Read Moroccan Standard Translation لُوقَا 2 Bible Online

لُوقَا 2 - Moroccan Standard Translation bible

لُوقَا 2

¹الْفَصْلْ التَّانِي وْفْدِيكْ لِيَّامْ آمْرْ الْقَيْصَرْ أُوغُسْطُسْ بَاشْ يْتّْحْصَاوْ ݣَاعْ سُكَّانْ الْإِمْبْرَاطُورِيَّة.

²وْكَانْ هَادَا هُوَ أَوَّلْ إِحْصَاءْ مْلِّي كَانْ كِيرِينِيُوسْ حَاكْمْ عْلَى سُورِيَا،

³وْمْشَى كُلّْ وَاحْدْ لْلْمْدِينَة دْيَالُه بَاشْ يْتّْقَيّْدْ فِيهَا.

⁴وْطْلَعْ يُوسْفْ حْتَّى هُوَ مْنْ مْدِينْةْ النَّاصِرَة اللِّي فْالْجَلِيلْ، وْمْشَى لْمْدِينْةْ دَاوُدْ، بِيتْ لَحْمْ اللِّي فْالْيَهُودِيَّة، حِيتْ كَانْ مْنْ عَائِلْةْ دَاوُدْ وْقْبِيلْتُه،

⁵بَاشْ يْتّْقَيّْدْ مْعَ مَرْيَمْ خَطِيبْتُه اللِّي كَانْتْ حَامْلَة.

⁶وْمْلِّي كَانُو فْبِيتْ لَحْمْ، وْصْلَاتْ وَقْتْ الْوْلَادَة دْيَالْتْهَا،

⁷وْوَلْدَاتْ وَلْدْهَا الْبْكَرْ وْݣَمّْطَاتُه وْنَعّْسَاتُه فْالْبْلَاصَة دْيَالْ الْعَلْفْ، حِيتْ مَا كَانْتْشْ عَنْدْهُمْ بْلَاصَة فْالْفَنْدَقْ.

⁸وْكَانُو فْدِيكْ الجِّهَة شِي سْرَّاحَا كَيْبَاتُو عْلَى بْرَّا، وْكَيْتّْنَاوْبُو عْلَى الْعْسَّة دْ الْغْنَمْ دْيَالْهُمْ بْاللِّيلْ.

⁹وْبَانْ لِيهُمْ مَلَاكْ مْنْ عَنْدْ الرَّبّْ، وْضْوَّا الْعَزّْ دْ الرَّبّْ عْلِيهُمْ وْتّْخَلْعُو بْزَّافْ،

¹⁰وْݣَالْ لِيهُمْ الْمَلَاكْ: «مَا تْخَافُوشْ! حِيتْ رَانِي جَايْبْ لِيكُمْ خْبَارْ مْزْيَانَة غَتْفَرّْحْ الشَّعْبْ كُلُّه:

¹¹رَاهْ الْيُومْ تّْوْلَدْ لِيكُمْ فْمْدِينْةْ دَاوُدْ مُنَجِّي اللِّي هُوَ الْمَسِيحْ الرَّبّْ.

¹²وْهَادِي هِيَ الْعَلَامَة اللِّي كَنْعْطِيكُمْ: غَادِي تْلْقَاوْ وَلْدْ مْݣَمّْطْ وْنَاعْسْ فْالْبْلَاصَة دْيَالْ الْعَلْفْ».

¹³وْعْلَى غَفْلَة، بَانُو مْعَ الْمَلَاكْ جْمَاعَة مْنْ الْجِيشْ دْيَالْ السّْمَا، كَيْسَبّْحُو اللَّهْ وْكَيْݣُولُو:

¹⁴«الْعَزّْ لْلَّهْ فْالسّْمَا الْعَالْيَة، وْعْلَى الْأَرْضْ الْهْنَا لْهَادُوكْ اللِّي رَاضِي عْلِيهُمْ».

