Read Moroccan Standard Translation مَرْقُسْ 2 Bible Online

مَرْقُسْ 2 - Moroccan Standard Translation bible

مَرْقُسْ 2

¹الْفَصْلْ التَّانِي وْمْنْ بَعْدْ شِي يَّامَاتْ، رْجَعْ يَسُوعْ لْكَفْرْنَاحُومْ وْسْمْعُو النَّاسْ بْلِّي هُوَ فْالدَّارْ.

²وْتّْجَمْعُو بْزَّافْ دْ النَّاسْ، حْتَّى مَا بْقَاتْ حْتَّى بْلَاصَة قُدَّامْ الْبَابْ. وْبْدَا كَيْعَلّْمْهُمْ كْلَامْ اللَّهْ.

³وْجَابُو لِيهْ وَاحْدْ الرَّاجْلْ مْشْلُولْ هَازِّينُه رْبْعَة دْ الرّْجَالْ.

⁴وْمْلِّي مَا قَدْرُوشْ يْقَرّْبُوهْ لِيهْ بْقُوَّةْ الزّْحَامْ دْ النَّاسْ، عْرَّاوْ السّْقَفْ فُوقْ الْبْلَاصَة اللِّي كَانْ ݣَالْسْ فِيهَا، وْدَارُو فِيهْ فَتْحَة، وْدْلَّاوْ الْفْرَاشْ اللِّي نَاعْسْ فِيهْ الْمْشْلُولْ.

⁵وْمْلِّي شَافْ يَسُوعْ إِيمَانْهُمْ ݣَالْ لْلْمْشْلُولْ: «آ وْلْدِي، رَاهْ تّْغَفْرُو لِيكْ دْنُوبْكْ!».

⁶وْكَانُو ݣَالْسِينْ تْمَّ شِي عُلَمَا دْ الشّْرَعْ وْݣَالُو فْخَاطْرْهُمْ:

⁷«عْلَاشْ كَيْتّْكَلّْمْ هَادْ الرَّاجْلْ هَكَّا، وْكَيْݣُولْ كْلَامْ الْكُفْرْ؟ شْكُونْ يْقْدَرْ يْغْفَرْ الدّْنُوبْ مْنْ غِيرْ اللَّهْ بُوحْدُه؟».

⁸وْدْغْيَا عْرَفْ يَسُوعْ بْالرُّوحْ دْيَالُه آشْ كَيْݣُولُو فْخَاطْرْهُمْ، وْهُوَ يْݣُولْ لِيهُمْ: «عْلَاشْ عَنْدْكُمْ هَادْ الْأَفْكَارْ فْخَاطْرْكُمْ؟

⁹أَمَا سْهَلْ، يْتّْݣَالْ لْلْمْشْلُولْ: مْغْفُورِينْ لِيكْ دْنُوبْكْ وْلَا يْتّْݣَالْ لِيهْ: نُوضْ هْزّْ فْرَاشْكْ وْسِيرْ؟،

¹⁰وَلَكِنْ خَاصّْ تْعَرْفُو بْلِّي وَلْدْ الْإِنْسَانْ عَنْدُه السُّلْطَة عْلَى الْأَرْضْ بَاشْ يْغْفَرْ الدّْنُوبْ». وْݣَالْ لْلْمْشْلُولْ:

¹¹«لِيكْ كَنْݣُولْ: نُوضْ هْزّْ فْرَاشْكْ، وْسِيرْ لْدَارْكْ!».

¹²وْوْقَفْ الرَّاجْلْ وْهْزّْ فْرَاشُه وْخْرَجْ قُدَّامْ النَّاسْ. وْتّْعَجّْبُو كُلّْهُمْ وْعْطَاوْ الْعَزّْ لْلَّهْ وْݣَالُو: «عَمّْرْنَا مَا شْفْنَا بْحَالْ هَادْشِّي!».

¹³وْعَاوْدْ رْجَعْ يَسُوعْ لْجَنْبْ بْحَرْ الْجَلِيلْ، وْجَاتْ عَنْدُه الجّْمَاعَة دْ النَّاسْ وْبْدَا كَيْعَلّْمْهُمْ.

¹⁴وْمْلِّي كَانْ دَايْزْ شَافْ وَاحْدْ الرَّاجْلْ سْمِيتُه لَاوِي وَلْدْ حَلْفَى ݣَالْسْ فْدَارْ الضَّرِيبَة، وْهُوَ يْݣُولْ لِيهْ: «تْبَعْنِي». وْنَاضْ تْبْعُه.

¹⁵وْمْلِّي كَانْ يَسُوعْ كَيَاكُلْ فْدَارْ لَاوِي، ݣَلْسُو كَيَاكْلُو مْعَاهْ وْمْعَ التّْلَامْدْ دْيَالُه بْزَّافْ دْ النَّاسْ مْنْ مَّالِينْ الضَّرِيبَة وْالْمُدْنِبِينْ، حِيتْ بْزَّافْ دْ النَّاسْ مْنّْهُمْ كَانُو تْبْعُوهْ.

¹⁶وْمْلِّي شَافُو الْعُلَمَا دْ الشّْرَعْ دْيَالْ الْفْرِّيسِيِّينْ بْلِّي هُوَ كَيَاكُلْ مْعَ الْمُدْنِبِينْ وْمَّالِينْ الضَّرِيبَة، ݣَالُو لْتْلَامْدُه: «عْلَاشْ كَيَاكُلْ مْعَ مَّالِينْ الضَّرِيبَة وْالْمُدْنِبِينْ؟».

