Read Moroccan Standard Translation يُوحَنَّا 19 Bible Online

يُوحَنَّا 19 - Moroccan Standard Translation bible

يُوحَنَّا 19

¹الْفَصْلْ تْسَعْطَاشْ وْمْنْ بَعْدْ دَّا بِيلَاطُسْ يَسُوعْ وْضَرْبُه.

²وْضْفْرُو الْعَسْكَرْ تَاجْ دْيَالْ الشُّوكْ وْحَطُّوهْ عْلَى رَاسُه، وْلَبّْسُوهْ سْلْهَامْ مْدَادِي،

³وْبْدَاوْ كَيْقَرّْبُو لْعَنْدُه وْكَيْݣُولُو لِيهْ: «السّْلَامْ عْلِيكْ آ مَلِكْ لِيهُودْ!» وْكَيْصَرْفْقُوهْ.

⁴وْخْرَجْ بِيلَاطُسْ مَرَّة خْرَى عْلَى بْرَّا وْݣَالْ لِيهُمْ: «هَانِي غَنْخَرّْجُه لِيكُمْ بَاشْ تْعَرْفُو بْلِّي مَا لْقِيتْ عْلِيهْ حْتَّى شِي تُهْمَة».

⁵وْخْرَجْ يَسُوعْ عْلَى بْرَّا وْعْلَى رَاسُه تَاجْ دْيَالْ الشُّوكْ وْلَابْسْ سْلْهَامْ مْدَادِي، وْݣَالْ لِيهُمْ بِيلَاطُسْ: «هَا هُوَ هَادْ الرَّاجْلْ!».

⁶وْمْلِّي شَافُوهْ الرُّؤَسَا دْ رْجَالْ الدِّينْ وْالْحَرَسْ، غَوّْتُو وْݣَالُو: «صْلْبُه! صْلْبُه!». وْرَدّْ عْلِيهُمْ بِيلَاطُسْ: «دِّيوْهْ نْتُمَ وْصَلْبُوهْ، حِيتْ أَنَا مَا لْقِيتْ عْلِيهْ حْتَّى شِي تُهْمَة».

⁷وْجَاوْبُوهْ لِيهُودْ: «عَنْدْنَا الشّْرَعْ، وْعْلَى حْسَابْ الشّْرَعْ خَاصُّه يْمُوتْ، حِيتْ رَدّْ رَاسُه وَلْدْ اللَّهْ».

⁸وْمْلِّي سْمَعْ بِيلَاطُسْ هَادْ الْكْلَامْ، زَادْ خَافْ.

⁹وْعَاوْدْ دْخَلْ لْلْقْصَرْ دْيَالُه وْسْوّْلْ يَسُوعْ: «مْنِينْ نْتَ؟»، وَلَكِنْ يَسُوعْ مَا عْطَاهْ حْتَّى شِي جْوَابْ.

¹⁰وْهُوَ يْݣُولْ لِيهْ بِيلَاطُسْ: «وَاشْ مَا غَادِيشْ تْهْضَرْ مْعَايَ؟ وَاشْ مَا كَتْعْرَفْشْ بْلِّي رَاهْ عَنْدِي السُّلْطَة بَاشْ نْطَلْقْكْ وْعَنْدِي السُّلْطَة بَاشْ نْصَلْبْكْ؟».

¹¹وْجَاوْبُه يَسُوعْ: «مَا عَنْدْكْ حْتَّى سُلْطَة عْلِيَّ مْنْ غِيرْ إِلَا تّْعْطَاتْ لِيكْ مْنْ الْفُوقْ. عْلَى هَادْشِّي رَاهْ هَادَاكْ اللِّي سَلّْمْنِي لِيكْ، الدَّنْبْ دْيَالُه كْبَرْ».

