Read Moroccan Standard Translation يُوحَنَّا 11 Bible Online

يُوحَنَّا 11 - Moroccan Standard Translation bible

يُوحَنَّا 11

¹الْفَصْلْ حْضَاشْ وْكَانْ وَاحْدْ الرَّاجْلْ مْرِيضْ سْمِيتُه لِعَازَرْ مْنْ بَيْتْ عَنْيَا، الدُّوَّارْ فِينْ سَاكْنَة مَرْيَمْ وْخْتْهَا مَرْتَا.

²وْهَادْ مَرْيَمْ هِيَ اللِّي كَانْتْ دْهْنَاتْ الرَّبّْ يَسُوعْ بْالرِّيحَة وْمْسْحَاتْ رْجْلِيهْ بْشْعَرْهَا، وْكَانْ لِعَازَرْ الْمْرِيضْ هُوَ خُوهَا.

³وْصِيفْطُو الْخْوَاتَاتْ بْجُوجْ لْيَسُوعْ وْݣَالُو لِيهْ: «آ سِيدِي، رَاهْ هَادَاكْ اللِّي عْزِيزْ عْلِيكْ مْرِيضْ».

⁴وْمْلِّي سْمَعْ يَسُوعْ هَادْ الْكْلَامْ، ݣَالْ: «هَادْ الْمَرْضْ مَا غَيْسَالِيشْ بْالْمُوتْ، وَلَكِنْ غَيْبَيّْنْ الْعَزّْ دْ اللَّهْ وْبِيهْ غَادِي يْتّْعْطَى الْعَزّْ لْوَلْدْ اللَّهْ».

⁵وْكَانْ يَسُوعْ كَيْبْغِي مَرْتَا وْخْتْهَا وْلِعَازَرْ.

⁶وْمْلِّي سْمَعْ بْلِّي لِعَازَرْ مْرِيضْ، دَوّْزْ غِيرْ يُومَيْنْ فْالْمُوضْعْ فِينْ كَانْ.

⁷وْمْنْ بَعْدْ دَاكْشِّي ݣَالْ لْتْلَامْدُه: «يَالَّاهْ نْرْجْعُو لْبْلَادْ الْيَهُودِيَّة».

⁸وْݣَالُو لِيهْ تْلَامْدُه: «آ الْمُعَلِّمْ، عَادْ كَانُو لِيهُودْ بَاغْيِينْ يْرَجْمُوكْ، وْغَادِي لْتْمَّ تَانِي؟».

⁹وْهُوَ يْجَاوْبْهُمْ يَسُوعْ: «يَاكْ النّْهَارْ فِيهْ طْنَاشْرْ سَاعَة؟ إِيوَا إِلَا كَانْ شِي وَاحْدْ كَيْمْشِي بْالنّْهَارْ رَاهْ مَا كَيْعْتَرْشْ، عْلَاحْقَّاشْ كَيْشُوفْ الضُّو دْيَالْ هَادْ الدّْنْيَا.

¹⁰وَلَكِنْ إِلَا كَانْ شِي حَدّْ كَيْمْشِي فْاللِّيلْ رَاهْ كَيْعْتَرْ، عْلَاحْقَّاشْ مَا فِيهْشْ الضُّو».

¹¹ݣَالْ يَسُوعْ هَادْ الْكْلَامْ، وْزَادْ مْنْ بَعْدْ ݣَالْ لِيهُمْ: «لِعَازَرْ صَاحْبْنَا نَاعْسْ، وَلَكِنْ غَادِي نْمْشِي نْفَيّْقُه».

¹²وْهُمَ يْݣُولُو لِيهْ تْلَامْدُه: «إِلَا كَانْ آ سِيدِي نَاعْسْ، رَاهْ غَيْتّْشَافَى».

¹³وَلَكِنْ يَسُوعْ كَانْ كَيْتّْكَلّْمْ لِيهُمْ عْلَى الْمُوتْ دْيَالْ لِعَازَرْ وْهُمَ كَيْحْسَابْ لِيهُمْ بْلِّي كَيْتّْكَلّْمْ عْلَى النّْعَاسْ.

¹⁴وْدِيكْ السَّاعَة ݣَالْ لِيهُمْ بْصَرَاحَة: «رَاهْ لِعَازَرْ مَاتْ،

¹⁵وْأَنَا فْرْحَانْ عْلَى وْدّْكُمْ، عْلَاحْقَّاشْ مَا كَنْتْشْ تْمَّ، بَاشْ تْقَدْرُو تْآمْنُو. إِيوَا يَالَّاهُو نْمْشِيوْ لْعَنْدُه!».

