Read Moroccan Standard Translation لُوقَا 10 Bible Online

لُوقَا 10 - Moroccan Standard Translation bible

لُوقَا 10

¹الْفَصْلْ الْعَاشْرْ وْمْنْ بَعْدْ هَادْشِّي، خْتَارْ الرَّبّْ يَسُوعْ تْنِينْ وْسْبْعِينْ خْرِينْ، وْصِيفْطْهُمْ جُوجْ جُوجْ بَاشْ يْسَبْقُوهْ لْلْمْدُونْ وْلْلْبْلَايْصْ اللِّي بْغَا يْمْشِي لِيهُمْ.

²وْݣَالْ لِيهُمْ: «الْحْصَادْ كْتِيرْ، وَلَكِنْ الْحْصَّادَا قْلَالْ. إِيوَا طْلْبُو مْنْ مُولْ الْحْصَادْ يْصِيفْطْ حْصَّادَا لْلْحْصَادْ دْيَالُه.

³سِيرُو، هَانِي كَنْصِيفْطْكُمْ بْحَالْ الْخْرْفَانْ بِينْ الدّْيَابْ.

⁴مَا تْهَزُّو مْعَاكُمْ لَا صْرَّة دْ الْفْلُوسْ، لَا رَزْمَة، لَا صْبَّاطْ، وْمَا تْسَلّْمُو عْلَى حَدّْ فْالطّْرِيقْ.

⁵وْالدَّارْ اللِّي دْخَلْتُو لِيهَا، ݣُولُو فْاللّْوّْلْ: السّْلَامْ عْلِيكُمْ آ مَّالِينْ هَادْ الدَّارْ.

⁶وْإِلَا كَانْ فِيهَا اللِّي كَيْبْغِي السّْلَامْ، غَادِي يْوَصْلُه سْلَامْكُمْ، وْإِلَا مَا كَانْشْ، سْلَامْكُمْ غَيْرْجَعْ لِيكُمْ.

⁷وْبْقَاوْ فْدِيكْ الدَّارْ وَاكْلِينْ شَارْبِينْ مْنْ دَاكْشِّي اللِّي عَنْدْ مَّالِيهَا، حِيتْ الْخْدَّامْ كَيْسْتَاهْلْ الْأُجْرَة دْيَالُه، وْمَا تْمْشِيوْشْ مْنْ دَارْ لْدَارْ.

⁸وْالْمْدِينَة اللِّي دْخَلْتُو لِيهَا وْقْبْلُوكُمْ مَّالِيهَا، كُولُو مْنْ دَاكْشِّي اللِّي كَيْعْطِيوْكُمْ.

⁹وْشَافِيوْ الْمَرْضَى دْيَالْهُمْ وْݣُولُو لِيهُمْ: رَاهْ مَمْلَكَةْ اللَّهْ قَرّْبَاتْ لِيكُمْ.

¹⁰وَلَكِنْ الْمْدِينَة اللِّي دْخَلْتُو لِيهَا وْمَا قْبْلُوكُمْشْ مَّالِيهَا، خَرْجُو لْزْنَاقِيهَا وْݣُولُو:

¹¹حْتَّى الْغَبْرَة دْ مْدِينْتْكُمْ اللِّي لْصْقَاتْ فْرْجْلِينَا كَنْسُوسُوهَا لِيكُمْ، وَلَكِنْ خَاصّْكُمْ تْعَرْفُو بْلِّي مَمْلَكَةْ اللَّهْ قَرّْبَاتْ.

¹²نْݣُولْ لِيكُمْ، رَاهْ عَاقِبْةْ سَدُومْ فْدَاكْ النّْهَارْ غَادِي تْكُونْ خَفّْ مْنْ عَاقِبْةْ دِيكْ الْمْدِينَة».

¹³«يَا وِيلْكْ آ كُورَزِينْ! يَا وِيلْكْ آ بَيْتْ صَيْدَا! كُونْ الْمُعْجِزَاتْ اللِّي وْقْعُو فِيكُمْ وْقْعُو فْصُورْ وْصَيْدَا، كُونْ شْحَالْ هَادِي تَابُو مَّالِيهُمْ، وْكُونْ لْبْسُو الْخِيشْ وْݣَلْسُو عْلَى الرّْمَادْ[٤].

¹⁴وَلَكِنْ عَاقِبْةْ صُورْ وْصَيْدَا فْيُومْ الْحِسَابْ غَادِي تْكُونْ خَفّْ مْنْ عَاقِبْتْكُمْ.

¹⁵وْنْتِ آ كَفْرْنَاحُومْ! وَاشْ غَتْهَزِّي حْتَّى لْلسّْمَا؟ لَّا، رَاكِ غَادِي تّْخَبْطِي حْتَّى لْلْهَاوِيَة.

