Read Moroccan Standard Translation مَرْقُسْ 8 Bible Online

مَرْقُسْ 8 - Moroccan Standard Translation bible

مَرْقُسْ 8

¹الْفَصْلْ التَّامْنْ وْفْدِيكْ لِيَّامْ عَاوْدْ تّْجَمْعَاتْ جْمَاعَة كْبِيرَة دْ النَّاسْ، وْمَا كَانْ عَنْدْهُمْ مَا يْتّْكَالْ. وْعَيّْطْ يَسُوعْ عْلَى التّْلَامْدْ دْيَالُه وْݣَالْ لِيهُمْ:

²«بْقَاوْ فِيَّ هَادْ النَّاسْ، عْلَاحْقَّاشْ تْلْتْ يَّامْ هَادِي وْهُمَ مْعَايَ، وْمَا عَنْدْهُمْ مَا يْتّْكَالْ.

³وْإِلَا صِيفْطْتْهُمْ لْدْيُورْهُمْ بْالجُّوعْ غَادِي يْسَخْفُو فْالطّْرِيقْ، وْشِي وْحْدِينْ مْنّْهُمْ جَاوْ مْنْ بْعِيدْ».

⁴وْجَاوْبُوهْ التّْلَامْدْ دْيَالُه: «مْنِينْ غَادِي يْقْدَرْ يْجِيبْ شِي وَاحْدْ فْهَادْ الْخْلَا الْخُبْزْ اللِّي يْشَبّْعْ هَادْ النَّاسْ؟».

⁵وْسْوّْلْهُمْ يَسُوعْ: «شْحَالْ مْنْ خُبْزَة عَنْدْكُمْ؟»، وْجَاوْبُوهْ: «سْبْعَة».

⁶وْآمْرْ يَسُوعْ الجّْمَاعَة دْ النَّاسْ بَاشْ يْݣَلْسُو لْلْأَرْضْ، وْهْزّْ السّْبْعَة دْ الْخُبْزَاتْ وْشْكَرْ اللَّهْ، وْقَطّْعْهُمْ وْعْطَاهُمْ لْلتّْلَامْدْ دْيَالُه بَاشْ يْفَرّْقُوهُمْ عْلَى الجّْمَاعَة دْ النَّاسْ، وْهُمَ يْفَرّْقُوهُمْ.

⁷وْكَانُو عَنْدْهُمْ شِي حُوتَاتْ صْغَارْ. وْبَعْدْمَا شْكَرْ يَسُوعْ اللَّهْ عْلِيهُمْ، ݣَالْ لْلتّْلَامْدْ دْيَالُه يْفَرّْقُوهُمْ حْتَّى هُمَ.

⁸وْكْلَاوْ النَّاسْ حْتَّى شْبْعُو، وْمْنْ بَعْدْ جْمْعُو التّْلَامْدْ دْيَالُه سْبْعَة دْ الْݣُفَّاتْ عَامْرِينْ بْالطّْرُوفَ دْ الْخُبْزْ.

⁹وْكَانُو تْقْرِيبًا شِي رَبْعَالَافْ وَاحْدْ. وْمْنْ بَعْدْ صِيفْطْهُمْ يَسُوعْ بْحَالْهُمْ.

¹⁰وْدِيكْ السَّاعَة رْكَبْ فْالْفْلُوكَة مْعَ التّْلَامْدْ دْيَالُه وْوْصَلْ لْجْوَايْهْ دَلْمَانُوتَة.

¹¹وْجَاوْ شِي وْحْدِينْ مْنْ الْفْرِّيسِيِّينْ عَنْدْ يَسُوعْ وْبْدَاوْ كَيْتّْنَاقْشُو مْعَاهْ. وْبَاشْ يْجَرّْبُوهْ، طْلْبُو مْنُّه عَلَامَة مْنْ السّْمَا،

¹²وْهُوَ يْتّْنَهّْدْ مْنْ قَلْبُه وْݣَالْ: «عْلَاشْ هَادْ الْجِيلْ كَيْطْلَبْ عَلَامَة؟ نْݣُولْ لِيكُمْ الْحَقّْ: حْتَّى عَلَامَة مَا غَتّْعْطَى لْهَادْ الْجِيلْ!».

