Read Moroccan Standard Translation مَرْقُسْ 7 Bible Online

مَرْقُسْ 7 - Moroccan Standard Translation bible

مَرْقُسْ 7

¹الْفَصْلْ السَّابْعْ وْتّْجَمْعُو عْلَى يَسُوعْ الْفْرِّيسِيِّينْ وْشِي وْحْدِينْ مْنْ الْعُلَمَا دْ الشّْرَعْ اللِّي جَاوْ مْنْ أُورْشَلِيمْ،

²وْشَافُو شِي وْحْدِينْ مْنْ تْلَامْدْ يَسُوعْ كَيَاكْلُو بْيْدِّيهُمْ مُّوسّْخِينْ، وْمَا مْغْسُولِينْشْ.

³عْلَاحْقَّاشْ الْفْرِّيسِيِّينْ وْلِيهُودْ كُلّْهُمْ مَا كَيَاكْلُو حْتَّى كَيْغَسْلُو يْدِّيهُمْ مْزْيَانْ كِمَا هِيَ الْعَادَة دْيَالْ الشّْيُوخْ.

⁴وْمْلِّي كَيْرَجْعُو مْنْ السُّوقْ مَا كَيَاكْلُو حْتَّى كَيْغَسْلُو. وْكَايْنِينْ بْزَّافْ دْ الْحْوَايْجْ خْرِينْ اللِّي وْرْتُوهُمْ وْكَيْدِيرُوهُمْ، بْحَالْ الْغْسِيلْ دْيَالْ الْكِيسَانْ وْالْبْرْقَانْ وْالْمَّاعْنْ دْيَالْ النّْحَاسْ.

⁵وْسْوّْلُو الْفْرِّيسِيِّينْ وْالْعُلَمَا دْ الشّْرَعْ يَسُوعْ وْݣَالُو لِيهْ: «عْلَاشْ مَا كَيْتْبْعُوشْ التّْلَامْدْ دْيَاوْلْكْ الْعَادَة دْيَالْ الشّْيُوخْ، وْكَيَاكْلُو بْيْدِّينْ مُّوسّْخِينْ؟».

⁶وْجَاوْبْهُمْ: «آ الْمُنَافِقِينْ! رَاهْ إِشْعِيَا كَانْ عَنْدُه الْحَقّْ مْلِّي تّْنَبّْأْ عْلِيكُمْ وْݣَالْ: هَادْ الشَّعْبْ كَيْحَمْدُونِي غِيرْ بْفُمّْهُمْ، وَلَكِنْ قَلْبْهُمْ بْعِيدْ عْلِيَّ.

⁷بْلَا فَايْدَة كَيْعَبْدُونِي، وْكَيْعَلّْمُو التَّعَالِيمْ اللِّي هِيَ وْصِيَّاتْ دْيَالْ النَّاسْ.

⁸نْتُمَ سْمَحْتُو فْالْوْصِيَّة دْيَالْ اللَّهْ وْتْبَعْتُو الْعَادَاتْ دْ النَّاسْ».

⁹وْݣَالْ لِيهُمْ: «مَا عَنْدِي مَا نْتّْسَالْكُمْ! كَتْعَرْفُو كِيفَاشْ تْسَمْحُو فْالْوْصِيَّة دْيَالْ اللَّهْ بَاشْ تْشَدُّو فْالْعَادَاتْ دْيَالْكُمْ.

¹⁰حِيتْ مُوسَى ݣَالْ: تّْهَلَّى فْبَّاكْ وْمُّكْ، وْاللِّي سْبّْ بَّاهْ وْلَا مُّه خَاصُّه يْتّْقْتَلْ.

¹¹وَلَكِنْ نْتُمَ كَتْݣُولُو: إِلَا شِي وَاحْدْ ݣَالْ لْبَّاهْ وْلَا مُّه: مَا نْقْدَرْشْ نْعَاوْنْكُمْ حِيتْ هَادْشِّي اللِّي كْنْتْ كَنْعْطِيكُمْ رَاهْ هُوَ قُرْبَانْ، يَعْنِي هْدِيَّة لْلَّهْ،

¹²مَا بْقَاشْ وَاجْبْ عْلِيهْ يْعَاوْنْ بَّاهْ وْلَا مُّه.