¹⁵وْمْلِّي خْلَّاوْهُمْ الْمَلَايْكَة وْرْجْعُو لْلسّْمَا، ݣَالُو السّْرَّاحَا لْبَعْضِيَّاتْهُمْ: «أَجِيوْ نْمْشِيوْ دَابَا لْبِيتْ لَحْمْ، وْنْشُوفُو هَادْشِّي اللِّي وْقَعْ اللِّي عْلَمْنَا بِيهْ الرَّبّْ».

¹⁶وْمْشَاوْ بْالزّْرْبَة، وْلْقَاوْ مَرْيَمْ وْيُوسْفْ، وْالْوَلْدْ نَاعْسْ فْالْبْلَاصَة دْيَالْ الْعَلْفْ.

¹⁷وْمْلِّي شَافُوهْ، عَاوْدُو دَاكْشِّي اللِّي ݣَالْ لِيهُمْ الْمَلَاكْ عْلَى هَادْ الْوَلْدْ،

¹⁸وْݣَاعْ هَادُوكْ اللِّي سْمْعُو كْلَامْ السّْرَّاحَا تّْعَجّْبُو مْنْ هَادْ الْأُمُورْ.

¹⁹وَلَكِنْ مَرْيَمْ كَانْتْ كَتْخَلِّي ݣَاعْ هَادْ الْأُمُورْ فْخَاطْرْهَا وْكَتّْمَعّْنْ فِيهُمْ فْقَلْبْهَا.

²⁰وْرْجْعُو السّْرَّاحَا وْهُمَ كَيْعْطِيوْ الْعَزّْ لْلَّهْ وْكَيْسَبّْحُوهْ عْلَى كُلّْ مَا سْمْعُو وْشَافُو، حِيتْ ݣَاعْ دَاكْشِّي اللِّي وْقَعْ كَانْ كِمَا ݣَالْ لِيهُمْ الْمَلَاكْ.

²¹وْمْلِّي كْمْلَاتْ تْمَنْ يَّامْ، وْجَا الْوَقْتْ بَاشْ يْتّْخَتّْنْ الْوَلْدْ، تّْسَمَّى يَسُوعْ، كِيفْ سْمَّاهْ الْمَلَاكْ قْبَلْ مَا تْحْمَلْ بِيهْ مَرْيَمْ.

²²وْمْلِّي كْمْلَاتْ لِيَّامْ دْيَالْ التَّطْهِيرْ دْيَالْهُمْ كِمَا كَايْنْ فْشْرَعْ مُوسَى، دَّاوْ يَسُوعْ لْأُورْشَلِيمْ بَاشْ يْقَدّْمُوهْ لْلرَّبّْ،

²³كِمَا مْكْتُوبْ فْشْرَعْ الرَّبّْ اللِّي كَيْݣُولْ: «كُلّْ دْكَرْ بْكَرْ هُوَ دْيَالْ الرَّبّْ»،

²⁴وْبَاشْ يْقَدّْمُو الدّْبِيحَة كِمَا تّْݣَالْ فْشْرَعْ الرَّبّْ: «جُوجْ طْيُورْ دْيَالْ الْيَمَامْ وْلَا جُوجْ فْرَاخْ دْيَالْ الْحْمَامْ».

²⁵وْكَانْ فْأُورْشَلِيمْ وَاحْدْ الرَّاجْلْ صَالِحْ وْمْتَّاقِي اللَّهْ سْمِيتُه سِمْعَانْ، كَيْتّْسَنَّى النّْجَا دْيَالْ شَعْبْ إِسْرَائِيلْ، وْكَانْ الرُّوحْ الْقُدُسْ عْلِيهْ.

²⁶وْعْرَفْ مْنْ الرُّوحْ الْقُدُسْ بْلِّي مَا غَيْمُوتْ حْتَّى يْشُوفْ مَسِيحْ الرَّبّْ.