¹⁷وْهُوَ يْسْمَعْهُمْ يَسُوعْ وْݣَالْ لِيهُمْ: «رَاهْ مَاشِي الصْحَاحْ اللِّي مْحْتَاجِينْ لْلطّْبِيبْ، وَلَكِنْ الْمَرْضَى. أَنَا مَا جِيتْشْ بَاشْ نْعَيّْطْ عْلَى اللِّي مْتَّاقْيِينْ اللَّهْ، وَلَكِنْ عْلَى الْمُدْنِبِينْ».

¹⁸وْكَانُو التّْلَامْدْ دْيَالْ يُوحَنَّا وْالْفْرِّيسِيِّينْ صَايْمِينْ، وْجَاوْ وْݣَالُو لْيَسُوعْ: «عْلَاشْ التّْلَامْدْ دْيَالْ يُوحَنَّا وْالتّْلَامْدْ دْيَالْ الْفْرِّيسِيِّينْ كَيْصُومُو، وْالتّْلَامْدْ دْيَالْكْ مَا كَيْصُومُوشْ؟».

¹⁹وْجَاوْبْهُمْ يَسُوعْ: «وَاشْ يْقَدْرُو الْمْعْرُوضِينْ لْلْعَرْسْ يْصُومُو وْالْعْرِيسْ مْعَاهُمْ؟ مَا حَدّْ الْعْرِيسْ مْعَاهُمْ رَاهْ مَا يْقَدْرُوشْ يْصُومُو.

²⁰وَلَكِنْ غَادِي يْجِي الْوَقْتْ اللِّي غَيْتّْخَادْ فِيهْ الْعْرِيسْ مْنْ بِينَاتْهُمْ، وْفْدَاكْ النّْهَارْ غَيْصُومُو.

²¹حْتَّى وَاحْدْ مَا كَيْرَقّْعْ لْبَاسْ قْدِيمْ بْطَرْفْ دْيَالْ التُّوبْ جْدِيدْ، حِيتْ إِلَا دَارْ هَادْشِّي غَادِي تّْكَمّْشْ الرّْقْعَة الجّْدِيدَة وْتْزِيدْ التّْشْرِيݣَة تْكْبَرْ.

²²وْرَاهْ حْتَّى وَاحْدْ مَا كَيْدِيرْ الْخْمَرْ الجّْدِيدْ فْݣْرْبَاتْ دْيَالْ الجّْلْدْ قْدَامْ، حِيتْ إِلَا دَارْ هَادْشِّي الْخْمَرْ الجّْدِيدْ غَادِي يْتْقُبْ الْݣْرْبَاتْ، وْيْسِيلْ الْخْمَرْ وْالْݣْرْبَاتْ يْضِيعُو. وَلَكِنْ الْخْمَرْ الجّْدِيدْ كَيْتّْدَارْ فْݣْرْبَاتْ دْ الجّْلْدْ جْدَادْ».

²³وْفْوَاحْدْ السّْبْتْ[١]، دَازْ يَسُوعْ بِينْ الْفْدَادْنْ دْ الزّْرَعْ، وْبْدَاوْ التّْلَامْدْ دْيَالُه كَيْقَطّْعُو السّْبُولْ وْهُمَ غَادْيِينْ.

²⁴وْجَاوْ الْفْرِّيسِيِّينْ وْݣَالُو لِيهْ: «شُوفْ! عْلَاشْ التّْلَامْدْ دْيَالْكْ كَيْدِيرُو شِي حْوَايْجْ اللِّي مَا خَاصّْهُمْشْ يْتّْدَارُو نْهَارْ السّْبْتْ؟».

²⁵وْرَدّْ عْلِيهُمْ يَسُوعْ: «وَاشْ عَمّْرْكُمْ مَا قْرِيتُو آشْ دَارْ دَاوُدْ مْلِّي جَاهْ الجُّوعْ هُوَ وْهَادُوكْ اللِّي مْعَاهْ؟

²⁶وْكِيفَاشْ دْخَلْ لْبِيتْ اللَّهْ، فْيَّامْ أَبِيَأَتَارْ اللِّي كَانْ هُوَ الرَّئِيسْ دْ رْجَالْ الدِّينْ، وْكْلَا الْخُبْزْ اللِّي كَيْقَدّْمُوهْ لْلَّهْ، اللِّي مَا كَانْ خَاصّْ يَاكْلُه حْتَّى وَاحْدْ، مْنْ غِيرْ رْجَالْ الدِّينْ بُوحْدْهُمْ، وْعْطَى مْنُّه حْتَّى لْلرّْجَالْ اللِّي كَانُو مْعَاهْ؟».

²⁷وْݣَالْ لِيهُمْ: «نْهَارْ السّْبْتْ تْدَارْ لْبْنَادْمْ، مَاشِي بْنَادْمْ اللِّي تْدَارْ لْنْهَارْ السّْبْتْ.

²⁸حِيتْ وَلْدْ الْإِنْسَانْ هُوَ الرَّبّْ حْتَّى دْيَالْ السّْبْتْ».