Read Moroccan Standard Translation لُوقَا 9 Bible Online

لُوقَا 9 - Moroccan Standard Translation bible

لُوقَا 9

¹الْفَصْلْ التَّاسْعْ وْجْمَعْ يَسُوعْ تْلَامْدُه الطّْنَاشْ وْعْطَاهُمْ الْقُوَّة وْالسُّلْطَة عْلَى ݣَاعْ الجّْنُونْ وْبَاشْ يْشْفِيوْ مْنْ الْأَمْرَاضْ،

²وْصِيفْطْهُمْ بَاشْ يْخَبّْرُو بْمَمْلَكَةْ اللَّهْ وْيْشَافِيوْ الْمَرْضَى.

³وْݣَالْ لِيهُمْ: «مَا تْهَزُّو مْعَاكُمْ حْتَّى شِي حَاجَة فْالسّْفَرْ، لَا عْكَّازْ، لَا رَزْمَة، لَا خُبْزْ، وَلَا فْلُوسْ، وْمَا تَاخْدُوشْ مْعَاكُمْ جُوجْ لْبْسَاتْ.

⁴وْالدَّارْ اللِّي دْخَلْتُو لِيهَا، هِيَ فِينْ تْبْقَاوْ حْتَّى تْخَرْجُو مْنّْهَا.

⁵وْݣَاعْ اللِّي مَا قْبْلُوكُمْشْ، خَرْجُو مْنْ مْدِينْتْهُمْ وْسُوسُو الْغَبْرَة اللِّي فْرْجْلِيكُمْ بَاشْ تْكُونْ هَادِي شْهَادَة ضْدّْهُمْ».

⁶وْمْنْ بَعْدْ هَادْشِّي، خَرْجُو التّْلَامْدْ وْمْشَاوْ لْلدّْوَاوْرْ كَيْخَبّْرُو بْالْبْشَارَة وْكَيْشَافِيوْ الْمَرْضَى فْكُلّْ بْلَاصَة.

⁷وْمْلِّي سْمَعْ الْحَاكْمْ هِيرُودُسْ بْكُلّْ مَا كَانْ كَيْجْرَا حَارْ، عْلَاحْقَّاشْ شِي وْحْدِينْ كَانُو كَيْݣُولُو: «هَادَا يُوحَنَّا الْمَعْمَدَانْ تّْبْعَتْ مْنْ الْمُوتْ»،

⁸وْشِي وْحْدِينْ ݣَالُو: «هَادَا إِيلِيَّا بَانْ!»، وْوْحْدِينْ خْرِينْ ݣَالُو: «هَادَا وَاحْدْ مْنْ الْأَنْبِيَا اللّْوّْلِينْ تّْبْعَتْ».

⁹وَلَكِنْ هِيرُودُسْ ݣَالْ: «يُوحَنَّا رَانِي قْطَعْتْ رَاسُه، إِيوَا شْكُونْ هَادَا اللِّي كَنْسْمَعْ عْلِيهْ بْحَالْ هَادْ الْخْبَارْ؟». وْكَانْ بَاغِي يْشُوفُه.

¹⁰وْمْلِّي رْجْعُو الرُّسُلْ خَبّْرُو يَسُوعْ بْݣَاعْ دَاكْشِّي اللِّي دَارُو، وْدَّاهُمْ وْمْشَى مْعَاهُمْ بُوحْدُه لْوَاحْدْ الْمْدِينَة سْمِيتْهَا بَيْتْ صَيْدَا.

¹¹وْمْلِّي عَرْفُوهْ الجّْمَاعَاتْ دْ النَّاسْ كَايْنْ تْمَّ، تْبْعُوهْ. وْرَحّْبْ بِيهُمْ وْتّْكَلّْمْ لِيهُمْ عْلَى مَمْلَكَةْ اللَّهْ، وْشْفَى هَادُوكْ اللِّي كَانُو مْحْتَاجِينْ يْتّْشَافَاوْ.

¹²وْمْلِّي بْدَاتْ الشّْمْسْ كَتْغْرَبْ، قَرّْبُو لِيهْ تْلَامْدُه الطّْنَاشْ وْݣَالُو لِيهْ: «فَرّْقْ هَادْ الجّْمَاعَة دْ النَّاسْ بَاشْ يْمْشِيوْ لْلدّْوَاوْرْ وْالْفِيرْمَاتْ اللِّي قْرَابْ، بَاشْ يْبَاتُو تْمَّ وْيْلْقَاوْ مَا يَاكْلُو، حِيتْ حْنَا هْنَا فْالْخْلَا».

