Read Moroccan Standard Translation مَرْقُسْ 9 Bible Online

مَرْقُسْ 9 - Moroccan Standard Translation bible

مَرْقُسْ 9

¹الْفَصْلْ التَّاسْعْ وْݣَالْ لِيهُمْ يَسُوعْ: «نْݣُولْ لِيكُمْ الْحَقّْ: رَاهْ كَايْنْ فْالنَّاسْ اللِّي حَاضْرِينْ هْنَا اللِّي مَا غَادِيشْ يْدُوقُو الْمُوتْ حْتَّى يْشُوفُو مَمْلَكَةْ اللَّهْ جَايَّة بْالْقُوَّة».

²وْمْنْ بَعْدْ سْتّْ يَّامْ دَّا يَسُوعْ مْعَاهْ بُطْرُسْ وْيَعْقُوبْ وْيُوحَنَّا بُوحْدْهُمْ وْطْلْعُو لْوَاحْدْ الجّْبَلْ عَالِي، وْتْمَّ تّْبَدّْلَاتْ صِفْتُه قُدَّامْهُمْ.

³وْوْلَّاوْ حْوَايْجُه كَيْلَمْعُو بْزَّافْ وْبِيضِينْ، بْيُوضِيَة مَا كَايْنْ حْتَّى شِي وَاحْدْ فْالدّْنْيَا اللِّي يْقْدَرْ يْدِيرْ بْحَالْهَا.

⁴وْهُوَ يْبَانْ لِيهُمْ إِيلِيَّا وْمُوسَى كَيْتّْكَلّْمُو مْعَ يَسُوعْ.

⁵وْݣَالْ بُطْرُسْ لْيَسُوعْ: «آ سِيدِي، شْحَالْ مْزْيَانْ نْكُونُو هْنَا. خَلِّينَا نْصَايْبُو تْلَاتَة دْ النّْوَايْلْ، وَحْدَة لِيكْ، وَحْدَة لْمُوسَى وْوَحْدَة لْإِيلِيَّا».

⁶ݣَالْ هَادْ الْكْلَامْ حِيتْ مَا كَانْشْ عَارْفْ أَشْنُو كَيْݣُولْ بْسْبَابْ الْخَلْعَة اللِّي شْدَّاتُه هُوَ وْصْحَابُه.

⁷وْجَاتْ وَاحْدْ السّْحَابَة وْضَلّْلَاتْ عْلِيهُمْ، وْجَا صُوتْ مْنْ السّْحَابَة وْݣَالْ: «هَادَا هُوَ وْلْدِي الْعْزِيزْ، سْمْعُو لِيهْ».

⁸وْمْلِّي تْلَفّْتُو دْغْيَا، مَا شَافُو حْتَّى وَاحْدْ مْنْ غِيرْ يَسُوعْ بُوحْدُه.

⁹وْهُمَ نَازْلِينْ مْنْ الجّْبَلْ، وْصَّاهُمْ يَسُوعْ بَاشْ مَا يْخَبّْرُو حْتَّى وَاحْدْ بْدَاكْشِّي اللِّي شَافُو، حْتَّى يْتّْبْعَتْ وَلْدْ الْإِنْسَانْ مْنْ بِينْ الْمُوتَى.

¹⁰وْدَارُو بْكْلَامُه وَلَكِنْ بْقَاوْ كَيْسْوّْلُو بْعْضِيَّاتْهُمْ: «أَشْنُو الْمَعْنَى دْيَالْ يْتّْبْعَتْ مْنْ بِينْ الْمُوتَى؟».

¹¹وْهُمَ يْسْوّْلُوهْ: «عْلَاشْ كَيْݣُولُو الْعُلَمَا دْ الشّْرَعْ بْلِّي فْاللّْوّْلْ خَاصّْ إِيلِيَّا يْجِي؟».

¹²وْجَاوْبْهُمْ يَسُوعْ: «فْالْحَقِيقَة إِيلِيَّا خَاصّْ يْجِي فْاللّْوّْلْ وْيْصْلَحْ كُلّْشِي. وَلَكِنْ وَاشْ مَا مْكْتُوبْشْ عَاوْتَانِي فْكْتَابْ اللَّهْ بْلِّي لَابْدَّ وَلْدْ الْإِنْسَانْ يْتّْعَدّْبْ بْزَّافْ وْيْحْتَقْرُوهْ النَّاسْ؟

¹³نْݣُولْ لِيكُمْ: رَاهْ جَا إِيلِيَّا، وْدَارُو بِيهْ مَا بْغَاوْ كِيفْ مْكْتُوبْ عْلِيهْ فْكْتَابْ اللَّهْ».

