Read Moroccan Standard Translation لُوقَا 4 Bible Online

لُوقَا 4 - Moroccan Standard Translation bible

لُوقَا 4

¹الْفَصْلْ الرَّابْعْ وْرْجَعْ يَسُوعْ مْعَمّْرْ بْالرُّوحْ الْقُدُسْ مْنْ وَادْ الْأُرْدُنْ، وْدَّاهْ الرُّوحْ مْنْ بْلَاصَة لْبْلَاصَة فْالصَّحْرَا،

²مُدَّةْ رْبْعِينْ يُومْ وْإِبْلِيسْ كَيْجَرّْبْ فِيهْ، وْمَا كْلَا حْتَّى حَاجَة فْدِيكْ لِيَّامْ، وْمْلِّي دَازْ هَادْ الْوَقْتْ جَاهْ الجُّوعْ.

³وْݣَالْ لِيهْ إِبْلِيسْ: «إِلَا كْنْتِ وَلْدْ اللَّهْ، ݣُولْ لْهَادْ الْحَجْرَة تْوَلِّي خُبْزْ».

⁴وْهُوَ يْرَدّْ عْلِيهْ يَسُوعْ: «مْكْتُوبْ فْكْتَابْ اللَّهْ: مَاشِي غِيرْ بْالْخُبْزْ بُوحْدُه كَيْعِيشْ بْنَادْمْ».

⁵وْطْلّْعُه إِبْلِيسْ لْوَاحْدْ الْبْلَاصَة عَالْيَة، وْوْرَّاهْ فْوَقْتْ قْلِيلْ ݣَاعْ الْمَمْلَكَاتْ دْيَالْ الدّْنْيَا،

⁶وْݣَالْ لِيهْ: «غَنْعْطِيكْ السُّلْطَة عْلَى هَادْ الْمَمْلَكَاتْ كُلّْهُمْ وْنْعْطِيكْ الْعَزّْ دْيَالْهُمْ، عْلَاحْقَّاشْ هَادْشِّي كُلُّه تّْعْطَى لِيَّ، وْنْقْدَرْ نْعْطِيهْ لَمّْنْ بْغِيتْ،

⁷وْإِلَا سْجَدْتِي لِيَّ، ݣَاعْ هَادْشِّي غَيْوَلِّي دْيَالْكْ».

⁸وْهُوَ يْرَدّْ عْلِيهْ يَسُوعْ وْݣَالْ: «مْكْتُوبْ فْكْتَابْ اللَّهْ: لْلرَّبّْ إِلَاهْكْ تْسْجَدْ، وْهُوَ بُوحْدُه اللِّي تْعْبَدْ».

⁹وْدَّاهْ إِبْلِيسْ لْأُورْشَلِيمْ، وْوَقّْفُه عْلَى الْحَافَة دْ السّْطَحْ دْيَالْ بِيتْ اللَّهْ وْݣَالْ لِيهْ: «إِلَا كْنْتِ وَلْدْ اللَّهْ، رْمِي رَاسْكْ مْنْ هْنَا لْلْتَحْتْ،

¹⁰حِيتْ مْكْتُوبْ فْكْتَابْ اللَّهْ: غَادِي يْوَصِّي اللَّهْ الْمَلَايْكَة دْيَالُه عْلِيكْ بَاشْ يْحَفْضُوكْ.

¹¹وْعْلَى يْدِّيهُمْ غَيْهَزُّوكْ بَاشْ رْجْلَكْ مَا تّْضْرَبْشْ مْعَ الْحْجَرْ».

¹²وْهُوَ يْرَدّْ عْلِيهْ يَسُوعْ وْݣَالْ: «رَاهْ تّْݣَالْ فْكْتَابْ اللَّهْ، مَا تْجَرّْبْشْ الرَّبّْ إِلَاهْكْ».

¹³وْمْلِّي كْمْلُو ݣَاعْ التَّجْرِبَاتْ، تّْفْرَقْ عْلِيهْ إِبْلِيسْ حْتَّى لْوَقْتْ آخْرْ.

¹⁴وْرْجَعْ يَسُوعْ لْبْلَادْ الْجَلِيلْ وْهُوَ مْعَمّْرْ بْقُوَّةْ رُوحْ اللَّهْ، وْدَاعْتْ خْبَارُه فْدِيكْ الجّْوَايْهْ كُلّْهَا.

¹⁵وْكَانْ كَيْعَلّْمْ فْدْيُورْ الصّْلَاة دْيَالْهُمْ، وْكُلّْشِي كَانْ كَيْشَكْرُه.

