Read Moroccan Standard Translation لُوقَا 23 Bible Online

لُوقَا 23 - Moroccan Standard Translation bible

لُوقَا 23

¹الْفَصْلْ تْلَاتَة وْعْشْرِينْ وْنَاضُو ݣَاعْ الزُّعَمَا دْيَالْ لِيهُودْ وْدَّاوْ يَسُوعْ لْبِيلَاطُسْ،

²وْبْدَاوْ كَيْتَّهْمُوهْ وْكَيْݣُولُو: «لْقِينَا هَادْ الرَّاجْلْ كَيْنَوّْضْ الْفُوضَى فْوَسْطْ الشَّعْبْ، وْمَا كَيْخَلِّيهُمْشْ يْخَلّْصُو الضَّرِيبَة لْقَيْصَرْ، وْكَيْݣُولْ بْلِّي هُوَ الْمَسِيحْ الْمَلِكْ».

³وْسْوّْلُه بِيلَاطُسْ وْݣَالْ: «وَاشْ نْتَ هُوَ مَلِكْ لِيهُودْ؟». وْهُوَ يْجَاوْبُه: «نْتَ اللِّي كَتْݣُولْ هَادْشِّي».

⁴وْݣَالْ بِيلَاطُسْ لْلرُّؤَسَا دْ رْجَالْ الدِّينْ وْالنَّاسْ اللِّي حَاضْرِينْ: «مَا لْقِيتْ حْتَّى شِي تُهْمَة عْلَى هَادْ الرَّاجْلْ!».

⁵وَلَكِنْ هُمَ بْقَاوْ شَادِّينْ فْهْضَرْتْهُمْ وْكَيْݣُولُو: «رَاهْ كَيْنَوّْضْ الْفُوضَى بِينْ النَّاسْ بْالتَّعْلِيمْ دْيَالُه فْݣَاعْ بْلَادْ الْيَهُودِيَّة، مْنْ الْجَلِيلْ حْتَّى لّْهْنَا».

⁶وْمْلِّي سْمَعْ بِيلَاطُسْ هَادْ الْكْلَامْ، سْوّْلْ وْݣَالْ: «وَاشْ هَادْ الرَّاجْلْ مْنْ الْجَلِيلْ؟».

⁷وْمْلِّي عْرَفْ بْلِّي هُوَ مْنْ الْبْلَادْ اللِّي كَيْحْكَمْ عْلِيهَا هِيرُودُسْ، صِيفْطُه لْهِيرُودُسْ اللِّي كَانْ حْتَّى هُوَ فْدَاكْ الْوَقْتْ فْأُورْشَلِيمْ.

⁸وْمْلِّي شَافْ هِيرُودُسْ يَسُوعْ، فْرَحْ بْزَّافْ، حِيتْ كَانْ بَاغِي يْشُوفُه مْنْ شْحَالْ هَادِي بْكْتْرَةْ مَا سْمَعْ عْلِيهْ، وْكَانْ كَيْتّْمَنَّى بَاشْ يْشُوفُه كَيْدِيرْ شِي عَلَامَة.

⁹وْسْوّْلُه عْلَى بْزَّافْ دْ الْحْوَايْجْ، وَلَكِنْ يَسُوعْ مَا جَاوْبُه عْلَى حْتَّى شِي سُؤَالْ.

¹⁰وْنَاضُو الرُّؤَسَا دْ رْجَالْ الدِّينْ وْالْعُلَمَا دْ الشّْرَعْ كَيْتَّهْمُوهْ بْقُوَّة.

¹¹وْحْتَقْرُه هِيرُودُسْ وْالْعَسْكَرْ دْيَالُه وْضَحْكُو عْلِيهْ وْلَبّْسُوهْ لْبَاسْ كَيْلْمَعْ، وْرَدُّه هِيرُودُسْ لْبِيلَاطُسْ.

¹²وْفْدَاكْ النّْهَارْ، تّْصَالْحْ هِيرُودُسْ مْعَ بِيلَاطُسْ عْلَاحْقَّاشْ كَانُو مْنْ قْبَلْ مْتْخَاصْمِينْ.