¹⁴وْمْلِّي وْصَلْ يَسُوعْ وْالتّْلَامْدْ اللِّي كَانُو مْعَاهْ لْعَنْدْ التّْلَامْدْ لْخْرِينْ، شَافُو جْمَاعَة كْبِيرَة دْ النَّاسْ ضَايْرَة بْهَادْ التّْلَامْدْ وْشِي وْحْدِينْ مْنْ الْعُلَمَا دْ الشّْرَعْ كَيْتّْنَاقْشُو مْعَاهُمْ.

¹⁵وْغِيرْ شَافُو النَّاسْ يَسُوعْ تّْعَجّْبُو كُلّْهُمْ وْجْرَاوْ لْعَنْدُه بَاشْ يْسَلّْمُو عْلِيهْ.

¹⁶وْسْوّْلْ يَسُوعْ التّْلَامْدْ: «فَاشْ كَتّْنَاقْشُو مْعَاهُمْ؟».

¹⁷وْجَاوْبُه وَاحْدْ الرَّاجْلْ مْنْ وَسْطْ الجّْمَاعَة دْ النَّاسْ وْݣَالْ لِيهْ: «آ سِيدِي، جْبْتْ لِيكْ وْلْدِي حِيتْ سَاكْنُه وَاحْدْ الجّْنْ اللِّي رْدُّه زِيزُونْ،

¹⁸وْفِينْ مَا كَيْشَدُّه كَيْطِيّْحُه، وْكَيْخَرْجُو الْكْشَاكْشْ مْنْ فُمُّه وْكَيْغَزّْزْ سْنَانُه وْكَيْبَسْ. وْݣْلْتْ لْلتّْلَامْدْ دْيَالْكْ بَاشْ يْخَرّْجُوهْ مْنُّه، وَلَكِنْ مَا قَدْرُوشْ».

¹⁹وْجَاوْبْهُمْ يَسُوعْ وْݣَالْ: «آ هَادْ الْجِيلْ اللِّي مَا عَنْدُه إِيمَانْ! حْتَّى لْإِمْتَى غَنْبْقَى مْعَاكُمْ؟ حْتَّى لْإِمْتَى غَنْتّْحَمّْلْكُمْ؟ جِيبُو لِيَّ الْوَلْدْ!».

²⁰وْجَابُو لِيهْ الْوَلْدْ، وْغِيرْ الجّْنْ شَافْ يَسُوعْ وْهُوَ يْلُوحْ الْوَلْدْ بْالجّْهْدْ، وْطَاحْ الْوَلْدْ لْلْأَرْضْ وْبْدَا كَيْتّْمَرّْغْ فِيهَا وْالْكْشَاكْشْ خَارْجِينْ مْنْ فُمُّه.

²¹وْسْوّْلْ يَسُوعْ بَّاتْ الْوَلْدْ وْݣَالْ لِيهْ: «مْنْ إِيمْتَى وْهُوَ هَكَّا؟»، وْجَاوْبُه: «مْنْ صْغْرُه.

²²وْبْزَّافْ دْ الْمَرَّاتْ كَيْرْمِيهْ فْالْعَافْيَة وْلَا فْالْمَا بَاشْ يْقْتْلُه. وَلَكِنْ إِلَا قْدَرْتِي تْدِيرْ شِي حَاجَة حَنّْ عْلِينَا وْعَاوْنَّا».

²³وْݣَالْ لِيهْ يَسُوعْ: «كَتْݣُولْ إِلَا قْدَرْتِي؟ رَاهْ كُلّْشِي مُمْكِنْ لْهَادَاكْ اللِّي كَيْآمْنْ».

²⁴وْدِيكْ السَّاعَة غَوّْتْ الْبُو دْيَالْ الْوَلْدْ وْݣَالْ: «كَنْآمْنْ! عَاوْنِّي بَاشْ إِيمَانِي يْزِيدْ!».

²⁵وْمْلِّي شَافْ يَسُوعْ بْلِّي الجّْمَاعَة دْ النَّاسْ كَتّْجْمَعْ عْلِيهُمْ، نْهَضْ فْالجّْنّْ وْݣَالْ لِيهْ: «آ هَادْ الجّْنْ الزِّيزُونْ وْالصّْمَكْ! أَنَا كَنْآمْرَكْ: خْرُجْ مْنْ الْوَلْدْ وْعَمّْرَكْ مَا تْرْجَعْ لِيهْ!».

