Read Moroccan Standard Translation يُوحَنَّا 10 Bible Online

يُوحَنَّا 10 - Moroccan Standard Translation bible

يُوحَنَّا 10

¹الْفَصْلْ الْعَاشْرْ «نْݣُولْ لِيكُمْ الْحَقّْ: رَاهْ اللِّي مَا كَيْدْخَلْشْ لْلزّْرِيبَة دْ الْخْرْفَانْ مْنْ الْبَابْ، وَلَكِنْ كَيْطْلَعْ لِيهَا مْنْ مُوضْعْ آخُرْ، هَادَاكْ رَاهْ سْرَّاقْ وْشْفَّارْ.

²وْاللِّي كَيْدْخَلْ مْنْ الْبَابْ رَاهْ هُوَ السّْرَّاحْ دْيَالْ الْخْرْفَانْ.

³هَادَا لَمّْنْ كَيْحَلّْ الْعْسَّاسْ الْبَابْ، وْالْخْرْفَانْ كَيْسَمْعُو الصُّوتْ دْيَالُه، وْكَيْعَيّْطْ عْلَى الْخْرْفَانْ دْيَالُه بْسْمِيَّاتْهُمْ وْكَيْخَرّْجْهُمْ.

⁴وْمْلِّي كَيْخَرّْجْ ݣَاعْ الْخْرْفَانْ دْيَالُه، كَيْمْشِي قُدَّامْهُمْ وْهُمَ كَيْتْبْعُوهْ، عْلَاحْقَّاشْ كَيْعَرْفُو صُوتُه.

⁵وْمَا عَمّْرْهُمْ غَيْتْبْعُو الْبْرَّانِي وَلَكِنْ غَيْهَرْبُو مْنُّه، حِيتْ مَا كَيْعَرْفُوشْ الصُّوتْ دْ الْبْرَّانِيِّينْ».

⁶ݣَالْ لِيهُمْ يَسُوعْ هَادْ الْمْتَالْ، وَلَكِنْ هُمَ مَا فَهْمُوشْ آشْ كَانْ كَيْݣُولْ.

⁷وْݣَالْ لِيهُمْ يَسُوعْ تَانِي: «نْݣُولْ لِيكُمْ الْحَقّْ: رَاهْ أَنَا هُوَ بَابْ الْخْرْفَانْ.

⁸ݣَاعْ هَادُوكْ اللِّي جَاوْ قْبَلْ مْنِّي رَاهُمْ سْرَّاقَا وْشْفَّارَا، وَلَكِنْ الْخْرْفَانْ مَا سْمْعُوشْ لِيهُمْ.

⁹أَنَا هُوَ الْبَابْ، إِلَا دْخَلْ مْنِّي شِي وَاحْدْ، غَيْنْجَا وْغَيْدْخَلْ وْغَيْخْرُجْ وْغَيْلْقَا فِينْ يْسْرَحْ.

¹⁰الشّْفَارْ مَا كَيْجِي غِيرْ بَاشْ يْسْرَقْ وْيْقْتَلْ وْيْخَرّْبْ، وَلَكِنْ أَنَا جِيتْ بَاشْ تْكُونْ عَنْدْهُمْ حَيَاةْ، حَيَاةْ فَايْضَة بْالْخِيرْ».

¹¹«أَنَا هُوَ الرَّاعِي الْمْزْيَانْ، وْالرَّاعِي الْمْزْيَانْ كَيْوْهَبْ حْيَاتُه عْلَى قْبَلْ الْخْرْفَانْ.

¹²وَلَكِنْ الْخْدَّامْ اللِّي مْكْرِي وْمَاشِي هُوَ الرَّاعِي وْالْخْرْفَانْ مَاشِي دْيَالُه، غِيرْ كَيْشُوفْ الدِّيبْ جَايْ كَيْسْمَحْ فْالْخْرْفَانْ وْكَيْهْرَبْ، وْهَكَّا كَيْخْطَفْ الدِّيبْ الْخْرْفَانْ وْكَيْشَتّْتْهُمْ.