¹³وْعَيّْطْ بِيلَاطُسْ عْلَى الرُّؤَسَا دْ رْجَالْ الدِّينْ، وْالزُّعَمَا، وْالنَّاسْ،

¹⁴وْݣَالْ لِيهُمْ: «رَاهْ هَادْ الرَّاجْلْ اللِّي جْبْتُو لِيَّ وْݣْلْتُو بْلِّي كَيْخَرّْجْ النَّاسْ عْلَى الطّْرِيقْ، سْوّْلْتُه قُدَّامْكُمْ وْمَا لْقِيتْ عْلِيهْ حْتَّى شِي تُهْمَة مْنْ دَاكْشِّي بَاشْ كَتْتَّهْمُوهْ،

¹⁵وْهِيرُودُسْ بْرَاسُه مَا لْقَا عْلِيهْ وَالُو، عْلَاحْقَّاشْ رْجّْعُه لِينَا. هَادْ الرَّاجْلْ مَا دَارْ حْتَّى شِي حَاجَة اللِّي يْسْتَاهْلْ عْلِيهَا الْمُوتْ.

¹⁶وْدَابَا غَادِي نْضْرْبُه وْنْطَلْقُه يْمْشِي بْحَالُه». [

¹⁷وْكَانْ وَاجْبْ عْلَى بِيلَاطُسْ يْطْلَقْ لِيهُمْ فْكُلّْ عِيدْ وَاحْدْ مْنْ الْمْسْجُونِينْ.][٧]

¹⁸وْهُمَ يْغَوّْتُو بْصُوتْ وَاحْدْ وْݣَالُو: «قْتَلْ هَادْ الرَّاجْلْ وْطْلَقْ لِينَا بَارَابَاسْ!».

¹⁹وْكَانْ بَارَابَاسْ فْالْحَبْسْ عْلَاحْقَّاشْ كَانْ مْشَارْكْ فْالْفُوضَى اللِّي وْقْعَاتْ فْالْمْدِينَة، وْحِيتْ قْتَلْ شِي رُوحْ.

²⁰وْتّْكَلّْمْ مْعَاهُمْ بِيلَاطُسْ مَرَّة خْرَى عْلَاحْقَّاشْ بْغَا يْطْلَقْ يَسُوعْ،

²¹وْهُمَ يْبْدَاوْ كَيْغَوّْتُو وْكَيْݣُولُو: «صْلْبُه! صْلْبُه!».

²²وْݣَالْ لِيهُمْ لْلْمَرَّة التَّالْتَة: «آشْ مْنْ شَرّْ دَارْ هَادْ الرَّاجْلْ؟ رَاهْ مَا لْقِيتْ عْلِيهْ حْتَّى شِي تُهْمَة اللِّي يْسْتَاهْلْ عْلِيهَا الْمُوتْ، غَادِي نْضْرْبُه وْنْطَلْقُه يْمْشِي بْحَالُه!».

²³وْأَكّْدُو عْلِيهْ وْهُمَ كَيْغَوّْتُو عْلَى حَرّْ جَهْدْهُمْ وْكَيْطْلْبُو مْنُّه بَاشْ يْصَلْبُه، وْكَانْ الصُّوتْ دْيَالْهُمْ غَالْبْ.

²⁴وْقَرّْرْ بِيلَاطُسْ بَاشْ يْدِيرْ دَاكْشِّي اللِّي بْغَاوْ،

²⁵وْطْلَقْ لِيهُمْ الرَّاجْلْ اللِّي كَانْ فْالْحَبْسْ بْسْبَابْ الْفُوضَى وْالْقْتِيلَة، وْسَلّْمْ لِيهُمْ يَسُوعْ بَاشْ يْدِيرُو فِيهْ مَا بْغَاوْ.

²⁶وْفْالْوَقْتْ فَاشْ كَانُو غَادْيِينْ بِيهْ، شْدُّو وَاحْدْ الرَّاجْلْ مْنْ الْقَيْرَوَانْ سْمِيتُه سِمْعَانْ، كَانْ رَاجْعْ مْنْ الْفْدَّانْ، وْحَطُّو عْلِيهْ الْخْشْبَة دْ الصّْلِيبْ بَاشْ يْهَزّْهَا مْنْ وْرَا يَسُوعْ.

²⁷وْتْبْعُوهْ بْزَّافْ دْ النَّاسْ، وْشِي عْيَالَاتْ اللِّي كَانُو كَيْنَدْبُو وْيْنْوّْحُو عْلِيهْ.

