Read Moroccan Standard Translation لُوقَا 19 Bible Online

لُوقَا 19 - Moroccan Standard Translation bible

لُوقَا 19

¹الْفَصْلْ تْسَعْطَاشْ وْدْخَلْ يَسُوعْ لْأَرِيحَا وْبْدَا كَيْتّْمَشَّى فِيهَا.

²وْكَانْ فِيهَا وَاحْدْ الرَّاجْلْ لَبَاسْ عْلِيهْ مْنْ الْمْسْؤُولِينْ الْكْبَارْ دْيَالْ الضَّرِيبَة سْمِيتُه زَكَّا،

³وْحَاوْلْ يْشُوفْ شْكُونْ هُوَ يَسُوعْ، وَلَكِنْ مَا قْدَرْشْ يْشُوفُه بْسْبَابْ الزّْحَامْ، عْلَاحْقَّاشْ كَانْ قْصِيرْ.

⁴وْهُوَ يْجْرِي لْلْقُدَّامْ وْطْلَعْ لْوَاحْدْ الْكَرْمَة بَاشْ يْشُوفُه، عْلَاحْقَّاشْ كَانْ غَادِي يْدُوزْ مْنْ حْدَاهَا.

⁵وْمْلِّي وْصَلْ يَسُوعْ لْتْمَّ، هْزّْ عِينِيهْ لْفُوقْ وْشَافُه، وْݣَالْ لِيهْ: «آ زَكَّا نْزَلْ دْغْيَا، عْلَاحْقَّاشْ خَاصّْنِي نْݣْلَسْ عَنْدْكْ الْيُومْ فْدَارْكْ».

⁶وْهُوَ يْنْزَلْ دْغْيَا وْرَحّْبْ بْيَسُوعْ وْهُوَ فْرْحَانْ.

⁷وْمْلِّي شَافُو النَّاسْ دَاكْشِّي اللِّي وْقَعْ، تّْشْكَّاوْ كُلّْهُمْ وْهُمَ يْݣُولُو: «دْخَلْ لْدَارْ وَاحْدْ الرَّاجْلْ مُدْنِبْ بَاشْ يْݣْلَسْ عَنْدُه».

⁸وْوْقَفْ زَكَّا وْݣَالْ لْلرَّبّْ يَسُوعْ: «آ سِيدِي، رَانِي غَادِي نْعْطِي نَصّْ دَاكْشِّي اللِّي كَنْمْلَكْ لْلْمَسَاكِينْ، وْإِلَا دِّيتْ لْشِي وَاحْدْ شِي حَاجَة، غَادِي نْرَدّْ لِيهْ دَاكْشِّي اللِّي دِّيتْ لِيهْ عْلَى رْبْعَة دْ الْمَرَّاتْ».

⁹وْهُوَ يْݣُولْ لِيهْ يَسُوعْ: «الْيُومْ دْخَلْ النّْجَا لْهَادْ الدَّارْ، حِيتْ هَادْ الرَّاجْلْ حْتَّى هُوَ مْنْ وْلَادْ إِبْرَاهِيمْ.

¹⁰حِيتْ وَلْدْ الْإِنْسَانْ جَا بَاشْ يْقَلّْبْ عْلَى النَّاسْ الْمُّوضّْرِينْ وْيْنَجِّيهُمْ».

¹¹وْمْلِّي كَانُو كَيْسَمْعُو هَادْشِّي، زَادْ عَاوْدْ لِيهُمْ وَاحْدْ الْمْتَالْ، عْلَاحْقَّاشْ كَانْ قْرِيبْ لْأُورْشَلِيمْ، وْكَانُو كَيْفَكّْرُو بْلِّي مَمْلَكَةْ اللَّهْ غَتْبَانْ دِيكْ السَّاعَة،

¹²وْهُوَ يْݣُولْ: «سَافْرْ وَاحْدْ الْأَمِيرْ لْبْلَادْ بْعِيدَة بَاشْ يْوَلِّي مَلِكْ عْلِيهَا، وْيْرْجَعْ مْنْ بَعْدْ.

¹³وْعَيّْطْ عْلَى عَشْرَة دْ الْعْبِيدْ دْيَالُه، وْعْطَى لْكُلّْ وَاحْدْ مْنّْهُمْ مْيَةْ دِينَارْ وْݣَالْ لِيهُمْ: بِيعُو وْشْرِيوْ بْهَادْ الْفْلُوسْ حْتَّى نْرْجَعْ.

¹⁴وْكَانُو الشَّعْبْ دْيَالُه مَا كَيْحَمْلُوهْشْ، وْصِيفْطُو وْرَاهْ مْرْسُولِينْ بَاشْ يْݣُولُو: مَا بْغِينَاشْ هَادْ الرَّاجْلْ يْكُونْ مَلِكْ عْلِينَا.

¹⁵وْبَعْدْمَا وْلَّى مَلِكْ، رْجَعْ وْآمْرْ بَاشْ يْجِيوْ لْعَنْدُه الْعْبِيدْ اللِّي عْطَاهُمْ الْفْلُوسْ، بَاشْ يْعْرَفْ شْحَالْ رْبْحُو مْنْ الْبِيعْ وْالشّْرَا.