¹⁶وْجَا يَسُوعْ لْلنَّاصِرَة فِينْ كْبَرْ، وْكِيفْ كَانْتْ الْعَادَة دْيَالُه دْخَلْ لْدَارْ الصّْلَاة نْهَارْ السّْبْتْ، وْوْقَفْ بَاشْ يْقْرَا.

¹⁷وْعْطَاوْهْ كْتَابْ النّْبِي إِشْعِيَا، وْمْلِّي حَلّْ الْكْتَابْ، لْقَا وْقْرَا الْمُوضْعْ اللِّي مْكْتُوبْ فِيهْ:

¹⁸«رُوحْ الرَّبّْ عْلِيَّ حِيتْ خْتَارْنِي [٢]بَاشْ نْخَبّْرْ الْمَسَاكِينْ بْالْبْشَارَة، وْصِيفْطْنِي نْخَبّْرْ اللِّي مْحْبُوسِينْ بْلِّي غَادِي يْتّْطْلَقْ سْرَاحْهُمْ، وْالْعَمْيِينْ بْلِّي غَيْوَلِّيوْ يْشُوفُو، وْالْمْضْلُومِينْ بْلِّي غَيْتْحَرّْرُو،

¹⁹وْصِيفْطْنِي نْخَبّْرْ بْالْعَامْ اللِّي فِيهْ غَادِي يْقْبَلْ الرَّبّْ شَعْبُه».

²⁰وْسْدّْ يَسُوعْ كْتَابْ اللَّهْ، وْرَدُّه لْلْخْدَّامْ فْدَارْ الصّْلَاة وْݣْلَسْ. وْكَانُو ݣَاعْ اللِّي حَاضْرِينْ كَيْشُوفُو فِيهْ،

²¹وْبْدَا كَيْݣُولْ لِيهُمْ: «الْيُومْ، رَاهْ تْحَقّْقْ هَادْ الْكْلَامْ كِمَا سْمَعْتُوهْ».

²²وْكُلّْهُمْ تّْكَلّْمُو عْلِيهْ مْزْيَانْ، وْتّْعَجّْبُو مْنْ كْلَامْ النِّعْمَة اللِّي كَانْ كَيْخْرُجْ مْنْ فُمُّه، وْݣَالُو: «وَاشْ هَادَا مَاشِي هُوَ وَلْدْ يُوسْفْ؟»

²³وْݣَالْ لِيهُمْ يَسُوعْ: «غَادِي تْݣُولُو لِيَّ هَادْ الْمْتَالْ: آ الطّْبِيبْ دَاوِي بْعْدَ رَاسْكْ، وْݣَاعْ دَاكْشِّي اللِّي سْمَعْنَاهْ طْرَا فْكَفْرْنَاحُومْ دِيرُه حْتَّى هْنَا فْبْلَادْكْ».

²⁴وْݣَالْ لِيهُمْ: «نْݣُولْ لِيكُمْ الْحَقّْ، عَمّْرْ شِي نْبِي مَا تّْقْبَلْ فْبْلَادُه.

²⁵وْالْحَقّْ نْݣُولْ لِيكُمْ: رَاهْ بْزَّافْ دْ الْهْجَّالَاتْ كَانُو فْإِسْرَائِيلْ فْوَقْتْ إِيلِيَّا، مْلِّي تّْحْبْسَاتْ الشّْتَا تْلْتْ سْنِينْ وْسْتّْ شْهُورْ، وْمْلِّي جَا جُوعْ صْعِيبْ فْالْبْلَادْ كُلّْهَا،

²⁶وْوَاخَّا هَادْشِّي مَا صِيفْطْ اللَّهْ إِيلِيَّا حْتَّى لْشِي لْوَحْدَة مْنّْهُمْ، وَلَكِنْ صِيفْطُه لْعَنْدْ مْرَاة هْجَّالَة فْصِرْفَة اللِّي فْجْوَايْهْ صَيْدَا.

²⁷وْكَانُو فْإِسْرَائِيلْ بْزَّافْ دْيَالْ الْمْجْدَامِينْ فْوَقْتْ النّْبِي أَلِيشَعَ، وَلَكِنْ حْتَّى وَاحْدْ مْنّْهُمْ مَا وْلَّى طَاهْرْ مْنْ غِيرْ نُعْمَانْ السُّورِي».

²⁸وْمْلِّي سْمْعُو ݣَاعْ الْحَاضْرِينْ فْدَارْ الصّْلَاة هَادْ الْكْلَامْ تْقَلّْقُو بْزَّافْ.

²⁹وْنَاضُو وْخَرّْجُوهْ عْلَى بْرَّا دْ الْمْدِينَة، وْجَابُوهْ لْلْحَافَة دْ الجّْبَلْ اللِّي كَانْتْ مْبْنِيَة عْلِيهْ الْمْدِينَة بَاشْ يْرْمِيوْهْ لْلْتَحْتْ.

