Read Moroccan Standard Translation لُوقَا 24 Bible Online

لُوقَا 24 - Moroccan Standard Translation bible

لُوقَا 24

¹الْفَصْلْ رْبْعَة وْعْشْرِينْ وْفْالْفْجَرْ دْيَالْ نْهَارْ الْحَدّْ، جَاوْ الْعْيَالَاتْ لْلْقْبَرْ وْهُمَ هَازِّينْ مْعَاهُمْ الْحْنُوطْ اللِّي وَجّْدُوهْ.

²وْلْقَاوْ الْحَجْرَة مْكَرْكْبَة مْنْ بَابْ الْقْبَرْ.

³وْمْلِّي دَخْلُو، مَا لْقَاوْشْ الدَّاتْ دْيَالْ الرَّبّْ يَسُوعْ.

⁴وْفْالْوَقْتْ اللِّي هُمَ حَايْرِينْ، بَانُو لِيهُمْ جُوجْ رْجَالْ لَابْسِينْ لْبَاسْ كَيْلْمَعْ،

⁵وْخَافُو الْعْيَالَاتْ وْحْدْرُو وْجُوهْهُمْ لْلْأَرْضْ، وْݣَالُو لِيهُمْ الرّْجَالْ بْجُوجْ: «عْلَاشْ كَتْقَلّْبُو عْلَى الْحَيّْ بِينْ الْمْيّْتِينْ؟

⁶رَاهْ مَا كَايْنْشْ هْنَا، عْلَاحْقَّاشْ نَاضْ مْنْ الْقْبَرْ. تْفَكّْرُو الْكْلَامْ اللِّي ݣَالْ لِيكُمْ فَاشْ كَانْ مَازَالْ فْالْجَلِيلْ،

⁷مْلِّي ݣَالْ: رَاهْ خَاصّْ وَلْدْ الْإِنْسَانْ يْتّْسَلّْمْ لْلْيْدِّينْ دْ النَّاسْ الْمُدْنِبِينْ وْيْتّْصْلَبْ، وْفْالنّْهَارْ التَّالْتْ يْتّْبْعَتْ مْنْ الْمُوتْ».

⁸وْتّْفَكّْرُو الْعْيَالَاتْ كْلَامُه.

⁹وْرْجْعُو مْنْ الْقْبَرْ، وْعَاوْدُو لْلتّْلَامْدْ الْحْضَاشْ وْلْلخْرِينْ كُلّْهُمْ ݣَاعْ دَاكْشِّي اللِّي جْرَا.

¹⁰وْالْعْيَالَاتْ اللِّي ݣَالُو هَادْشِّي لْلرُّسُلْ، هُمَ مَرْيَمْ الْمَجْدَلِيَّة وْيُوَنَّا وْمَرْيَمْ أُمّْ يَعْقُوبْ، وْالْعْيَالَاتْ اللِّي كَانُو مْعَاهُمْ.

¹¹وْمَا تِيّْقُوهُمْشْ الرُّسُلْ عْلَاحْقَّاشْ حْسَابْ لِيهُمْ بْلِّي كَانُو غِيرْ كَيْخَرّْفُو.

¹²وَلَكِنْ بُطْرُسْ نَاضْ وْمْشَى كَيْجْرِّي لْلْقْبَرْ، وْمْلِّي تّْحْنَى بَانْ لِيهْ غِيرْ الْكْفَنْ. وْرْجَعْ كَيْتّْعَجّْبْ مْنْ دَاكْشِّي اللِّي وْقَعْ.

¹³وْفْدَاكْ النّْهَارْ نِيتْ، كَانُو جُوجْ مْنْ التّْلَامْدْ فْطْرِيقْهُمْ لْوَاحْدْ الدُّوَّارْ سْمِيّْتُه عِمْوَاسْ، كَانْ بْعِيدْ عْلَى أُورْشَلِيمْ بْشِي حْضَاشْرْ كِيلُومِتْرْ.

¹⁴وْكَانُو كَيْتّْكَلّْمُو عْلَى ݣَاعْ هَادْ الْأُمُورْ اللِّي وْقْعَاتْ.

¹⁵وْمْلِّي كَانُو كَيْتّْكَلّْمُو وْكَيْتّْنَاقْشُو، قَرّْبْ مْنّْهُمْ يَسُوعْ بْرَاسُه وْمْشَى مْعَاهُمْ،

¹⁶وَلَكِنْ شِي حَاجَة مَا خْلَّاتْشْ عِينِيهُمْ يْعَرْفُوهْ.

¹⁷وْهُوَ يْݣُولْ لِيهُمْ: «فَاشْ كَتْهَضْرُو وْنْتُمَ غَادْيِينْ؟». وْوَقْفُو، وْكَانْ الْحُزْنْ بَايْنْ عْلِيهُمْ.

