Read Moroccan Standard Translation لُوقَا 5 Bible Online

لُوقَا 5 - Moroccan Standard Translation bible

لُوقَا 5

¹الْفَصْلْ الْخَامْسْ وْفْوَاحْدْ النّْهَارْ كَانْ يَسُوعْ وَاقْفْ عْلَى جَنْبْ الْبُحَيْرَة دْيَالْ جَنِّيسَارَتْ، وْكَانُو الجّْمَاعَة دْ النَّاسْ كَيْتْدَافْعُو بَاشْ يْسَمْعُو كْلَامْ اللَّهْ.

²وْهُوَ يْشُوفْ جُوجْ فْلَايْكْ وَاقْفِينْ عْلَى جَنْبْ الْبُحَيْرَة، خَرْجُو مْنّْهُمْ الْبْحَّارَة كَيْغَسْلُو شْبَاكْهُمْ.

³وْطْلَعْ يَسُوعْ لْوَحْدَة مْنّْهُمْ، وْكَانْتْ دْيَالْ سِمْعَانْ، وْطْلَبْ مْنُّه يْبَعّْدْ شْوِيَّة عْلَى الْبْرّْ، وْݣْلَسْ كَيْعَلّْمْ الجّْمَاعَاتْ دْ النَّاسْ مْنْ الْفْلُوكَة.

⁴وْمْلِّي كَمّْلْ كْلَامُه، ݣَالْ لْسِمْعَانْ: «سِيرْ لْلْغُرْقْ وْرْمِيوْ الشّْبَاكْ دْيَاوْلْكُمْ بَاشْ تْصَيّْدُو».

⁵وْجَاوْبُه سِمْعَانْ وْݣَالْ: «تْمَحّْنَّا اللِّيلْ كُلُّه آ سِيدِي، وْمَا صَيّْدْنَا حْتَّى حَاجَة، وَلَكِنْ حِيتْ ݣْلْتِيهَا نْتَ، غَنْرْمِي الشّْبَاكْ».

⁶وْمْلِّي دَارُو دَاكْشِّي، صَيّْدُو حُوتْ كْتِيرْ حْتَّى بْدَاوْ الشّْبَاكْ دْيَالْهُمْ كَيْتّْشَرّْݣُو.

⁷وْشَيّْرُو لْهَادُوكْ اللِّي مْشَارْكِينْ مْعَاهُمْ اللِّي فْالْفْلُوكَة لْخْرَى بَاشْ يْجِيوْ يْعَاوْنُوهُمْ، وْجَاوْ عَمّْرُو الْفْلَايْكْ بْجُوجْ حْتَّى قَرّْبُو يْغَرْقُو.

⁸وْمْلِّي شَافْ سِمْعَانْ بُطْرُسْ هَادْشِّي، تّْحْنَى عَنْدْ رْكَابِي يَسُوعْ وْݣَالْ: «بَعّْدْ مْنِّي! آ سِيدِي، حِيتْ أَنَا رَاجْلْ مُدْنِبْ».

⁹عْلَاحْقَّاشْ تّْعَجّْبْ هُوَ وْݣَاعْ هَادُوكْ اللِّي مْعَاهْ مْنْ كْتْرَةْ الْحُوتْ اللِّي صَيّْدُو.

¹⁰وْحْتَّى يَعْقُوبْ وْيُوحَنَّا وْلَادْ زَبَدِي اللِّي مْشَارْكِينْ مْعَ سِمْعَانْ، تّْعَجّْبُو بْحَالْهُمْ. وْهُوَ يْݣُولْ يَسُوعْ لْسِمْعَانْ: «مَا تْخَافْشْ! مْنْ الْيُومْ غَادِي تْوَلِّي تْصَيّْدْ النَّاسْ».

¹¹وْمْنْ بَعْدْمَا رْجْعُو بْفْلَايْكْهُمْ لْلْبْرّْ، خْلَّاوْ كُلّْشِي وْتْبْعُو يَسُوعْ.

¹²وْمْلِّي كَانْ فْوَاحْدْ الْمْدِينَة، كَانْ تْمَّ وَاحْدْ الرَّاجْلْ عَامْرْ بْالجّْدَامْ، وْغِيرْ شَافْ يَسُوعْ وْهُوَ يْطِيحْ عْلَى وْجْهُه وْرَغْبُه وْݣَالْ: «آ سِيدِي، إِلَا بْغِيتِي رَاكْ تْقْدَرْ تْرَدّْنِي طَاهْرْ!».

¹³وْهُوَ يْمَدّْ يَسُوعْ يْدُّه وْمْسُّه وْݣَالْ: «أَنَا بْغِيتْ، إِيوَا كُونْ طَاهْرْ!». وْفْدِيكْ السَّاعَة تْحَيّْدْ مْنُّه الجّْدَامْ.