²⁷وْبْالرُّوحْ الْقُدُسْ جَا لْبِيتْ اللَّهْ. وْمْلِّي جَابُو الْوَالِدِينْ وَلْدْهُمْ يَسُوعْ بَاشْ يْعْطِيوْ عْلِيهْ دَاكْشِّي اللِّي مْفْرُوضْ فْالشّْرَعْ،

²⁸هَزُّه سِمْعَانْ فْدْرَاعُه وْبَارْكْ اللَّهْ وْݣَالْ:

²⁹«وْدَابَا آ رْبِّي، طْلَقْ سْرَاحْ الْعَبْدْ دْيَالْكْ عْلَى خِيرْ كِيفْ قَاوْلْتِيهْ.

³⁰عْلَاحْقَّاشْ عِينِيَّ شَافُو النّْجَا دْيَالْكْ،

³¹اللِّي وَجّْدْتِيهْ قُدَّامْ الشّْعُوبْ كُلّْهُمْ:

³²نُورْ يْهْدِي الشّْعُوبْ اللِّي مَا كَيْعَبْدُوشْ اللَّهْ وْعَزّْ لْشَعْبَكْ إِسْرَائِيلْ».

³³وْتّْعَجّْبْ بَّاهْ وْمُّه مْنْ دَاكْشِّي اللِّي ݣَالْ سِمْعَانْ عْلِيهْ،

³⁴وْبَارْكْهُمْ سِمْعَانْ وْݣَالْ لْمَرْيَمْ مُّه: «هَادْ الْوَلْدْ تّْخْتَارْ بَاشْ يْكُونْ سْبَابْ لْبْزَّافْ دْ النَّاسْ فْإِسْرَائِيلْ بَاشْ يْطِيحُو، وْلْنَاسْ خْرِينْ بَاشْ يْنُوضُو. وْبَاشْ يْكُونْ عَلَامَة كَيْضَادُّوهَا بْزَّافْ دْ النَّاسْ.

³⁵وْهَكَّا غَادِي تْبَانْ الْأَفْكَارْ الْمْخَبّْيَة دْيَالْ نَاسْ كْتَارْ. وْحْتَّى نْتِ آ مَرْيَمْ، غَادِي يْدْخُلْ سِيفْ الْحُزْنْ فْنَفْسْكْ».

³⁶وْكَانْتْ تْمَّ وَاحْدْ النّْبِيَّة كْبِيرَة فْالْعْمَرْ، سْمِيتْهَا حَنَّة بَنْتْ فَنُوئِيلْ، مْنْ قْبِيلْةْ أَشِيرْ، تّْزَوّْجَاتْ وْهِيَ عْزْبَة وْعَاشْتْ مْعَ رَاجْلْهَا سْبَعْ سْنِينْ،

³⁷وْمْنْ بَعْدْ مَا مَاتْ، بْقَاتْ هْجَّالَة حْتَّى وْلَّى فْعْمَرْهَا رْبْعَة وْتْمَانِينْ عَامْ، وْعَمّْرْهَا مَا خْرْجَاتْ مْنْ بِيتْ اللَّهْ، مْدَاوْمَة فِيهْ عْلَى الصّْيَامْ وْالصّْلَاة لِيلْ وْنْهَارْ.

³⁸وْفْدِيكْ السَّاعَة جَاتْ وْقَرّْبَاتْ لْعَنْدْهُمْ وْشْكْرَاتْ اللَّهْ، وْتّْكَلّْمَاتْ عْلَى الْوَلْدْ يَسُوعْ مْعَ ݣَاعْ هَادُوكْ اللِّي كَيْتّْسْنَّاوْ اللَّهْ يْفْدِي أُورْشَلِيمْ.