¹³وْݣَالْ لِيهُمْ يَسُوعْ: «عْطِيوْهُمْ نْتُمَ مَا يَاكْلُو»، وْهُمَ يْجَاوْبُوهْ: «مَا عَنْدْنَا غِيرْ خَمْسَة دْ الْخُبْزَاتْ وْجُوجْ حُوتَاتْ، مْنْ غِيرْ إِلَا مْشِينَا وْشْرِينَا الْمَاكْلَة لْݣَاعْ هَادْ النَّاسْ».

¹⁴عْلَاحْقَّاشْ كَانُو خَمْسَالَافْ رَاجْلْ تْقْرِيبًا. وَلَكِنْ ݣَالْ لْلتّْلَامْدْ دْيَالُه: «ݣْلّْسُوهُمْ جْمَاعَة جْمَاعَة، كُلّْ جْمَاعَة يْكُونُو فِيهَا خَمْسِينْ وَاحْدْ تْقْرِيبًا»،

¹⁵وْدَاكْشِّي اللِّي دَارُو.

¹⁶وْخْدَا الْخَمْسَة دْ الْخُبْزَاتْ وْالجُّوجْ دْ الْحُوتَاتْ، وْهْزّْ عِينِيهْ لْلسّْمَا وْشْكَرْ اللَّهْ عْلَى الْمَاكْلَة وْقْسَمْهَا وْعْطَى لْلتّْلَامْدْ بَاشْ يْفَرّْقُوهَا عْلَى النَّاسْ.

¹⁷وْكْلَاوْ كُلّْهُمْ حْتَّى شْبْعُو، وْجْمْعُو طْنَاشْرْ ݣُفَّة عَامْرَة بْدَاكْشِّي اللِّي شَاطْ.

¹⁸وْوَاحْدْ الْمَرَّة كَانْ يَسُوعْ كَيْصَلِّي بُوحْدُه وْكَانُو التّْلَامْدْ دْيَالُه مْعَاهْ، وْهُوَ يْسْوّْلْهُمْ: «شْكُونْ أَنَا فْنَضَرْ النَّاسْ؟».

¹⁹وْجَاوْبُوهْ: «شِي وْحْدِينْ كَيْݣُولُو يُوحَنَّا الْمَعْمَدَانْ، وْشِي وْحْدِينْ النّْبِي إِيلِيَّا، وْوْحْدِينْ خْرِينْ كَيْݣُولُو وَاحْدْ مْنْ الْأَنْبِيَا اللّْوّْلِينْ تّْبْعَتْ مْنْ الْمُوتْ».

²⁰وْسْوّْلْهُمْ: «وْشْكُونْ أَنَا فْنَضَرْكُمْ نْتُمَ؟». وْهُوَ يْجَاوْبُه بُطْرُسْ: «نْتَ هُوَ مَسِيحْ اللَّهْ!».

²¹وْوْصَّاهُمْ يَسُوعْ وْآمْرْهُمْ بَاشْ مَا يْݣُولُو هَادْ الْكْلَامْ حْتَّى لْشِي حَدّْ.

²²وْݣَالْ لْلتّْلَامْدْ دْيَالُه: «رَاهْ لَابْدَّ مَا يْتّْعَدّْبْ وَلْدْ الْإِنْسَانْ بْزَّافْ وْيْتّْرْفْضْ مْنْ الشّْيُوخْ وْالرُّؤَسَا دْ رْجَالْ الدِّينْ وْالْعُلَمَا دْ الشّْرَعْ، وْيْتّْقْتَلْ، وْفْالنّْهَارْ التَّالْتْ يْتّْبْعَتْ مْنْ الْمُوتْ».

²³وْݣَالْ لْلنَّاسْ اللِّي حَاضْرِينْ كُلّْهُمْ: «إِلَا بْغَا شِي وَاحْدْ يْتْبَعْنِي، خَاصُّه يْسْمَحْ فْرَاسُه وْيْهَزّْ الصّْلِيبْ دْيَالُه كُلَّ نْهَارْ، وْيْتْبَعْنِي.

