Read Moroccan Standard Translation يُوحَنَّا 18 Bible Online

يُوحَنَّا 18 - Moroccan Standard Translation bible

يُوحَنَّا 18

¹الْفَصْلْ تْمَنْطَاشْ وْمْنْ بَعْدْمَا كَمّْلْ يَسُوعْ هَادْ الصّْلَاة، خْرَجْ مْعَ تْلَامْدُه لْلجِّهَة لْخْرَى دْيَالْ وَادْ قَدْرُونْ فِينْ كَانْ وَاحْدْ الجّْنَانْ، وْدْخَلْ لِيهْ هُوَ وْتْلَامْدُه.

²وْكَانْ يَهُودَا اللِّي غَادِي يْسَلّْمُه كَيْعْرَفْ هَادْ الْمُوضْعْ، عْلَاحْقَّاشْ كَانْ يَسُوعْ كَيْجْتَمْعْ فِيهْ بْزَّافْ دْ الْمَرَّاتْ مْعَ تْلَامْدُه.

³وْهُوَ يْجِي يَهُودَا لْتْمَّ وْجَابْ مْعَاهْ الْعَسْكَرْ وْالْحَرَسْ اللِّي صِيفْطُوهُمْ مْعَاهْ الرُّؤَسَا دْ رْجَالْ الدِّينْ وْالْفْرِّيسِيِّينْ، وْكَانُو هَازِّينْ مْعَاهُمْ الْمْشَاهْبْ وْالْقْنَادْلْ وْالسّْلَاحْ.

⁴وْخْرَجْ يَسُوعْ لْعَنْدْهُمْ وْهُوَ عَارْفْ ݣَاعْ دَاكْشِّي اللِّي غَادِي يْجْرَا لِيهْ، وْݣَالْ لِيهُمْ: «عْلَى مْنْ كَتْقَلّْبُو؟»،

⁵وْجَاوْبُوهْ: «عْلَى يَسُوعْ النَّاصِرِي». وْهُوَ يْݣُولْ لِيهُمْ: «أَنَا هُوَ». وْكَانْ يَهُودَا اللِّي غَيْسَلّْمُه حْتَّى هُوَ وَاقْفْ مْعَاهُمْ.

⁶وْمْلِّي جَاوْبْهُمْ يَسُوعْ وْݣَالْ لِيهُمْ: «أَنَا هُوَ»، رْجْعُو اللُّورْ وْهُمَ يْطِيحُو لْلْأَرْضْ.

⁷وْسْوّْلْهُمْ يَسُوعْ مَرَّة خْرَى: «عْلَى مْنْ كَتْقَلّْبُو؟» وْهُمَ يْجَاوْبُوهْ: «عْلَى يَسُوعْ النَّاصِرِي».

⁸وْݣَالْ لِيهُمْ يَسُوعْ: «رَاهْ ݣْلْتْ لِيكُمْ بْلِّي أَنَا هُوَ. وْإِلَا كْنْتُو كَتْقَلّْبُو عْلِيَّ أَنَا، إِيوَا خَلِّيوْ هَادُو يْمْشِيوْ بْحَالْهُمْ».

⁹بَاشْ يْتّْحَقّْقْ الْكْلَامْ اللِّي ݣَالْ يَسُوعْ: «رَاهْ هَادُو اللِّي عْطِيتِيهُمْ لِيَّ، مَا خْسَرْتْ مْنّْهُمْ حْتَّى وَاحْدْ».

¹⁰وْكَانْ عَنْدْ سِمْعَانْ بُطْرُسْ وَاحْدْ السِّيفْ، وْهُوَ يْجَبْدُه وْضْرَبْ بِيهْ الْعَبْدْ دْيَالْ رَئِيسْ رْجَالْ الدِّينْ وْقْطَعْ لِيهْ وْدْنُه لِيمْنَى. وْكَانْتْ سْمِيّْةْ دَاكْ الْعَبْدْ، مَلْخُسْ.

¹¹وْݣَالْ يَسُوعْ لْبُطْرُسْ: «رَدّْ سِيفْكْ لْجْوَاهْ! وَاشْ مَا غَادِيشْ نْشْرَبْ هَادْ الْكَاسْ اللِّي عْطَاهْ لِيَّ الْآبْ».

¹²وْمْنْ بَعْدْ شْدُّو الْعَسْكَرْ وْالْقَايْدْ وْالْحَرَسْ دْيَالْ لِيهُودْ يَسُوعْ وْكَتّْفُوهْ،

¹³وْدَّاوْهْ فْاللّْوّْلْ لْعَنْدْ حَنَّانْ نْسِيبْ قَيَافَا اللِّي كَانْ هُوَ الرَّئِيسْ دْ رْجَالْ الدِّينْ فْدَاكْ الْعَامْ.

¹⁴وْقَيَافَا هُوَ اللِّي كَانْ ݣَالْ لْلِيهُودْ بْلِّي خْيَرْ يْمُوتْ رَاجْلْ وَاحْدْ فْبْلَاصْةْ الشَّعْبْ.