³⁹وْمْلِّي كَمّْلْ يُوسْفْ وْمَرْيَمْ ݣَاعْ دَاكْشِّي اللِّي مْفْرُوضْ عْلِيهُمْ فْشْرَعْ الرَّبّْ، رْجْعُو لْمْدِينْتْهُمْ النَّاصِرَة فْالْجَلِيلْ.

⁴⁰وْكَانْ الْوَلْدْ كَيْكْبَرْ وْكَيْتّْقُوَّى وْكَيْتّْعَمّْرْ بْالْحْكْمَة، وْنِعْمَةْ اللَّهْ كَانْتْ عْلِيهْ.

⁴¹وْكَانُو وَالِدِينْ يَسُوعْ كَيْمْشِيوْ كُلّْ عَامْ لْأُورْشَلِيمْ فْعِيدْ الْفِصْحْ[١].

⁴²وْمْلِّي وْلَّاتْ عَنْدْ يَسُوعْ طْنَاشْرْ عَامْ، طْلَعْ مْعَاهُمْ لْأُورْشَلِيمْ كِيفْ كَانْتْ الْعَادَة فْالْعِيدْ.

⁴³وْبَعْدْمَا كْمْلَاتْ يَّامْ الْعِيدْ، رْجْعُو وَالِدِينْ يَسُوعْ، وْبْقَى هُوَ فْأُورْشَلِيمْ، بْلَا مَا يْعَرْفُو وَالِدِيهْ.

⁴⁴وْحْسَابْ لِيهُمْ بْلِّي هُوَ مْعَ النَّاسْ الْمْسَافْرِينْ مْعَاهُمْ. وْمْنْ بَعْدْ مَا كَمّْلُو نْهَارْ دْ الْمْشِي بْدَاوْ كَيْقَلّْبُو عْلِيهْ عَنْدْ الْعَائِلَة وْالْمْعَارْفْ دْيَالْهُمْ،

⁴⁵وْمْلِّي مَا لْقَاوْهْشْ، رْجْعُو لْأُورْشَلِيمْ يْقَلّْبُو عْلِيهْ.

⁴⁶وْمْنْ بَعْدْ تْلْتْ يَّامْ، لْقَاوْهْ فْبِيتْ اللَّهْ ݣَالْسْ فْوَسْطْ الْعُلَمَا دْ الشّْرَعْ، كَيْتّْصَنّْتْ لِيهُمْ وْكَيْسْوّْلْهُمْ.

⁴⁷وْݣَاعْ هَادُوكْ اللِّي سْمْعُوهْ تّْعَجّْبُو مْنْ الدَّكَاءْ وْالْأَسْئِلَة دْيَالُه.

⁴⁸وْمْلِّي شَافُوهْ وَالِدِيهْ تّْعَجّْبُو. وْݣَالْتْ لِيهْ مُّه: «عْلَاشْ آ وْلْدِي دْرْتِي لِينَا هَادْشِّي؟ رَاهْ أَنَا وْبَّاكْ كْنَّا كَنْقَلّْبُو عْلِيكْ وْحْنَا مْخْلُوعِينْ».

⁴⁹وْجَاوْبْهُمْ يَسُوعْ: «عْلَاشْ كَتْقَلّْبُو عْلِيَّ؟ وَاشْ مَا كَتْعَرْفُوشْ بْلِّي خَاصّْنِي نْكُونْ فْدَارْ بَّا؟».

⁵⁰وَلَكِنْ مَا فَهْمُوشْ دَاكْشِّي اللِّي ݣَالْ لِيهُمْ.

⁵¹وْرْجَعْ مْعَاهُمْ لْلنَّاصِرَة، وْكَانْ كَيْطِيعْهُمْ. وْخْبَّاتْ مُّه ݣَاعْ هَادْ الْأُمُورْ فْقَلْبْهَا.

⁵²وْكَانْ يَسُوعْ كَيْكْبَرْ وْكَيْزِيدْ فْالْحْكْمَة وْالْقُبُولْ عَنْدْ اللَّهْ وْالنَّاسْ.