¹³وْخْلَّاهُمْ تْمَّ وْطْلَعْ لْلْفْلُوكَة وْمْشَى لْلجِّهَة لْخْرَى دْ الْبْحَرْ.

¹⁴وْنْسَاوْ التّْلَامْدْ دْيَالُه يْدِّيوْ مْعَاهُمْ الْخُبْزْ، مْنْ غِيرْ خُبْزَة وَحْدَة اللِّي كَانْتْ عَنْدْهُمْ فْالْفْلُوكَة.

¹⁵وْوْصَّاهُمْ يَسُوعْ وْݣَالْ: «رْدُّو الْبَالْ، حْضِيوْ رَاسْكُمْ مْنْ خْمِيرَةْ الْفْرِّيسِيِّينْ وْخْمِيرَةْ هِيرُودُسْ!».

¹⁶وْبْدَاوْ كَيْتّْنَاقْشُو بِينَاتْهُمْ وْݣَالُو: «كَيْݣُولْ هَادْشِّي حِيتْ مَا عَنْدْنَاشْ الْخُبْزْ!».

¹⁷وْعْرَفْ يَسُوعْ، وْݣَالْ لِيهُمْ: «عْلَاشْ كَتّْنَاقْشُو وْكَتْݣُولُو: مَا عَنْدْنَاشْ الْخُبْزْ؟ وَاشْ مَازَالْ مَا كَتْعَرْفُوشْ وْمَا كَتْفَهْمُوشْ؟ مَالْ قَلْبْكُمْ قَاسْحْ؟

¹⁸عَنْدْكُمْ الْعِينِينْ وْمَا كَتْشُوفُوشْ؟ وْعَنْدْكُمْ الْوَدْنِينْ وْمَا كَتْسَمْعُوشْ؟ وَاشْ مَا كَتْعَقْلُوشْ

¹⁹مْلِّي قَطّْعْتْ خَمْسَة دْ الْخُبْزَاتْ وْفَرّْقْتْهُمْ عْلَى خَمْسَالَافْ وَاحْدْ، شْحَالْ مْنْ ݣُفَّة جْمَعْتُو مْنْ الطّْرُوفَ دْ الْخُبْزْ؟»، وْجَاوْبُوهْ: «طْنَاشْ!».

²⁰وْݣَالْ لِيهُمْ: «وْمْلِّي قَطّْعْتْ سْبْعَة دْ الْخُبْزَاتْ وْفَرّْقْتْهُمْ عْلَى رَبْعَالَافْ وَاحْدْ، شْحَالْ مْنْ ݣُفَّة جْمَعْتُو مْنْ الطّْرُوفَ دْ الْخُبْزْ؟»، وْجَاوْبُوهْ: «سْبْعَة!».

²¹وْهُوَ يْݣُولْ لِيهُمْ: «إِيوَا! هَادْشِّي كَامْلْ وْمَازَالْ مَا فْهَمْتُوشْ؟».

²²وْمْلِّي وْصَلْ يَسُوعْ وْالتّْلَامْدْ دْيَالُه لْبَيْتْ صَيْدَا، جَابُو لِيهْ شِي نَاسْ وَاحْدْ الرَّاجْلْ عْمَى وْرَغْبُوهْ بَاشْ يْمَسُّه.

²³وْشْدّْ يَسُوعْ فْيْدّْ الْعْمَى وْخَرّْجُه عْلَى بْرَّا دْ الدُّوَّارْ، وْبَخّْ فْعِينِيهْ وْحَطّْ يْدِّيهْ عْلِيهْ وْسْوّْلُه: «وَاشْ كَتْشُوفْ شِي حَاجَة؟».

²⁴وْهْزّْ الْعْمَى عِينِيهْ وْݣَالْ: «كَنْشُوفْ نَاسْ بْحَالْ الشّْجَرْ كَيْتّْمْشَّاوْ».

²⁵وْحَطّْ يَسُوعْ يْدِّيهْ مَرَّة خْرَى عْلَى عِينِيهْ، وْهُوَ يْتّْشَافَى وْوْلَّى كَيْشُوفْ كُلّْشِي وَاضْحْ.

²⁶وْصِيفْطُه يَسُوعْ لْدَارُه وْݣَالْ لِيهْ: «مَا تْرْجَعْشْ لْلدُّوَّارْ».