²⁴عْلَاحْقَّاشْ اللِّي بْغَا يْنَجِّي حْيَاتُه غَيْضَيّْعْهَا، وْاللِّي ضَيّْعْ حْيَاتُه عْلَى قْبْلِي غَيْنَجِّيهَا.

²⁵آشْ مْنْ نْفَعْ عَنْدْ بْنَادْمْ إِلَا رْبَحْ الدّْنْيَا كُلّْهَا وْضَيّْعْ نْفْسُه وْلَا هْلَكْهَا؟

²⁶اللِّي حْشَمْ يْݣُولْ بْلِّي كَيْعْرَفْنِي وْكَيْعْرَفْ كْلَامِي، غَيْكُونْ حْشْمَانْ بِيهْ وَلْدْ الْإِنْسَانْ مْلِّي غَيْجِي فْالْعَزّْ دْيَالُه وْدْيَالْ الْآبْ وْالْمَلَايْكَة الْمْقَدّْسِينْ.

²⁷وْنْݣُولْ لِيكُمْ الْحَقّْ: رَاهْ كَايْنِينْ فْالنَّاسْ اللِّي حَاضْرِينْ هْنَا، اللِّي مَا غَيْدُوقُوشْ الْمُوتْ حْتَّى يْشُوفُو مَمْلَكَةْ اللَّهْ».

²⁸وْبَعْدْمَا ݣَالْ يَسُوعْ هَادْ الْكْلَامْ بْشِي تْمَنْ يَّامْ، دَّا مْعَاهْ بُطْرُسْ وْيُوحَنَّا وْيَعْقُوبْ وْطْلَعْ لْلجّْبَلْ بَاشْ يْصَلِّي.

²⁹وْمْلِّي كَانْ كَيْصَلِّي، تّْبَدّْلَاتْ صِفْةْ وْجْهُه وْوْلَّاوْ حْوَايْجُه بِيضِينْ وْنَاصْعِينْ.

³⁰وْهُمَ يْبَانُو جُوجْ رْجَالْ كَيْتّْكَلّْمُو مْعَاهْ، هُمَ مُوسَى وْإِيلِيَّا،

³¹عْلِيهُمْ الْعَزّْ دْيَالْ اللَّهْ، وْبْدَاوْ كَيْتّْكَلّْمُو عْلَى الْمُوتْ دْيَالُه اللِّي كَانْتْ قْرِيبَة تّْحَقّْقْ فْأُورْشَلِيمْ.

³²وَلَكِنْ بُطْرُسْ وْصْحَابُه غْلَبْ عْلِيهُمْ النّْعَاسْ، وْمْلِّي فَاقُو شَافُو الْعَزّْ دْيَالْ يَسُوعْ وْالرّْجَالْ بْجُوجْ اللِّي وَاقْفِينْ مْعَاهْ.

³³وْمْلِّي كَانْ مُوسَى وْإِيلِيَّا غَادْيِينْ يْتّْفَارْقُو مْعَ يَسُوعْ ݣَالْ لِيهْ بُطْرُسْ: «آ سِيدِي، شْحَالْ مْزْيَانْ نْكُونُو هْنَا. خَلِّينَا نْصَايْبُو تْلَاتَة دْ النّْوَايْلْ، وَحْدَة لِيكْ، وَحْدَة لْمُوسَى وْوَحْدَة لْإِيلِيَّا». وْمَا كَانْشْ عَارْفْ أَشْنُو كَيْݣُولْ.

³⁴وْفْالْوَقْتْ فَاشْ كَانْ بُطْرُسْ كَيْتّْكَلّْمْ، جَاتْ وَاحْدْ السّْحَابَة وْضَلّْلَاتْ عْلِيهُمْ، وْتّْخَلْعُو التّْلَامْدْ مْلِّي دَخْلُو فِيهَا.

³⁵وْتّْسْمَعْ صُوتْ مْنْ السّْحَابَة كَيْݣُولْ: «هَادَا هُوَ وْلْدِي اللِّي خْتَارِيتُه، سْمْعُو لِيهْ!».

³⁶وْبَعْدْمَا تّْكَلّْمْ هَادْ الصُّوتْ، شَافُو يَسُوعْ بُوحْدُه، وْسْكْتُو وْمَا عَاوْدُو لْحْتَّى وَاحْدْ فْدِيكْ لِيَّامْ دَاكْشِّي اللِّي شَافُو.