¹⁶وْدْخَلْ اللّْوّْلْ وْݣَالْ: آ سِيدِي، مْيَةْ دِينَارْ دْيَالْكْ جَابْتْ أَلْفْ دِينَارْ.

¹⁷وْݣَالْ لِيهْ: مَا عَنْدِي مَا نْسَالْكْ، نْتَ عَبْدْ مْزْيَانْ! عْلَاحْقَّاشْ كْنْتِ أَمِينْ فْالْقْلِيلْ، غَنْعْطِيكْ السُّلْطَة عْلَى عَشْرَة دْ الْمْدُونْ.

¹⁸وْدْخَلْ التَّانِي وْݣَالْ: آ سِيدِي، مْيَةْ دِينَارْ دْيَالْكْ جَابْتْ خَمْسْمِيَّةْ دِينَارْ.

¹⁹وْهُوَ يْݣُولْ لِيهْ: وْنْتَ غَتْوَلِّي حَاكْمْ عْلَى خَمْسَة دْ الْمْدُونْ.

²⁰وْدْخَلْ لَاخُرْ وْݣَالْ: آ سِيدِي، هَا هِيَ الْمْيَةْ دِينَارْ اللِّي عْطِيتِينِي، خْبِّيتْهَا عَنْدِي فْوَاحْدْ الْمَنْدِيلْ،

²¹رَانِي كْنْتْ خَايْفْ مْنّْكْ، عْلَاحْقَّاشْ نْتَ رَاجْلْ قَاسْحْ كَتَاخُدْ دَاكْشِّي اللِّي مَا خْزَنْتِيهْشْ، وْكَتْحْصَدْ دَاكْشِّي اللِّي مَا زْرَعْتِيهْشْ.

²²وْهُوَ يْݣُولْ لِيهْ الْمَلِكْ: مْنْ كْلَامْكْ غَادِي نْحْكَمْ عْلِيكْ آ هَادْ الْعَبْدْ الْقْبِيحْ. عْرَفْتِي بْلِّي أَنَا رَاجْلْ قَاسْحْ كَنَاخْدْ دَاكْشِّي اللِّي مَا خْزَنْتْشْ، وْكَنْحْصَدْ دَاكْشِّي اللِّي مَا زْرَعْتْشْ،

²³إِيوَا عْلَاشْ دِيكْ السَّاعَة مَا حَطِّيتِيشْ فْلُوسِي عَنْدْ هَادُوكْ اللِّي كَيْبِيعُو وْيْشْرِيوْ فْالْفْلُوسْ؟ بَاشْ مْلِّي نْرْجَعْ نْرَدّْهُمْ مْعَ الرّْبَحْ دْيَالْهُمْ.

²⁴وْمْنْ بَعْدْ ݣَالْ لْلنَّاسْ اللِّي كَانُو وَاقْفِينْ تْمَّ: حَيّْدُو لِيهْ الْمْيَةْ دِينَارْ وْعْطِيوْهَا لْمُولْ أَلْفْ دِينَارْ.

²⁵وْݣَالُو لِيهْ: آ سِيدِي، رَاهْ عَنْدُه أَلْفْ دِينَارْ!

²⁶وْهُوَ يْݣُولْ لِيهُمْ: رَاهْ اللِّي عَنْدُه غَيْتّْعْطَى لِيهْ. وْاللِّي مَا عَنْدُوشْ، حْتَّى دَاكْشِّي اللِّي عَنْدُه غَادِي يْتّْخَادْ مْنُّه.

²⁷أَمَّا عْدْيَانِي اللِّي مَا بْغَاوْنِيشْ نْكُونْ مَلِكْ عْلِيهُمْ، جِيبُوهُمْ لّْهْنَا وْقْتْلُوهُمْ قُدَّامِي».

²⁸ݣَالْ يَسُوعْ هَادْ الْكْلَامْ وْكَمّْلْ طْرِيقُه وْطْلَعْ لْأُورْشَلِيمْ.

²⁹وْمْلِّي قَرّْبْ مْنْ بَيْتْ فَاجِي وْبَيْتْ عَنْيَا، حْدَا الجّْبَلْ اللِّي سْمِيتُه جْبَلْ الزِّيتُونْ، صِيفْطْ جُوجْ مْنْ تْلَامْدُه،

³⁰وْݣَالْ لِيهُمْ: «سِيرُو لْدَاكْ الدُّوَّارْ اللِّي قُدَّامْكُمْ، وْمْلِّي تْدَخْلُو لِيهْ غَتْلْقَاوْ وَاحْدْ الدّْحْشْ مْرْبُوطْ عَمّْرْ شِي حَدّْ مَا رْكَبْ عْلِيهْ، حْلُّو الرّْبَاطْ دْيَالُه وْجِيبُوهْ.

³¹وْإِلَا سْوّْلْكُمْ شِي وَاحْدْ: عْلَاشْ كَتْحَلُّو الرّْبَاطْ دْيَالُه؟ ݣُولُو لِيهْ: رَاهْ الرَّبّْ مْحْتَاجْ لِيهْ».