¹³الْخْدَّامْ الْمْكْرِي كَيْهْرَبْ حِيتْ هُوَ غِيرْ مْكْرِي، وْمَا كَيْدِّيهَاشْ فْالْخْرْفَانْ.

¹⁴أَنَا هُوَ الرَّاعِي الْمْزْيَانْ، وْكَنْعْرَفْ خْرْفَانِي وْخْرْفَانِي كَيْعَرْفُونِي،

¹⁵كِمَا الْآبْ كَيْعْرَفْنِي وْأَنَا كَنْعْرَفْ الْآبْ. وْأَنَا كَنْوْهَبْ حْيَاتِي عْلَى قْبَلْ خْرْفَانِي.

¹⁶وْعَنْدِي خْرْفَانْ خْرِينْ مَا هُمَاشْ مْنْ هَادْ الزّْرِيبَة، خَاصّْنِي نْجِيبْهُمْ حْتَّى هُمَ وْغَيْسَمْعُو صُوتِي، وْغَيْوَلِّيوْ قْطْعَة وَحْدَة عَنْدْهَا رَاعِي وَاحْدْ.

¹⁷عْلَى هَادْشِّي كَيْبْغِينِي الْآبْ، عْلَاحْقَّاشْ كَنْوْهَبْ حْيَاتِي بَاشْ نْرْجّْعْهَا تَانِي.

¹⁸حْتَّى شِي وَاحْدْ مَا كَيَاخْدْهَا مْنِّي، وَلَكِنْ كَنْوْهَبْهَا بْخَاطْرِي حِيتْ عَنْدِي السُّلْطَة بَاشْ نْوْهَبْهَا وْعَنْدِي السُّلْطَة بَاشْ نْرْجّْعْهَا. وْالْآبْ هُوَ اللِّي عْطَانِي هَادْ الْوْصِيَّة».

¹⁹وْمَا تَّافْقُوشْ لِيهُودْ تَانِي فْهْضَرْتْهُمْ عْلَى قْبَلْ هَادْ الْكْلَامْ،

²⁰وْبْزَّافْ مْنّْهُمْ ݣَالُو: «رَاهْ سَاكْنُه شِي جْنّْ، وْغِيرْ كَيْخَرّْفْ. عْلَاشْ كَتْسَمْعُو لِيهْ؟».

²¹وْݣَالُو وْحْدِينْ خْرِينْ: «هَادَا مَاشِي كْلَامْ دْيَالْ وَاحْدْ سَاكْنُه جْنّْ، وَاشْ اللِّي سَاكْنُه شِي جْنّْ غَيْقْدَرْ يْحَلّْ عِينِينْ الْعَمْيِينْ؟».

²²وْفْالْوَقْتْ دْيَالْ الشّْتْوَا، كَانْ فْأُورْشَلِيمْ عِيدْ التَّجْدِيدْ.

²³وْكَانْ يَسُوعْ كَيْتّْمَشَّى فْبِيتْ اللَّهْ فْالْقَاعَة دْيَالْ سُلَيْمَانْ.

²⁴وْهُمَ يْضُورُو بِيهْ لِيهُودْ وْݣَالُو لِيهْ: «حْتَّى لْإِيمْتَى غَادِي تْخَلِّينَا حَايْرِينْ؟ إِلَا كْنْتِ نْتَ هُوَ الْمَسِيحْ، ݣُولْهَا لِينَا بْصَرَاحَة!».

²⁵وْجَاوْبْهُمْ يَسُوعْ وْݣَالْ: «رَانِي ݣْلْتْهَا لِيكُمْ وْمَا كَتِّيْقُوشْ. الْأَعْمَالْ اللِّي كَنْدِيرْ بْالْإِسْمْ دْيَالْ بَّا، هِيَ كَتْشْهَدْ لِيَّ.

²⁶وَلَكِنْ مَا كَتْآمْنُوشْ حِيتْ نْتُمَ مَاشِي مْنْ الْخْرْفَانْ دْيَالِي.

²⁷خْرْفَانِي كَيْسَمْعُو الصُّوتْ دْيَالِي، وْأَنَا كَنْعْرَفْهُمْ وْهُمَ كَيْتْبْعُونِي.

