Read Moroccan Standard Translation لُوقَا 13 Bible Online

لُوقَا 13 - Moroccan Standard Translation bible

لُوقَا 13

¹الْفَصْلْ تْلْطَاشْ وْفْدَاكْ الْوَقْتْ، جَاوْ شِي وْحْدِينْ وْعَاوْدُو لْيَسُوعْ عْلَى النَّاسْ اللِّي مْنْ الْجَلِيلْ اللِّي قْتَلْهُمْ الْحَاكْمْ بِيلَاطُسْ وْخَلّْطْ دْمّْهُمْ بْدْمّْ الدّْبَايْحْ دْيَالْهُمْ،

²وْجَاوْبْهُمْ يَسُوعْ وْݣَالْ: «وَاشْ يْحْسَابْ لِيكُمْ بْلِّي هَادُوكْ الْجَلِيلِيِّينْ كَانُو مُدْنِبِينْ كْتَرْ مْنْ ݣَاعْ الْجَلِيلِيِّينْ لْخْرِينْ؟

³كَنْݣُولْ لِيكُمْ لَّا! وَلَكِنْ رَاهْ إِلَا مَا تْبْتُوشْ، كُلّْكُمْ غَادِي تّْهَلْكُو بْحَالْهُمْ.

⁴وْدُوكْ التّْمَنْطَاشْ اللِّي طَاحْ عْلِيهُمْ بَرْجْ دُوَّارْ سِلْوَامْ وْقْتَلْهُمْ، وَاشْ يْحْسَابْ لِيكُمْ بْلِّي كَانُو مُدْنِبِينْ كْتَرْ مْنْ ݣَاعْ سُكَّانْ أُورْشَلِيمْ؟

⁵كَنْݣُولْ لِيكُمْ لَّا! وَلَكِنْ إِلَا مَا تْبْتُوشْ كُلّْكُمْ غَادِي تّْهَلْكُو بْحَالْهُمْ».

⁶وْݣَالْ هَادْ الْمْتَالْ: «كَانْتْ عَنْدْ وَاحْدْ الرَّاجْلْ كَرْمَة مْغْرُوسَة فْالجّْنَانْ دْيَالُه، وْجَا بَاشْ يْقَلّْبْ وَاشْ عْطَاتْ غَلّْتْهَا، وَلَكِنْ مَا لْقَا فِيهَا وَالُو.

⁷وْهُوَ يْݣُولْ لْلجّْنَايْنِي: هَادِي تْلْتْ سْنِينْ وْأَنَا كَنْجِي بَاشْ نْقَلّْبْ وَاشْ كَايْنَة شِي غْلَّة فْهَادْ الْكَرْمَة، وْمَا كَنْلْقَا فِيهَا وَالُو، إِيوَا غِيرْ قْطَعْهَا! عْلَاشْ غَنْخَلِّيوْهَا تْضَيّْعْ الْأَرْضْ بْلَا فَايْدَة؟

⁸وْرَدّْ عْلِيهْ الجّْنَايْنِي: خَلِّيهَا آ سِيدِي تْبْقَى غِيرْ هَادْ الْعَامْ، رَاهْ غَادِي نْكَرْبَلْ التّْرَابْ اللِّي ضَايْرْ بِيهَا وْنْدِيرْ الْغْبَارْ.

⁹وْإِلَا عْطَاتْ غَلّْتْهَا الْعَامْ الْمَاجِي خَلِّيهَا، وْإِلَا مَا عْطَاتْشْ قْطَعْهَا».

¹⁰وْكَانْ يَسُوعْ كَيْعَلّْمْ فْوَاحْدْ دَارْ الصّْلَاة نْهَارْ السّْبْتْ،

¹¹وْكَانْتْ تْمَّ وَاحْدْ الْمْرَاة سَاكْنْهَا جْنّْ مَرّْضْهَا تْمَنْطَاشْرْ عَامْ، وْرَدّْ ضْهَرْهَا مْحْنِي وْمَا قَادْرَاشْ تْوْقَفْ مْقَادَّة.

¹²وْمْلِّي شَافْهَا يَسُوعْ عَيّْطْ لِيهَا وْݣَالْ لِيهَا: «آ الْمْرَاة، رَاكِ تّْفْكِّيتِي مْنْ الْمَرْضْ دْيَالْكْ!».