¹²وْمْنْ هَادَاكْ الْوَقْتْ وْبِيلَاطُسْ بَاغِي يْطْلَقْ يَسُوعْ، وَلَكِنْ لِيهُودْ كَانُو كَيْغَوّْتُو وْكَيْݣُولُو: «إِلَا طْلَقْتِي هَادْ الرَّاجْلْ غَتْكُونْ ضْدّْ قَيْصَرْ، حِيتْ كُلّْ مْنْ كَيْدِيرْ رَاسُه مَلِكْ، رَاهْ ضْدّْ قَيْصَرْ!».

¹³وْمْلِّي سْمَعْ بِيلَاطُسْ هَادْ الْكْلَامْ، آمْرْ بَاشْ يْخَرّْجُو يَسُوعْ، وْݣْلَسْ عْلَى الْكُرْسِي دْ الْحُكْمْ فْوَاحْدْ الْمُوضْعْ كَيْݣُولُو لِيهْ الْبَلَاطْ، وْبْاللُّغَة الْعِبْرِيَّة كَيْسَمِّيوْهْ جَبَّاتَا.

¹⁴وْدَاكْ النّْهَارْ كَانُو كَيْوَجّْدُو لْعِيدْ الْفِصْحْ، وْكَانْتْ السَّاعَة قْرِيبَة لْلطّْنَاشْ، وْهُوَ يْݣُولْ بِيلَاطُسْ لْلِيهُودْ: «هَا هُوَ الْمَلِكْ دْيَالْكُمْ!».

¹⁵وْهُمَ يْغَوّْتُو: «دِّيهْ! دِّيهْ! صْلْبُه!». وْسْوّْلْهُمْ بِيلَاطُسْ: «وَاشْ غَنْصْلَبْ الْمَلِكْ دْيَالْكُمْ؟». وْجَاوْبُوهْ الرُّؤَسَا دْ رْجَالْ الدِّينْ: «مَا عَنْدْنَا حْتَّى شِي مَلِكْ مْنْ غِيرْ قَيْصَرْ!».

¹⁶وْدِيكْ السَّاعَة عْطَاهْ لِيهُمْ بِيلَاطُسْ بَاشْ يْصَلْبُوهْ. وْشْدُّو الْعَسْكَرْ يَسُوعْ وْدَّاوْهْ.

¹⁷وْخْرَجْ وْهُوَ هَازّْ الصّْلِيبْ دْيَالُه لْلْمُوضْعْ اللِّي سْمِيتُه الْجُمْجُمَة، وْكَيْسَمِّيوْهْ بْاللُّغَة الْعِبْرِيَّة الْجُلْجُتَة.

¹⁸وْتْمَّ صَلْبُوهْ، وْصَلْبُو مْعَاهْ جُوجْ خْرِينْ، وَاحْدْ عْلَى لِيمْنْ وْلَاخُرْ عْلَى لِيسْرْ، وْيَسُوعْ فْالْوَسْطْ.

¹⁹وْكْتَبْ بِيلَاطُسْ وَاحْدْ اللُّوحَة وْآمْرْ بَاشْ تْتْعَلّْقْ فُوقْ الصّْلِيبْ، وْكَانْ مْكْتُوبْ فِيهَا: «يَسُوعْ النَّاصِرِي مَلِكْ لِيهُودْ».

²⁰وْبْزَّافْ دْ لِيهُودْ قْرَاوْ هَادْ اللُّوحَة، حِيتْ الْمُوضْعْ اللِّي تّْصْلَبْ فِيهْ يَسُوعْ كَانْ قْرِيبْ مْنْ الْمْدِينَة. وْكَانْتْ مْكْتُوبَة بْاللُّغَة الْعِبْرِيَّة وْاللَّاتِينِيَّة وْالْيُونَانِيَّة.

²¹وْݣَالُو الرُّؤَسَا دْ رْجَالْ الدِّينْ دْيَالْ لِيهُودْ لْبِيلَاطُسْ: «مَا تْكْتَبْشْ: مَلِكْ لِيهُودْ وَلَكِنْ كْتَبْ: هَادْ الرَّاجْلْ ݣَالْ: أَنَا مَلِكْ لِيهُودْ!».