¹⁴وْآمْرُه يَسُوعْ وْݣَالْ لِيهْ: «مَا تْݣُولْهَا لْحْتَّى شِي حَدّْ وَلَكِنْ سِيرْ وْرِّي دَاتْكْ لْرَاجْلْ الدِّينْ، وْعْطِي الْهْدِيَّة عْلَى التَّطْهِيرْ دْيَالْكْ كِمَا وْصَّى مُوسَى، بَاشْ يْكُونْ هَادْشِّي شْهَادَة لِيهُمْ».

¹⁵وْزَادْتْ خْبَارْ يَسُوعْ كَتْدِيعْ، وْجَاوْ لْعَنْدُه جْمَاعَاتْ كْتِيرَة بَاشْ يْسَمْعُوهْ وْيْتّْشَافَاوْ مْنْ مَرْضْهُمْ،

¹⁶وَلَكِنْ هُوَ كَانْ كَيْتّْعْزَلْ فْالْبْلَايْصْ الْخَالْيَة وْكَيْصَلِّي.

¹⁷وْوَاحْدْ النّْهَارْ كَانْ يَسُوعْ كَيْعَلّْمْ، وْكَانُو بِينْ الْحَاضْرِينْ شِي وْحْدِينْ مْنْ الْفْرِّيسِيِّينْ وْالْعُلَمَا دْ الشّْرَعْ اللِّي جَاوْ مْنْ ݣَاعْ الدّْوَاوْرْ اللِّي فْالْجَلِيلْ وْالْيَهُودِيَّة وْأُورْشَلِيمْ، وْبْقُوَّةْ الرَّبّْ اللِّي كَانْتْ مْعَاهْ تّْشَافَاوْ الْمَرْضَى.

¹⁸وْجَاوْ شِي نَاسْ هَازِّينْ مْشْلُولْ بْفْرَاشُه، وْكَانُو كَيْقَلّْبُو كِيفَاشْ يْدِيرُو بَاشْ يْدَخّْلُوهْ وْيْحَطُّوهْ قُدَّامْ يَسُوعْ.

¹⁹وْمْلِّي مَا لْقَاوْشْ كِيفَاشْ يْدَخّْلُوهْ بْسْبَابْ الزّْحَامْ، طْلْعُو لْلسّْطَحْ وْدْلَّاوْهْ بْفْرَاشُه مْنْ بِينْ الطُّوبْ وْحَطُّوهْ فْالْوَسْطْ قُدَّامْ يَسُوعْ.

²⁰وْمْلِّي شَافْ يَسُوعْ إِيمَانْهُمْ، ݣَالْ لْلْمْشْلُولْ: «آ هَادْ الرَّاجْلْ، رَاهْ تّْغَفْرُو لِيكْ دْنُوبْكْ».

²¹وْبْدَاوْ الْعُلَمَا دْ الشّْرَعْ وْالْفْرِّيسِيِّينْ كَيْݣُولُو فْخَاطْرْهُمْ: «شْكُونْ هُوَ هَادَا اللِّي كَيْتّْكَلّْمْ بْكْلَامْ الْكُفْرْ؟ شْكُونْ يْقْدَرْ يْغْفَرْ الدّْنُوبْ مْنْ غِيرْ اللَّهْ بُوحْدُه؟».

²²وْعْرَفْ يَسُوعْ فَاشْ كَيْخَمّْمُو، وْجَاوْبْهُمْ: «عْلَاشْ كَتْفَكّْرُو فْخَاطْرْكُمْ بْحَالْ هَكَّا؟

²³أَمَا سْهَلْ، يْتّْݣَالْ: مْغْفُورِينْ لِيكْ دْنُوبْكْ، وْلَا يْتّْݣَالْ: نُوضْ وْسِيرْ؟

²⁴وَلَكِنْ بَاشْ تْعَرْفُو بْلِّي وَلْدْ الْإِنْسَانْ عَنْدُه السُّلْطَة عْلَى الْأَرْضْ بَاشْ يْغْفَرْ الدّْنُوبْ». ݣَالْ لْلْمْشْلُولْ: «لِيكْ كَنْݣُولْ: نُوضْ هْزّْ فْرَاشْكْ، وْسِيرْ لْدَارْكْ!».

²⁵وْفْدِيكْ السَّاعَة نَاضْ الرَّاجْلْ قُدَّامْ النَّاسْ، وْهْزّْ فْرَاشُه وْمْشَى لْدَارُه وْهُوَ كَيْعْطِي الْعَزّْ لْلَّهْ.

²⁶وْتّْخَلْعُو كُلّْهُمْ وْخَافُو بْزَّافْ، وْعْطَاوْ الْعَزّْ لْلَّهْ وْݣَالُو: «الْيُومْ شْفْنَا أُمُورْ عْجِيبَة!».