²⁶وْغَوّْتْ الجّْنْ وْطِيّْحْ الْوَلْدْ بْالجّْهْدْ لْلْأَرْضْ وْبْدَا كَيْتّْمَرّْغْ وْخْرَجْ مْنُّه. وْطَاحْ الْوَلْدْ بْحَالْ الْمْيّْتْ، حْتَّى ݣَالُو بْزَّافْ دْ النَّاسْ: «رَاهْ مَاتْ».

²⁷وَلَكِنْ يَسُوعْ شْدُّه مْنْ يْدُّه وْعَاوْنُه بَاشْ يْنُوضْ، وْهُوَ يْوْقَفْ عْلَى رْجْلِيهْ.

²⁸وْمْلِّي دْخَلْ يَسُوعْ لْلدَّارْ، كَانُو التّْلَامْدْ دْيَالُه مْعَاهْ بُوحْدْهُمْ، وْهُمَ يْسْوّْلُوهْ: «عْلَاشْ مَا قْدَرْنَاشْ حْنَا نْخَرّْجُو الجّْنْ؟».

²⁹وْهُوَ يْݣُولْ لِيهُمْ: «هَادْ النُّوعْ دْيَالْ الجّْنُونْ مَا كَيْخْرُجْ حْتَّى بْشِي حَاجَة مْنْ غِيرْ الصّْلَاة».

³⁰وْخَرْجُو مْنْ تْمَّ وْدَازُو عْلَى الْجَلِيلْ. وْمَا بْغَاشْ يَسُوعْ يْعَرْفُه شِي حَدّْ بْاللِّي رَاهْ هُوَ تْمَّ،

³¹حِيتْ كَانْ كَيْعَلّْمْ التّْلَامْدْ دْيَالُه، وْكَيْݣُولْ لِيهُمْ: «وَلْدْ الْإِنْسَانْ غَيْتّْسَلّْمْ لْلْيْدِّينْ دْ النَّاسْ وْغَيْقْتْلُوهْ، وْتْلْتْ يَّامْ مْنْ بَعْدْمَا يْقْتْلُوهْ غَيْتّْبْعَتْ مْنْ الْمُوتْ».

³²وَلَكِنْ التّْلَامْدْ مَا فَهْمُوشْ هَادْ الْكْلَامْ، وْخَافُو يْسْوّْلُوهْ.

³³وْوَصْلُو لْكَفْرْنَاحُومْ، وْمْلِّي دَخْلُو لْلدَّارْ سْوّْلْ يَسُوعْ تْلَامْدُه: «فَاشْ كْنْتُو كَتّْنَاقْشُو فْالطّْرِيقْ؟».

³⁴وْبْقَاوْ سَاكْتِينْ، حِيتْ كَانُو كَيْتّْنَاقْشُو فْالطّْرِيقْ عْلَى شْكُونْ هُوَ الْمْخَيّْرْ فِيهُمْ.

³⁵وْݣْلَسْ يَسُوعْ وْعَيّْطْ عْلَى التّْلَامْدْ الطّْنَاشْ وْݣَالْ لِيهُمْ: «اللِّي بْغَا يْوَلِّي اللّْوّْلْ، خَاصُّه يْكُونْ هُوَ اللّْخْرْ، وْالْخْدَّامْ دْيَالْ النَّاسْ كُلّْهُمْ».

³⁶وْجَابْ وَاحْدْ الْوْلِيِّدْ وْوَقّْفُه وَسْطْ مْنّْهُمْ وْعَنّْقُه وْݣَالْ لِيهُمْ:

³⁷«اللِّي كَيْرَحّْبْ بْشِي وَلْدْ بْحَالْ هَادَا عْلَى قْبْلِي، رَاهْ كَيْرَحّْبْ بِيَّ. وْاللِّي كَيْرَحّْبْ بِيَّ، رَاهْ مَا كَيْرَحّْبْشْ بِيَّ أَنَا، وَلَكِنْ كَيْرَحّْبْ بْهَادَاكْ اللِّي صِيفْطْنِي».

