Read Moroccan Standard Translation لُوقَا 14 Bible Online

لُوقَا 14 - Moroccan Standard Translation bible

لُوقَا 14

¹الْفَصْلْ رْبَعْطَاشْ وْدْخَلْ نْهَارْ السّْبْتْ لْدَارْ وَاحْدْ مْنْ كْبَارْ الْفْرِّيسِيِّينْ بَاشْ يَاكُلْ، وْكَانُو حَاضْيِينُه آشْ غَيْدِيرْ.

²وْكَانْ قُدَّامُه وَاحْدْ الرَّاجْلْ، مْرِيضْ بْوَاحْدْ الْمَرْضْ اللِّي مّْوَرّْمْ دَاتُه كُلّْهَا،

³وْسْوّْلْ يَسُوعْ الْعُلَمَا دْ الشّْرَعْ وْالْفْرِّيسِيِّينْ وْݣَالْ لِيهُمْ: «وَاشْ الشِّفَا نْهَارْ السّْبْتْ حْلَالْ وْلَا حْرَامْ؟».

⁴وْهُمَ يْسَكْتُو. وْشْدّْ يَسُوعْ دَاكْ الرَّاجْلْ مْنْ يْدِّيهْ وْشَافَاهْ وْطَلْقُه يْمْشِي بْحَالُه.

⁵وْمْنْ بَعْدْ ݣَالْ لِيهُمْ: «شْكُونْ فِيكُمْ اللِّي إِلَا طَاحْ لِيهْ وَلْدُه وْلَا تُورُه فْالْبِيرْ وَاخَّا نْهَارْ السّْبْتْ مَا غَيْطَلّْعُوشْ مْنُّه دْغْيَا؟».

⁶وْمَا قَدْرُوشْ يْجَاوْبُوهْ عْلَى هَادْشِّي.

⁷وْعَاوْدْ لْلْمْعْرُوضِينْ هَادْ الْمْتَالْ مْلِّي شَافْهُمْ كَيْخْتَارُو الْبْلَايْصْ الْقُدَّامِيَّة، وْݣَالْ:

⁸«مْلِّي يْعْرَضْ عْلِيكْ شِي حَدّْ لْلْعَرْسْ، مَا تْݣْلَسْشْ فْالْبْلَاصَة الْقُدَّامِيَّة. عْلَاحْقَّاشْ يْقْدَرْ يْكُونْ فْالْمْعْرُوضِينْ شِي وَاحْدْ خْيَرْ مْنّْكْ،

⁹وْيْجِي هَادَاكْ اللِّي عْرَضْ عْلِيكْ وْعْلِيهْ وْيْݣُولْ لِيكْ: عْطِي بْلَاصْتْكْ لْهَادَا! وْتْنُوضْ وْنْتَ حْشْمَانْ، وْتْݣْلَسْ فْالْبْلَاصَة اللُّورَانِيَّة.

¹⁰وَلَكِنْ مْلِّي تْكُونْ مْعْرُوضْ، ݣْلَسْ فْالْبْلَاصَة اللُّورَانِيَّة، بَاشْ إِلَا جَا اللِّي عْرَضْ عْلِيكْ، يْݣُولْ لِيكْ: زِيدْ آ صَاحْبِي لْلْقُدَّامْ، دِيكْ السَّاعَة غَيْكْبَرْ شَانْكْ فْعِينِينْ ݣَاعْ الْمْعْرُوضِينْ مْعَاكْ،

¹¹عْلَاحْقَّاشْ ݣَاعْ اللِّي كَيْعَلِّي مْنْ شَانُه، شَانُه غَيْطِيحْ. وْاللِّي كَيْتّْوَاضْعْ، شَانُه غَيْعْلَا».