²²وْهُوَ يْجَاوْبْهُمْ بِيلَاطُسْ: «اللِّي كْتَبْتُه رَانِي كْتَبْتُه».

²³وْمْنْ بَعْدْ، مْلِّي صْلْبُو الْعَسْكَرْ يَسُوعْ، شْدُّو حْوَايْجُه وْقْسْمُوهُمْ عْلَى رْبْعَة دْ الْقْسْمَاتْ، كُلّْ عَسْكْرِي خْدَا قْسْمَة. وْخْدَاوْ السّْلْهَامْ حْتَّى هُوَ، وْكَانْ كُلُّه طَرْفْ وَاحْدْ مَا مْخَيّْطْشْ.

²⁴وْهُمَ يْݣُولُو لْبَعْضِيَّاتْهُمْ: «بْلَا مَا نْشَرّْݣُوهْ، وَلَكِنْ نْضْرْبُو عْلِيهْ الْعُودْ وْنْشُوفُو فْمْنْ غَيْجِي». وْوْقَعْ هَادْشِّي بَاشْ يْتّْحَقّْقْ الْكْلَامْ اللِّي فْكْتَابْ اللَّهْ وْاللِّي كَيْݣُولْ: «قْسْمُو حْوَايْجِي مْعَ بْعْضِيَّاتْهُمْ وْعْلَى السّْلْهَامْ دْيَالِي ضْرْبُو الْعُودْ». هَادْشِّي اللِّي دَارُو الْعَسْكَرْ.

²⁵وْاللِّي كَانُو وَاقْفِينْ حْدَا صْلِيبْ يَسُوعْ هُمَ: مُّه، وْخَالْتُه، وْمَرْيَمْ مْرَاةْ كِلُوبَا، وْمَرْيَمْ الْمَجْدَلِيَّة.

²⁶وْمْلِّي شَافْ يَسُوعْ مُّه وْالتّْلْمِيدْ اللِّي كَانْ كَيْبْغِيهْ وَاقْفْ حْدَاهَا، ݣَالْ لْمُّه: «آ الْمْرَاة، هَا هُوَ وَلْدْكْ».

²⁷وْمْنْ بَعْدْ ݣَالْ لْلتّْلْمِيدْ دْيَالُه: «هَا هِيَ مُّكْ». وْمْنْ دِيكْ السَّاعَة دَّاهَا التّْلْمِيدْ مْعَاهْ لْدَارُه.

²⁸وْمْنْ بَعْدْ هَادْشِّي شَافْ يَسُوعْ بْلِّي كُلّْشِي كْمَلْ، وْهُوَ يْݣُولْ: «أَنَا عْطْشَانْ»، بَاشْ يْتّْحَقّْقْ دَاكْشِّي اللِّي فْكْتَابْ اللَّهْ.

²⁹وْكَانْ مْحْطُوطْ وَاحْدْ الْغُرَّافْ عَامْرْ بْالْخْلّْ، وْهُمَ يْفَزّْݣُو فِيهْ طَرْفْ دْيَالْ التُّوبْ وْدَارُوهْ فْوَاحْدْ الْعَرْشْ دْيَالْ عَشْبَةْ الزُّوفَا، وْقَرّْبُوهْ لِيهْ لْفُمُّه.

³⁰وْمْلِّي دَاقْ يَسُوعْ الْخَلّْ ݣَالْ: «كُلّْشِي كْمَلْ». وْهُوَ يْحْنِي رَاسُه وْمَاتْ.

³¹وْحِيتْ كَانْ هَادَا هُوَ النّْهَارْ اللِّي كَيْوَجّْدُو فِيهْ لِيهُودْ لْلسّْبْتْ، وْمَا يْمْكَنْشْ تْبْقَى الدَّاتْ دْيَالْ الرّْجَالْ اللِّي مْصْلُوبِينْ مْعَلّْقَة عْلَى الصّْلِيبْ، حِيتْ السّْبْتْ نْهَارْ كْبِيرْ عَنْدْهُمْ، طْلْبُو مْنْ بِيلَاطُسْ بَاشْ يْهَرّْسْ السِّيݣَانْ دْيَالْ الرّْجَالْ وْيْنَزّْلُو الدَّاتْ دْيَالْهُمْ.

