Read Moroccan Standard Translation لُوقَا 18 Bible Online

لُوقَا 18 - Moroccan Standard Translation bible

لُوقَا 18

¹الْفَصْلْ تْمَنْطَاشْ وْتّْكَلّْمْ مْعَاهُمْ بْوَاحْدْ الْمْتَالْ كَيْبَيّْنْ بْلِّي خَاصّْهُمْ يْدَاوْمُو عْلَى الصّْلَاة وْمَا يْمَلُّوشْ مْنّْهَا،

²وْݣَالْ: «كَانْ فْوَاحْدْ الْمْدِينَة وَاحْدْ الْقَاضِي مَا كَيْخَافْ لَا مْنْ اللَّهْ وْلَا مْنْ الْعَبْدْ.

³وْكَانْتْ فْدِيكْ الْمْدِينَة وَاحْدْ الْهْجَّالَة كَتْمْشِي لْعَنْدُه وْكَتْݣُولْ لِيهْ: خُدْ لِيَّ حَقِّي مْنْ الْعْدُو دْيَالِي!

⁴وْمُدَّة طْوِيلَة وْهُوَ مَا بْغَاشْ يْسْمَعْ لِيهَا، وَلَكِنْ مْنْ بَعْدْ ݣَالْ فْخَاطْرُه: وَاخَّا مَا كَنْخَافْ لَا مْنْ اللَّهْ وْلَا مْنْ الْعَبْدْ،

⁵غَنَاخُدْ الْحَقّْ لْهَادْ الْهْجَّالَة عْلَاحْقَّاشْ كَتْصَدّْعْنِي، وَإِلَّا رَاهَا غَتْبْقَى تْهَرّْسْ لِيَّ رَاسِي بْالْمْجِي دْيَالْهَا».

⁶وْݣَالْ الرَّبّْ: «سْمْعُو أَشْنُو ݣَالْ الْقَاضِي الضَّالْمْ،

⁷إِيوَا وَاشْ اللَّهْ مَا غَادِيشْ يَاخُدْ الْحَقّْ لْهَادُوكْ اللِّي خْتَارْهُمْ وْاللِّي كَيْطْلْبُوهْ لِيلْ وْنْهَارْ؟ وَاشْ مَا غَادِيشْ يْسْتَاجْبْ لِيهُمْ دْغْيَا؟

⁸نْݣُولْ لِيكُمْ: رَاهْ دْغْيَا غَادِي يَاخُدْ لِيهُمْ حَقّْهُمْ. وَلَكِنْ، وَاشْ وَلْدْ الْإِنْسَانْ غَيْلْقَا الْإِيمَانْ عْلَى الْأَرْضْ مْلِّي غَيْجِي؟».

⁹وْݣَالْ هَادْ الْمْتَالْ لْلنَّاسْ اللِّي كَانُو كَيْحَسْبُو رْيُوسْهُمْ عْلَى حَقّْ، وْكَيْحْتَقْرُو لْخْرِينْ:

¹⁰«هَادُو جُوجْ رْجَالْ طْلْعُو لْبِيتْ اللَّهْ بَاشْ يْصَلِّيوْ، وَاحْدْ مْنّْهُمْ فْرِّيسِي وْلَاخُرْ مْنْ مَّالِينْ الضَّرِيبَة.

¹¹وْقَفْ الْفْرِّيسِي كَيْصَلِّي وْكَيْݣُولْ فْخَاطْرُه: كَنْشَكْرْكْ آ رْبِّي، عْلَاحْقَّاشْ رَانِي مَاشِي بْحَالْ ݣَاعْ النَّاسْ الشّْفَارَا وْالضَّالْمِينْ وْالْفَاسْدِينْ، وْمَاشِي بْحَالْ هَادْ مُولْ الضَّرِيبَة!

¹²أَنَا كَنْصُومْ جُوجْ مْرَّاتْ فْالسِّيمَانَة، وْكَنْعَشّْرْ عْلَى ݣَاعْ دَاكْشِّي اللِّي كَنْرْبَحْ.

¹³أَمَّا مُولْ الضَّرِيبَة، بْقَى وَاقْفْ بْعِيدْ وْمَا قْدَرْشْ يْهَزّْ عِينِيهْ لْلسّْمَا، وَلَكِنْ كَانْ كَيْضْرَبْ عْلَى صَدْرُه وْكَيْݣُولْ: اللَّهُمَ رْحَمْنِي، أَنَا الْمُدْنِبْ!».