¹³وْهَكَّا كَتْلْغِيوْ كْلَامْ اللَّهْ بْالْعَادَة دْيَالْكُمْ اللِّي وْرَتُّوهَا، وْكَتْدِيرُو بْزَّافْ دْ الْحْوَايْجْ بْحَالْ هَادِي».

¹⁴وْعَيّْطْ يَسُوعْ عَاوْتَانِي عْلَى الجّْمَاعَة دْ النَّاسْ بَاشْ يْجِيوْ لْعَنْدُه وْݣَالْ لِيهُمْ: «تْصَنّْتُو لِيَّ كُلّْكُمْ وْفْهْمُو.

¹⁵مَا كَايْنَة حْتَّى شِي حَاجَة اللِّي كَتْدْخُلْ لْبْنَادْمْ مْنْ بْرَّا وْكَتْنَجّْسُه، وَلَكِنْ دَاكْشِّي اللِّي كَيْخْرُجْ مْنْ بْنَادْمْ هُوَ اللِّي كَيْنَجّْسُه». [

¹⁶وْاللِّي عَنْدُه شِي وْدْنِينْ بَاشْ يْسْمَعْ، يْسْمَعْ.][٢]

¹⁷وْمْلِّي خْلَّا يَسُوعْ الجّْمَاعَة دْ النَّاسْ وْدْخَلْ لْوَاحْدْ الدَّارْ، سْوّْلُوهْ التّْلَامْدْ دْيَالُه عْلَى الْمَعْنَى دْيَالْ هَادْ الْمْتَالْ.

¹⁸وْهُوَ يْݣُولْ لِيهُمْ: «وَاشْ حْتَّى نْتُمَ مَا كَتْفَهْمُوشْ؟ وَاشْ مَا كَتْشُوفُوشْ بْلِّي كُلّْشِي اللِّي كَيْدْخَلْ لْبْنَادْمْ مْنْ بْرَّا مَا يْقْدَرْشْ يْنَجّْسُه؟

¹⁹حِيتْ مَا كَيْدْخَلْشْ لْلْقَلْبْ دْيَالُه، وَلَكِنْ كَيْدْخَلْ لْلْكَرْشْ دْيَالُه، وْمْنْ بَعْدْ كَيْخْرُجْ لْبَرَّا». وْبْهَادْ الْكْلَامْ رَدّْ يَسُوعْ ݣَاعْ اللِّي كَيْتّْكَالْ طَاهْرْ.

²⁰وْݣَالْ لِيهُمْ: «رَاهْ اللِّي كَيْخْرُجْ مْنْ بْنَادْمْ هُوَ اللِّي كَيْنَجّْسُه.

²¹حِيتْ مْنْ لْدَاخْلْ مْنْ الْقَلْبْ دْيَالْ بْنَادْمْ كَتْخْرَجْ الْأَفْكَارْ الْخَايْبَة، الزّْنَا، وْالسّْرْقَة، وْالْقْتِيلَة،

²²وْالْفْسَادْ، وْالطّْمَعْ، وْالْخُبْتْ، وْالْخْدِيعَة، وْالْخْسْرَانْ، وْالْحْسَدْ، وْالسّْبَّانْ، وْالتَّكَبُّرْ، وْقَلّْةْ الْعْقَلْ.

²³ݣَاعْ هَادْ الْأُمُورْ دْيَالْ الشَّرّْ كَيْخَرْجُو مْنْ لْدَاخْلْ دْيَالْ بْنَادْمْ وْكَيْنَجّْسُوهْ».

²⁴وْمْشَى يَسُوعْ مْنْ تْمَّ لْجْوَايْهْ صُورْ. وْدْخَلْ لْوَاحْدْ الدَّارْ، وْمَا بْغَا حْتَّى وَاحْدْ يْعَرْفُه فِينْ كَايْنْ، وَلَكِنْ مَا قْدَرْشْ يْتْخَبَّا.

