Read Moroccan Standard Translation يُوحَنَّا 13 Bible Online

يُوحَنَّا 13 - Moroccan Standard Translation bible

يُوحَنَّا 13

¹الْفَصْلْ تْلْطَاشْ وْقْبَلْ مْنْ عِيدْ الْفِصْحْ، كَانْ يَسُوعْ عَارْفْ بْلِّي سَاعْتُه وْصْلَاتْ بَاشْ يْمْشِي مْنْ هَادْ الدّْنْيَا لْعَنْدْ الْآبْ، وْكَانْ كَيْبْغِي هَادُوكْ اللِّي تْبْعُوهْ فْالدّْنْيَا، وْبْغَاهُمْ بْلَا قْيَاسْ.

²وْمْلِّي كَانُو كَيْتّْعْشَّاوْ، وْسْوَسْ إِبْلِيسْ مْنْ قْبَلْ فْقَلْبْ يَهُودَا وَلْدْ سِمْعَانْ الْإِسْخَرْيُوطِي بَاشْ يْسَلّْمْ يَسُوعْ.

³وْكَانْ يَسُوعْ عَارْفْ بْلِّي الْآبْ عْطَاهْ كُلّْشِي فْيْدِّيهْ، وْبْلِّي هُوَ مْنْ عَنْدْ اللَّهْ جَا، وْلْعَنْدْ اللَّهْ غَادِي يْرْجَعْ.

⁴وْهُوَ يْنُوضْ مْنْ الْعْشَا وْحَيّْدْ اللّْبَاسْ الْفُوقَانِي وْخْدَا وَاحْدْ الْفُوطَة وْتّْحَزّْمْ بِيهَا،

⁵وْمْنْ بَعْدْ كْبّْ الْمَا فْالطَّاسْ وْبْدَا كَيْغْسَلْ رْجْلِينْ التّْلَامْدْ وْكَيْمْسَحْهُمْ بْالْفُوطَة اللِّي كَانْ مْحَزّْمْ بِيهَا.

⁶وْمْلِّي وْصَلْ لْعَنْدْ سِمْعَانْ بُطْرُسْ، ݣَالْ لِيهْ سِمْعَانْ: «آ سِيدِي، نْتَ غَتْغْسَلْ لِيَّ رْجْلِيَّ؟».

⁷وْجَاوْبُه يَسُوعْ وْݣَالْ لِيهْ: «نْتَ دَابَا مَا كَتْعْرَفْشْ أَشْنُو كَنْدِيرْ، وَلَكِنْ غَتْفْهَمْ مْنْ بَعْدْ».

⁸وْݣَالْ لِيهْ بُطْرُسْ: «عَمّْرَكْ مَا غَتْغْسَلْ لِيَّ رْجْلِيَّ!». وْجَاوْبُه يَسُوعْ: «إِلَا مَا غْسَلْتْشْ لِيكْ رْجْلِيكْ، مَا غَيْكُونْ عَنْدْكْ حَقّْ مْعَايَ».

⁹وْهُوَ يْݣُولْ لِيهْ سِمْعَانْ بُطْرُسْ: «آ سِيدِي، غْسَلْ مَاشِي غِيرْ رْجْلِيَّ وَلَكِنْ حْتَّى يْدِّيَّ وْرَاسِي».

¹⁰وْݣَالْ لِيهْ يَسُوعْ: «اللِّي غْسَلْ رَاهْ هُوَ نْقِي كُلُّه، مَا مْحْتَاجْ يْغْسَلْ غِيرْ رْجْلِيهْ. وْنْتُمَ رَاكُمْ نْقِيِّينْ، وَلَكِنْ مَاشِي كُلّْكُمْ».

¹¹حِيتْ كَانْ عَارْفْ شْكُونْ اللِّي غَادِي يْسَلّْمُه، وْعْلِيهَا ݣَالْ: «مَاشِي كُلّْكُمْ نْقِيِّينْ».

¹²وْمْلِّي غْسَلْ لِيهُمْ رْجْلِيهُمْ، وْلْبَسْ لْبَاسُه الْفُوقَانِي وْرْجَعْ ݣْلَسْ فْبْلَاصْتُه، ݣَالْ لِيهُمْ: «وَاشْ فْهَمْتُو آشْ دْرْتْ لِيكُمْ؟

¹³نْتُمَ كَتْعَيْطُو عْلِيَّ الْمُعَلِّمْ وْالسِّيّْدْ، عَنْدْكُمْ الْحَقّْ فْهَادْشِّي اللِّي كَتْݣُولُو، حِيتْ أَنَا هَكَّاكْ.