¹⁸وْجَاوْبُه وَاحْدْ مْنّْهُمْ سْمِيتُه كِلْيُوبَاسْ: «يْمْكَنْ نْتَ بُوحْدْكْ اللِّي بْرَّانِي عْلَى أُورْشَلِيمْ، وْمَا كَتْعْرَفْشْ أَشْنُو وْقَعْ فِيهَا هَادْ لِيَّامْ!».

¹⁹وْسْوّْلْهُمْ يَسُوعْ: «أَشْنُو وْقَعْ؟». وْهُمَ يْجَاوْبُوهْ: «دَاكْشِّي اللِّي جْرَا لْيَسُوعْ اللِّي مْنْ النَّاصِرَة، اللِّي كَانْ نْبِي قْوِي فْقْوَالُه وْأَعْمَالُه قُدَّامْ اللَّهْ وْالشَّعْبْ كُلُّه،

²⁰وْكِيفَاشْ سَلّْمُوهْ الرُّؤَسَا دْ رْجَالْ الدِّينْ وْالْحُكَّامْ دْيَاوْلْنَا بَاشْ يْتّْحْكَمْ عْلِيهْ بْالْمُوتْ، وْصَلْبُوهْ.

²¹وْحْنَا كْنَّا كَنْتّْرَجَّاوْ بْلِّي هُوَ اللِّي غَيْفْدِي إِسْرَائِيلْ. وْفُوقْ مْنْ هَادْشِّي، رَاهْ هَادَا هُوَ النّْهَارْ التَّالْتْ بَاشْ وْقْعَاتْ هَادْ الْأُمُورْ.

²²وَلَكِنْ شِي عْيَالَاتْ مْنْ جْمَاعْتْنَا حَيّْرُونَا، عْلَاحْقَّاشْ مْشَاوْ زَارُو الْقْبَرْ مْعَ الْفْجَرْ،

²³وْمَا لْقَاوْشْ الدَّاتْ دْيَالُه، وْرْجْعُو كَيْݣُولُو بْلِّي بَانُو لِيهُمْ الْمَلَايْكَة، اللِّي ݣَالُو لِيهُمْ بْلِّي يَسُوعْ حَيّْ.

²⁴وْمْشَاوْ شِي وْحْدِينْ مْنَّا لْلْقْبَرْ، وْلْقَاوْ كِيفْ ݣَالُو لِينَا الْعْيَالَاتْ. وَلَكِنْ هُوَ مَا شَافُوهْشْ».

²⁵وْهُوَ يْݣُولْ لِيهُمْ يَسُوعْ: «آ هَادْ الْحْمَّاقْ اللِّي قْلُوبْهُمْ قَاسْحِينْ مَا كَيْآمْنُوشْ بْكْلَامْ الْأَنْبِيَا!

²⁶وَاشْ مَا كَانْشْ خَاصّْ الْمَسِيحْ يْقَاسِي هَادْ الْعْدَابْ، وْيْدْخَلْ لْلْعَزّْ دْيَالُه؟».

²⁷وْفَسّْرْ لِيهُمْ يَسُوعْ دَاكْشِّي اللِّي ݣَالْ عْلِيهْ كْتَابْ اللَّهْ، وْبْدَا مْنْ مُوسَى وْالْأَنْبِيَا كَامْلِينْ.

²⁸وْمْلِّي قَرّْبُو لْلدُّوَّارْ اللِّي كَانُو قَاصْدِينُه، بَيّْنْ لِيهُمْ يَسُوعْ بْحَالْ إِلَا غَادِي لْشِي بْلَاصَة بْعِيدَة.

²⁹وْزَاوْݣُوهْ وْݣَالُو لِيهْ: «بْقَى مْعَانَا، عْلَاحْقَّاشْ اللِّيلْ قَرّْبْ وْالنّْهَارْ بْدَا كَيْمْشِي!». وْدْخَلْ بَاشْ يْبْقَى مْعَاهُمْ.

³⁰وْمْلِّي ݣَلْسُو يَاكْلُو، خْدَا يَسُوعْ الْخُبْزْ وْقَطّْعُه وْعْطَاهُمْ بَعْدْمَا شْكَرْ اللَّهْ.

³¹وْتّْحَلُّو لِيهُمْ عِينِيهُمْ وْعَرْفُوهْ، وْمْنْ بَعْدْ مَا بْقَاشْ كَيْبَانْ لِيهُمْ.

³²وْݣَالْ وَاحْدْ مْنّْهُمْ لْلَّاخُرْ: «وَاشْ مَا كَانْشْ قَلْبْنَا حَاسّْ مْلِّي هْضَرْ مْعَانَا فْالطّْرِيقْ وْشْرَحْ لِينَا كْتَابْ اللَّهْ؟».