¹²وْݣَالْ يَسُوعْ لْمُولْ الْعْرَاضَة: «مْلِّي تْدِيرْ شِي غْدَا وْلَا شِي عْشَا، مَا تْعْرَضْشْ عْلَى صْحَابْكْ وْلَا خُوتْكْ وْلَا حْبَابْكْ وْلَا جِيرَانْكْ اللِّي لَبَاسْ عْلِيهُمْ، لَيْعَرْضُو عْلِيكْ حْتَّى هُمَ، وْهَكَّا تْكُونْ تّْجَازِيتِي.

¹³وَلَكِنْ مْلِّي تْدِيرْ شِي عْرَاضَة، عْرَضْ عْلَى الْمَسَاكِينْ وْالْمْعْطُوبِينْ وْالْعَرْجِينْ وْالْعَمْيِينْ.

¹⁴وْسْعْدَاتْكْ إِلَا دْرْتِي هَادْشِّي، عْلَاحْقَّاشْ هَادْ النَّاسْ مَا غَيْقَدْرُوشْ يْجَازِيوْكْ، وْاللَّهْ هُوَ اللِّي غَيْجَازِيكْ مْلِّي يْتّْبَعْتُو اللِّي مْتَّاقْيِينْ اللَّهْ».

¹⁵وْمْلِّي سْمَعْ وَاحْدْ مْنْ الْمْعْرُوضِينْ هَادْ الْكْلَامْ ݣَالْ لْيَسُوعْ: «سْعْدَاتْ هَادَاكْ اللِّي غَيَاكُلْ فْمَمْلَكَةْ اللَّهْ!».

¹⁶وْهُوَ يْجَاوْبُه: «هَادَا وَاحْدْ الرَّاجْلْ وَجّْدْ عْشَا كْبِيرْ، وْعْرَضْ عْلَى نَاسْ كْتَارْ.

¹⁷وْصِيفْطْ الْعَبْدْ دْيَالُه فْوَقْتْ الْعْشَا بَاشْ يْݣُولْ لْلْمْعْرُوضِينْ: أَجِيوْ رَاهْ كُلّْشِي مُوجُودْ!.

¹⁸وَلَكِنْ كُلّْهُمْ بْدَاوْ كَيْتّْهَرّْبُو. وْݣَالْ لِيهْ اللّْوّْلْ: رَاهْ شْرِيتْ وَاحْدْ الْفْدَّانْ، وْخَاصّْنِي نْمْشِي نْشُوفُه، غِيرْ سْمَحْ لِيَّ عَافَاكْ.

¹⁹وْݣَالْ لِيهْ لَاخُرْ: رَاهْ شْرِيتْ خَمْسَة دْ الزُّوجَاتْ دْيَالْ الْبْݣَرْ وْغَادِي دَابَا نْجَرّْبْهُمْ، غِيرْ سْمَحْ لِيَّ عَافَاكْ.

²⁰وْݣَالْ لِيهْ لَاخُرْ: أَنَا تّْزَوّْجْتْ، دَاكْشِّي عْلَاشْ مَا نْقْدَرْشْ نْجِي.

²¹وْرْجَعْ الْعَبْدْ عَنْدْ سِيدُه وْخَبّْرُه بْدَاكْشِّي اللِّي جْرَا، وْهُوَ يْتْقَلّْقْ مُولْ الدَّارْ وْݣَالْ لِيهْ: خْرُجْ دْغْيَا لْلزّْنَاقِي وْالدّْرُوبَ دْيَاوْلْ الْمْدِينَة وْدَخّْلْ لّْهْنَا الْمَسَاكِينْ وْالْمْعْطُوبِينْ وْالْعَرْجِينْ وْالْعَمْيِينْ.

²²وْݣَالْ الْعَبْدْ: آ سِيدِي رَاهْ دَاكْشِّي اللِّي ݣْلْتِي لِيَّ نْدِيرْ دْرْتُه، وْمَازَالْ كَايْنْ التِّيسَاعْ.

²³وْجَاوْبُه سِيدُه: خْرُجْ لْلطّْرْقَانْ وْلْبْرَّا دْ الْمْدِينَة وْلَزّْمْ عْلَى النَّاسْ يْدَخْلُو حْتَّى تْعْمَرْ دَارِي.