¹⁵وْتْبَعْ سِمْعَانْ بُطْرُسْ وْوَاحْدْ التّْلْمِيدْ آخُرْ يَسُوعْ، وْكَانْ هَادْ التّْلْمِيدْ مْعْرُوفْ عَنْدْ الرَّئِيسْ دْ رْجَالْ الدِّينْ، وْدْخَلْ مْعَ يَسُوعْ لْدَارْ رَئِيسْ رْجَالْ الدِّينْ.

¹⁶وَلَكِنْ بُطْرُسْ بْقَى وَاقْفْ حْدَا الْبَابْ عْلَى بْرَّا، وْهُوَ يْخْرَجْ التّْلْمِيدْ لَاخُرْ اللِّي كَانْ مْعْرُوفْ عَنْدْ رَئِيسْ رْجَالْ الدِّينْ وْتّْكَلّْمْ مْعَ الْمْرَاة الْعْسَّاسَة دْيَالْ الْبَابْ وْدَخّْلْ بُطْرُسْ.

¹⁷وْسْوّْلَاتْ بُطْرُسْ: «وَاشْ مَاشِي حْتَّى نْتَ مْنْ تْلَامْدْ هَادْ الرَّاجْلْ؟»، وْهُوَ يْجَاوْبْهَا: «لَّا، أَنَا مَاشِي مْنّْهُمْ».

¹⁸وْكَانُو الْعْبِيدْ وْالْحَرَسْ وَاقْفِينْ حْدَا الْعَافْيَة اللِّي شْعْلُوهَا حِيتْ كَانْ الْبَرْدْ بْزَّافْ، وْبْدَاوْ كَيْسَخْنُو بِيهَا، وْوْقَفْ بُطْرُسْ كَيْسْخُنْ مْعَاهُمْ.

¹⁹وْسْوّْلْ الرَّئِيسْ دْ رْجَالْ الدِّينْ يَسُوعْ عْلَى تْلَامْدُه وْعْلَى التَّعْلِيمْ دْيَالُه،

²⁰وْجَاوْبُه يَسُوعْ: «أَنَا تّْكَلّْمْتْ مْعَ النَّاسْ دْيَالْ الدّْنْيَا بْالْعْلَّالِي، وْكْنْتْ كَنْعَلّْمْ كُلّْ وَقْتْ فْدْيُورْ الصّْلَاة وْفْبِيتْ اللَّهْ فِينْ كَيْتّْجَمْعُو لِيهُودْ كُلّْهُمْ، وْعَمّْرْنِي مَا ݣْلْتْ شِي حَاجَة فْالسِّرْ.

²¹إِيوَا عْلَاشْ كَتْسَوّْلْنِي أَنَا؟ سْوّْلْ النَّاسْ اللِّي سْمْعُو الْكْلَامْ دْيَالِي، حِيتْ هَادُوكْ رَاهُمْ كَيْعَرْفُو شْنُو ݣْلْتْ».

²²وْمْلِّي ݣَالْ يَسُوعْ هَادْ الْكْلَامْ، صَرْفْقُه وَاحْدْ مْنْ الْحَرَسْ كَانْ وَاقْفْ حْدَاهْ وْݣَالْ لِيهْ: «وَاشْ بْحَالْ هَكَّا كَتْجَاوْبْ الرَّئِيسْ دْ رْجَالْ الدِّينْ؟».

²³وْجَاوْبُه يَسُوعْ: «إِلَا كْنْتْ تّْكَلّْمْتْ بْكْلَامْ قْبِيحْ، إِيوَا بَيّْنُه لْلنَّاسْ، وْإِلَا كْنْتْ تّْكَلّْمْتْ مْزْيَانْ، عْلَاشْ كَتْضْرَبْنِي؟».

²⁴وْمْنْ بَعْدْ صِيفْطْ حَنَّانْ يَسُوعْ وْهُوَ مْكَتّْفْ لْعَنْدْ قَيَافَا الرَّئِيسْ دْ رْجَالْ الدِّينْ.

²⁵وْمْلِّي كَانْ سِمْعَانْ بُطْرُسْ وَاقْفْ كَيْسْخُنْ، ݣَالُو لِيهْ شِي وْحْدِينْ: «وَاشْ مَاشِي حْتَّى نْتَ مْنْ تْلَامْدْ يَسُوعْ؟». وْهُوَ يْنْكَرْ وْݣَالْ: «لَّا، أَنَا مَاشِي مْنّْهُمْ!».

²⁶وْݣَالْ وَاحْدْ مْنْ الْعْبِيدْ دْيَالْ الرَّئِيسْ دْ رْجَالْ الدِّينْ، وْهُوَ نْسِيبْ الرَّاجْلْ اللِّي قْطَعْ لِيهْ بُطْرُسْ وْدْنِيهْ: «وَاشْ مَا شْفْتَكْشْ مْعَاهْ فْالجّْنَانْ؟».

²⁷وْنْكَرْ بُطْرُسْ مَرَّة خْرَى، وْدِيكْ السَّاعَة صَاحْ الْفْرُّوجْ.