³²وْهُمَ يْجِيوْ الْعَسْكَرْ وْهَرّْسُو سِيݣَانْ الرّْجَالْ بْجُوجْ اللِّي مْصْلُوبِينْ مْعَ يَسُوعْ.

³³وَلَكِنْ مْلِّي جَاوْ بَاشْ يْهَرّْسُو سِيݣَانْ يَسُوعْ لْقَاوْهْ مَاتْ، وْمَا هَرْسُّوهُمْشْ لِيهْ.

³⁴وَلَكِنْ وَاحْدْ مْنْ هَادُوكْ الْعَسْكَرْ تْقَبْ جَنْبْ يَسُوعْ بْالْحَرْبَة، وْدِيكْ السَّاعَة خْرَجْ مْنُّه الدّْمْ وْالْمَا.

³⁵وْهَادَاكْ اللِّي شَافْ هَادْشِّي، شْهَدْ بِيهْ وْشْهَادْتُه صْحِيحَة، وْهُوَ مْتْيِقّْنْ بْلِّي كَيْݣُولْ الْحَقّْ بَاشْ تْآمْنُو حْتَّى نْتُمَ.

³⁶وْوْقَعْ هَادْشِّي بَاشْ يْتّْحَقّْقْ الْكْلَامْ اللِّي فْكْتَابْ اللَّهْ اللِّي كَيْݣُولْ: «حْتَّى عْضَمْ مْنُّه مَا غَيْتّْهَرّْسْ».

³⁷وْآيَة خْرَى فْكْتَابْ اللَّهْ كَتْݣُولْ: «غَيْشُوفُو فْهَادَاكْ اللِّي تْقْبُو لِيهْ جَنْبُه».

³⁸وْمْنْ بَعْدْ هَادْشِّي جَا يُوسْفْ اللِّي مْنْ الرَّامَة، وْاللِّي كَانْ تْلْمِيدْ دْ يَسُوعْ وْمَا مْعْرُوفْشْ عْلَاحْقَّاشْ كَانْ كَيْخَافْ مْنْ لِيهُودْ، وْطْلَبْ مْنْ بِيلَاطُسْ بَاشْ يَاخُدْ الدَّاتْ دْيَالْ يَسُوعْ، وْوَافْقْ بِيلَاطُسْ. وْجَا يُوسْفْ وْخْدَا الدَّاتْ دْيَالْ يَسُوعْ.

³⁹وْجَا حْتَّى نِيقُودِيمُوسْ اللِّي كَانْ جَا مْنْ قْبَلْ لْعَنْدْ يَسُوعْ بْاللِّيلْ، وْجَابْ مْعَاهْ تْقْرِيبًا تْلَاتِينْ كِيلُو دْ الْمَسْكْ الْحُرّْ مْخَلّْطْ بْالْعُودْ.

⁴⁰وْهُمَ يَاخْدُو الدَّاتْ دْيَالْ يَسُوعْ وْدَارُوهَا فْالْكْفَنْ وْحَنّْطُوهَا كِمَا كَانْتْ الْعَادَة عَنْدْ لِيهُودْ.

⁴¹وْكَانْ فْالْمُوضْعْ اللِّي تّْصْلَبْ فِيهْ يَسُوعْ وَاحْدْ الجّْنَانْ، وْفْهَادْ الجّْنَانْ وَاحْدْ الْقْبَرْ جْدِيدْ عَمّْرْ شِي وَاحْدْ مَا تّْدْفَنْ فِيهْ.

⁴²وْدَارُو يَسُوعْ فْهَادَاكْ الْقْبَرْ حِيتْ قْرِيبْ، وْحِيتْ هَادَاكْ النّْهَارْ نِيتْ كَانُو لِيهُودْ كَيْوَجّْدُو لْلسّْبْتْ.