²⁵وْغِيرْ سْمْعَاتْ عْلِيهْ وَاحْدْ الْمْرَاة كَانْتْ عَنْدْهَا بَنْتْ صْغِيرَة سَاكْنْهَا جْنّْ، وْهِيَ تْمْشِي لْعَنْدُه وْطَاحْتْ عَنْدْ رْجْلِيهْ،

²⁶وْكَانْتْ الْمْرَاة يُونَانِيَّة مْنْ أَصْلْ سُورِي فِينِيقِي. وْرْغْبَاتُه بَاشْ يْخَرّْجْ الجّْنْ مْنْ بَنْتْهَا.

²⁷وْجَاوْبْهَا يَسُوعْ: «خَلِّي بْعْدَ الْوْلَادْ يْشْبْعُو، حِيتْ مَاشِي مْعْقُولْ يْتّْخَادْ خُبْزْ الْوْلَادْ وْيْتّْرْمَى لْلْكْلَابْ».

²⁸وَلَكِنْ جَاوْبَتُه وْݣَالْتْ: «آ سِيدِي، حْتَّى الْكْلَابْ كَيَاكْلُو تَحْتْ الْمِيدَة مْنْ الْفْرَاتْتْ اللِّي كَيْطِيحُو لْلْوْلَادْ!».

²⁹وْهُوَ يْݣُولْ لِيهَا: «عْلَى وْدّْ هَادْ الْكْلَامْ، غِيرْ سِيرِي! رَاهْ الجّْنْ خْرَجْ مْنْ بَنْتْكْ».

³⁰وْرْجْعَاتْ الْمْرَاة لْدَارْهَا، وْلْقَاتْ بَنْتْهَا نَاعْسَة فْالْفْرَاشْ، وْالجّْنْ خْرَجْ مْنّْهَا.

³¹وْخْرَجْ يَسُوعْ مْنْ جْوَايْهْ صُورْ، وْدَازْ مْنْ صَيْدَا وْمْنْ الجّْوَايْهْ دْيَالْ الْمْدُونْ الْعَشْرَة، وْجَا لْبْحَرْ الْجَلِيلْ.

³²وْجَابُو لِيهْ شِي نَاسْ وَاحْدْ الرَّاجْلْ صْمَكْ وْمَا كَيْقْدَرْشْ يْتّْكَلّْمْ مْزْيَانْ، وْرَغْبُو يَسُوعْ بَاشْ يْحَطّْ عْلِيهْ يْدُّه.

³³وْبَعّْدُه يَسُوعْ عْلَى الجّْمَاعَة دْ النَّاسْ، وْدَارْ صْبَاعُه فْوْدْنِينْ الرَّاجْلْ، وْدْفَلْ وْمْسّْ لِيهْ لْسَانُه.

³⁴وْهْزّْ عِينِيهْ لْلسّْمَا وْتْنَهّْدْ وْݣَالْ لِيهْ: «إِفَّاتَا» يَعْنِي: «تّْحَلّْ».

³⁵وْدِيكْ السَّاعَة تّْحَلُّو وْدْنِينْ الرَّاجْلْ وْتّْسَرّْحْ لْسَانُه، وْبْدَا كَيْهْضَرْ مْزْيَانْ.

³⁶وْوْصَّى يَسُوعْ النَّاسْ بَاشْ مَا يْخَبّْرُو حْتَّى وَاحْدْ. وَلَكِنْ شْحَالْ مَّا كَانْ كَيْوَصِّيهُمْ بَاشْ يْسَكْتُو، كَانُو كَيْزِيدُو يْدَيّْعُو الْخْبَارْ.

³⁷وْكَانُو كَيْتّْعَجّْبُو بْلَا قْيَاسْ وْكَيْݣُولُو: «ݣَاعْ دَاكْشِّي اللِّي كَيْدِيرْ، كَيْدِيرُه مْزْيَانْ! رَدّْ الصَّمْكِينْ كَيْسَمْعُو وْالزّْيَازْنْ كَيْتّْكَلّْمُو».