³⁷وْالْغَدّْ لِيهْ، نْزْلُو مْنْ الجّْبَلْ، وْتّْلْقَّاتْ لِيهْ جْمَاعَة كْبِيرَة دْ النَّاسْ.

³⁸وْغَوّْتْ وَاحْدْ الرَّاجْلْ مْنّْهُمْ وْݣَالْ: «آ سِيدِي، بْغِيتْكْ تْشُوفْ مْنْ حَالْ وْلْدِي، حِيتْ هُوَ بُوحْدُه اللِّي عَنْدِي!

³⁹وْرَاهْ وَاحْدْ الجّْنْ كَيْسَيْطَرْ عْلِيهْ وْكَيْخَلِّيهْ يْغَوّْتْ عْلَى غَفْلَة، وْكَيْهَزُّه وْكَيْخَبْطُه حْتَّى كَيْخَرّْجْ الْكْشَاكْشْ مْنْ فُمُّه، وْمَا كَيْطَلْقُه حْتَّى كَيْعَيِّيهْ وْيْدَݣْدْݣُه.

⁴⁰وْرْغَبْتْ التّْلَامْدْ دْيَاوْلْكْ بَاشْ يْخَرّْجُوهْ مْنُّه وَلَكِنْ مَا قَدْرُوشْ».

⁴¹وْجَاوْبْ يَسُوعْ وْݣَالْ: «آ هَادْ الْجِيلْ الْقْبِيحْ اللِّي مَا عَنْدُه إِيمَانْ! حْتَّى لْإِمْتَى غَادِي نْبْقَى مْعَاكُمْ وْنْتْحَمّْلْكُمْ؟ جِيبْ وَلْدْكْ لّْهْنَا!».

⁴²وْمْلِّي بْدَا الْوَلْدْ كَيْقَرّْبْ لْعَنْدْ يَسُوعْ، طَيّْحُه الجّْنْ وْخْبْطُه مْعَ الْأَرْضْ. وْنْهَضْ يَسُوعْ فْالجّْنّْ، وْشْفَى الْوَلْدْ وْرَدُّه لْبَّاهْ.

⁴³وْتّْعَجّْبُو النَّاسْ اللِّي كَانُو حَاضْرِينْ كُلّْهُمْ مْنْ الْعَظَمَة دْيَالْ اللَّهْ. وْمْلِّي كَانُو مَازَالْ كَيْتّْعَجّْبُو مْنْ ݣَاعْ دَاكْشِّي اللِّي دَارْ يَسُوعْ، ݣَالْ لْلتّْلَامْدْ دْيَالُه:

⁴⁴«سْمْعُو مْزْيَانْ هَادْشِّي اللِّي غَنْݣُولْ لِيكُمْ: وَلْدْ الْإِنْسَانْ غَيْتّْسَلّْمْ لْلْيْدِّينْ دْ النَّاسْ».

⁴⁵وَلَكِنْ التّْلَامْدْ مَا فَهْمُوشْ هَادْ الْكْلَامْ، عْلَاحْقَّاشْ الْمَعْنَى دْيَالُه كَانْ مْخَبِّي عْلِيهُمْ بَاشْ مَا يْفَهْمُوهْشْ، وْكَانُو خَايْفِينْ يْسْوّْلُوهْ آشْ بْغَا يْݣُولْ.

⁴⁶وْبْدَاوْ التّْلَامْدْ كَيْتّْنَاقْشُو بِينَاتْهُمْ عْلَى شْكُونْ هُوَ الْمْخَيّْرْ فِيهُمْ؟

⁴⁷وْعْرَفْ يَسُوعْ الْأَفْكَارْ اللِّي فْقَلْبْهُمْ، وْجَابْ وَاحْدْ الْوَلْدْ وْوَقّْفُه حْدَاهْ،

⁴⁸وْݣَالْ لِيهُمْ: «اللِّي كَيْرَحّْبْ بْهَادْ الْوَلْدْ فْالْإِسْمْ دْيَالِي، رَاهْ كَيْرَحّْبْ بِيَّ. وْاللِّي كَيْرَحّْبْ بِيَّ، رَاهْ كَيْرَحّْبْ بْهَادَاكْ اللِّي صِيفْطْنِي، حِيتْ الصّْغِيرْ فِيكُمْ كُلّْكُمْ، هُوَ الْمْخَيّْرْ فِيكُمْ».

