Read Moroccan Standard Translation يُوحَنَّا 15 Bible Online

يُوحَنَّا 15 - Moroccan Standard Translation bible

يُوحَنَّا 15

¹الْفَصْلْ خْمْسْطَاشْ «أَنَا هُوَ الدَّالْيَة الْحْقِيقِيَّة وْبَّا هُوَ الجّْنَايْنِي.

²كُلّْ عَرْشْ فِيَّ مَا كَيْعْطِيشْ الْغْلَّة كَيْقْطْعُه، وْكُلّْ عَرْشْ فِيَّ كَيْعْطِي الْغْلَّة كَيْنَقِّيهْ بَاشْ يْعْطِي غْلَّة كْتَرْ.

³نْتُمَ دَابَا رَاكُمْ نْقِيِّينْ بْفْضَلْ الْكْلَامْ اللِّي تّْكَلّْمْتْ مْعَاكُمْ بِيهْ.

⁴إِيوَا تْبْتُو فِيَّ وْأَنَا فِيكُمْ. رَاهْ كِمَا الْعَرْشْ مَا كَيْقْدَرْشْ يْعْطِي الْغْلَّة بُوحْدُه إِلَا مَا كَانْشْ تَابْتْ فْالدَّالْيَة، هَكَّا حْتَّى نْتُمَ مَا تْقَدْرُوشْ تْعْطِيوْ الْغْلَّة إِلَا مَا تْبْتُّوشْ فِيَّ.

⁵أَنَا الدَّالْيَة وْنْتُمَ الْعْرُوشْ. اللِّي تْبَتْ فِيَّ وْأَنَا فِيهْ رَاهْ هُوَ اللِّي غَيْعْطِي غْلَّة كْتِيرَة، حِيتْ رَاكُمْ بْلَا بِيَّ مَا تْقَدْرُو تْدِيرُو حْتَّى حَاجَة.

⁶وْإِلَا كَانْ شِي وَاحْدْ مَا تَابْتْشْ فِيَّ غَيْتّْرْمَى عْلَى بْرَّا بْحَالْ الْعَرْشْ وْغَيْيْبَسْ، وْغَيْجَمْعُوهْ وْغَيْرْمِيوْهْ فْالْعَافْيَة وْيْتّْحْرَقْ.

⁷وَلَكِنْ إِلَا تْبَتُّو فِيَّ وْتْبَتْ كْلَامِي فِيكُمْ، طْلْبُو اللِّي بْغِيتُو وْرَاهْ غَيْكُونْ لِيكُمْ.

⁸وْبْهَادْشِّي كَيْتّْعْطَى الْعَزّْ لْبَّا: مْلِّي تْعْطِيوْ غْلَّة كْتِيرَة وْتْكُونُو تْلَامْدِي.

⁹كِمَا بْغَانِي الْآبْ، هَكَّا حْتَّى أَنَا بْغِيتْكُمْ، إِيوَا تْبْتُو فْمْحَبّْتِي.

¹⁰إِلَا دْرْتُو بْالْوْصِيَّاتْ دْيَالِي غَادِي تّْبْتُو فْمْحَبّْتِي، كِمَا دْرْتْ أَنَا بْوْصِيَّاتْ بَّا وْتَابْتْ فْمْحَبّْتُه.

¹¹ݣْلْتْ لِيكُمْ هَادْشِّي بَاشْ تْتْبَتْ الْفَرْحَة دْيَالِي فِيكُمْ وْتْكْمَلْ الْفَرْحَة دْيَالْكُمْ.

¹²وْهَادِي هِيَ وْصِيْتِي: بْغِيوْ بْعْضِيَّاتْكُمْ كِمَا أَنَا كَنْبْغِيكُمْ.

¹³رَاهْ مَا كَايْنَاشْ شِي مْحَبَّة كْبَرْ مْنْ هَادْ الْمْحَبَّة الْكْبِيرَة: يْوْهَبْ الْوَاحْدْ حْيَاتُه عْلَى وْدّْ اللِّي كَيْبْغِيهُمْ.

¹⁴نْتُمَ رَاكُمْ حْبَابِي إِلَا دْرْتُو دَاكْشِّي اللِّي كَنْوَصِّيكُمْ بِيهْ.

¹⁵مْنْ دَابَا مَا غَنْعَاوْدْشْ نْسَمِّيكُمْ عْبِيدْ، حِيتْ الْعَبْدْ مَا كَيْعْرَفْشْ آشْ كَيْدِيرْ سِيدُه، وَلَكِنْ دْرْتْكُمْ حْبَابِي، حِيتْ خَبّْرْتْكُمْ بْكُلّْ مَا سْمَعْتْ مْنْ بَّا.