²⁷وْمْنْ بَعْدْ هَادْشِّي، خْرَجْ يَسُوعْ وْشَافْ وَاحْدْ مْنْ مَّالِينْ الضَّرِيبَة سْمِيتُه لَاوِي، ݣَالْسْ فْدَارْ الضَّرِيبَة، وْݣَالْ لِيهْ يَسُوعْ: «تْبَعْنِي!»

²⁸وْنَاضْ وْخْلَّا كُلّْشِي وْتْبْعُه.

²⁹وْدَارْ لِيهْ لَاوِي عْرَاضَة كْبِيرَة فْدَارُه، حَضْرَاتْ لِيهَا جْمَاعَة كْبِيرَة مْنْ مَّالِينْ الضَّرِيبَة وْغِيرْهُمْ، وْݣَلْسُو كَيَاكْلُو مْعَاهُمْ.

³⁰وْبْدَاوْ الْفْرِّيسِيِّينْ وْصْحَابْهُمْ مْنْ الْعُلَمَا دْ الشّْرَعْ كَيْݣَمْݣْمُو عْلَى تْلَامْدْ يَسُوعْ وْكَيْݣُولُو: «عْلَاشْ كَتَاكْلُو وْكَتْشَرْبُو مْعَ مَّالِينْ الضَّرِيبَة وْالْمُدْنِبِينْ؟»

³¹وْجَاوْبْهُمْ يَسُوعْ وْݣَالْ: «رَاهْ مَاشِي الصْحَاحْ اللِّي مْحْتَاجِينْ لْلطّْبِيبْ، وَلَكِنْ الْمَرْضَى.

³²مَا جِيتْشْ نْعَيّْطْ عْلَى اللِّي مْتَّاقْيِينْ اللَّهْ، وَلَكِنْ عْلَى الْمُدْنِبِينْ بَاشْ يْتُوبُو».

³³وْشِي وْحْدِينْ مْنّْهُمْ ݣَالُو لْيَسُوعْ: «تْلَامْدْ يُوحَنَّا كَيْصُومُو وْكَيْصَلِّيوْ بْزَّافْ بْحَالْ تْلَامْدْ الْفْرِّيسِيِّينْ، أَمَّا تْلَامْدْكْ رَاهُمْ كَيَاكْلُو وْكَيْشَرْبُو!»

³⁴وْجَاوْبْهُمْ يَسُوعْ: «وَاشْ تْقَدْرُو تْخَلِّيوْ الْمْعْرُوضِينْ لْلْعَرْسْ يْصُومُو وْالْعْرِيسْ بَاقِي مْعَاهُمْ؟

³⁵وَلَكِنْ غَادِي يْجِي الْوَقْتْ اللِّي غَيْتّْخَادْ الْعْرِيسْ مْنْ بِينَاتْهُمْ، وْفْدِيكْ السَّاعَة غَيْصُومُو».

³⁶وْݣَالْ لِيهُمْ هَادْ الْمْتَالْ: «مَا كَايْنْ حْتَّى حَدّْ كَيْقَطّْعْ طَرْفْ مْنْ لْبَاسْ جْدِيدْ وْكَيْرَقّْعْ بِيهْ لْبَاسْ قْدِيمْ، حِيتْ إِلَا دَارْ دَاكْشِّي غَيْقَطّْعْ الجّْدِيدْ، وْالرّْقْعَة دْيَالْ اللّْبَاسْ الجّْدِيدْ مَا غَتْجِيشْ مْعَ اللّْبَاسْ الْقْدِيمْ.

³⁷وْحْتَّى وَاحْدْ مَا كَيْدِيرْ خْمَرْ جْدِيدْ فْݣْرْبَاتْ دْيَالْ الجّْلْدْ قْدَامْ، حِيتْ إِلَا دَارْ دَاكْشِّي غَادِي يْتْقُبْ الْخْمَرْ الجّْدِيدْ الْݣْرْبَاتْ وْغَيْسِيلْ، وْالْݣْرْبَاتْ غَيْضِيعُو.

³⁸وَلَكِنْ الْخْمَرْ الجّْدِيدْ خَاصُّه يْتْدَارْ فْݣْرْبَاتْ دْ الجّْلْدْ جْدَادْ.

³⁹وْحْتَّى وَاحْدْ مَا كَيْشْرَبْ خْمَرْ قْدِيمْ فْاللّْوّْلْ وْيْبْغِي يْشْرَبْ مْنْ مُورَاهْ خْمَرْ جْدِيدْ، حِيتْ غَادِي يْݣُولْ: الْخْمَرْ الْقْدِيمْ مْزْيَانْ!».