⁴⁹وْݣَالْ لِيهْ يُوحَنَّا: «آ سِيدِي، رَاهْ شْفْنَا وَاحْدْ الرَّاجْلْ كَيْخَرّْجْ الجّْنُونْ بْالْإِسْمْ دْيَالْكْ وْمَا خَلِّينَاهْشْ، عْلَاحْقَّاشْ هُوَ مَاشِي مْعَانَا».

⁵⁰وْرَدّْ عْلِيهْ يَسُوعْ وْݣَالْ: «مَا تْحَبْسُوهْشْ، حِيتْ اللِّي مَا كَيْضَادّْكُمْشْ، رَاهْ هُوَ مْعَاكُمْ».

⁵¹وْمْلِّي وْصَلْ الْوَقْتْ بَاشْ يْتّْرْفَعْ يَسُوعْ لْلسّْمَا، قَرّْرْ بَاشْ يْمْشِي لْأُورْشَلِيمْ.

⁵²وْصِيفْطْ قُدَّامُه شِي رُسُلْ بَاشْ يْسَبْقُوهْ، وْمْشَاوْ وْدَخْلُو لْوَاحْدْ الدُّوَّارْ فْبْلَادْ السَّامِرَة بَاشْ يْوَجّْدُو لِيهْ فِينْ يْݣْلَسْ.

⁵³وْمَا رَحّْبُوشْ بِيهْ مَّالِينْ الدُّوَّارْ عْلَاحْقَّاشْ كَانْ غَادِي لْأُورْشَلِيمْ.

⁵⁴وْمْلِّي شَافُو يَعْقُوبْ وْيُوحَنَّا اللِّي هُمَ تْلَامْدْ يَسُوعْ هَادْشِّي ݣَالُو لِيهْ: «آ سِيدِي، وَاشْ بْغِيتِي نْدْعِيوْ عْلِيهُمْ بَاشْ تْنْزَلْ الْعَافْيَة مْنْ السّْمَا تْهَلْكْهُمْ؟».

⁵⁵وْتْلَفّْتْ يَسُوعْ وْخَاصْمْ عْلِيهُمْ،

⁵⁶وْمْشَاوْ لْدُوَّارْ آخُرْ.

⁵⁷وْمْلِّي كَانُو غَادْيِينْ فْالطّْرِيقْ، ݣَالْ لِيهْ شِي وَاحْدْ: «آ سِيدِي، غَادِي نْتْبْعَكْ فِينْ مَا مْشِيتِي».

⁵⁸وْهُوَ يْجَاوْبُه يَسُوعْ: «التّْعَالْبْ عَنْدْهَا غِيرَانْهَا، وْطْيُورْ السّْمَا عَنْدْهَا عْشَاشْهَا، وَلَكِنْ وَلْدْ الْإِنْسَانْ رَاهْ مَا عَنْدُه حْتَّى فِينْ يْسْنَّدْ رَاسُه».

⁵⁹وْݣَالْ يَسُوعْ لْوَاحْدْ الرَّاجْلْ آخُرْ: «تْبَعْنِي!» وْهُوَ يْجَاوْبُه: «آ سِيدِي! خَلِّينِي بْعْدَ نْمْشِي نْدْفَنْ بَّا».

⁶⁰وْرَدّْ عْلِيهْ يَسُوعْ وْݣَالْ: «خَلِّي الْمُوتَى يْدْفْنُو الْمُوتَى دْيَالْهُمْ، أَمَّا نْتَ، سِيرْ وْخَبّْرْ بْمَمْلَكَةْ اللَّهْ».

⁶¹وْݣَالْ لِيهْ وَاحْدْ آخُرْ: «بْغِيتْ نْتْبْعَكْ آ سِيدِي، وَلَكِنْ خَلِّينِي بْعْدَ نْوَدّْعْ مَّالِينْ الدَّارْ».

⁶²وْرَدّْ عْلِيهْ يَسُوعْ وْݣَالْ: «رَاهْ اللِّي حَطّْ يْدُّه عْلَى الْمْحْرَاتْ وْتّْلَفّْتْ وْرَاهْ، مَا كَيْصْلَاحْشْ لْمَمْلَكَةْ اللَّهْ».