¹⁶وْتُومَا اللِّي مْكَنِّي بْالتّْوِيمِي، ݣَالْ لْلتّْلَامْدْ صْحَابُه: «يَالَّاهُو حْتَّى حْنَا نْمْشِيوْ مْعَ يَسُوعْ بَاشْ نْمُوتُو مْعَاهْ».

¹⁷وْمْلِّي وْصَلْ يَسُوعْ، لْقَا بْلِّي لِعَازَرْ دَوّْزْ رْبَعْ يَّامْ فْالْقْبَرْ.

¹⁸وْكَانْتْ بَيْتْ عَنْيَا بْعِيدَة عْلَى أُورْشَلِيمْ غِيرْ بْشِي تْلَاتَة كِيلُومِتْرْ.

¹⁹وْجَاوْ بْزَّافْ دْيَالْ لِيهُودْ لْعَنْدْ مَرْتَا وْمَرْيَمْ بَاشْ يْعَزِّيوْهُمْ فْخُوهُمْ.

²⁰وْمْلِّي سْمْعَاتْ مَرْتَا بْلِّي يَسُوعْ جَايْ، تْلْقَّاتْ لِيهْ، وَلَكِنْ مَرْيَمْ بْقَاتْ ݣَالْسَة فْالدَّارْ.

²¹وْݣَالْتْ مَرْتَا لْيَسُوعْ: «آ سِيدِي، كُونْ كْنْتِ هْنَا، كُونْ ݣَاعْ مَا مَاتْ خُويَا!

²²وَلَكِنْ حْتَّى دَابَا أَنَا كَنْعْرَفْ بْلِّي الْحَاجَة اللِّي غَادِي تْطْلَبْهَا مْنْ اللَّهْ غَيْعْطِيهَا لِيكْ».

²³وْهُوَ يْݣُولْ لِيهَا يَسُوعْ: «خُوكْ غَادِي يْتّْبْعَتْ مَرَّة خْرَى!».

²⁴وْݣَالْتْ لِيهْ مَرْتَا: «رَاهْ عْرَفْتْ بْلِّي غَادِي يْتّْبْعَتْ مْنْ الْمُوتْ فْيُومْ الْبَعْتْ».

²⁵وْجَاوْبْهَا يَسُوعْ: «أَنَا هُوَ اللِّي كَنْبْعَتْ النَّاسْ مْنْ الْمُوتْ وْكَنْعْطِيهُمْ الْحَيَاةْ، اللِّي آمْنْ بِيَّ وَاخَّا يْمُوتْ غَيْحْيَا!

²⁶وْكُلّْ وَاحْدْ حَيّْ وْكَيْآمْنْ بِيَّ، عَمّْرُه مَا غَيْمُوتْ. وَاشْ كَتْآمْنِي بْهَادْ الْكْلَامْ؟».

²⁷وْهِيَ تْݣُولْ لِيهْ: «إِيِّهْ آ سِيدِي! أَنَا آمْنْتْ بْلِّي نْتَ هُوَ الْمَسِيحْ وَلْدْ اللَّهْ اللِّي جَايْ لْلدّْنْيَا».

²⁸وْمْلِّي ݣَالْتْ مَرْتَا هَادْشِّي، مْشَاتْ وْعَيّْطَاتْ عْلَى مَرْيَمْ خْتْهَا فْالسِّرْ وْݣَالْتْ: «رَاهْ الْمُعَلِّمْ جَا وْكَيْعَيّْطْ لِيكْ».

²⁹وْمْلِّي سْمْعَاتْ مَرْيَمْ بْالْمْجِي دْيَالْ يَسُوعْ، نَاضْتْ دْغْيَا وْجَاتْ لْعَنْدُه.

³⁰وْكَانْ يَسُوعْ مَازَالْ مَا وْصَلْ لْلدُّوَّارْ، وَلَكِنْ كَانْ بَاقِي فْالْمُوضْعْ اللِّي تْلَاقَاتْ فِيهْ مَرْتَا مْعَاهْ.

³¹وْمْلِّي لِيهُودْ اللِّي كَانُو مْعَ مَرْيَمْ فْالدَّارْ كَيْعَزِّيوْهَا، شَافُوهَا نَاضْتْ بْالزّْرْبَة وْخْرْجَاتْ، تْبْعُوهَا حِيتْ ضْنُّو بْلِّي رَاهَا غَادْيَة لْلْقْبَرْ تْبْكِي تْمَّ.