¹³وْغِيرْ حَطّْ عْلِيهَا يْدِّيهْ، وْهِيَ تْوْقَفْ مْقَادَّة وْعْطَاتْ الْعَزّْ لْلَّهْ.

¹⁴وْتّْقَلّْقْ الرَّئِيسْ دْيَالْ دَارْ الصّْلَاة، عْلَاحْقَّاشْ يَسُوعْ شْفَى الْمْرَاة نْهَارْ السّْبْتْ، وْهُوَ يْݣُولْ لْلنَّاسْ الْحَاضْرِينْ: «كَايْنَة سْتّْ يَّامْ اللِّي خَاصّْكُمْ تْخَدْمُو فِيهَا، فْدُوكْ لِيَّامْ أَجِيوْ تّْشَافَاوْ، مَاشِي نْهَارْ السّْبْتْ!».

¹⁵وْهُوَ يْرَدّْ عْلِيهْ الرَّبّْ يَسُوعْ: «آ هَادْ الْمُنَافِقِينْ! وَاشْ فِيكُمْ اللِّي مَا كَيْحَلّْشْ التُّورْ دْيَالُه وْلَا حْمَارُه نْهَارْ السّْبْتْ وْيْدِّيهْ مْنْ الْبْلَاصَة دْيَالْ الْعَلْفْ بَاشْ يْوَرّْدُه؟

¹⁶وْهَادْ الْمْرَاة رَاهْ هِيَ مْنْ وْلَادْ إِبْرَاهِيمْ، تْمَنْطَاشْرْ عَامْ وْالشِّيطَانْ رَابْطْهَا، وَاشْ مَا وَاجْبْشْ تّْفَكّْ مْنْ التَّكْتِيفَة دْيَالْهَا نْهَارْ السّْبْتْ؟».

¹⁷وْمْلِّي ݣَالْ هَادْ الْكْلَامْ، تّْحَشّْمُو هَادُوكْ اللِّي كَانُو كَيْضَادُّوهْ، وْفَرْحَاتْ الجّْمَاعَة دْ النَّاسْ كُلّْهَا بْالْمُعْجِزَاتْ اللِّي كَانْ كَيْدِيرْهَا.

¹⁸وْݣَالْ يَسُوعْ: «لْآشْ كَتْشْبَهْ مَمْلَكَةْ اللَّهْ؟ وْبْآشْ غَنْشَبّْهْهَا؟

¹⁹رَاهَا كَتْشْبَهْ لْوَاحْدْ الْحَبَّة دْ الْخَرْدَلْ خْدَاهَا شِي رَاجْلْ وْزْرَعْهَا فْأَرْضُه، وْكْبْرَاتْ وْوْلَّاتْ شَجْرَة كَيْعَشّْشُو طْيُورْ السّْمَا فْعْرُوشْهَا».

²⁰وْعَاوْدْ ݣَالْ: «بَاشْ غَادِي نْشَبّْهْ مَمْلَكَةْ اللَّهْ؟

²¹رَاهَا بْحَالْ شْوِيَّة دْيَالْ الْخْمِيرَة خْدَاتْهَا شِي مْرَاة وْخَلّْطَاتْهَا مْعَ تْلَاتَة كِيلُو دْيَالْ الطّْحِينْ حْتَّى خْمْرَاتْ الْعْجِينَة كُلّْهَا».

²²وْكَانْ يَسُوعْ كَيْعَلّْمْ فْالْمْدُونْ وْالدّْوَاوْرْ وْهُوَ فْطْرِيقُه لْأُورْشَلِيمْ.

²³وْسْوّْلُه شِي وَاحْدْ وْݣَالْ لِيهْ: «آ سِيدِي، وَاشْ هَادُوكْ اللِّي غَيْنْجَاوْ قْلَالْ؟». وْهُوَ يْجَاوْبُه يَسُوعْ:

²⁴«دِيرُو جَهْدْكُمْ بَاشْ تْدَخْلُو مْنْ الْبَابْ الضّْيِّقْ. عْلَاحْقَّاشْ نْݣُولْ لِيكُمْ: بْزَّافْ دْ النَّاسْ غَادِي يْحَاوْلُو يْدَخْلُو وْمَا غَيْقَدْرُوشْ.