²⁸وْتْلَفّْتْ لِيهُمْ يَسُوعْ وْݣَالْ: «مَا تْبْكِيوْشْ عْلِيَّ آ بْنَاتْ أُورْشَلِيمْ، وَلَكِنْ بْكِيوْ عْلَى رْيُوسْكُمْ وْعْلَى وْلَادْكُمْ.

²⁹عْلَاحْقَّاشْ هَا هِيَ لِيَّامْ جَايَّة اللِّي فِيهَا غَيْݣُولُو النَّاسْ: سْعْدَاتْ الْعْيَالَاتْ اللِّي عَمّْرْهُمْ مَا حْمْلُو وَلَا وْلْدُو وَلَا رْضّْعُو.

³⁰دِيكْ السَّاعَة غَيْبْدَاوْ يْݣُولُو لْلجّْبَالْ: طِيحُو عْلِينَا، وْغَيْݣُولُو لْلْكُدْيَاتْ: غْطِّيوْنَا.

³¹إِيوَا إِلَا كَانُو هَكَّا كَيْدِيرُو بْالْعُودْ الْخْضَرْ، أَشْنُو غَيْطْرَا لْلْعُودْ الْيَابْسْ؟».

³²وْدَّاوْهْ هُوَ وْجُوجْ دْيَالْ الشّْفَارَا بَاشْ يْعَدْمُوهُمْ.

³³وْمْلِّي وْصْلُو لْلْبْلَاصَة الْمْسَمْيَّة بْالْجُمْجُمَة، صَلْبُوهْ تْمَّ مْعَ الشّْفَارَا، وَاحْدْ عْلَى لِيمْنْ دْيَالُه وْلَاخُرْ عْلَى لِيسْرْ.

³⁴وَلَكِنْ يَسُوعْ ݣَالْ: «آ بَّا غْفَرْ لْهَادْ النَّاسْ، عْلَاحْقَّاشْ رَاهُمَ مَا كَيْعَرْفُوشْ أَشْنُو كَيْدِيرُو».

³⁵وْكَانُو النَّاسْ وَاقْفِينْ تْمَّ وْكَيْشُوفُو، وْالرُّؤَسَا كَيْضَحْكُو عْلِيهْ وْكَيْݣُولُو: «يَاكْ نْجَّا غِيرُه، إِيوَا يْنَجِّي رَاسُه إِلَا كَانْ هُوَ نِيتْ الْمَسِيحْ اللِّي خْتَارُه اللَّهْ!».

³⁶وْضَحْكُو عْلِيهْ الْعَسْكَرْ حْتَّى هُمَ، وْقَرّْبُو لِيهْ وْعْطَاوْهْ الْخَلّْ

³⁷وْݣَالُو لِيهْ: «إِلَا كْنْتِ مَلِكْ لِيهُودْ، نْجِّي رَاسْكْ!».

³⁸وْكَانْتْ فُوقْ رَاسُه لُوحَة مْكْتُوبْ فِيهَا: «هَادَا هُوَ مَلِكْ لِيهُودْ!».

³⁹وْبْدَا وَاحْدْ مْنْ الشّْفَارَا اللِّي مْعَلّْقِينْ عْلَى خَشْبَةْ الصّْلِيبْ كَيْسَبّْ فْيَسُوعْ وْكَيْݣُولْ لِيهْ: «يَاكْ نْتَ هُوَ الْمَسِيحْ؟ إِيوَا نْجِّي رَاسْكْ وْنْجِّينَا مْعَاكْ!».

⁴⁰وْخَاصْمْ عْلِيهْ الشّْفَارْ لَاخُرْ وْݣَالْ لِيهْ: «وَاشْ مَا كَتْخَافْشْ مْنْ اللَّهْ وْنْتَ كَتّْعَاقْبْ بْحَالُه؟

⁴¹حْنَا بْعْدَ كَنْسْتَاهْلُو الْعْقُوبَة، عْلَاحْقَّاشْ كَنْتّْعَاقْبُو عْلَى حْسَابْ فْعَايْلْنَا، أَمَّا هُوَ، رَاهْ مَا دَارْ حْتَّى شِي دَنْبْ».

⁴²وْݣَالْ لْيَسُوعْ: «تْفَكّْرْنِي فْالْوَقْتْ اللِّي غَتْرْجَعْ فِيهْ وْنْتَ مَلِكْ».