³⁰وَلَكِنْ هُوَ دَازْ فْوَسْطْ مْنّْهُمْ وْمْشَى.

³¹وْهْبَطْ لْكَفْرْنَاحُومْ، وْهِيَ مْدِينَة فْالْجَلِيلْ، وْبْدَا كَيْعَلّْمْ النَّاسْ نْهَارْ السّْبْتْ،

³²وْتّْعَجّْبُو مْنْ التَّعْلِيمْ دْيَالُه، حِيتْ كَيْتّْكَلّْمْ بْسُلْطَة.

³³وْكَانْ فْدَارْ الصّْلَاة وَاحْدْ الرَّاجْلْ سَاكْنُه جْنّْ، وْبْدَا كَيْغَوّْتْ بْصُوتْ عَالِي:

³⁴«آشْ بِينَّا وْبِينْكْ آ يَسُوعْ النَّاصِرِي؟ وَاشْ جِيتِي بَاشْ تْهْلَكْنَا؟ أَنَا كَنْعْرَفْ شْكُونْ نْتَ: نْتَ هُوَ الْمْقَدّْسْ دْيَالْ اللَّهْ!».

³⁵وْنْهَضْ يَسُوعْ فْالجّْنّْ وْݣَالْ: «سْكُتْ وْخْرُجْ مْنْ الرَّاجْلْ!». وْطِيّْحْ الجّْنْ الرَّاجْلْ فْوَسْطْ النَّاسْ وْخْرَجْ مْنُّه بْلَا مَا يْآدِيهْ.

³⁶وْهُمَ يْتّْعَجْبُو النَّاسْ كُلّْهُمْ، وْݣَالُو لْبَعْضِيَّاتْهُمْ: «آشْ هَادْشِّي كَنْسَمْعُو؟ بْقُوَّة وْبْسُلْطَة كَيْآمْرْ الجّْنُونْ وْكَيْخَرْجُو؟».

³⁷وْدَاعْتْ خْبَارُه فْݣَاعْ هَادِيكْ الجّْوَايْهْ.

³⁸وْخْرَجْ مْنْ دَارْ الصّْلَاة وْدْخَلْ لْدَارْ سِمْعَانْ، وْكَانْتْ نْسِيبْةْ سِمْعَانْ فِيهَا السّْخَانَة مْجَهْدَة، وْطْلْبُو مْنُّه بَاشْ يْشَافِيهَا.

³⁹وْوْقَفْ حْدَاهَا، وْنْهَضْ فْالسّْخَانَة وْهِيَ تْمْشِي مْنّْهَا، وْنَاضْتْ وْضَايْفَاتْهُمْ.

⁴⁰وْمْعَ غْرُوبْ الشّْمْسْ، جَاوْ النَّاسْ بْالْمَرْضَى دْيَاوْلْهُمْ لْعَنْدْ يَسُوعْ، وْكَانْ كُلّْ وَاحْدْ وْمَرْضُه، وْحَطّْ يْدِّيهْ عْلَى كُلّْ وَاحْدْ مْنّْهُمْ وْشْفَاهْ،

⁴¹وْخَرْجُو الجّْنُونْ مْنْ بْزَّافْ دْ النَّاسْ وْهُمَ كَيْغَوّْتُو وْكَيْݣُولُو: «نْتَ وَلْدْ اللَّهْ!». وْنْهَضْ فِيهُمْ يَسُوعْ وْمَا خْلَّاهُمْشْ يْتّْكَلّْمُو، حِيتْ عَرْفُو بْلِّي هُوَ الْمَسِيحْ.

⁴²وْخْرَجْ يَسُوعْ فْالصّْبَاحْ بْكْرِي، وْمْشَى لْوَاحْدْ الْمُوضْعْ خَالِي، وْبْدَاوْ الجّْمَاعَاتْ دْ النَّاسْ كَيْقَلّْبُو عْلِيهْ، وْمْلِّي لْقَاوْهْ شْدُّوهْ بَاشْ يْبْقَى مْعَاهُمْ.

⁴³وَلَكِنْ هُوَ ݣَالْ لِيهُمْ: «وَاجْبْ عْلِيَّ نْخَبّْرْ الْمْدُونْ لْخْرِينْ حْتَّى هُمَ بْمَمْلَكَةْ اللَّهْ، حِيتْ عْلَى قْبَلْ هَادْشِّي اللَّهْ صِيفْطْنِي».

⁴⁴وْمْشَى كَيْخَبّْرْ بْالْبْشَارَة فْدْيُورْ الصّْلَاة دْيَالْ الْيَهُودِيَّة.