²⁸وْكَنْعْطِيهُمْ الْحَيَاةْ الدَّايْمَة، وْعَمّْرْهُمْ مَا غَيْمُوتُو، وْمَا غَيْخْطَفْهُمْ حْتَّى حَدّْ مْنْ يْدِّي.

²⁹بَّا اللِّي عْطَاهُمْ لِيَّ، هُوَ قْوَى مْنْ كُلّْشِي، وْحْتَّى حَدّْ مَا يْقْدَرْ يْخْطَفْهُمْ مْنْ يْدّْ بَّا،

³⁰رَاهْ أَنَا وْالْآبْ وَاحْدْ».

³¹وْهْزُّو لِيهُودْ مَرَّة خْرَى الْحْجَرْ بَاشْ يْرَجْمُوهْ.

³²وْݣَالْ لِيهُمْ يَسُوعْ: «وْرِّيتْكُمْ بْزَّافْ دْيَالْ الْأَعْمَالْ الْمْزْيَانَة اللِّي عْطَاهَا لِيَّ بَّا، إِيوَا عْلَى آشْ مْنْ عَمَلْ مْنّْهُمْ بْغِيتُو تْرَجْمُونِي؟».

³³وْجَاوْبُوهْ لِيهُودْ: «مَا بْغِينَاشْ نْرَجْمُوكْ عْلَى قْبَلْ شِي عَمَلْ مْزْيَانْ، وَلَكِنْ عْلَى قْبَلْ كْلَامْ الْكُفْرْ دْيَالْكْ، حِيتْ نْتَ غِيرْ بْنَادْمْ وْرْدِّيتِي رَاسْكْ إِلَاهْ!».

³⁴وْجَاوْبْهُمْ يَسُوعْ: «وَاشْ مَا مْكْتُوبْشْ فْالشّْرَعْ دْيَالْكُمْ: أَنَا ݣْلْتْ نْتُمَ آلِهَة؟

³⁵إِيوَا إِلَا سْمَّى هَادُوكْ اللِّي جَاهُمْ كْلَامُه آلِهَة، وْكْلَامْ اللَّهْ عَمّْرُه مَا كَيْطِيحْ

³⁶كِيفَاشْ نْتُمَ كَتْݣُولُو لْهَادَاكْ اللِّي قَدّْسُه الْآبْ وْصِيفْطُه لْلدّْنْيَا: رَاكْ ݣْلْتِي كْلَامْ الْكُفْرْ، عْلَاحْقَّاشْ ݣْلْتْ: أَنَا وَلْدْ اللَّهْ؟

³⁷إِلَا مَا كَنْتْشْ كَنْدِيرْ الْأَعْمَالْ دْيَالْ بَّا، مَا تْآمْنُوشْ بِيَّ.

³⁸وَلَكِنْ إِلَا كْنْتْ كَنْدِيرْهَا، آمْنُو غِيرْ بْالْأَعْمَالْ إِلَا مَا آمْنْتُوشْ بِيَّ. بَاشْ تْعَرْفُو وْتْفَهْمُو بْلِّي الْآبْ فِيَّ وْأَنَا فْالْآبْ».

³⁹وْبْدَاوْ كَيْقَلّْبُو عَاوْتَانِي بَاشْ يْشَدُّوهْ، وَلَكِنْ فْلَتْ مْنْ يْدِّيهُمْ.

⁴⁰وْرْجَعْ يَسُوعْ لْلجِّهَة لْخْرَى دْيَالْ وَادْ الْأُرْدُنْ فِينْ كَانْ يُوحَنَّا كَيْعَمّْدْ مْنْ قْبَلْ، وْبْقَى تْمَّ.

⁴¹وْجَاوْ عَنْدُه بْزَّافْ دْ النَّاسْ كَيْݣُولُو: «رَاهْ يُوحَنَّا مَا دَارْ حْتَّى شِي عَلَامَة، وَلَكِنْ ݣَاعْ دَاكْشِّي اللِّي ݣَالْ عْلَى هَادْ الرَّاجْلْ كَانْ صْحِيحْ».

⁴²وْآمْنُو بِيهْ نَاسْ كْتَارْ تْمَّ.