¹⁶مَاشِي نْتُمَ اللِّي خْتَارْتُونِي، وَلَكِنْ أَنَا اللِّي خْتَارْتْكُمْ وْكَلّْفْتْكُمْ بَاشْ تْمْشِيوْ وْتْجِيبُو الْغْلَّة، وْغَلّْتْكُمْ تْدُومْ، وْالْآبْ غَيْعْطِيكُمْ كُلّْ مَا كَتْطْلْبُو بْالْإِسْمْ دْيَالِي.

¹⁷وْاللِّي كَنْوَصِّيكُمْ عْلِيهْ هُوَ تْبْغِيوْ بْعْضِيَّاتْكُمْ».

¹⁸«إِلَا كَانُو نَاسْ الدّْنْيَا كَيْكَرْهُوكُمْ، خَاصّْكُمْ تْعَرْفُو بْلِّي رَاهُمْ كْرْهُونِي قْبَلْ مْنّْكُمْ.

¹⁹كُونْ كْنْتُو مْنْ الدّْنْيَا، كُونْ رَاهْ النَّاسْ دْيَالْهَا كَيْبْغِيوْكُمْ بْحَالْ مَّالِيهَا. وَلَكِنْ حِيتْ نْتُمَ مَاشِي مْنْ الدّْنْيَا، وْأَنَا اللِّي خْتَارْتْكُمْ مْنْ وَسْطْ النَّاسْ دْيَالْهَا، رَاهْ عْلَى هَادْشِّي نَاسْ الدّْنْيَا كَيْكَرْهُوكُمْ.

²⁰تْفَكّْرُو الْكْلَامْ اللِّي ݣْلْتُه لِيكُمْ: رَاهْ الْعَبْدْ مَا هُوَّاشْ حْسَنْ مْنْ سِيدُه. إِلَا كَانُو كَيْتّْعَدَّاوْ عْلِيَّ رَاهْ غَادِي يْتّْعَدَّاوْ عْلِيكُمْ حْتَّى نْتُمَ، وْإِلَا كَانُو كَيْدِيرُو بْكْلَامِي رَاهْ غَادِي يْدِيرُو بْكْلَامْكُمْ حْتَّى نْتُمَ.

²¹وَلَكِنْ رَاهْ هُمَ غَيْدِيرُو لِيكُمْ هَادْشِّي كُلُّه عْلَى وْدّْ الْإِسْمْ دْيَالِي، عْلَاحْقَّاشْ مَا كَيْعَرْفُوشْ هَادَاكْ اللِّي صِيفْطْنِي.

²²كُونْ مَا جِيتْشْ وْمَا هْضَرْتْشْ مْعَاهُمْ، كُونْ مَا بْقَى عْلِيهُمْ دَنْبْ. وَلَكِنْ دَابَا مَا بْقَاتْ عَنْدْهُمْ سْبَّة عْلَى دْنُوبْهُمْ.

²³اللِّي كَيْكْرَهْنِي كَيْكْرَهْ بَّا حْتَّى هُوَ.

²⁴كُونْ غِيرْ مَا دَرْتْشْ بِينَاتْهُمْ الْمُعْجِزَاتْ اللِّي مَا دَارْهَا حَدّْ مْنْ غِيرِي، كُونْ مَا بْقَى عْلِيهُمْ دَنْبْ، وَلَكِنْ دَابَا وَاخَّا شَافُو هَادُوكْ الْمُعْجِزَاتْ رَاهُمْ كْرْهُونِي أَنَا وْبَّا.

²⁵وَلَكِنْ هَادْشِّي جْرَا بَاشْ يْتّْحَقّْقْ الْكْلَامْ اللِّي مْكْتُوبْ فْالشّْرَعْ دْيَالْهُمْ: رَاهْ هُمَ كْرْهُونِي بْلَا سْبَّة.

²⁶وْمْلِّي يْجِي الْمُعِينْ اللِّي غَادِي نْصِيفْطُه مْنْ عَنْدْ الْآبْ، رُوحْ الْحَقّْ اللِّي كَيْخْرُجْ مْنْ الْآبْ، رَاهْ غَادِي يْشْهَدْ لِيَّ.

²⁷وْغَادِي تْشَهْدُو لِيَّ حْتَّى نْتُمَ، حِيتْ رَاكُمْ مْعَايَ مْنْ اللّْوّْلْ».