Read Moroccan Standard Translation لُوقَا 6 Bible Online

لُوقَا 6 - Moroccan Standard Translation bible

لُوقَا 6

¹الْفَصْلْ السَّادْسْ وْفْوَاحْدْ السّْبْتْ، دَازْ يَسُوعْ بِينْ الْفْدَادْنْ دْ الزّْرَعْ، وْبْدَاوْ التّْلَامْدْ دْيَالُه كَيْقَطّْعُو السّْبُولْ وْكَيْفَرْكُوهْ بْيْدِّيهُمْ وْكَيَاكْلُوهْ.

²وْݣَالُو لِيهُمْ شِي وْحْدِينْ مْنْ الْفْرِّيسِيِّينْ: «عْلَاشْ كَتْدِيرُو دَاكْشِّي اللِّي مَا خَاصّْشْ يْتْدَارْ نْهَارْ السّْبْتْ؟».

³وْجَاوْبْهُمْ يَسُوعْ وْݣَالْ: «وَاشْ مَا قْرِيتُوشْ آشْ دَارْ دَاوُدْ مْلِّي جَاهْ الجُّوعْ هُوَ وْهَادُوكْ اللِّي كَانُو مْعَاهْ؟

⁴وْكِيفَاشْ دْخَلْ لْبِيتْ اللَّهْ وْخْدَا الْخُبْزْ اللِّي كَيْقَدّْمُوهْ لْلَّهْ، وْكْلَا وْعْطَى لْلرّْجَالْ اللِّي مْعَاهْ، وَاخَّا مَا كَانْ خَاصّْ يَاكْلُه حْتَّى وَاحْدْ، مْنْ غِيرْ رْجَالْ الدِّينْ بُوحْدْهُمْ».

⁵وْݣَالْ لِيهُمْ يَسُوعْ: «وَلْدْ الْإِنْسَانْ هُوَ الرَّبّْ دْيَالْ السّْبْتْ».

⁶وْفْوَاحْدْ السّْبْتْ آخُرْ، دْخَلْ لْدَارْ الصّْلَاة وْبْدَا كَيْعَلّْمْ. وْكَانْ تْمَّ وَاحْدْ الرَّاجْلْ، يْدُّه لِيمْنَى مْشْلُولَة.

⁷وْبْقَاوْ الْعُلَمَا دْ الشّْرَعْ وْالْفْرِّيسِيِّينْ حَاضْيِينْ يَسُوعْ بَاشْ يْشُوفُو وَاشْ غَادِي يْشَافِي فْنْهَارْ السّْبْتْ، بَاشْ يْلْقَاوْ عْلِيهْ شِي تُهْمَة.

⁸وْعْرَفْ يَسُوعْ فَاشْ كَانُو كَيْخَمّْمُو، وْݣَالْ لْلرَّاجْلْ اللِّي يْدُّه مْشْلُولَة: «نُوضْ وْقَفْ فْالْوَسْطْ!» وْنَاضْ الرَّاجْلْ وْوْقَفْ.

⁹وْݣَالْ لِيهُمْ يَسُوعْ: «بْغِيتْ نْسْوّْلْكُمْ: أَشْنُو اللِّي حْلَالْ نْهَارْ السّْبْتْ، نْدِيرُو الْخِيرْ وْلَا نْدِيرُو الشَّرّْ؟ نْعَتْقُو رُوحْ وْلَا نْقْتْلُوهَا؟»

¹⁰وْضَارْ وْشَافْ فِيهُمْ كُلّْهُمْ وْݣَالْ لْلرَّاجْلْ: «مْدّْ يْدّْكْ!» وْهُوَ يْمْدّْهَا، وْوْلَّاتْ صْحِيحَة،

¹¹وْتّْقَلّْقُو بْزَّافْ وْبْدَاوْ كَيْتّْشَاوْرُو آشْ يْمْكَنْ يْدِيرُو لْيَسُوعْ.

¹²وْفْدِيكْ لِيَّامْ طْلَعْ يَسُوعْ لْلجّْبَلْ بَاشْ يْصَلِّي، وْبْقَى اللِّيلْ كُلُّه وْهُوَ كَيْصَلِّي لْلَّهْ.

