Read Moroccan Standard Translation لُوقَا 21 Bible Online

لُوقَا 21 - Moroccan Standard Translation bible

لُوقَا 21

¹الْفَصْلْ وَاحْدْ وْعْشْرِينْ وْهْزّْ يَسُوعْ عِينِيهْ، وْهُوَ يْشُوفْ الْأَغْنِيَا كَيْحَطُّو الْهْدِيَّاتْ دْيَالْهُمْ فْصْنْدُوقْ بِيتْ اللَّهْ.

²وْشَافْ وَاحْدْ الْهْجَّالَة مَا فْحَالْهَاشْ كَتْحَطّْ جُوجْ شْقْفَاتْ دْيَالْ الْفْلُوسْ فْالصّْنْدُوقْ،

³وْهُوَ يْݣُولْ: «نْݣُولْ لِيكُمْ الْحَقّْ: هَادْ الْهْجَّالَة اللِّي مَا فْحَالْهَاشْ حْطَّاتْ كْتَرْ مْنْ النَّاسْ لْخْرِينْ كُلّْهُمْ.

⁴حِيتْ هُمَ مْنْ دَاكْشِّي اللِّي شَايْطْ عْلِيهُمْ حَطُّو الْهْدِيَّاتْ. وَلَكِنْ هِيَ وَاخَّا مَا فْحَالْهَاشْ حْطَّاتْ ݣَاعْ دَاكْشِّي اللِّي عَنْدْهَا وْاللِّي بِيهْ كَتْعِيشْ».

⁵وْمْلِّي كَانُو شِي وْحْدِينْ كَيْتّْكَلّْمُو عْلَى بِيتْ اللَّهْ بْلِّي مْزَوّْقْ بْالْحْجَرْ الْمْزْيَانْ وْبْالْحْوَايْجْ الْمْهْدِيِّينْ لْلَّهْ، ݣَالْ يَسُوعْ:

⁶«غَيْجِي وَاحْدْ الْوَقْتْ مَا غَتْبْقَى فِيهْ حْتَّى حَجْرَة فُوقْ حَجْرَة مْنْ هَادْشِّي اللِّي كَتْشُوفُوهْ، كُلّْشِي غَادِي يْرِيبْ».

⁷وْسْوّْلُوهْ: «إِيمْتَى غَيْوْقَعْ هَادْشِّي آ سِيدِي؟ وْأَشْنُو غَتْكُونْ الْعَلَامَة مْلِّي غَتْقَرّْبْ هَادْ الْأُمُورْ تْوْقَعْ؟»

⁸وْجَاوْبْهُمْ: «رْدُّو بَالْكُمْ لَيْغَلّْطْكُمْ شِي وَاحْدْ! غَيْجِيوْ بْزَّافْ دْ النَّاسْ بْالْإِسْمْ دْيَالِي، وْغَيْݣُولُو: أَنَا هُوَ! وْالْوَقْتْ قَرّْبْ! بْحَالْ هَادُو مَا تّْبْعُوهُمْشْ.

⁹وْمْلِّي تْسَمْعُو بْخْبَارْ الْحُرُوبْ وْالْفْتْنَة مَا تّْخَلْعُوشْ، عْلَاحْقَّاشْ هَادْشِّي لَابْدَّ مَا يْوْقَعْ فْاللّْوّْلْ، وَلَكِنْ مَا غَيْكُونْشْ هَادَاكْ هُوَ اللّْخْرْ دْ الزّْمَانْ».

¹⁰وْمْنْ بَعْدْ ݣَالْ لِيهُمْ: «غَادِي يْهْجَمْ شَعْبْ عْلَى شَعْبْ وْمَمْلَكَة عْلَى مَمْلَكَة،

¹¹وْغَيْطْرَاوْ زَلَازِلْ قْوِيِّينْ، وْغَيْجِي الجُّوعْ وْغَتْكْتَرْ الْأَمْرَاضْ الْخَايْبَة فْبْزَّافْ دْيَالْ الْبْلَايْصْ، وْغَيْوَقْعُو شِي حْوَايْجْ كَيْخَلْعُو، وْغَيْبَانُو عَلَامَاتْ كْبَارْ فْالسّْمَا.