³²وْمْشَاوْ التّْلَامْدْ اللِّي صِيفْطْهُمْ وْلْقَاوْ دَاكْشِّي كِمَا ݣَالْ لِيهُمْ يَسُوعْ.

³³وْفْالْوَقْتْ فَاشْ كَانُو كَيْحَلُّو الرّْبَاطْ دْيَالْ الدّْحْشْ، ݣَالُو لِيهُمْ مَّالِيهْ: «عْلَاشْ كَتْحَلُّو الرّْبَاطْ دْيَالْ الدّْحْشْ؟».

³⁴وْهُمَ يْجَاوْبُوهُمْ: «رَاهْ الرَّبّْ مْحْتَاجْ لِيهْ».

³⁵وْجَابُو التّْلَامْدْ الدّْحْشْ لْيَسُوعْ، وْحَطُّو فُوقْ مْنُّه حْوَايْجْهُمْ، وْعَاوْنُو يَسُوعْ يْرْكَبْ عْلِيهْ.

³⁶وْفْالْوَقْتْ فَاشْ كَانْ غَادِي، بْدَاوْ النَّاسْ كَيْفَرّْشُو لِيهْ حْوَايْجْهُمْ فْالطّْرِيقْ.

³⁷وْمْلِّي بْدَا كَيْقَرّْبْ لْلْهَبْطَة دْيَالْ جْبَلْ الزِّيتُونْ، بْدَاتْ الجّْمَاعَة دْ التّْلَامْدْ كَيْهَلْلُّو، وْكَيْسَبّْحُو اللَّهْ عْلَى حَرّْ جَهْدْهُمْ، بْسْبَابْ ݣَاعْ الْمُعْجِزَاتْ اللِّي شَافُو.

³⁸وْكَانُو كَيْݣُولُو: «مْبْرُوكْ الْمَلِكْ اللِّي جَايْ بْإِسْمْ الرَّبّْ! الْهْنَا وْالْعَزّْ فْالسّْمَا الْعَالْيَة!».

³⁹وْݣَالُو لِيهْ شِي فْرِّيسِيِّينْ مْنْ الجّْمَاعَة دْ النَّاسْ: «آ سِيدِي، سَكّْتْ التّْلَامْدْ دْيَاوْلْكْ!».

⁴⁰وْجَاوْبْهُمْ يَسُوعْ وْݣَالْ: «نْݣُولْ لِيكُمْ: إِلَا سْكْتُو هَادُو، رَاهْ الْحْجَرْ غَادِي يْغَوّْتْ!».

⁴¹وْمْلِّي قَرّْبْ مْنْ الْمْدِينَة شَافْهَا وْبْكَى عْلِيهَا،

⁴²وْهُوَ يْݣُولْ: «تْمَنِّيتْ كُونْ عْرَفْتِي الْيُومْ طْرِيقْ الْهْنَا! وَلَكِنْ دَابَا رَاهْ مْضَرّْݣْ عْلَى عِينِيكْ.

⁴³عْلَاحْقَّاشْ مَازَالْ غَادِي يْجِي وَاحْدْ الْوَقْتْ غَيْضَوّْرُو عْلِيكْ عْدْيَانْكْ سُورْ، وْيْحَبْسُوكْ، وْيْتّْجَمْعُو عْلِيكْ مْنْ كُلّْ جِهَة،

⁴⁴وْغَادِي يْسَحْقُوكْ نْتِ وْوْلَادْكْ اللِّي سَاكْنِينْ فِيكْ، وْمَا غَيْخَلِّيوْ فِيكْ حْتَّى حَجْرَة وَاقْفَة، عْلَاحْقَّاشْ مَا عْرَفْتِيشْ الْوَقْتْ اللِّي فِيهْ جَا اللَّهْ بَاشْ يْنَجِّيكْ».

⁴⁵وْمْلِّي دْخَلْ يَسُوعْ لْبِيتْ اللَّهْ، بْدَا كَيْجَرِّي عْلَى هَادُوكْ اللِّي كَيْبِيعُو فِيهْ،

⁴⁶وْكَيْݣُولْ لِيهُمْ: «رَاهْ مْكْتُوبْ فْكْتَابْ اللَّهْ: دَارِي هِيَ دَارْ لْلصّْلَاة، وْنْتُمَ رْدِّيتُوهَا غَارْ دْيَالْ الشّْفَارَا!».

⁴⁷وْكَانْ كَيْعَلّْمْ كُلَّ نْهَارْ فْبِيتْ اللَّهْ، وْكَانُو الرُّؤَسَا دْ رْجَالْ الدِّينْ، وْالْعُلَمَا دْ الشّْرَعْ، وْالزُّعَمَا دْ الشَّعْبْ بَاغْيِينْ يْقْتْلُوهْ،

⁴⁸وْمَا لْقَاوْشْ كِيفَاشْ يْدِيرُو، حِيتْ ݣَاعْ النَّاسْ كَانُو كَيْعْجَبْهُمْ يْتّْصَنّْتُو لِيهْ.