⁴³وْهُوَ يْجَاوْبُه يَسُوعْ: «نْݣُولْ لِيكْ الْحَقّْ: الْيُومْ غَتْكُونْ مْعَايَ فْالجّْنَّة».

⁴⁴وْفْجْوَايْهْ الطّْنَاشْ دْ النّْهَارْ ضْلَامْتْ الْأَرْضْ كُلّْهَا حْتَّى لْلتّْلَاتَة دْ الْعْشِيَّة،

⁴⁵وْتْضَرّْݣَاتْ الشّْمْسْ وْتْشَرّْݣَاتْ الْخَامِيَّة دْيَالْ بِيتْ اللَّهْ مْنْ الْوَسْطْ،

⁴⁶وْغَوّْتْ يَسُوعْ وَاحْدْ الْغُوتَة مْجَهْدَة وْݣَالْ: «آ بَّا، بِينْ يْدِّيكْ كَنْخَلِّي رُوحِي». وْغِيرْ ݣَالْ هَادْ الْكْلَامْ وْمَاتْ.

⁴⁷وْمْلِّي شَافْ الْقَايْدْ دْ الْعَسْكَرْ أَشْنُو وْقَعْ، عْطَى الْعَزّْ لْلَّهْ وْݣَالْ: «فْالْحَقِيقَة هَادْ الرَّاجْلْ مَا كَانْ عْلِيهْ حْتَّى دَنْبْ».

⁴⁸وْݣَاعْ النَّاسْ اللِّي حَضْرُو وْشَافُو أَشْنُو وْقَعْ، رْجْعُو وْهُمَ كَيْضْرْبُو عْلَى صْدُورْهُمْ.

⁴⁹وْكَانُو ݣَاعْ صْحَابْ يَسُوعْ وْالْعْيَالَاتْ اللِّي تْبْعُوهْ مْنْ الْجَلِيلْ، وَاقْفِينْ كَيْشُوفُو آشْ كَانْ كَيْطْرَا مْنْ بْعِيدْ.

⁵⁰وْجَا وَاحْدْ مْنْ الْمَجْلِسْ دْيَالْ لِيهُودْ سْمِيتُه يُوسْفْ، وْهُوَ رَاجْلْ مْزْيَانْ وْمْتَّاقِي اللَّهْ،

⁵¹مَا كَانْشْ مْتَّافْقْ مْعَ الرَّيْ دْيَالْ الْمَجْلِسْ وْمْعَ دَاكْشِّي اللِّي كَيْدِيرُوهْ، وْكَانْ مْنْ الرَّامَة وْهِيَ مْدِينَة فْالْيَهُودِيَّة، وْكَيْتّْسَنَّى الْمْجِي دْيَالْ مَمْلَكَةْ اللَّهْ،

⁵²وْدْخَلْ عَنْدْ بِيلَاطُسْ وْطْلَبْ مْنُّه بَاشْ يْعْطِيهْ الدَّاتْ دْيَالْ يَسُوعْ.

⁵³وْنَزّْلْهَا مْنْ الصّْلِيبْ وْكَفّْنْهَا بْالْكْتَّانْ، وْحَطّْهَا فْقْبَرْ مْحْفُورْ فْالْحْجَرْ، عَمّْرْ شِي وَاحْدْ مَا تّْدْفَنْ فِيهْ مْنْ قْبَلْ.

⁵⁴وْكَانْ دَاكْ النّْهَارْ هُوَ النّْهَارْ اللِّي كَيْوَجّْدُو فِيهْ لْلسّْبْتْ اللِّي كَانْ قْرِيبْ يْبْدَا.

⁵⁵وْالْعْيَالَاتْ اللِّي كَانُو تَابْعِينْ يَسُوعْ مْنْ الْجَلِيلْ تْبْعُو يُوسْفْ، وْشَافُو الْقْبَرْ وْكِيفَاشْ تّْحْطَّاتْ فِيهْ الدَّاتْ دْيَالْ يَسُوعْ.

⁵⁶وْمْنْ بَعْدْ رْجْعُو وْوَجّْدُو الرِّيحَة وْالْحْنُوطْ، وْرْتَاحُو نْهَارْ السّْبْتْ كِمَا مْفْرُوضْ عْلِيهُمْ فْالشّْرَعْ.