¹³وْفْالصّْبَاحْ، عَيّْطْ عْلَى تْلَامْدُه وْخْتَارْ مْنّْهُمْ طْنَاشْ اللِّي سْمَّاهُمْ رُسُلْ، وْهُمَ:

¹⁴سِمْعَانْ اللِّي سْمَّاهْ بُطْرُسْ، وْأَنْدْرَاوُسْ خُوهْ، وْيَعْقُوبْ، وْيُوحَنَّا، وْفِيلُبُّسْ وْبَرْتُولَمَاوُسْ،

¹⁵وْمَتَّى وْتُومَا، وْيَعْقُوبْ بْنْ حَلْفَى وْسِمْعَانْ اللِّي مْعْرُوفْ بْالْغَيُورْ،

¹⁶وْيَهُودَا بْنْ يَعْقُوبْ وْيَهُودَا الْإِسْخَرْيُوطِي اللِّي وْلَّى خَايْنْ.

¹⁷وْهْبَطْ مْعَاهُمْ يَسُوعْ وْوْقَفْ فْوَاحْدْ الْبْلَاصَة مْوَاطْيَة، وْكَانُو بْزَّافْ دْ التّْلَامْدْ دْيَالُه وْجْمَاعَة كْبِيرَة دْيَالْ النَّاسْ مْنْ بْلَادْ الْيَهُودِيَّة كُلّْهَا، وْأُورْشَلِيمْ، وْجَنْبْ الْبْحَرْ دْ صُورْ وْصَيْدَا،

¹⁸جَاوْ بَاشْ يْسَمْعُوهْ وْيْتّْشَافَاوْ مْنْ الْأَمْرَاضْ دْيَالْهُمْ، وْحْتَّى اللِّي مْعَدّْبِينْهُمْ الجّْنُونْ كَانُو كَيْتّْشَافَاوْ.

¹⁹وْݣَاعْ النَّاسْ بْغَاوْ يْمَسُّوهْ، حِيتْ كَانْتْ كَتْخْرَجْ مْنُّه قُوَّة وْكَتْشَافِيهُمْ كَامْلِينْ.

²⁰وْشَافْ يَسُوعْ فْالتّْلَامْدْ دْيَالُه وْݣَالْ لِيهُمْ: «سْعْدَاتْكُمْ آ الْمَسَاكِينْ، حِيتْ تّْعْطَاتْ لِيكُمْ مَمْلَكَةْ اللَّهْ!

²¹سْعْدَاتْكُمْ آ اللِّي جِيعَانِينْ دَابَا، حِيتْ غَادِي تْشَبْعُو. سْعْدَاتْكُمْ آ اللِّي كَتْبْكِيوْ دَابَا، حِيتْ غَادِي تْضَحْكُو.

²²وْسْعْدَاتْكُمْ مْلِّي يْكَرْهُوكُمْ النَّاسْ، وْمْلِّي يْجْرِّيوْ عْلِيكُمْ، وْيْعَايْرُوكُمْ وْيْرَدُّوكُمْ بْحَالْ إِلَا مَا كَتْسْوَاوْ وْمَا كَتْصْلَاحُو، بْسْبَابْ وَلْدْ الْإِنْسَانْ.

²³فْهَادَاكْ النّْهَارْ فْرْحُو وْطِيرُو بْالْفَرْحَة، حِيتْ أَجْرْكُمْ عْظِيمْ فْالسّْمَا. حِيتْ بْحَالْ هَادْشِّي اللِّي دَارُو جْدُودْهُمْ لْلْأَنْبِيَا.

²⁴وَلَكِنْ يَا وِيلْكُمْ آ اللِّي لَبَاسْ عْلِيكُمْ، حِيتْ عَنْدْكُمْ اللِّي يْوَاسِيكُمْ.

²⁵وْيَا وِيلْكُمْ آ اللِّي شْبْعَانِينْ دَابَا، حِيتْ غَادِي تْجُوعُو. وْيَا وِيلْكُمْ نْتُمَ آ اللِّي كَتْضْحْكُو دَابَا، حِيتْ غَادِي تْنْوّْحُو وْتْبْكِيوْ.

²⁶وْيَا وِيلْكُمْ إِلَا شْكْرُوكُمْ ݣَاعْ النَّاسْ، حِيتْ هَادْشِّي اللِّي دَارُو جْدُودْهُمْ مْعَ الْأَنْبِيَا الْكْدَّابِينْ».