³²وْغِيرْ وْصْلَاتْ مَرْيَمْ لْلْمُوضْعْ فِينْ كَانْ يَسُوعْ وْشَافْتُه، سْجْدَاتْ عَنْدْ رْجْلِيهْ وْݣَالْتْ لِيهْ: «آ سِيدِي، كُونْ كْنْتِ هْنَا، كُونْ ݣَاعْ مَا مَاتْ خُويَا!».

³³وْمْلِّي شَافْهَا يَسُوعْ كَتْبْكِي هِيَ وْلِيهُودْ اللِّي جَاوْ مْعَاهَا، تْأَتّْرْ بْزَّافْ وْتْأَلّْمْ،

³⁴وْسْوّْلْهُمْ: «فِينْ دْفَنْتُوهْ؟». وْݣَالُو لِيهْ: «أَجِي آ سِيدِي وْشُوفْ!».

³⁵وْبْدَا يَسُوعْ كَيْبْكِي.

³⁶وْݣَالُو لِيهُودْ لْبَعْضِيَّاتْهُمْ: «شُوفُو شْحَالْ كَانْ كَيْبْغِيهْ!».

³⁷وَلَكِنْ شِي وْحْدِينْ مْنّْهُمْ ݣَالُو: «وَاشْ هَادْ الرَّاجْلْ اللِّي حَلّْ الْعِينِينْ دْيَالْ الْعْمَى، مَا كَانْشْ قَادْرْ يْبَعّْدْ الْمُوتْ عْلَى لِعَازَرْ؟».

³⁸وْتْأَتّْرْ يَسُوعْ بْزَّافْ فْخَاطْرُه عَاوْتَانِي، وْقَرّْبْ مْنْ الْقْبَرْ. وْكَانْ هَادْ الْقْبَرْ غَارْ، الْبَابْ دْيَالُه مْسْدُودْ بْحَجْرَة.

³⁹وْݣَالْ يَسُوعْ: «حَيّْدُو الْحَجْرَة!». وْݣَالْتْ لِيهْ مَرْتَا خْتْ الْمْيّْتْ: «آ سِيدِي، رَاهْ غَيْكُونْ خْنَازْ، حِيتْ رْبَعْ يَّامْ هَادِي بَاشْ تّْدْفَنْ!».

⁴⁰وْݣَالْ لِيهَا يَسُوعْ: «وَاشْ مَا ݣْلْتْشْ لِيكْ: إِلَا آمْنْتِي رَاهْ غَادِي تْشُوفِي الْعَزّْ دْيَالْ اللَّهْ؟».

⁴¹وْحَيّْدُو الْحَجْرَة، وْهْزّْ يَسُوعْ عِينِيهْ لْلفُوقْ وْݣَالْ: «آ الْآبْ، كَنْشَكْرْكْ حِيتْ سْمَعْتِي لِيَّ،

⁴²وْكَنْعْرَفْ بْلِّي دِيمَا كَتْسْمَعْ لِيَّ. وَلَكِنْ ݣْلْتْ هَادْ الْكْلَامْ عْلَى قْبَلْ الجّْمَاعَة دْ النَّاسْ اللِّي ضَايْرِينْ بِيَّ، بَاشْ يْآمْنُو بْلِّي نْتَ صِيفْطْتِينِي».

⁴³وْمْلِّي ݣَالْ هَادْ الْكْلَامْ، عَيّْطْ بْصُوتْ قْوِي وْݣَالْ: «آ لِعَازَرْ، خْرُجْ!».

⁴⁴وْخْرَجْ الْمْيّْتْ بْيْدِّيهْ وْرْجْلِيهْ مْرْبُوطِينْ بْالْكْفَنْ، وْوْجْهُ مَلْوِي عْلِيهْ وَاحْدْ الزِّيفْ. وْݣَالْ لِيهُمْ يَسُوعْ: «فْكُّوهْ وْخَلِّيوْهْ يْمْشِي بْحَالُه!».

⁴⁵وْبْزَّافْ دْيَالْ لِيهُودْ اللِّي جَاوْ لْعَنْدْ مَرْيَمْ لْدَارْهَا، وْشَافُو دَاكْشِّي اللِّي دَارْ يَسُوعْ، آمْنُو بِيهْ.