²⁵وْمْلِّي يْنُوضْ مُولْ الدَّارْ وْيْسَدّْ الْبَابْ، غَادِي تْبْقَاوْ نْتُمَ بْرَّا كَتْدَقُّو وْكَتْݣُولُو: حَلّْ لِينَا آ سِيدِي! وْغَيْجَاوْبْكُمْ: رَاهْ مَا كَنْعْرَفْشْ مْنِينْ جِيتُو!

²⁶وْغَادِي تْݣُولُو: يَاكْ كْلِينَا وْشْرَبْنَا مْعَاكْ وْعَلّْمْتِي النَّاسْ فْزْنَاقِينَا!

²⁷وْغَادِي يْݣُولْ لِيكُمْ: رَاهْ مَا كَنْعْرَفْشْ مْنِينْ جِيتُو! بَعّْدُو مْنِّي كُلّْكُمْ آ اللِّي كَتْدِيرُو الدّْنُوبْ!

²⁸تْمَّ غَيْكُونْ الْبْكَا وْتْغْزَازْ السّْنَانْ، مْلِّي غَتْشُوفُو إِبْرَاهِيمْ وْإِسْحَاقْ وْيَعْقُوبْ وْݣَاعْ الْأَنْبِيَا فْمَمْلَكَةْ اللَّهْ، وْنْتُمَ مْرْمِيِّينْ بْرَّا!

²⁹وْغَيْجِيوْ نَاسْ مْنْ الشَّرْقْ وْمْنْ الْغَرْبْ، وْمْنْ الشَّمَالْ وْمْنْ الْجَنُوبْ، وْغَيْݣَلْسُو يَاكْلُو فْمَمْلَكَةْ اللَّهْ.

³⁰وْهَكَّا غَيْوَلِّيوْ اللّْخْرِينْ هُمَ اللّْوّْلِينْ وْاللّْوّْلِينْ هُمَ اللّْخْرِينْ».

³¹وْفْدِيكْ السَّاعَة قَرّْبُو شِي فْرِّيسِيِّينْ عَنْدْ يَسُوعْ وْݣَالُو لِيهْ: «خْرُجْ وْسِيرْ مْنْ هْنَا، عْلَاحْقَّاشْ هِيرُودُسْ بْغَا يْقْتْلَكْ!».

³²وْهُوَ يْجَاوْبْهُمْ: «سِيرُو ݣُولُو لْدَاكْ التَّعْلَبْ: هَانِي كَنْخَرّْجْ الجّْنُونْ وْكَنْشَافِي الْمَرْضَى الْيُومْ وْغْدَّا، وْفْالنّْهَارْ التَّالْتْ غَنْكَمّْلْ كُلّْشِي.

³³وَلَكِنْ خَاصّْنِي نْزِيدْ فْطْرِيقِي الْيُومْ وْغْدَّا وْبَعْدْ غْدَّا، عْلَاحْقَّاشْ مَا يْمْكَنْشْ يْتّْهْلَكْ شِي نْبِي بْرَّا دْ أُورْشَلِيمْ.

³⁴أُورْشَلِيمْ، آ أُورْشَلِيمْ! آ اللِّي كَتْقْتْلِي الْأَنْبِيَا وْكَتْرَجْمِي هَادُوكْ اللِّي تْرَسْلُو لِيكْ! شْحَالْ مْنْ مَرَّة بْغِيتْ نْجْمَعْ وْلَادْكْ كِيفْ كَتْجْمَعْ الدّْجَاجَة فْلَالْسْهَا وْكَتْحْضَنْ عْلِيهُمْ، وَلَكِنْ مَا بْغَاوْشْ.

³⁵هَانِي خَلِّيتْ لِيكُمْ دَارْكُمْ. وْنْݣُولْ لِيكُمْ: رَاهْ مَا غَتْشُوفُونِي حْتَّى يْجِي النّْهَارْ اللِّي تْݣُولُو فِيهْ: مْبْرُوكْ اللِّي جَايْ بْإِسْمْ الرَّبّْ!».