²⁷«وَلَكِنْ كَنْݣُولْ لِيكُمْ آ اللِّي كَتْسَمْعُو: بْغِيوْ عْدْيَانْكُمْ، وْدِيرُو الْخِيرْ مْعَ اللِّي كَيْكَرْهُوكُمْ،

²⁸بَارْكُو اللِّي كَيْسَبُّوكُمْ، وْدْعِيوْ مْعَ هَادُوكْ اللِّي كَيْضَلْمُوكُمْ.

²⁹اللِّي صَرْفْقَكْ عْلَى حْنْكَكْ، ضَوّْرْ لِيهْ لَاخُرْ، وْاللِّي دَّا لِيكْ جْلَّابْتْكْ، سْمَحْ لِيهْ حْتَّى فْالتّْشَامِيرْ دْيَالْكْ.

³⁰وْاللِّي طْلَبْ مْنّْكْ شِي حَاجَة عْطِيهَا لِيهْ، وْاللِّي دَّا لِيكْ شِي حَاجَة دْيَالْكْ مَا تْعَاوْدْشْ تْطْلَبْهَا مْنُّه.

³¹وْدِيرُو مْعَ النَّاسْ كِمَا كَتْبْغِيوْهُمْ يْدِيرُو مْعَاكُمْ.

³²وْإِلَا بْغِيتُو غِيرْ اللِّي كَيْبْغِيوْكُمْ، آشْ مْنْ فْضَلْ عَنْدْكُمْ؟ حِيتْ حْتَّى الْمُدْنِبِينْ كَيْبْغِيوْ اللِّي كَيْبْغِيوْهُمْ.

³³وْإِلَا دْرْتُو الْخِيرْ غِيرْ مْعَ اللِّي كَيْدِيرُوهْ مْعَاكُمْ، آشْ مْنْ فْضَلْ عَنْدْكُمْ؟ حِيتْ حْتَّى الْمُدْنِبِينْ كَيْدِيرُو بْحَالْ هَكَّا.

³⁴وْإِلَا سَلّْفْتُو غِيرْ هَادُوكْ اللِّي كَتْمْنَّاوْ يْرَدُّو لِيكُمْ، آشْ مْنْ فْضَلْ عَنْدْكُمْ؟ حِيتْ حْتَّى الْمُدْنِبِينْ كَيْسَلّْفُو لْلْمُدْنِبِينْ بَاشْ يْرْجّْعُو لِيهُمْ سَلْفْهُمْ.

³⁵وَلَكِنْ بْغِيوْ عْدْيَانْكُمْ، وْدِيرُو الْخِيرْ وْسَلّْفُو بْلَا مَا تْعَوّْلُو تَاخْدُو حْتَّى شِي حَاجَة، وْهَكَّا غَيْكُونْ أَجْرْكُمْ كْبِيرْ، وْغَتْكُونُو وْلَادْ اللَّهْ الْعَالِي، حِيتْ كَيْنْعَمْ حْتَّى عْلَى نْكَّارِينْ الْخِيرْ وْالْمُدْنِبِينْ.

³⁶وْخَاصّْ تْكُونْ فِيكُمْ الرَّحْمَة كِمَا اللَّهْ بَّاكُمْ رْحِيمْ».

³⁷«مَا تْحَاكْمُو حَدّْ، وْمَا غَتّْحَاكْمُوشْ. مَا تْحَكْمُو عْلَى حَدّْ، وْمَا غَيْتّْحْكَمْشْ عْلِيكُمْ. غْفْرُو، وْغَيْتّْغْفَرْ لِيكُمْ.

³⁸عْطِيوْ، وْغَيْتّْعْطَى لِيكُمْ. عَبْرَة مْزْيَانَة وْمْدْكُوكَة، وْمْخَضْخْضَة وْوَافْيَّة غَتّْحَطّْ فْحْجَرْكُمْ، حِيتْ الْعْبَارْ بَاشْ كَتْعَبْرُو، بِيهْ غَيْتّْعْبَرْ لِيكُمْ».