³³وْنَاضُو دِيكْ السَّاعَة وْرْجْعُو لْأُورْشَلِيمْ، وْلْقَاوْ الرُّسُلْ بْحْضَاشْ وْصْحَابْهُمْ مْجْمُوعِينْ،

³⁴وْهُمَ كَيْݣُولُو: «رَاهْ بْالصَّحْ الرَّبّْ تّْبْعَتْ مْنْ الْمُوتْ وْبَانْ لْسِمْعَانْ!».

³⁵وْهُمَ يْعَاوْدُو لِيهُمْ أَشْنُو جْرَا فْالطّْرِيقْ، وْكِيفَاشْ عَرْفُو الرَّبّْ مْلِّي قَطّْعْ الْخُبْزْ.

³⁶وْهُمَ كَيْتّْكَلّْمُو، وْقَفْ يَسُوعْ وَسْطْ مْنّْهُمْ وْݣَالْ لِيهُمْ: «السّْلَامْ عْلِيكُمْ!»

³⁷وْهُمَ يْخَافُو وْتّْخَلْعُو، وْحْسَابْ لِيهُمْ بْلِّي كَيْشُوفُو شِي رُوحْ.

³⁸وْݣَالْ لِيهُمْ: «مَالْكُمْ مْخْلُوعِينْ، وْعْلَاشْ دْخَلْ الشّْكْ لْقْلُوبْكُمْ؟

³⁹شُوفُو يْدِّيَّ وْرْجْلِيَّ، رَانِي أَنَا هُوَ. مْسُّونِي وْشُوفُو. الرُّوحْ مَا عَنْدُوشْ اللّْحَمْ وْالْعْضَمْ كِمَا كَتْشُوفُو عَنْدِي».

⁴⁰ݣَالْ هَادْشِّي وْوْرَّاهُمْ يْدِّيهْ وْرْجْلِيهْ.

⁴¹وَلَكِنْ مَا تِيّْقُوهْشْ مْنْ كْتْرَةْ الْفَرْحَة وْالدّْهْشَة. وْݣَالْ لِيهُمْ: «وَاشْ عَنْدْكُمْ هْنَا مَا يْتّْكَالْ؟».

⁴²وْعْطَاوْهْ طَرْفْ دْيَالْ الْحُوتْ مْشْوِي،

⁴³وْخْدَاهْ وْكْلَاهْ قُدَّامْهُمْ.

⁴⁴وْݣَالْ لِيهُمْ: «مْلِّي كْنْتْ مْعَاكُمْ ݣْلْتْ لِيكُمْ: خَاصّْ يْتّْحَقّْقْ ݣَاعْ دَاكْشِّي اللِّي تّْكْتَبْ عْلِيَّ فْشْرَعْ مُوسَى وْكْتُبْ الْأَنْبِيَا وْالْمَزَامِيرْ».

⁴⁵وْمْنْ بَعْدْ هَادْشِّي حَلّْ لِيهُمْ عْقُولْهُمْ بَاشْ يْفَهْمُو كْتَابْ اللَّهْ،

⁴⁶وْݣَالْ لِيهُمْ: «هَادْشِّي اللِّي مْكْتُوبْ فْكْتَابْ اللَّهْ بْلِّي الْمَسِيحْ غَادِي يْتّْعَدّْبْ وْفْالنّْهَارْ التَّالْتْ يْتّْبْعَتْ مْنْ الْمُوتْ،

⁴⁷وْبْالْإِسْمْ دْيَالُه غَادِي يْبَرّْحُو النَّاسْ بْالتُّوبَة وْمَغْفِرَةْ الدّْنُوبْ لْلشّْعُوبْ كُلّْهُمْ، وْغَادِي يْبْدَاوْ مْنْ أُورْشَلِيمْ.

⁴⁸وْنْتُمَ شَاهْدِينْ عْلَى هَادْشِّي.

⁴⁹وْهَانِي غَنْصِيفْطْ لِيكُمْ دَاكْشِّي اللِّي وْعَدْ بِيهْ بَّا. وَلَكِنْ بْقَاوْ فْمْدِينْةْ أُورْشَلِيمْ حْتَّى تّْعَمّْرُو بْالْقُوَّة اللِّي غَتْنْزَلْ عْلِيكُمْ مْنْ عَنْدْ اللَّهْ».

⁵⁰وْخْرَجْ وْدَّاهُمْ حْتَّى لْبَيْتْ عَنْيَا، وْهْزّْ يْدِّيهْ وْبَارْكْهُمْ.

⁵¹وْفْالْوَقْتْ فَاشْ كَانْ كَيْبَارْكْهُمْ، تّْفَارْقْ مْعَاهُمْ وْتّْرْفَعْ لْلسّْمَا،

⁵²وْهُمَ يْسَجْدُو لِيهْ، وْرْجْعُو لْأُورْشَلِيمْ فْرْحَانِينْ بْزَّافْ.

⁵³وْكَانُو فْكُلّْ وَقْتْ كَيْمْشِيوْ لْبِيتْ اللَّهْ بَاشْ يْبَارْكُو اللَّهْ.