²⁸وْفْالصّْبَاحْ بْكْرِي، جَابُو يَسُوعْ مْنْ دَارْ قَيَافَا لْقْصَرْ الْحَاكْمْ، وْمَا دَخْلُوشْ بَاشْ مَا يْتّْنَجّْسُوشْ، وْبَاشْ يْقَدْرُو يَاكْلُو خْرُوفْ عِيدْ الْفِصْحْ.

²⁹دَاكْشِّي عْلَاشْ خْرَجْ لْعَنْدْهُمْ بِيلَاطُسْ، وْسْوّْلْهُمْ وْݣَالْ: «بَاشْ كَتْتَّهْمُو هَادْ الرَّاجْلْ؟».

³⁰وْجَاوْبُوهْ وْݣَالُو: «كُونْ مَا كَانْشْ دَايْرْ عْلَاشْ، ݣَاعْ مَا غَنْجِيبُوهْ لِيكْ!».

³¹وْهُوَ يْݣُولْ لِيهُمْ بِيلَاطُسْ: «دِّيوْهْ نْتُمَ وْحْكْمُو عْلِيهْ عْلَى حْسَابْ الشّْرَعْ دْيَالْكُمْ». وْݣَالُو لِيهْ لِيهُودْ: «مَا عَنْدْنَاشْ الْحَقّْ نْقْتْلُو شِي حَدّْ».

³²وْوْقَعْ هَادْشِّي بَاشْ يْتّْحَقّْقْ كْلَامْ يَسُوعْ اللِّي ݣَالُه وْبَيّْنْ بِيهْ لْلنَّاسْ كِيفَاشْ غَيْمُوتْ.

³³وْدْخَلْ بِيلَاطُسْ مَرَّة خْرَى لْلْقْصَرْ دْيَالُه، وْعَيّْطْ عْلَى يَسُوعْ وْسْوّْلُه: «وَاشْ نْتَ هُوَ مَلِكْ لِيهُودْ؟».

³⁴وْجَاوْبُه يَسُوعْ: «وَاشْ كَتْݣُولْ هَادْشِّي مْنْ رَاسْكْ وْلَا وْحْدِينْ خْرِينْ اللِّي ݣَالُو لِيكْ عْلِيَّ؟».

³⁵وْهُوَ يْرَدّْ عْلِيهْ بِيلَاطُسْ: «وَاشْ أَنَا يْهُودِي؟ رَاهْ الشَّعْبْ اللِّي نْتَ مْنُّه وْالرُّؤَسَا دْ رْجَالْ الدِّينْ هُمَ اللِّي جَابُوكْ لِيَّ، إِيوَا ݣُولْ أَشْنُو دْرْتِي؟».

³⁶وْجَاوْبُه يَسُوعْ: «الْمَمْلَكَة دْيَالِي مَاشِي مْنْ هَادْ الدّْنْيَا، كُونْ كَانْتْ الْمَمْلَكَة دْيَالِي مْنْ هَادْ الدّْنْيَا، كُونْ رَاهْ النَّاسْ اللِّي مْعَايَ غَيْدِيرُو جَهْدْهُمْ بَاشْ مَا يْخَلِّيوْنِيشْ نْطِيحْ فْيْدّْ لِيهُودْ، وَلَكِنْ رَاهْ الْمَمْلَكَة دْيَالِي مَاشِي مْنْ هْنَا».

³⁷وْهُوَ يْݣُولْ لِيهْ بِيلَاطُسْ: «عْلَى هَادْ الْحْسَابْ وَاشْ نْتَ مَلِكْ؟». وْجَاوْبُه يَسُوعْ: «نْتَ اللِّي ݣْلْتِي بْلِّي أَنَا مَلِكْ. عْلَى هَادْشِّي تّْوْلَدْتْ وْعْلَى هَادْشِّي جِيتْ لْلدّْنْيَا بَاشْ نْشْهَدْ لْلْحَقّْ، وْݣَاعْ اللِّي كَيْبْغِي الْحَقّْ كَيْسْمَعْ صُوتِي».

³⁸وْݣَالْ لِيهْ بِيلَاطُسْ: «أَشْنُو هُوَ الْحَقّْ؟». وْمْلِّي ݣَالْ هَادْشِّي، عَاوْدْ خْرَجْ لْعَنْدْ لِيهُودْ وْݣَالْ لِيهُمْ: «أَنَا رَانِي مَا لْقِيتْ عْلَى هَادْ الرَّاجْلْ حْتَّى شِي تُهْمَة.

³⁹وَلَكِنْ عْلَى حْسَابْ الْعَادَة دْيَالْكُمْ، كَنْطْلَقْ لِيكُمْ فْعِيدْ الْفِصْحْ شِي وَاحْدْ مْنْ الْمْسْجُونِينْ، إِيوَا وَاشْ تْبْغِيوْ نْطْلَقْ لِيكُمْ مَلِكْ لِيهُودْ؟».

⁴⁰وْهُمَ يْغَوّْتُو كُلّْهُمْ وْݣَالُو لِيهْ: «مَاشِي هَادَا، وَلَكِنْ بَارَابَاسْ!». وْكَانْ بَارَابَاسْ شْفَّارْ.