⁴⁶وَلَكِنْ شِي وْحْدِينْ مْنّْهُمْ مْشَاوْ لْعَنْدْ الْفْرِّيسِيِّينْ وْعَاوْدُو لِيهُمْ عْلَى دَاكْشِّي اللِّي دَارْ يَسُوعْ.

⁴⁷وْتّْجَمْعُو الرُّؤَسَا دْ رْجَالْ الدِّينْ وْالْفْرِّيسِيِّينْ بِينَاتْهُمْ وْݣَالُو: «أَشْنُو نْدِيرُو؟ رَاهْ هَادْ الرَّاجْلْ كَيْدِيرْ عَلَامَاتْ كْتَارْ.

⁴⁸وْإِلَا خَلِّينَاهْ هَكَّا، غَيْآمْنُو بِيهْ النَّاسْ كُلّْهُمْ، وْغَيْجِيوْ الرُّومَانِيِّينْ وْغَيَاخْدُو الْمُوضْعْ الْمْقَدّْسْ دْيَالْنَا وْالشَّعْبْ دْيَالْنَا».

⁴⁹وْهُوَ يْݣُولْ لِيهُمْ وَاحْدْ الرَّاجْلْ مْنّْهُمْ سْمِيتُه قَيَافَا، كَانْ هُوَ الرَّئِيسْ دْ رْجَالْ الدِّينْ هَادَاكْ الْعَامْ: «نْتُمَ رَاكُمْ مَا كَتْعَرْفُو وَالُو،

⁵⁰وَلَا كَتْفَهْمُو بْلِّي رَاهْ خِيرْ لِيكُمْ يْمُوتْ رَاجْلْ وَاحْدْ فْبْلَاصْةْ الشَّعْبْ، وْمَا يْمُوتْشْ الشَّعْبْ كُلُّه».

⁵¹وْمَا ݣَالْشْ هَادْ الْكْلَامْ غِيرْ مْنْ رَاسُه، وَلَكِنْ حِيتْ كَانْ هُوَ الرَّئِيسْ دْ رْجَالْ الدِّينْ دَاكْ الْعَامْ، تّْنَبّْأْ بْلِّي يَسُوعْ غَادِي يْمُوتْ عْلَى قْبَلْ الشَّعْبْ.

⁵²وْمَاشِي غِيرْ عْلَى قْبَلْ الشَّعْبْ بُوحْدُه، وَلَكِنْ بَاشْ يْجْمَعْ وْلَادْ اللَّهْ اللِّي مْشَتّْتِينْ وْيْوَلِّيوْ وَاحْدْ.

⁵³وْمْنْ دَاكْ النّْهَارْ، وْلِيهُودْ كَيْتّْشَاوْرُو بَاشْ يْقْتْلُو يَسُوعْ.

⁵⁴وْعْلَى هَادْشِّي مَا بْقَاشْ يَسُوعْ كَيْمْشِي بِينْ لِيهُودْ بْالْعْلَّالِي، وَلَكِنْ مْشَى مْنْ تْمَّ لْوَاحْدْ الْبْلَاصَة قْرِيبَة لْلصَّحْرَا، لْمْدِينَة صْغِيرَة سْمِيتْهَا أَفْرَايْمْ، وْبْقَى تْمَّ مْعَ تْلَامْدُه.

⁵⁵وْكَانْ عِيدْ الْفِصْحْ دْيَالْ لِيهُودْ قْرِيبْ، وْطْلْعُو بْزَّافْ دْ النَّاسْ مْنْ الدُّوَّارْ لْأُورْشَلِيمْ قْبَلْ مْنْ عِيدْ الْفِصْحْ بَاشْ يْتّْنْقَّاوْ.

⁵⁶وْكَانُو كَيْقَلّْبُو عْلَى يَسُوعْ وْكَيْسْوّْلُو بْعْضِيَّاتْهُمْ وْهُمَ مْجْمُوعِينْ فْبِيتْ اللَّهْ: «آشْ ضْهَرْ لِيكُمْ؟ بْلَا شْكّْ مَا غَادِيشْ يْجِي لْلْعِيدْ؟».

⁵⁷وْآمْرُو الرُّؤَسَا دْ رْجَالْ الدِّينْ وْالْفْرِّيسِيِّينْ النَّاسْ وْݣَالُو لِيهُمْ: اللِّي عْرَفْ فِينْ كَايْنْ يَسُوعْ خَاصُّه يْعْلَمْ بِيهْ بَاشْ يْتّْشَدّْ.