¹⁴إِيوَا، إِلَا كْنْتْ أَنَا السِّيّْدْ وْالْمُعَلِّمْ غْسَلْتْ لِيكُمْ رْجْلِيكُمْ، رَاهْ حْتَّى نْتُمَ خَاصّْكُمْ تْغَسْلُو رْجْلِينْ بْعْضِيَّاتْكُمْ.

¹⁵وْرَانِي عْطِيتْكُمْ هَادْ الْمْتَالْ بَاشْ حْتَّى نْتُمَ تْدِيرُو كِيفْ دْرْتْ أَنَا مْعَاكُمْ.

¹⁶وْنْݣُولْ لِيكُمْ الْحَقّْ: مَا كَايْنْشْ شِي عَبْدْ حْسَنْ مْنْ سِيدُه وْلَا شِي رَسُولْ حْسَنْ مْنْ اللِّي مْصِيفْطُه.

¹⁷وْدَابَا مْلِّي عْرَفْتُو هَادْشِّي، سْعْدَاتْكُمْ إِلَا دْرْتُو بِيهْ.

¹⁸مَا كَنْݣُولْشْ هَادْشِّي عْلِيكُمْ كُلّْكُمْ، حِيتْ كَنْعْرَفْ هَادُوكْ اللِّي خْتَارْتْهُمْ. وَلَكِنْ خَاصّْ يْتّْحَقّْقْ الْكْلَامْ اللِّي فْكْتَابْ اللَّهْ وْاللِّي كَيْݣُولْ: هَادَاكْ اللِّي كْلَا مْعَايَ خُبْزِي، وْلَّى ضْدِّي.

¹⁹وْأَنَا كَنْݣُولْ لِيكُمْ هَادْشِّي دَابَا قْبَلْ مَا يْجْرَا، بَاشْ مْلِّي يْجْرَا، تْآمْنُو بْلِّي أَنَا هُوَ.

²⁰وْنْݣُولْ لِيكُمْ الْحَقّْ: اللِّي قْبَلْ شِي وَاحْدْ أَنَا مْصِيفْطُه، رَاهْ قْبَلْنِي. وْاللِّي قْبَلْنِي، رَاهْ قْبَلْ اللِّي مْصِيفْطْنِي».

²¹وْمْلِّي ݣَالْ يَسُوعْ هَادْشِّي، تْغَيّْرَاتْ خَاطْرُه وْهُوَ يْݣُولْ قُدَّامْ التّْلَامْدْ: «نْݣُولْ لِيكُمْ الْحَقّْ: رَاهْ وَاحْدْ مْنّْكُمْ غَيْسَلّْمْنِي!».

²²وْهُمَ يْشُوفُو التّْلَامْدْ فْبَعْضِيَّاتْهُمْ وْكَانُو حَايْرِينْ وْمَا عَارْفِينْشْ عْلَى مْنْ كَيْتّْكَلّْمْ فِيهُمْ.

²³وْكَانْ وَاحْدْ مْنْ التّْلَامْدْ اللِّي كَانْ يَسُوعْ كَيْبْغِيهْ، قْرِيبْ مْنْ يَسُوعْ.

²⁴وْشَيّْرْ لِيهْ سِمْعَانْ بُطْرُسْ بَاشْ يْسْوّْلْ يَسُوعْ شْكُونْ اللِّي كَيْقْصَدْ بْكْلَامُه.

²⁵وْتّْكَّا هَادْ التّْلْمِيدْ عْلَى صْدَرْ يَسُوعْ وْسْوّْلُه: «شْكُونْ هُوَ آ سِيدِي؟».

²⁶وْجَاوْبُه يَسُوعْ: «رَاهْ هُوَ اللِّي غَنْغَمّْسْ الدّْغْمَة وْنْعْطِيهَا لِيهْ!». وْهُوَ يْغَمّْسْ الدّْغْمَة وْعْطَاهَا لْيَهُودَا الْإِسْخَرْيُوطِي وَلْدْ سِمْعَانْ.

