Read Moroccan Standard Translation يُوحَنَّا 16 Bible Online

يُوحَنَّا 16 - Moroccan Standard Translation bible

يُوحَنَّا 16

¹الْفَصْلْ سْطَّاشْ «ݣْلْتْ لِيكُمْ هَادْشِّي بَاشْ تْبْقَاوْ تَابْتِينْ فْإِيمَانْكُمْ.

²رَاهْ غَيْخَرّْجُوكُمْ مْنْ دْيُورْ الصّْلَاة، وْغَيْجِي الْوَقْتْ اللِّي كَيْضَنّْ فِيهْ كُلّْ وَاحْدْ كَيْقْتَلْكُمْ بْلِّي رَاهْ هُوَ كَيْدِيرْ شِي خْدْمَة لْلَّهْ.

³وْغَيْدِيرُو لِيكُمْ هَادْشِّي عْلَاحْقَّاشْ مَا عَرْفُوشْ الْآبْ وْمَا عَرْفُونِيشْ.

⁴وَلَكِنْ تّْكَلّْمْتْ مْعَاكُمْ بْهَادْشِّي بَاشْ حْتَّى إِلَا جَا الْوَقْتْ اللِّي غَيْجْرَا فِيهْ، غَتّْفَكّْرُو بْلِّي ݣْلْتْهَا لِيكُمْ. وْرَاهْ مَا ݣْلْتْهَاشْ لِيكُمْ مْنْ اللّْوّْلْ حِيتْ كْنْتْ مْعَاكُمْ.

⁵أَمَّا دَابَا، هَانِي غَادِي نْرْجَعْ عَنْدْ هَادَاكْ اللِّي صِيفْطْنِي، وْحْتَّى وَاحْدْ فِيكُمْ مَا كَيْسَوّْلْنِي فِينْ غَادِي.

⁶وَلَكِنْ قَلْبْكُمْ عْمَرْ بْالْحُزْنْ، حِيتْ ݣْلْتْ لِيكُمْ هَادْشِّي.

⁷وَلَكِنْ نْݣُولْ لِيكُمْ الْحَقّْ: رَاهْ خْيَرْ لِيكُمْ نْمْشِي، حِيتْ إِلَا مَا مْشِيتْشْ، مَا غَيْجِيكُمْشْ الْمُعِينْ. وَلَكِنْ إِلَا مْشِيتْ، غَنْصِيفْطُه لِيكُمْ.

⁸وْمْلِّي غَيْجِي، غَيْبَيّْنْ لْلنَّاسْ اللِّي فْالدّْنْيَا بْاللِّي كَانُو غَالْطِينْ مْنْ جِهْةْ الدّْنُوبْ، وْالتَّقْوَى، وْالْحُكْمْ دْيَالْ الرَّبّْ.

⁹مْنْ جِهْةْ الدّْنُوبْ: عْلَاحْقَّاشْ مَا كَيْآمْنُوشْ بِيَّ.

¹⁰وْمْنْ جِهْةْ التَّقْوَى: عْلَاحْقَّاشْ غَنْرْجَعْ عَنْدْ الْآبْ وْمَا غَتْعَاوْدُوشْ تْشُوفُونِي.

¹¹وْمْنْ جِهْةْ الْحُكْمْ: عْلَاحْقَّاشْ الرَّئِيسْ دْيَالْ هَادْ الدّْنْيَا اللِّي هُوَ إِبْلِيسْ رَاهْ تّْحْكَمْ.

¹²رَاهْ بَاقِي عَنْدِي بْزَّافْ دْ الْأُمُورْ مَا نْݣُولْ لِيكُمْ، وَلَكِنْ مَا تْقَدْرُوشْ عْلِيهَا دَابَا.

¹³وَلَكِنْ مْلِّي يْجِي رُوحْ الْحَقّْ، رَاهْ هُوَ اللِّي غَيْوَرِّيكُمْ الْحَقّْ كُلُّه، حِيتْ مَا غَيْتّْكَلّْمْشْ مْنْ رَاسُه وَلَكِنْ غَيْݣُولْ لِيكُمْ كُلّْ مَا غَيْسْمَعْ وْغَيْخَبّْرْكُمْ بْالْأُمُورْ اللِّي جَايَّة.

¹⁴وْهُوَ اللِّي غَيْبَيّْنْ الْعَزّْ دْيَالِي، عْلَاحْقَّاشْ دَاكْشِّي اللِّي غَيْخَبّْرْكُمْ بِيهْ رَاهْ هُوَ مْنْ عَنْدِي.

¹⁵كُلّْ حَاجَة عَنْدْ الْآبْ رَاهَا دْيَالِي، عْلِيهَا ݣْلْتْ لِيكُمْ: رَاهْ اللِّي غَيْخَبّْرْكُمْ بِيهْ رُوحْ الْحَقّْ هُوَ مْنْ عَنْدِي.

¹⁶مْنْ دَابَا شْوِيَّة مَا غَادِيشْ تْشُوفُونِي، وْمْنْ بَعْدْ شْوِيَّة عَاوْتَانِي غَتْشُوفُونِي».

¹⁷وْسْوّْلُو شِي وْحْدِينْ مْنْ التّْلَامْدْ دْيَالُه بْعْضِيَّاتْهُمْ: «آشْ كَيْعْنِي بْكْلَامُه لِينَا: مْنْ دَابَا شْوِيَّة مَا غَتْشُوفُونِيشْ، وْمْنْ بَعْدْ شْوِيَّة عَاوْتَانِي غَتْشُوفُونِي. وْبْكْلَامُه: عْلَاحْقَّاشْ رَانِي رَاجْعْ عَنْدْ الْآبْ؟»

¹⁸وْݣَالُو: «آشْ كَيْعْنِي بْهَادْ الْكْلَامْ مْلِّي ݣَالْ: مْنْ دَابَا شْوِيَّة؟ رَاهْ مَا فْهَمْنَاشْ آشْنُو بْغَا يْݣُولْ».