²⁴حِيتْ نْݣُولْ لِيكُمْ الْحَقّْ: رَاهْ حْتَّى شِي وَاحْدْ مْنْ هَادُوكْ اللِّي عْرَضْتْ عْلِيهُمْ وْمَا جَاوْشْ، مَا غَيْدُوقْ عْشَايَ!».

²⁵وْكَانُو جْمَاعَاتْ كْبَارْ دْ النَّاسْ غَادْيِينْ مْعَ يَسُوعْ، وْتْلَفّْتْ وْݣَالْ:

²⁶«اللِّي جَا لْعَنْدِي وْمَا بْغَانِيشْ كْتَرْ مْنْ بَّاهْ وْمُّه، وْمْرَاتُه وْوْلَادُه، وْخُوتُه وْخْوَاتَاتُه، وْكْتَرْ حْتَّى مْنْ نْفْسُه، مَا يْقْدَرْشْ يْكُونْ تْلْمِيدْ دْيَالِي.

²⁷وْاللِّي مَا كَيْهَزّْشْ الصّْلِيبْ دْيَالُه وْيْتْبَعْنِي، مَا يْقْدَرْشْ يْكُونْ تْلْمِيدْ دْيَالِي.

²⁸شْكُونْ فِيكُمْ، اللِّي كَيْبْغِي يْبْنِي بَرْجْ بْلَا مَا يْݣْلَسْ فْاللّْوّْلْ وْيْحْسَبْ الْمْصْرُوفْ بَاشْ يْشُوفْ وَاشْ قَادْرْ يْكَمّْلُه؟

²⁹وَإِلَّا رَاهْ غَيْحَطّْ السَّاسْ وْمَا يْقْدَرْشْ يْكَمّْلْ الْبْنِي، وْݣَاعْ النَّاسْ اللِّي غَيْشُوفُوهْ غَادِي يْبْدَاوْ يْضَحْكُو عْلِيهْ

³⁰وْيْݣُولُو: هَادْ الرَّاجْلْ بْدَا الْبْنِي وْمَا قْدَرْشْ يْكَمّْلُه.

³¹وْلَا وَاشْ كَايْنْ شِي مَلِكْ كَيْخْرُجْ يْتّْحَارْبْ مْعَ شِي مَلِكْ آخُرْ بْلَا مَا يْݣْلَسْ وْيْتّْشَاوْرْ مْعَ رَاسُه، وَاشْ قَادْرْ يْتّْحَارْبْ مْعَ وَاحْدْ عَنْدُه عْشْرِينْ أَلْفْ عَسْكْرِي وَاخَّا هُوَ عَنْدُه غِيرْ عَشْرَلَافْ؟

³²وْإِلَا لْقَا رَاسُه مَا قَادْرْشْ، غَادِي يْصِيفْطْ لِيهْ الْمْرْسُولِينْ دْيَالُه مَا حَدُّه بَاقِي بْعِيدْ وْيْطْلَبْ مْنُّه الْمُصَالَحَة.

³³وْهَكَّا، مَا يْقْدَرْ حْتَّى شِي حَدّْ فِيكُمْ يْكُونْ تْلْمِيدْ دْيَالِي إِلَا مَا سْمَحْشْ فْݣَاعْ دَاكْشِّي اللِّي عَنْدُه».

³⁴«الْمْلْحَة مْزْيَانَة، وَلَكِنْ إِلَا مْسَاسْتْ الْمْلْحَة، بَاشْ غَتْرْجَعْ لِيهَا الْمْلُوحِيَّة دْيَالْهَا.

³⁵رَاهَا مَا كَتْبْقَى صَالْحَة لَا لْلْأَرْضْ، وْلَا لْلْغْبَارْ، وْكَتّْرْمَى بْرَّا. اللِّي عَنْدُه شِي وْدْنِينْ بَاشْ يْسْمَعْ، يْسْمَعْ».