²⁷وْمْشَى يَسُوعْ وْالتّْلَامْدْ دْيَالُه لْلدّْوَاوْرْ اللِّي فْجْوَايْهْ قَيْصَرِيَّةْ فِيلُبُّسْ، وْفْالطّْرِيقْ سْوّْلْ يَسُوعْ التّْلَامْدْ دْيَالُه: «شْكُونْ أَنَا فْنَضَرْ النَّاسْ؟».

²⁸وْجَاوْبُوهْ: «يُوحَنَّا الْمَعْمَدَانْ، وْعَنْدْ شِي وْحْدِينْ: النّْبِي إِيلِيَّا، وْعَنْدْ وْحْدِينْ خْرِينْ: وَاحْدْ مْنْ الْأَنْبِيَا».

²⁹وْسْوّْلْهُمْ: «وْنْتُمَ شْكُونْ أَنَا فْنَضَرْكُمْ؟». وْجَاوْبْ بُطْرُسْ: «نْتَ هُوَ الْمَسِيحْ!».

³⁰وْوْصَّاهُمْ بَاشْ مَا يْتّْكَلّْمُو مْعَ حْتَّى شِي وَاحْدْ عْلِيهْ.

³¹وْبْدَا كَيْعَلّْمْ تْلَامْدُه بْلِّي وَلْدْ الْإِنْسَانْ لَابْدَّ مَا يْتّْعَدّْبْ بْزَّافْ، وْبْلِّي الشّْيُوخْ وْالرُّؤَسَا دْ رْجَالْ الدِّينْ وْالْعُلَمَا دْ الشّْرَعْ مَا غَيْقْبْلُوهْشْ، وْغَيْتّْقْتَلْ، وْمْنْ بَعْدْ تْلْتْ يَّامْ غَيْتّْبْعَتْ مْنْ الْمُوتْ.

³²وْݣَالْ هَادْ الْكْلَامْ قُدَّامْ كُلّْشِي. وْجَرُّه بُطْرُسْ لْلجّْنْبْ وْبْدَا كَيْخَاصْمْ عْلِيهْ!

³³وْضَارْ يَسُوعْ وْشَافْ فْتْلَامْدُه وْخَاصْمْ عْلَى بُطْرُسْ وْݣَالْ لِيهْ: «بَعّْدْ مْنِّي آ هَادْ الشِّيطَانْ، نْتَ مَا كَيْهَمّْكْشْ مُرَادْ اللَّهْ وَلَكِنْ غِيرْ أَشْنُو بْغَاوْ النَّاسْ».

³⁴وْعَيّْطْ يَسُوعْ عْلَى الجّْمَاعَة دْ النَّاسْ وْالتّْلَامْدْ دْيَالُه، وْݣَالْ لِيهُمْ: «اللِّي بْغَا يْتْبَعْنِي، خَاصُّه يْسْمَحْ فْرَاسُه وْيْهَزّْ صْلِيبُه وْيْتْبَعْنِي.

³⁵حِيتْ اللِّي بْغَا يْنَجِّي حْيَاتُه غَيْضَيّْعْهَا، وَلَكِنْ اللِّي غَيْضَيّْعْ حْيَاتُه عْلَى وْدِّي وْعْلَى وْدّْ الْبْشَارَة، غَيْنَجِّيهَا.

³⁶آشْ مْنْ نْفَعْ عَنْدْ بْنَادْمْ إِلَا رْبَحْ الدّْنْيَا كُلّْهَا وْضَيّْعْ حْيَاتُه؟

³⁷وْآشْ يْمْكَنْ يْعْطِي بْنَادْمْ فْعُوضْ حْيَاتُه؟

³⁸عْلَاحْقَّاشْ اللِّي حْشَمْ يْݣُولْ بْلِّي كَيْعْرَفْنِي وْكَيْعْرَفْ كْلَامِي فْهَادْ الْجِيلْ الْفَاسْدْ وْالْمُدْنِبْ، رَاهْ وَلْدْ الْإِنْسَانْ غَيْكُونْ حْشْمَانْ بِيهْ مْلِّي غَيْرْجَعْ فْالْعَزّْ دْيَالْ بَّاهْ مْعَ الْمَلَايْكَة الْمْقَدّْسِينْ».