Read Moroccan Standard Translation مَرْقُسْ 16 Bible Online

مَرْقُسْ 16 - Moroccan Standard Translation bible

مَرْقُسْ 16

¹الْفَصْلْ سْطَّاشْ وْمْلِّي دَازْ نْهَارْ السّْبْتْ، شْرَاتْ مَرْيَمْ الْمَجْدَلِيَّة وْمَرْيَمْ أُمّْ يَعْقُوبْ وْسَالُومَة الْحْنُوطْ، بَاشْ يْمْشِيوْ يْدَهْنُو بِيهْ الدَّاتْ دْيَالْ يَسُوعْ.

²وْفْنْهَارْ الْحَدّْ بْكْرِي مْشَاوْ لْلْقْبَرْ فْوَقْتْ طْلُوعْ الشّْمْسْ.

³وْݣَالُو بِينَاتْهُمْ: «شْكُونْ اللِّي غَادِي يْكَرْكَبْ لِينَا الْحَجْرَة دْيَالْ بَابْ الْقْبَرْ؟».

⁴وْمْلِّي شَافُو الْقْبَرْ بَانْ لِيهُمْ بْلِّي الْحَجْرَة مْكَرْكْبَة، وَاخَّا هِيَ كْبِيرَة بْزَّافْ.

⁵وْمْلِّي دَخْلُو لْلْقْبَرْ شَافُو وَاحْدْ الشَّابْ ݣَالْسْ عْلَى لِيمْنْ لَابْسْ حْوَايْجْ بِيضِينْ، وْهُمَ يْتّْخَلْعُو.

⁶وْݣَالْ لِيهُمْ: «مَا تّْخَلْعُوشْ! نْتُمَ كَتْقَلّْبُو عْلَى يَسُوعْ اللِّي مْنْ النَّاصِرَة اللِّي صَلْبُوهْ. رَاهْ تّْبْعَتْ مْنْ الْمُوتْ! وْمَا كَايْنْشْ هْنَا. شُوفُو، هَا هُوَ الْمُوضْعْ فِينْ كَانُو حْطُّوهْ.

⁷وَلَكِنْ سِيرُو وْخَبّْرُو التّْلَامْدْ دْيَالُه وْبُطْرُسْ بْلِّي غَيْسْبَقْكُمْ لْلْجَلِيلْ، تْمَّ فِينْ غَتْشُوفُوهْ كِيفْ ݣَالْ لِيكُمْ».

⁸وْهُمَ يْخَرْجُو وْهَرْبُو مْنْ الْقْبَرْ كَيْتّْرَعّْدُو بْالْخُوفْ وْتَالْفِينْ. وْمَا خَبّْرُو حْتَّى وَاحْدْ حِيتْ كَانُو خَايْفِينْ. [

⁹وْمْلِّي تّْبْعَتْ يَسُوعْ مْنْ الْمُوتْ نْهَارْ الْحَدّْ فْالصّْبَاحْ بْكْرِي، بَانْ فْاللّْوّْلْ لْمَرْيَمْ الْمَجْدَلِيَّة اللِّي كَانْ خَرّْجْ مْنّْهَا سْبْعَة دْ الجّْنُونْ.

¹⁰وْمْشَاتْ خَبّْرَاتْ التّْلَامْدْ اللِّي كَانُو مْعَ يَسُوعْ، وْلْقَاتْهُمْ كَيْنْوّْحُو وْكَيْبْكِيوْ عْلِيهْ،

¹¹وْمْلِّي سْمْعُو مْنّْهَا بْلِّي يَسُوعْ حَيّْ وْبْلِّي شَافْتُه، مَا تَاقُوشْ بِيهَا.

¹²وْمْنْ بَعْدْ هَادْشِّي بَانْ يَسُوعْ فْصِفَة خْرَى لْجُوجْ تْلَامْدْ اللِّي كَانُو خَارْجِينْ مْنْ الْمْدِينَة وْغَادْيِينْ لْلْفْدَادْنْ.

¹³وْهُمَ يْرْجْعُو وْخَبّْرُو لْخْرِينْ، وَلَكِنْ حْتَّى هُمَ مَا تَاقُوشْ بِيهُمْ.

¹⁴وْفْاللّْخْرْ بَانْ لْلتّْلَامْدْ الْحْضَاشْ مْلِّي كَانُو ݣَالْسِينْ كَيَاكْلُو، وْخَاصْمْ عْلِيهُمْ عْلَى قَلّْةْ إِيمَانْهُمْ وْعْلَى قْسُوحِيَّةْ قْلُوبْهُمْ حِيتْ مَا تَاقُوشْ بْهَادُوكْ اللِّي شَافُوهْ مْنْ بَعْدْمَا تّْبْعَتْ مْنْ الْمُوتْ.

¹⁵وْݣَالْ لِيهُمْ: «سِيرُو لْلدّْنْيَا كُلّْهَا، وْخَبّْرُو ݣَاعْ النَّاسْ بْالْبْشَارَة.

¹⁶اللِّي آمْنْ بِيَّ وْتّْعَمّْدْ غَيْنْجَا، وَلَكِنْ اللِّي مَا آمْنْشْ بِيَّ غَيْتّْحْكَمْ عْلِيهْ.

¹⁷وْهَادْ الْعَلَامَاتْ غَيْدِيرُوهُمْ النَّاسْ اللِّي كَيْآمْنُو بِيَّ: بْالْإِسْمْ دْيَالِي غَيْخَرّْجُو الجّْنُونْ، وْغَيْتّْكَلّْمُو بْلُغَاتْ جْدِيدَة،

¹⁸وْغَيْشَدُّو اللّْفَاعِي بْيْدِّيهُمْ، وْإِلَا شَرْبُو السّْمّْ مَا غَيْوْقَعْ لِيهُمْ وَالُو، وْغَيْحَطُّو يْدِّيهُمْ عْلَى النَّاسْ اللِّي مْرَاضْ وْغَيْتّْشَافَاوْ».

¹⁹وْمْنْ بَعْدْمَا تّْكَلّْمْ مْعَاهُمْ الرَّبّْ يَسُوعْ، تّْرْفَعْ لْلسّْمَا وْݣْلَسْ عْلَى لِيمْنْ دْيَالْ اللَّهْ.

²⁰وْخَرْجُو التّْلَامْدْ دْيَالُه، وْخَبّْرُو النَّاسْ بْالْبْشَارَة فْكُلّْ مُوضْعْ، وْالرَّبّْ كَيْعَاوْنْهُمْ وْكَيْبَيّْنْ بْلِّي كْلَامْهُمْ حَقّْ بْالْعَلَامَاتْ اللِّي كَيْدِيرُو.][٨]