¹²وْقْبَلْ مْنْ هَادْشِّي كَامْلْ، غَيْشَدُّوكُمْ النَّاسْ وْغَيْتّْعَدَّاوْ عْلِيكُمْ وْغَيْدِّيوْكُمْ لْلْمَحَاكِمْ دْ الشّْرَعْ، وْغَيْدَخّْلُوكُمْ لْلْحْبَاسَاتْ، وْغَيْوَقّْفُوكُمْ قُدَّامْ الْمُلُوكْ وْالْحُكَّامْ عْلَى وْدّْ الْإِسْمْ دْيَالِي.

¹³وْغَتْكُونْ هَادِي وْجْبَة لِيكُمْ بَاشْ تْشَهْدُو لِيَّ.

¹⁴مَا تْرَفْدُوشْ الْهَمّْ كِيفَاشْ تْدَافْعُو عْلَى رْيُوسْكُمْ،

¹⁵حِيتْ غَادِي نْعْطِيكُمْ الْكْلَامْ وْالْحْكْمَة اللِّي مَا يْقَدْرُوشْ ݣَاعْ عْدْيَانْكُمْ يْرَدُّو عْلِيهَا وْلَا يْضَادُّوهَا.

¹⁶وْرَاهْ حْتَّى وَالِدِيكُمْ وْخُوتْكُمْ وْعَائِلَاتْكُمْ وْصْحَابْكُمْ غَيْسَلّْمُوكُمْ لْلْمَخْزَنْ، وْغَيْقْتْلُو مْنّْكُمْ شِي وْحْدِينْ،

¹⁷وْغَيْكَرْهُوكُمْ ݣَاعْ النَّاسْ عْلَى وْدّْ الْإِسْمْ دْيَالِي.

¹⁸وَلَكِنْ حْتَّى شَعْرَة وَحْدَة مْنْ رْيُوسْكُمْ مَا غَتّْهْلَكْ.

¹⁹وْبْالصّْبَرْ دْيَالْكُمْ غَتْنَجِّيوْ حْيَاتْكُمْ».

²⁰«وْمْلِّي تْشُوفُو أُورْشَلِيمْ ضَايْرْ بِيهَا الْعَسْكَرْ مْنْ كُلّْ جِهَة، عَرْفُو بْلِّي قَرّْبَاتْ تْرِيبْ.

²¹وْدِيكْ السَّاعَة اللِّي كَانْ فْبْلَادْ الْيَهُودِيَّة خَاصُّه يْهْرَبْ لْلجّْبَالْ، وْاللِّي كَانْ فْالْمْدِينَة خَاصُّه يْخْرَجْ مْنّْهَا، وْاللِّي كَانْ فْالْفْدَادْنْ مَا يْدْخَلْشْ لْلْمْدِينَة،

²²عْلَاحْقَّاشْ غَتْكُونْ هَادِي هِيَ لِيَّامْ دْيَالْ الْإِنْتِقَامْ، اللِّي فِيهَا غَتّْحَقّْقْ ݣَاعْ الْأُمُورْ اللِّي تّْكَتْبَاتْ فْكْتَابْ اللَّهْ.

²³وْيَا وِيلْ الْعْيَالَاتْ الْحَامْلَاتْ وْاللِّي كَيْرَضّْعُو فْدِيكْ لِيَّامْ! عْلَاحْقَّاشْ غَادِي يْضِيقْ الْحَالْ عْلَى هَادْ الْبْلَادْ وْغَيْنْزَلْ غَضَبْ اللَّهْ عْلَى هَادْ الشَّعْبْ.

²⁴وْغَيْمُوتُو بْقْطِيعْ السِّيفْ، وْغَيْتّْقَبْطُو وْيْدِّيوْهُمْ مْسْجُونِينْ لْݣَاعْ الْبْلْدَانْ. وْالشّْعُوبْ اللِّي مَا كَيْعَبْدُوشْ اللَّهْ غَيْرَيّْبُو أُورْشَلِيمْ حْتَّى يْسَالِي وَقْتْ هَادْ الشّْعُوبْ.

