Read Moroccan Standard Translation لُوقَا 3 Bible Online

لُوقَا 3 - Moroccan Standard Translation bible

لُوقَا 3

¹الْفَصْلْ التَّالْتْ وْفْالْعَامْ خْمْسْطَاشْ مْنْ حُكْمْ الْقَيْصَرْ طِيبَارْيُوسْ، مْلِّي كَانْ بِيلَاطُسْ الْبُنْطِي حَاكْمْ فْبْلَادْ الْيَهُودِيَّة، وْكَانْ هِيرُودُسْ حَاكْمْ فْبْلَادْ الْجَلِيلْ، وْخُوهْ فِيلُبُّسْ حَاكْمْ فْبْلَادْ إِيطُورِيَّة وْبْلَادْ تَرَاخُونِيتُسْ، وْكَانْ لِيسَانِيُوسْ حَاكْمْ فْمَنْطَقَةْ أَبِلِيَّة،

²وْمْلِّي كَانْ حَنَّانْ وْقَيَافَا هُمَ الرُّؤَسَا دْ رْجَالْ الدِّينْ، تّْكَلّْمْ اللَّهْ مْعَ يُوحَنَّا وَلْدْ زَكَرِيَّا فْالصَّحْرَا،

³وْهُوَ يْمْشِي لْݣَاعْ جْوَايْهْ الْأُرْدُنْ كَيْخَبّْرْ النَّاسْ عْلَى مَعْمُودِيَّةْ التُّوبَة بَاشْ يْتّْغَفْرُو لِيهُمْ دْنُوبْهُمْ،

⁴كِمَا مْكْتُوبْ فْكْتَابْ النّْبِي إِشْعِيَا: «صُوتْ كَيْبَرّْحْ فْالصَّحْرَا وْكَيْݣُولْ: وَجّْدُو طْرِيقْ الرَّبّْ، وْقَادُّو طْرْقَانُه.

⁵كُلّْ وَادْ غَادِي يْعْمَرْ وْكُلّْ جْبَلْ وْكُدْيَة غَادِي تْتْوَاطَا وْالطّْرِيقْ الْمْلْوِيَة غَادِي تّْقَادْ وْالْوَاعْرَة غَادِي تْسْهَالْ

⁶وْالنَّاسْ كُلّْهُمْ غَادِي يْشُوفُو النّْجَا دْ اللَّهْ!».

⁷وْكَانْ يُوحَنَّا كَيْݣُولْ لْلجّْمَاعَاتْ دْ النَّاسْ اللِّي جَاوْ يْتْعَمّْدُو عْلَى يْدِّيهْ: «آ تْرِّيكْةْ اللّْفَاعِي، شْكُونْ اللِّي نَبّْهْكُمْ بَاشْ تْهَرْبُو مْنْ غَضَبْ اللَّهْ اللِّي جَايْ؟

⁸إِيوَا بَيّْنُو التُّوبَة دْيَالْكُمْ بْأَعْمَالْكُمْ الْمْزْيَانَة، وْمَا تْبْدَاوْشْ تْݣُولُو مْعَ رَاسْكُمْ: بَّانَا هُوَ إِبْرَاهِيمْ. نْݣُولْ لِيكُمْ: رَاهْ اللَّهْ قَادْرْ بَاشْ يْدِيرْ مْنْ هَادْ الْحْجَرْ وْلَادْ لْإِبْرَاهِيمْ!

⁹وْدَابَا هَا الْفَاسْ مْحْطُوطْ عْلَى جْدَرْ الشّْجَرْ، وْكُلّْ شَجْرَة مَا كَتْعْطِيشْ غْلَّة مْزْيَانَة تّْقَطّْعْ وْتّْرْمَى فْالْعَافْيَة».

¹⁰وْسْوّْلُوهْ الجّْمَاعَاتْ دْ النَّاسْ: «آشْ خَاصّْنَا نْدِيرُو؟».

¹¹جَاوْبْهُمْ وْݣَالْ: «اللِّي عَنْدُه جُوجْ لْبْسَاتْ، يْعْطِي لْلِّي مَا عَنْدُوشْ. وْاللِّي عَنْدُه شِي مَاكْلَة، يْشَارْكْهَا مْعَ لْخْرِينْ».

¹²وْجَاوْ شِي وْحْدِينْ مْنْ مَّالِينْ الضَّرِيبَة بَاشْ يْتْعَمّْدُو، وْسْوّْلُوهْ: «آشْ خَاصّْنَا نْدِيرُو آ سِيدِي؟»

¹³وْݣَالْ لِيهُمْ: «مَا تْجَمْعُوشْ مْنْ الضَّرِيبَة كْتَرْ مْنْ اللِّي وَاجْبْ عْلِيكُمْ».

¹⁴وْسْوّْلُوهْ شِي عَسْكَرْ: «آشْ خَاصّْنَا حْتَّى حْنَا نْدِيرُو؟» ݣَالْ لِيهُمْ: «مَا تْدِّيوْشْ دْيَالْ النَّاسْ، وْمَا تْطِيّْحُوشْ عْلِيهُمْ الْبَاطْلْ، وْقْنْعُو بْالْخُلْصَة دْيَالْكُمْ».

¹⁵وْحِيتْ النَّاسْ كَانُو كَيْتّْسْنَّاوْ الْمْجِي دْ الْمَسِيحْ، بْدَاوْ كَيْݣُولُو مْعَ رَاسْهُمْ: «وَاشْ يُوحَنَّا هُوَ الْمَسِيحْ؟».

