Read Moroccan Standard Translation مَرْقُسْ 3 Bible Online

مَرْقُسْ 3 - Moroccan Standard Translation bible

مَرْقُسْ 3

¹الْفَصْلْ التَّالْتْ وْدْخَلْ يَسُوعْ مَرَّة خْرَى لْدَارْ الصّْلَاة، وْكَانْ تْمَّ وَاحْدْ الرَّاجْلْ يْدُّه مْشْلُولَة.

²وْبْقَاوْ الْفْرِّيسِيِّينْ حَاضْيِينْ يَسُوعْ بَاشْ يْشُوفُو وَاشْ غَادِي يْشَافِيهْ نْهَارْ السّْبْتْ، وْيْلْقَاوْ عْلِيهْ شِي تُهْمَة.

³وْݣَالْ يَسُوعْ لْلرَّاجْلْ اللِّي يْدُّه مْشْلُولَة: «نُوضْ وْقَفْ فْالْوَسْطْ!».

⁴وْهُوَ يْݣُولْ لْلْفْرِّيسِيِّينْ: «أَشْنُو اللِّي حْلَالْ نْهَارْ السّْبْتْ، نْدِيرُو الْخِيرْ وْلَا نْدِيرُو الشَّرّْ، نْعَتْقُو رُوحْ وْلَا نْقْتْلُوهَا؟» وْبْقَاوْ سَاكْتِينْ.

⁵وْضَارْ وْشَافْ فِيهُمْ وْهُوَ غْضْبَانْ، وْكَانْ حْزِينْ بْزَّافْ عْلَى قْسُوحِيَّةْ قَلْبْهُمْ، وْݣَالْ لْلرَّاجْلْ: «مْدّْ يْدّْكْ!»، وْمْدّْ يْدُّه وْوْلَّاتْ صْحِيحَة.

⁶وْدِيكْ السَّاعَة خَرْجُو الْفْرِّيسِيِّينْ وْبْدَاوْ كَيْتّْشَاوْرُو مْعَ الْهِيرُودُسِيِّينْ كِيفَاشْ يْدِيرُو بَاشْ يْقْتْلُوهْ.

⁷وْخْرَجْ يَسُوعْ مْعَ التّْلَامْدْ دْيَالُه لْجَنْبْ بْحَرْ الْجَلِيلْ، وْتْبْعُوهُمْ بْزَّافْ دْ النَّاسْ مْنْ الْجَلِيلْ وْالْيَهُودِيَّة،

⁸وْمْنْ أُورْشَلِيمْ وْأَدُومِيَّة، وْمْنْ الجِّهَة لْخْرَى دْيَالْ وَادْ الْأُرْدُنْ وْمْنْ جْوَايْهْ صُورْ وْصَيْدَا. هَادْ النَّاسْ كُلّْهُمْ جَاوْ لْعَنْدْ يَسُوعْ حِيتْ سْمْعُو عْلَى دَاكْشِّي اللِّي كَانْ كَيْدِيرْ.

⁹وْݣَالْ لْلتّْلَامْدْ دْيَالُه بَاشْ يْوَجّْدُو لِيهْ شِي فْلُوكَة بَاشْ النَّاسْ مَا يْتْزَاحْمُوشْ عْلِيهْ،

¹⁰حِيتْ شْفَى بْزَّافْ مْنّْهُمْ، حْتَّى بْدَاوْ ݣَاعْ الْمَرْضَى كَيْتّْزَاحْمُو عْلِيهْ بَاشْ يْمَسُّوهْ.

¹¹وْالْمْسْكُونِينْ بْالجّْنُونْ مْلِّي شَافُو يَسُوعْ طَاحُو عَنْدْ رْجْلِيهْ وْغَوّْتُو وْݣَالُو: «نْتَ هُوَ وَلْدْ اللَّهْ!».

¹²وَلَكِنْ يَسُوعْ وْصَّاهُمْ وْأَكّْدْ عْلِيهُمْ بَاشْ مَا يْݣُولُوشْ شْكُونْ هُوَ.

¹³وْطْلَعْ لْوَاحْدْ الجّْبَلْ وْعَيّْطْ عْلَى الرّْجَالْ اللِّي خْتَارْهُمْ، وْهُمَ يْجِيوْ لْعَنْدُه.

¹⁴وْخْتَارْ طْنَاشْرْ وَاحْدْ اللِّي سْمَّاهُمْ رُسُلْ، بَاشْ يْكُونُو مْعَاهْ وْيْصِيفْطْهُمْ بَاشْ يْخَبّْرُو بْالْبْشَارَة،

¹⁵وْتْكُونْ عَنْدْهُمْ السُّلْطَة بَاشْ يْخَرّْجُو الجّْنُونْ.

¹⁶وْهَادْ الطّْنَاشْ هُمَ: سِمْعَانْ اللِّي سْمَّاهْ يَسُوعْ بُطْرُسْ،

¹⁷وْيَعْقُوبْ وَلْدْ زَبَدِي وْخُوهْ يُوحَنَّا اللِّي سْمَّاهُمْ يَسُوعْ بُوَانَرْجِسْ اللِّي كَتْعْنِي وْلَادْ الرَّعْدْ،

¹⁸وْأَنْدْرَاوُسْ وْفِيلُبُّسْ وْبَرْتُولَمَاوُسْ، وْمَتَّى وْتُومَا، وْيَعْقُوبْ وَلْدْ حَلْفَى وْتَدَّاوُسْ وْسِمْعَانْ الْمْكَنِّي بْالْوَطَنِي،

¹⁹وْيَهُودَا الْإِسْخَرْيُوطِي اللِّي غَادِي يْخُونْ يَسُوعْ.