¹⁴نْݣُولْ لِيكُمْ: «رَاهْ هَادْ مُولْ الضَّرِيبَة هُوَ اللِّي مْشَى لْدَارُه وْاللَّهْ رَاضِي عْلِيهْ، مَاشِي هَادَاكْ الْفْرِّيسِي. عْلَاحْقَّاشْ ݣَاعْ اللِّي كَيْعَلِّي مْنْ شَانُه، شَانُه غَيْطِيحْ. وَلَكِنْ اللِّي كَيْتّْوَاضْعْ، شَانُه غَيْعْلَا».

¹⁵وْجَابُو لِيهْ شِي نَاسْ شِي دْرَارِي صْغَارْ بَاشْ يْحَطّْ يْدِّيهْ عْلِيهُمْ. وْمْلِّي شَافُو التّْلَامْدْ هَادْشِّي، خَاصْمُو عْلَى دُوكْ النَّاسْ.

¹⁶وَلَكِنْ يَسُوعْ عَيّْطْ عْلِيهُمْ لْعَنْدُه وْݣَالْ: «خَلِّيوْ الدّْرَارِي يْجِيوْ لْعَنْدِي وْمَا تْحَبْسُوهُمْشْ، عْلَاحْقَّاشْ بْحَالْ هَادُو اللِّي لِيهُمْ مَمْلَكَةْ اللَّهْ.

¹⁷وْرَانِي نْݣُولْ لِيكُمْ الْحَقّْ: اللِّي مَا كَيْقْبَلْشْ مَمْلَكَةْ اللَّهْ بْحَالْ شِي وَلْدْ صْغِيرْ، عَمّْرُه مَا غَيْدْخَلْ لِيهَا».

¹⁸وْسْوّْلُه وَاحْدْ الرَّئِيسْ: «آ الْمُعَلِّمْ الْمْزْيَانْ، أَشْنُو خَاصّْنِي نْدِيرْ بَاشْ نْوْرَتْ الْحَيَاةْ الدَّايْمَة؟».

¹⁹وْهُوَ يْجَاوْبُه يَسُوعْ: «عْلَاشْ كَتْعَيّْطْ لِيَّ آ الْمْزْيَانْ؟ رَاهْ مَا كَايْنْ حْتَّى شِي وَاحْدْ مْزْيَانْ مْنْ غِيرْ اللَّهْ بُوحْدُه،

²⁰وْرَاكْ كَتْعْرَفْ الْوْصِيَّاتْ: مَا تْفْسَدْ، مَا تْقْتَلْ، مَا تْسْرَقْ، مَا تْشْهَدْ بْالزُّورْ، تّْهَلَّى فْبَّاكْ وْمُّكْ».

²¹وْݣَالْ الرَّاجْلْ: «مْنْ صُغْرِي وْأَنَا كَنْدِيرْ بْݣَاعْ هَادْ الْأُمُورْ».

²²وْمْلِّي سْمَعْ يَسُوعْ هَادْ الْكْلَامْ، ݣَالْ لِيهْ: «مَازَالْ خَاصّْكْ حَاجَة وَحْدَة، بِيعْ ݣَاعْ دَاكْشِّي اللِّي عَنْدْكْ وْفَرّْقْ تَمَنُه عْلَى الْمَسَاكِينْ، وْغَيْكُونْ عَنْدْكْ كَنْزْ فْالسّْمَا، وْمْنْ بَعْدْ أَجِي تْبَعْنِي».

²³وْمْلِّي سْمَعْ الرَّاجْلْ هَادْ الْكْلَامْ حْزَنْ بْزَّافْ، عْلَاحْقَّاشْ كَانْ لَبَاسْ عْلِيهْ بْزَّافْ.

²⁴وْمْلِّي شَافْ يَسُوعْ بْلِّي الرَّاجْلْ حْزَنْ، ݣَالْ: «شْحَالْ صْعِيبْ عْلَى النَّاسْ اللِّي لَبَاسْ عْلِيهُمْ يْدَخْلُو لْمَمْلَكَةْ اللَّهْ!

²⁵حِيتْ دْخُولْ الجّْمَلْ مْنْ عِينْ لِيبْرَة سْهَلْ مْنْ دْخُولْ اللِّي لَبَاسْ عْلِيهْ لْمَمْلَكَةْ اللَّهْ».

²⁶وْهُمَ يْݣُولُو هَادُوكْ اللِّي سْمْعُوهْ: «عْلَى هَادْ الْحْسَابْ، شْكُونْ اللِّي غَادِي يْقْدَرْ يْنْجَا؟»

²⁷وْجَاوْبْهُمْ يَسُوعْ: «دَاكْشِّي اللِّي مَا يْقْدَرْشْ عْلِيهْ بْنَادْمْ، اللَّهْ قَادْرْ عْلِيهْ».