¹⁹وْعْرَفْ يَسُوعْ بْلِّي بْغَاوْ يْسْوّْلُوهْ وْݣَالْ لِيهُمْ: «وَاشْ كَتْسَوّْلُو بْعْضِيَّاتْكُمْ حِيتْ ݣْلْتْ: مْنْ دَابَا شْوِيَّة مَا غَتْشُوفُونِيشْ، وْمْنْ بَعْدْ شْوِيَّة عَاوْتَانِي غَتْشُوفُونِي.

²⁰نْݣُولْ لِيكُمْ الْحَقّْ: رَاكُمْ غَتْبْكِيوْ وْتْنْوّْحُو، أَمَّا نَاسْ الدّْنْيَا غَيْفَرْحُو. نْتُمَ غَتْحَزْنُو، وَلَكِنْ الْحُزْنْ دْيَالْكُمْ غَيْوَلِّي فَرْحَة.

²¹الْمْرَاة مْلِّي كَيْقَرّْبْ وَقْتْهَا بَاشْ تْوْلَدْ كَتْكُونْ مْقَلّْقَة بْزَّافْ حِيتْ جَا وَقْتْهَا، وَلَكِنْ مْلِّي كَتْوْلَدْ مَا كَتْبْقَاشْ تْفَكّْرْ فْالْوْجَعْ بْسْبَابْ الْفَرْحَة، حِيتْ تّْزَادْ وَاحْدْ بْنَادْمْ فْالدّْنْيَا.

²²وْهَكَّا حْتَّى نْتُمَ، رَاكُمْ دَابَا مْقَلّْقِينْ بْزَّافْ، وَلَكِنْ مْلِّي غَنْعَاوْدْ نْشُوفْكُمْ، غَيْفْرَحْ قَلْبْكُمْ وْمَا غَيْقْدَرْ حَدّْ يْحَيّْدْ مْنّْكُمْ الْفَرْحَة دْيَالْكُمْ.

²³وْفْدَاكْ النّْهَارْ مَا غَتْطْلْبُو مْنِّي حْتَّى حَاجَة. وْرَانِي نْݣُولْ لِيكُمْ الْحَقّْ: ݣَاعْ اللِّي كَتْطْلْبُوهْ مْنْ الْآبْ بْالْإِسْمْ دْيَالِي غَادِي يْعْطِيهْ لِيكُمْ.

²⁴حْتَّى لْدَابَا مَا طْلَبْتُو حْتَّى حَاجَة بْالْإِسْمْ دْيَالِي. طْلْبُو وْغَتَاخْدُو، بَاشْ تْكْمَلْ الْفَرْحَة دْيَالْكُمْ».

²⁵«ݣْلْتْ لِيكُمْ هَادْ الْأُمُورْ بْالْمْتُولْ، وَلَكِنْ غَادِي يْجِي وَقْتْ غَنْخَبّْرْكُمْ فِيهْ عْلَى الْآبْ بْكْلَامْ بَايْنْ بْلَا مْتُولْ.

²⁶فْدَاكْ النّْهَارْ غَادِي تْطْلْبُو الْآبْ بْالْإِسْمْ دْيَالِي، وْمَا كَنْݣُولْشْ بْلِّي غَادِي نْطْلَبْ الْآبْ عْلَى وْدّْكُمْ،

²⁷حِيتْ الْآبْ بْرَاسُه كَيْبْغِيكُمْ، عْلَاحْقَّاشْ بْغِيتُونِي وْآمْنْتُو بْلِّي رَانِي مْنْ عَنْدْ اللَّهْ خْرَجْتْ.

²⁸خْرَجْتْ مْنْ عَنْدْ الْآبْ وْجِيتْ لْلدّْنْيَا وْدَابَا غَادِي نْخَلِّي الدّْنْيَا وْنْرْجَعْ عَنْدْ الْآبْ».

²⁹وْهُمَ يْݣُولُو لِيهْ تْلَامْدُه: «هَا نْتَ دَابَا كَتْهْضَرْ بْكْلَامْ بَايْنْ بْلَا مَا تْݣُولْ حْتَّى مْتَالْ وَاحْدْ.

³⁰دَابَا كَنْعَرْفُو بْلِّي رَاكْ كَتْعْرَفْ كُلّْشِي وْمَا كَتْحْتَاجْشْ يْسْوّْلْكْ شِي وَاحْدْ، وْعْلَى هَادْشِّي كَنْآمْنُو بْلِّي رَاكْ جِيتِي مْنْ عَنْدْ اللَّهْ».

³¹وْرَدّْ عْلِيهُمْ يَسُوعْ: «دَابَا عَادْ كَتْآمْنُو!

³²رَاهْ غَادِي يْجِي وَاحْدْ الْوَقْتْ، وْهَا هُوَ جَا دَابَا، فِيهْ غَادِي تْتْفَرّْقُو، كُلّْ وَاحْدْ غَيْمْشِي بْحَالُه وْتْخَلِّيوْنِي بُوحْدِي. وَلَكِنْ أَنَا مَاشِي بُوحْدِي عْلَاحْقَّاشْ الْآبْ مْعَايَ.

³³رَانِي ݣْلْتْ لِيكُمْ هَادْ الْأُمُورْ بَاشْ يْكُونْ عَنْدْكُمْ الْهْنَا فِيَّ. فْهَادْ الدّْنْيَا غَادِي تْكُونُو مّْحّْنِينْ، وَلَكِنْ تْشَجّْعُو. رَانِي غْلَبْتْ الدّْنْيَا».