²⁵وْغَيْبَانُو عَلَامَاتْ فْالشّْمْسْ وْالْقَمَرْ وْالنّْجُومْ، وْغَيْتْهَوّْلُو شْعُوبْ الْأَرْضْ وْغَيْحِيرُو بْسْبَابْ صْدَاعْ الْبْحَرْ وْمَّاجُه.

²⁶وْغَيْبْدَاوْ النَّاسْ يْسَخْفُو مْنْ الْخُوفْ وْمْنْ دَاكْشِّي اللِّي كَيْتّْسْنَّاوْهْ يْوْقَعْ فْالدّْنْيَا، عْلَاحْقَّاشْ الْقُوَّاتْ اللِّي فْالسّْمَا غَتّْزَعْزَعْ.

²⁷وْفْدَاكْ الْوَقْتْ غَيْشُوفُو النَّاسْ وَلْدْ الْإِنْسَانْ جَايْ فْسْحَابَة بْالْقُوَّة وْالْعَزّْ الْكْبِيرْ.

²⁸مْلِّي يْبْدَاوْ هَادْ الْأُمُورْ يْوَقْعُو، وْقْفُو وْهْزُّو رْيُوسْكُمْ عْلَاحْقَّاشْ النّْجَا دْيَالْكُمْ قَرّْبْ».

²⁹وْعَاوْدْ لِيهُمْ هَادْ الْمْتَالْ: «شُوفُو الْكَرْمَة وْݣَاعْ الشّْجَرْ لَاخُرْ.

³⁰مْلِّي كَتْبْدَا تْدِيرْ الْوْرَاقْ، كَتْعَرْفُو بْلِّي الصِّيفْ قَرّْبْ.

³¹إِيوَا مْلِّي تْشُوفُو حْتَّى نْتُمَ هَادْ الْأُمُورْ كَيْوَقْعُو، عَرْفُو بْلِّي مَمْلَكَةْ اللَّهْ قَرّْبَاتْ.

³²وْرَانِي نْݣُولْ لِيكُمْ الْحَقّْ: مَا غَادِي يْجِي فِينْ يْتْقَادَا هَادْ الْجِيلْ حْتَّى يْوْقَعْ هَادْشِّي كُلُّه.

³³السّْمَا وْالْأَرْضْ غَيْفْنَاوْ، وَلَكِنْ كْلَامِي عَمّْرُه مَا غَيْفْنَى».

³⁴«رْدُّو بَالْكُمْ لَتْوَلِّي قْلُوبْكُمْ مْشْغُولَة بْالْخْمَرْ وْالسّْكْرَة وْهْمُومْ الدّْنْيَا، وْيْغْفَلْكُمْ دَاكْ النّْهَارْ

³⁵بْحَالْ شِي مْصِيدَة، حِيتْ غَيْنْزَلْ عْلَى ݣَاعْ سُكَّانْ الْأَرْضْ كُلّْهَا.

³⁶إِيوَا سْهْرُو فْكُلّْ وَقْتْ وْصَلِّيوْ، بَاشْ تْقَدْرُو تْنْجَاوْ مْنْ ݣَاعْ دَاكْشِّي اللِّي غَيْوْقَعْ، وْتْوَقْفُو قُدَّامْ وَلْدْ الْإِنْسَانْ».

³⁷وْكَانْ يَسُوعْ بْالنّْهَارْ كَيْعَلّْمْ فْبِيتْ اللَّهْ، وْفْالْعْشِيَّة كَيْخْرُجْ بَاشْ يْبَاتْ فْجْبَلْ الزِّيتُونْ.

³⁸وْݣَاعْ النَّاسْ كَانُو كَيْجِيوْ لْعَنْدُه بْكْرِي فْبِيتْ اللَّهْ بَاشْ يْسَمْعُو كْلَامُه.