³⁹وْݣَالْ لِيهُمْ يَسُوعْ هَادْ الْمْتَالْ: «وَاشْ يْقْدَرْ عْمَى يْݣَوّْدْ عْمَى؟ وَاشْ مَا غَيْطِيحُوشْ بْجُوجْ فْحَفْرَة؟

⁴⁰رَاهْ التّْلْمِيدْ مَاشِي حْسَنْ مْنْ الْمُعَلِّمْ دْيَالُه، وَلَكِنْ كُلّْ تْلْمِيدْ كَمّْلْ الْعِلْمْ دْيَالُه غَيْوَلِّي بْحَالْ الْمُعَلِّمْ دْيَالُه.

⁴¹عْلَاشْ كَتْشُوفْ الْخْشَّة دْيَالْ التّْبَنْ اللِّي فْعِينْ خُوكْ، وْمَا كَتْرَدّْشْ الْبَالْ لْلْعُودْ اللِّي فْعِينْكْ؟

⁴²وْكِيفَاشْ تْقْدَرْ تْݣُولْ لْخُوكْ: آ خُويَا، خَلِّينِي نْحَيّْدْ الْخْشَّة دْيَالْ التّْبَنْ اللِّي فْعِينْكْ، وْعِينْكْ نْتَ فِيهَا عُودْ مَا شْفْتِيهْشْ؟ آ هَادْ الْمُنَافِقْ، خَرّْجْ فْاللّْوّْلْ الْعُودْ مْنْ عِينْكْ، دِيكْ السَّاعَة غَتْشُوفْ مْزْيَانْ بَاشْ تْحَيّْدْ الْخْشَّة دْ التّْبَنْ مْنْ عِينْ خُوكْ!».

⁴³«الشَّجْرَة الْمْزْيَانَة مَا كَتْعْطِيشْ غْلَّة خَايْبَة، وْالشَّجْرَة الْخَايْبَة مَا كَتْعْطِيشْ غْلَّة مْزْيَانَة.

⁴⁴كُلّْ شَجْرَة كَتّْعْرَفْ مْنْ غَلّْتْهَا، حِيتْ النَّاسْ مَا كَيْجْنِيوْشْ الْكَرْمُوسْ مْنْ الشُّوكْ، وْمَا كَيْجْنِيوْشْ الْعْنَبْ مْنْ السّْدْرَة.

⁴⁵بْنَادْمْ الْمْزْيَانْ كَيْخَرّْجْ الْحْوَايْجْ الْمْزْيَانِينْ مْنْ الْكَنْزْ الْمْزْيَانْ اللِّي فْقَلْبُه، وْبْنَادْمْ الْخَايْبْ كَيْخَرّْجْ الْحْوَايْجْ الْخَايْبِينْ مْنْ الْكَنْزْ الْخَايْبْ اللِّي فْقَلْبُه».

⁴⁶«عْلَاشْ كَتْعَيْطُو لِيَّ: آ سِيدِي، آ سِيدِي، وْمَا كَتْدِيرُوشْ بْكْلَامِي؟

⁴⁷غَادِي نْوَرِّيكُمْ لَمّْنْ كَيْشْبَهْ كُلّْ وَاحْدْ كَيْجِي لْعَنْدِي، وْكَيْسْمَعْ كْلَامِي، وْكَيْدِيرْ بِيهْ.

⁴⁸كَيْشْبَهْ لْوَاحْدْ الرَّاجْلْ كَيْبْنِي دَارْ، حْفَرْ وْغَرّْقْ وْحَطّْ السَّاسْ عْلَى الصّْخَرْ، وْمْلِّي فَاضْ الْوَادْ عْلَى دِيكْ الدَّارْ، مَا قْدَرْشْ يْزَعْزَعْهَا عْلَاحْقَّاشْ كَانْتْ مْبْنِيَة عْلَى الصَّحْ.

⁴⁹أَمَّا اللِّي كَيْسْمَعْ كْلَامِي وْمَا كَيْدِيرْشْ بِيهْ، رَاهْ كَيْشْبَهْ لْوَاحْدْ الرَّاجْلْ بْنَى دَارُه عْلَى التّْرَابْ بْلَا مَا يْدِيرْ السَّاسْ، وْمْلِّي فَاضْ عْلِيهَا الْوَادْ، رَابْتْ دْغْيَا وْكَانْ التّْرْيَابْ دْيَالْهَا قْوِي».