¹⁶اللِّي سْمَعْ لِيكُمْ سْمَعْ لِيَّ. وْاللِّي مَا قْبَلْكُمْشْ مَا قْبَلْنِيشْ، وْاللِّي مَا قْبَلْنِيشْ مَا قْبَلْشْ هَادَاكْ اللِّي صِيفْطْنِي».

¹⁷وْرْجْعُو هَادُوكْ التّْنِينْ وْسْبْعِينْ وْهُمَ فْرْحَانِينْ، وْݣَالُو لْيَسُوعْ: «يَا رَبّْ، بْالْإِسْمْ دْيَالْكْ حْتَّى الجّْنُونْ وْلَّاوْ كَيْطِيعُونَا».

¹⁸وْهُوَ يْجَاوْبْهُمْ: «شْفْتْ الشِّيطَانْ طَايْحْ مْنْ السّْمَا بْحَالْ الْبَرْقْ.

¹⁹رَانِي عْطِيتْكُمْ السُّلْطَة بَاشْ تُوطَاوْ عْلَى اللّْفَاعِي وْالْعْݣَارْبْ وْعْلَى ݣَاعْ الْقُوَّة دْيَالْ الْعْدُو، وْحْتَّى حَاجَة مَا تْآدِيكُمْ.

²⁰وْوَاخَّا دَاكْشِّي، مَا خَاصّْكُمْشْ تْفَرْحُو حِيتْ الجّْنُونْ كَيْطِيعُوكُمْ، وَلَكِنْ فْرْحُو حِيتْ سْمِيَّاتْكُمْ مْكْتُوبِينْ فْالسَّمَاوَاتْ عَنْدْ اللَّهْ».

²¹وْفْهَادِيكْ السَّاعَة فْرَحْ يَسُوعْ بْالرُّوحْ الْقُدُسْ وْݣَالْ: «كَنْحَمْدَكْ آ الْآبْ، يَا رَبّْ السّْمَا وْالْأَرْضْ، حِيتْ خْبِّيتِي هَادْ الْأُمُورْ عْلَى الْحُكَمَا وْالْفُهَمَا وْبَيِّنْتِيهُمْ لْلدّْرَارِي الصّْغَارْ، حِيتْ هَادْشِّي اللِّي كَيْفَرّْحْكْ.

²²بَّا عْطَانِي كُلّْشِي، وْحْتَّى وَاحْدْ مَا كَيْعْرَفْ شْكُونْ هُوَ الْوَلْدْ غِيرْ الْبُو، وْلَا شْكُونْ هُوَ الْبُو غِيرْ الْوَلْدْ، وْغِيرْ هَادَاكْ اللِّي بْغَا الْوَلْدْ يْوَرِّيهْ لِيهْ».

²³وْتْلَفّْتْ لْلتّْلَامْدْ وْݣَالْ لِيهُمْ بُوحْدْهُمْ: «سْعْدَاتْ اللِّي كَيْشُوفْ دَاكْشِّي اللِّي كَتْشُوفُو!

²⁴فْالْحَقِيقَة، رَاهْ بْزَّافْ دْ الْأَنْبِيَا وْالْمُلُوكْ تْمْنَّاوْ يْشُوفُو دَاكْشِّي اللِّي كَتْشُوفُو وْمَا شَافُوهْشْ، وْيْسَمْعُو دَاكْشِّي اللِّي كَتْسَمْعُو وْمَا سْمْعُوهْشْ».

²⁵وْنَاضْ وَاحْدْ الْعَالِمْ دْ الشّْرَعْ، وْسْوّْلْ يَسُوعْ بَاشْ يْحَصّْلُه وْݣَالْ لِيهْ: «آشْ خَاصّْنِي نْدِيرْ بَاشْ تْكُونْ عَنْدِي الْحَيَاةْ الدَّايْمَة؟»

²⁶وْجَاوْبُه يَسُوعْ: «أَشْنُو مْكْتُوبْ فْشْرَعْ اللَّهْ؟ وْكِيفَاشْ كَتْقْرَاهْ؟»

²⁷وْجَاوْبْ الْعَالِمْ وْݣَالْ: «خَاصّْكْ تْبْغِي الرَّبّْ إِلَاهْكْ مْنْ قَلْبَكْ كُلُّه، وْمْنْ نْفْسَكْ كُلّْهَا، وْمْنْ قُوّْتْكْ كُلّْهَا، وْمْنْ عَقْلَكْ كُلُّه، وْخَاصّْكْ تْبْغِي اللِّي قْرِيبْ لِيكْ كِيفْ كَتْبْغِي رَاسْكْ».

²⁸وْهُوَ يْݣُولْ لِيهْ يَسُوعْ: «عَنْدْكْ الصَّحْ، دِيرْ هَادْشِّي وْغَتْحْيَا».