²⁰وْمْنْ بَعْدْ، مْشَى يَسُوعْ لْوَاحْدْ الدَّارْ، وْتّْجَمْعَاتْ عْلِيهْ عَاوْتَانِي الجّْمَاعَة دْ النَّاسْ حْتَّى مَا قْدَرْشْ هُوَ وْتْلَامْدُه يَاكْلُو.

²¹وْمْلِّي سَاقْتْ الْعَائِلَة دْ يَسُوعْ الْخْبَارْ، جَاوْ بَاشْ يْدِّيوْهْ حِيتْ ݣَالُو: «هَادَا رَاهْ خْرَجْ لِيهْ عَقْلُه!».

²²وْݣَالُو الْعُلَمَا دْ الشّْرَعْ اللِّي جَاوْ مْنْ أُورْشَلِيمْ: «رَاهْ فِيهْ بَعْلَزَبُولْ، وْرَاهْ كَيْخَرّْجْ الجّْنُونْ بْرَئِيسْ الجّْنُونْ».

²³وْعَيّْطْ يَسُوعْ عْلَى الْعُلَمَا دْ الشّْرَعْ وْهْضَرْ مْعَاهُمْ بْالْمْتُولْ وْݣَالْ لِيهُمْ: «كِيفَاشْ الشِّيطَانْ يْقْدَرْ يْخَرّْجْ الشِّيطَانْ؟

²⁴إِلَا شِي مَمْلَكَة تْقَسّْمَاتْ وْبْدَاوْ مَّالِيهَا كَيْتّْحَارْبُو بِينَاتْهُمْ، رَاهْ دِيكْ الْمَمْلَكَة مَا غَتْقْدَرْشْ تْبْقَى تَابْتَة،

²⁵وْإِلَا شِي عَائِلَة تْقَسّْمَاتْ وْبْدَاوْ كَيْدَّابْزُو بِينَاتْهُمْ، رَاهْ دِيكْ الْعَائِلَة مَا غَتْقْدَرْشْ تْبْقَى تَابْتَة.

²⁶وْإِلَا وْلَّى الشِّيطَانْ ضْدّْ رَاسُه وْتّْقْسَمْ، رَاهْ مَا يْقْدَرْشْ يْبْقَى تَابْتْ، وْغَادِي يْتّْفْنَى.

²⁷حْتَّى وَاحْدْ مَا يْقْدَرْ يْدْخَلْ لْدَارْ شِي وَاحْدْ صْحِيحْ وْيْسْرَقْ لِيهْ حْوَايْجُه، بْلَا مَا يْكَتّْفْ فْاللّْوّْلْ هَادَاكْ الرَّاجْلْ الصّْحِيحْ، عَادْ يْسْرَقْ لِيهْ دَارُه.

²⁸وْرَانِي نْݣُولْ لِيكُمْ الْحَقّْ: رَاهْ ݣَاعْ الدّْنُوبْ وْكْلَامْ الْكُفْرْ دْيَالْ بْنَادْمْ غَادِي يْتّْغَفْرُو.

²⁹وَلَكِنْ اللِّي كَيْݣُولْ كْلَامْ الْكُفْرْ عْلَى الرُّوحْ الْقُدُسْ، عَمّْرُه مَا غَيْتّْغْفَرْ لِيهْ، وْغَيْبْقَى هَادْ الدَّنْبْ مْحْسُوبْ عْلِيهْ عْلَى الدّْوَامْ».

³⁰ݣَالْ هَادْشِّي حِيتْ ݣَالُو عْلِيهْ: «رَاهْ سَاكْنُه جْنّْ!».

³¹وْجَاتْ أُمّْ يَسُوعْ وْخُوتُه، وْبْقَاوْ وَاقْفِينْ عْلَى بْرَّا وْصِيفْطُو شِي وَاحْدْ بَاشْ يْعَيّْطْ لِيهُمْ عْلِيهْ.

³²وْكَانُو بْزَّافْ دْ النَّاسْ ݣَالْسِينْ وْضَايْرِينْ بِيهْ، وْݣَالُو لِيهْ: «هَا هِيَ مُّكْ وْخُوتْكْ وْخْوَاتَتْكْ عْلَى بْرَّا كَيْقَلّْبُو عْلِيكْ».

³³وْݣَالْ لِيهُمْ: «شْكُونْ هِيَ مِّي وْشْكُونْ هُمَ خُوتِي؟».

³⁴وْشَافْ فْهَادُوكْ اللِّي ضَايْرِينْ بِيهْ وْݣَالْ لِيهُمْ: «هَا هُمَ مِّي وْخُوتِي!

³⁵حِيتْ اللِّي كَيْدِيرْ مُرَادْ اللَّهْ، هُوَ خُويَا وْخْتِي وْمِّي».