²⁸وْݣَالْ لِيهْ بُطْرُسْ: «هَا حْنَا خَلِّينَا كُلّْ مَا عَنْدْنَا وْتْبَعْنَاكْ!».

²⁹وْرَدّْ عْلِيهْ يَسُوعْ: «نْݣُولْ لِيكُمْ الْحَقّْ: كُلّْ وَاحْدْ سْمَحْ فْدَارُه، وْلَا فْمْرَاتُه، وْلَا فْخُوتُه، وْلَا فْبَّاهْ، وْلَا فْمُّه، وْلَا فْوْلَادُه، عْلَى قْبَلْ مَمْلَكَةْ اللَّهْ،

³⁰رَاهْ غَادِي يْتّْرَدّْ لِيهْ دَاكْشِّي اللِّي سْمَحْ فِيهْ عْلَى بْزَّافْ دْ الْمَرَّاتْ فْهَادْ الزّْمَانْ، وْفْالْآخِرَة غَتْكُونْ عَنْدُه الْحَيَاةْ الدَّايْمَة».

³¹وْدَّا تْلَامْدُه الطّْنَاشْ وْݣَالْ لِيهُمْ: «هَا حْنَا طَالْعِينْ لْأُورْشَلِيمْ، وْغَادِي يْتّْحَقّْقْ دَاكْشِّي اللِّي كْتْبُوهْ الْأَنْبِيَا عْلَى وَلْدْ الْإِنْسَانْ،

³²بْاللِّي غَادِي يْتّْسَلّْمْ لْلشّْعُوبْ اللِّي مَا كَيْعَبْدُوشْ اللَّهْ، وْغَادِي يْضَحْكُو عْلِيهْ وْيْسَبُّوهْ وْيْدْفْلُو عْلِيهْ،

³³وْغَادِي يْضْرْبُوهْ وْيْقْتْلُوهْ، وْفْالنّْهَارْ التَّالْتْ غَيْتّْبْعَتْ مْنْ الْمُوتْ».

³⁴وَلَكِنْ التّْلَامْدْ مَا فَهْمُو وَالُو مْنْ هَادْشِّي اللِّي ݣَالْ، وْكَانْ هَادْ الْكْلَامْ مَا وَاضْحْشْ عَنْدْهُمْ، وْمَا عَرْفُوشْ الْمَعْنَى دْيَالُه.

³⁵وْمْلِّي قَرّْبْ يَسُوعْ لْأَرِيحَا، كَانْ وَاحْدْ الرَّاجْلْ عْمَى ݣَالْسْ فْجَنْبْ الطّْرِيقْ كَيْسْعَى.

³⁶وْمْلِّي سْمَعْ الجّْمَاعَة دْ النَّاسْ دَايْزِينْ مْنْ حْدَاهْ، سْوّْلْ وْݣَالْ: «آشْ وَاقْعْ؟»

³⁷وْخَبّْرُوهْ بْلِّي يَسُوعْ النَّاصِرِي دَايْزْ مْنْ تْمَّ.

³⁸وْهُوَ يْغَوّْتْ وْݣَالْ: «آ يَسُوعْ بْنْ دَاوُدْ، رْحَمْنِي!».

³⁹وْنْهْضُو فِيهْ هَادُوكْ اللِّي كَانُو غَادْيِينْ فْالْقُدَّامْ بَاشْ يْسْكُتْ. وَلَكِنْ زَادْ كَيْغَوّْتْ كْتَرْ وْكَيْݣُولْ: «آ بْنْ دَاوُدْ، رْحَمْنِي!».

⁴⁰وْوْقَفْ يَسُوعْ وْآمْرْ بَاشْ يْجِيبُوهْ لِيهْ. وْمْلِّي قَرّْبْ لْعَنْدُه سْوّْلُه:

⁴¹«آشْ بْغِيتِي نْدِيرْ لِيكْ؟». وْجَاوْبُه: «بْغِيتْ نْوَلِّي نْشُوفْ آ سِيدِي!».

⁴²وْهُوَ يْݣُولْ لِيهْ يَسُوعْ: «وْلِّي كَتْشُوفْ، الْإِيمَانْ دْيَالْكْ رَاهْ شْفَاكْ!».

⁴³وْفْدِيكْ السَّاعَة وْلَّى كَيْشُوفْ وْتْبَعْ يَسُوعْ وْهُوَ كَيْعْطِي الْعَزّْ لْلَّهْ. وْمْلِّي شَافُو ݣَاعْ النَّاسْ هَادْشِّي اللِّي وْقَعْ، سَبّْحُو اللَّهْ.