³⁸وْݣَالْ لِيهْ يُوحَنَّا: «آ سِيدِي، رَاهْ شْفْنَا وَاحْدْ الرَّاجْلْ كَيْخَرّْجْ الجّْنُونْ بْالْإِسْمْ دْيَالْكْ وْمَا خَلِّينَاهْشْ، عْلَاحْقَّاشْ هُوَ مَاشِي مْعَانَا».

³⁹وْرَدّْ عْلِيهُمْ يَسُوعْ وْݣَالْ: «مَا تْحَبْسُوهْشْ! عْلَاحْقَّاشْ مَا كَايْنْ حْتَّى شِي وَاحْدْ غَيْدِيرْ مُعْجِزَة بْالْإِسْمْ دْيَالِي، وْغَيْقْدَرْ مْنْ بَعْدْ يْتّْكَلّْمْ عْلِيَّ بْكْلَامْ قْبِيحْ.

⁴⁰حِيتْ اللِّي مَا كَيْضَادّْنَاشْ، رَاهْ هُوَ مْعَانَا.

⁴¹وْاللِّي كَيْعْطِيكُمْ كَاسْ دْ الْمَا بْالْإِسْمْ دْيَالِي حِيتْ نْتُمَ دْيَالْ الْمَسِيحْ، نْݣُولْ لِيكُمْ الْحَقّْ: رَاهْ الْأَجْرْ دْيَالُه مَا غَيْضِيعْشْ.

⁴²وْاللِّي طِيّْحْ فْالدّْنُوبْ وَاحْدْ مْنْ هَادْ الصّْغَارْ اللِّي كَيْآمْنُو بِيَّ، رَاهْ هَادَاكْ خْيَرْ لِيهْ تْتْعَلّْقْ فْعُنْقُه حَجْرَة كْبِيرَة دْيَالْ الرّْحَى وْيْتّْرْمَى فْقَاعْ الْبْحَرْ.

⁴³إِلَا الْيْدّْ دْيَالْكْ طِيّْحَاتْكْ فْالدّْنُوبْ، قْطَعْهَا، حِيتْ حْسَنْ لِيكْ تْدْخُلْ لْلْحَيَاةْ الدَّايْمَة وْيْدّْكْ مْقْطُوعَة، وَلَا يْكُونُو عَنْدْكْ جُوجْ دْ الْيْدِّينْ وْتّْرْمَى فْجَهْنَّمْ فْالْعَافْيَة اللِّي مَا كَتْطْفَاشْ. [

⁴⁴تْمَّ فِينْ دُودْهُمْ مَا كَيْمُوتْشْ وْالْعَافْيَة مَا كَتْطْفَاشْ.]

⁴⁵وْإِلَا الرّْجَلْ دْيَالْكْ طِيّْحَاتْكْ فْالدّْنُوبْ، قْطَعْهَا، حِيتْ حْسَنْ لِيكْ تْدْخُلْ لْلْحَيَاةْ الدَّايْمَة عْرَجْ، وَلَا يْكُونُو عَنْدْكْ جُوجْ دْ الرّْجْلِينْ وْتّْرْمَى فْجَهْنَّمْ. [

⁴⁶تْمَّ فِينْ دُودْهُمْ مَا كَيْمُوتْشْ وْالْعَافْيَة مَا كَتْطْفَاشْ.][٣]

⁴⁷وْإِلَا الْعِينْ دْيَالْكْ طِيّْحَاتْكْ فْالدّْنُوبْ، ݣْلَعْهَا، حِيتْ حْسَنْ لِيكْ تْدْخُلْ لْمَمْلَكَةْ اللَّهْ عْوَرْ، وَلَا يْكُونُو عَنْدْكْ جُوجْ دْ الْعِينِينْ وْتّْرْمَى فْجَهْنَّمْ،

⁴⁸تْمَّ فِينْ دُودْهُمْ مَا كَيْمُوتْشْ وْالْعَافْيَة مَا كَتْطْفَاشْ.

⁴⁹رَاهْ كُلّْ وَاحْدْ غَيْتّْمَلّْحْ بْالْعَافْيَة.

⁵⁰الْمْلْحَة مْزْيَانَة، وَلَكِنْ إِلَا مْشَاتْ لِيهَا الْمْلُوحِيَّة دْيَالْهَا إِيوَا كِيفَاشْ غَتّْرْجْعُوهَا لِيهَا؟ خَاصّْ الْمْلْحَة تْكُونْ فِيكُمْ وْيْكُونْ الْهْنَا بِينَاتْكُمْ».