²⁷وْغِيرْ خْدَا الدّْغْمَة وْهُوَ يْدْخَلْ فِيهْ الشِّيطَانْ، وْݣَالْ لِيهْ يَسُوعْ: «دَاكْشِّي اللِّي غَتْدِيرْ، دِيرُه دْغْيَا».

²⁸وْحْتَّى وَاحْدْ مْنْ هَادُوكْ اللِّي كَانُو ݣَالْسِينْ مْعَاهُمْ، مَا فْهَمْ عْلَاشْ ݣَالْ لِيهْ هَادْ الْكْلَامْ.

²⁹وَلَكِنْ شِي وْحْدِينْ مْنّْهُمْ ضْنُّو بْلِّي يَسُوعْ ݣَالْ لِيهْ يْشْرِي دَاكْشِّي اللِّي مْحْتَاجِينْ لِيهْ لْلْعِيدْ، وْلَا يْعْطِي شِي حَاجَة دْ الْفْلُوسْ لْلْفُقَرَا، حِيتْ يَهُودَا كَانْ هُوَ لَمِينْ دْيَالْ الصّْنْدُوقْ.

³⁰وْغِيرْ كْلَا يَهُودَا الدّْغْمَة وْهُوَ يْخْرَجْ. وْكَانْ اللِّيلْ وْصَلْ.

³¹وْمْلِّي خْرَجْ يَهُودَا، ݣَالْ يَسُوعْ: «دَابَا بَانْ الْعَزّْ دْيَالْ وَلْدْ الْإِنْسَانْ وْبَانْ الْعَزّْ دْيَالْ اللَّهْ فْوَلْدْ الْإِنْسَانْ.

³²وْإِلَا بَانْ الْعَزّْ دْ اللَّهْ فْوَلْدْ الْإِنْسَانْ، رَاهْ اللَّهْ غَيْبَيّْنْ الْعَزّْ دْيَالْ وَلْدْ الْإِنْسَانْ فْالدَّاتْ دْيَالُه، وْغَيْبَيّْنْ الْعَزّْ دْيَالُه دْغْيَا.

³³آ وْلِيدَاتِي، رَانِي غَنْبْقَى مْعَاكُمْ غِيرْ وَقْتْ قْلِيلْ، وْرَاكُمْ غَتْقَلّْبُو عْلِيَّ، وْكِيفْ ݣْلْتْ لْلِيهُودْ كَنْݣُولْ لِيكُمْ دَابَا: مَا تْقَدْرُوشْ نْتُمَ تْجِيوْ فِينْ غَنْمْشِي أَنَا.

³⁴وْرَانِي كَنْوَصِّيكُمْ وْصِيَّة جْدِيدَة: بْغِيوْ بْعْضِيَّاتْكُمْ. وْكِمَا بْغِيتْكُمْ أَنَا، بْغِيوْ حْتَّى نْتُمَ بْعْضِيَّاتْكُمْ.

³⁵بْهَادْشِّي غَيْعَرْفُو النَّاسْ كُلّْهُمْ بْلِّي رَاكُمْ تْلَامْدِي: إِلَا كْنْتُو كَتْبْغِيوْ بْعْضِيَّاتْكُمْ».

³⁶وْݣَالْ لِيهْ سِمْعَانْ بُطْرُسْ: «آ سِيدِي، فِينْ غَتْمْشِي؟» وْجَاوْبُه يَسُوعْ: «الْبْلَاصَة فِينْ غَنْمْشِي دَابَا مَا غَتْقْدَرْشْ تّْبَعْنِي لِيهَا، وَلَكِنْ مْنْ بَعْدْ غَتّْبَعْنِي».

³⁷وْهُوَ يْݣُولْ لِيهْ بُطْرُسْ: «عْلَاشْ آ سِيدِي مَا نْقْدَرْشْ نْتْبْعَكْ دَابَا؟ رَانِي مُوجُودْ نْمُوتْ عْلَى وْدّْكْ!».

³⁸وْجَاوْبُه يَسُوعْ: «وَاشْ نْتَ بْالصَّحْ مُوجُودْ تْمُوتْ عْلَى وْدِّي؟ نْݣُولْ لِيكْ الْحَقّْ: مَا غَيْجِي فِينْ يْصِيحْ الْفْرُّوجْ حْتَّى تْنْكَرْنِي تْلَاتَة دْ الْمَرَّاتْ».