²⁹وَلَكِنْ الْعَالِمْ دْ الشّْرَعْ بْغَا يْبَيّْنْ بْلِّي هُوَ كَيْطَبّْقْ الشّْرَعْ، وْسْوّْلْ يَسُوعْ: «وْشْكُونْ هُوَ اللِّي قْرِيبْ لِيَّ؟»

³⁰وْجَاوْبُه يَسُوعْ وْݣَالْ: «هَادَا وَاحْدْ الرَّاجْلْ كَانْ نَازْلْ مْنْ أُورْشَلِيمْ لْأَرِيحَا، تْعَرّْضُو لِيهْ الشّْفَارَا، وْعْرَّاوْهْ وْضْرْبُوهْ، وْخْلَّاوْهْ بِينْ الْمُوتْ وْالْحَيَاةْ.

³¹وْبْالصُّدْفَة كَانْ وَاحْدْ مْنْ رْجَالْ الدِّينْ نَازْلْ مْنْ دِيكْ الطّْرِيقْ، وْمْلِّي شَافُه بَعّْدْ عْلِيهْ وْكَمّْلْ طْرِيقُه.

³²وْدَازْ وَاحْدْ مْنْ اللَّاوِيِّينْ حْتَّى هُوَ مْنْ دِيكْ الْبْلَاصَة، وْمْلِّي شَافُه بَعّْدْ عْلِيهْ وْكَمّْلْ طْرِيقُه.

³³وَلَكِنْ وَاحْدْ الرَّاجْلْ سَامِرِي كَانْ مْسَافْرْ دَازْ مْنْ حْدَاهْ، وْمْلِّي شَافُه حَنّْ عْلِيهْ.

³⁴وْقَرّْبْ لِيهْ وْدَاوَا الجّْرْحْ دْيَالُه بْالزِّيتْ وْالْخْمَرْ، وْمْنْ بَعْدْ رَكّْبُه عْلَى الْبْهِيمَة دْيَالُه وْدَّاهْ لْوَاحْدْ الْفْنْدَقْ وْتّْهَلَّى فِيهْ.

³⁵وْالْغَدّْ لِيهْ، عْطَى الرَّاجْلْ السَّامِرِي لْمُولْ الْفْنْدَقْ جُوجْ دِينَارَاتْ وْݣَالْ لِيهْ: تّْهَلَّى فِيهْ، وْاللِّي خْسَرْتِي فُوقْ مْنْ دَاكْشِّي اللِّي عْطِيتْكْ غَادِي نْرَدُّه لِيكْ مْلِّي نْرْجَعْ.

³⁶إِيوَا شْكُونْ مْنْ هَادْ التّْلَاتَة اللِّي كَيْبَانْ لِيكْ قْرِيبْ لْلرَّاجْلْ اللِّي تْعَرّْضُو لِيهْ الشّْفَارَا؟»

³⁷وْجَاوْبُه الْعَالِمْ دْ الشّْرَعْ: «هَادَاكْ اللِّي حَنّْ عْلِيهْ». وْهُوَ يْݣُولْ لِيهْ يَسُوعْ: «إِيوَا سِيرْ حْتَّى نْتَ وْدِيرْ بْحَالُه».

³⁸وْمْلِّي كَانُو غَادْيِينْ فْالطّْرِيقْ، دْخَلْ يَسُوعْ لْوَاحْدْ الدُّوَّارْ، وْرَحّْبَاتْ بِيهْ وَاحْدْ الْمْرَاة سْمِيتْهَا مَرْتَا فْدَارْهَا.

³⁹وْكَانْتْ عَنْدْهَا خْتْهَا سْمِيتْهَا مَرْيَمْ، ݣْلْسَاتْ عَنْدْ رْجْلِينْ الرَّبّْ يَسُوعْ كَتْسْمَعْ لْكْلَامُه.

⁴⁰وَلَكِنْ مَرْتَا كَانْتْ مْشْغُولَة فْالتّْوْجَادْ لْلْضّْيَافْ، وْجَاتْ وْݣَالْتْ لْيَسُوعْ: «يَا رَبّْ، وَاشْ مَا بْقِيتْشْ فِيكْ حِيتْ خْلَّاتْنِي خْتِي نْخْدَمْ غِيرْ بُوحْدِي؟ ݣُولْ لِيهَا تْنُوضْ تْعَاوْنِّي!»

⁴¹وْجَاوْبْهَا الرَّبّْ وْݣَالْ: «آ مَرْتَا، آ مَرْتَا، نْتِ هَازَّة الْهَمّْ وْمْشْغُولَة بْبْزَّافْ دْ الْأُمُورْ،

⁴²وَلَكِنْ غِيرْ حَاجَة وَحْدَة لَاشْ مْحْتَاجِينْ، وْمَرْيَمْ خْتَارْتْ الْحَاجَة الْمْخَيّْرَة اللِّي مَا غَيْݣْلَعْهَا لِيهَا حَدّْ».