¹⁶وْجَاوْبْ يُوحَنَّا وْݣَالْ لِيهُمْ: «رَاهْ أَنَا غَنْعَمّْدْكُمْ بْالْمَا، وَلَكِنْ غَيْجِي اللِّي قْوَى مْنِّي، اللِّي مَا نْسْتَاهْلْشْ نْحَلّْ سْيُورْ صْبَّاطُه. هُوَ غَادِي يْعَمّْدْكُمْ بْالرُّوحْ الْقُدُسْ وْبْالْعَافْيَة،

¹⁷وْفْيْدُّه الْمْدْرَة بَاشْ يْدَرِّي بِيهَا دْرَاسُه وْيْجْمَعْ الْݣْمْحْ فْخْزَايْنُه، أَمَّا التّْبَنْ رَاهْ غَيْحَرْقُه بْالْعَافْيَة اللِّي عَمّْرْهَا مَا غَتْطْفَا».

¹⁸وْكَانْ يُوحَنَّا كَيْشَجّْعْ النَّاسْ بْحْوَايْجْ خْرِينْ كْتَارْ بْحَالْ هَادُو، وْكَيْبَشّْرْهُمْ.

¹⁹وَلَكِنْ الْحَاكْمْ هِيرُودُسْ حِيتْ كَانْ تّْزَوّْجْ بْهِيرُودِيَّا مْرَاةْ خُوهْ وْدَارْ بْزَّافْ دْيَالْ الدّْنُوبْ، خَاصْمْ عْلِيهْ يُوحَنَّا.

²⁰وْزَادْ هِيرُودُسْ كَمّْلْهَا مْلِّي دَخّْلْ يُوحَنَّا لْلْحَبْسْ.

²¹وْمْلِّي تّْعَمّْدُو النَّاسْ كُلّْهُمْ، تْعَمّْدْ يَسُوعْ حْتَّى هُوَ، وْفْالْوَقْتْ اللِّي فِيهْ كَانْ كَيْصَلِّي، تّْحَلَّاتْ السّْمَا،

²²وْنْزَلْ عْلِيهْ الرُّوحْ الْقُدُسْ فْصِفْةْ حْمَامَة، وْتّْسْمَعْ صُوتْ مْنْ السّْمَا كَيْݣُولْ: «نْتَ وْلْدِي اللِّي بِيهْ فْرَحْتْ بْزَّافْ».

²³وْمْلِّي بْدَا يَسُوعْ كَيْبَشّْرْ كَانْ فْعَمْرُه تْلَاتِينْ عَامْ تْقْرِيبًا، وْكَانْ مْعْرُوفْ عَنْدْ النَّاسْ بْلِّي هُوَ وَلْدْ يُوسْفْ، بْنْ هَالِي،

²⁴بْنْ مَتْتَاتْ، بْنْ لَاوِي، بْنْ مَلْكِي، بْنْ يَنَّا، بْنْ يُوسْفْ،

²⁵بْنْ مَتَّاتِيَا، بْنْ عَامُوصْ، بْنْ نَاحُومْ، بْنْ حَسْلِي، بْنْ نَجَّايْ،

²⁶بْنْ مَآتْ، بْنْ مَتَّاتِيَا، بْنْ شِمْعِي، بْنْ يُوسْفْ، بْنْ يَهُودَا،

²⁷بْنْ يُوحَنَّا، بْنْ رِيسَا، بْنْ زَرُبَّابِلْ، بْنْ شَأَلْتِيئِيلْ، بْنْ نِيرِي،

²⁸بْنْ مَلْكِي، بْنْ أَدِّي، بْنْ قُصَمْ، بْنْ أَلْمُودَامْ، بْنْ عِيرْ،

²⁹بْنْ يَشُوعْ، بْنْ أَلِيعَازَرْ، بْنْ يُورِيمْ، بْنْ مَتْتَاتْ، بْنْ لَاوِي،

³⁰بْنْ شِمْعُونْ، بْنْ يَهُودَا، بْنْ يُوسْفْ، بْنْ يُونَانْ، بْنْ أَلِيَاقِيمْ،

³¹بْنْ مَلَيَا، بْنْ مَيْنَانْ، بْنْ مَتَّاتَا، بْنْ نَاتَانْ، بْنْ دَاوُدْ،

³²بْنْ يَسَّى، بْنْ عُوبِيدْ، بْنْ بُوعَزْ، بْنْ سَلْمُونْ، بْنْ نَحْشُونْ،

³³بْنْ عَمِّينَادَابْ، بْنْ أَدْمِينْ، بْنْ عَرْنِي، بْنْ حَصْرُونْ، بْنْ فَارِصْ، بْنْ يَهُودَا،

³⁴بْنْ يَعْقُوبْ، بْنْ إِسْحَاقْ، بْنْ إِبْرَاهِيمْ، بْنْ تَارَحْ، بْنْ نَاحُورْ،

³⁵بْنْ سَرُوجْ، بْنْ رَعُو، بْنْ فَالَجْ، بْنْ عَابِرْ، بْنْ شَالَحْ،

³⁶بْنْ قِينَانْ، بْنْ أَرْفَكْشَادْ، بْنْ سَامْ، بْنْ نُوحْ، بْنْ لَامَكْ،

³⁷بْنْ مَتُوشَالَحْ، بْنْ أَخْنُوخْ، بْنْ يَارِدْ، بْنْ مَهْلَلْئِيلْ، بْنْ قِينَانْ،

³⁸بْنْ أَنُوشْ، بْنْ شِيتْ، بْنْ آدَمْ، بْنْ اللَّهْ.