Read Moroccan Standard Translation يُوحَنَّا 2 Bible Online

يُوحَنَّا 2 - Moroccan Standard Translation bible

يُوحَنَّا 2

¹الْفَصْلْ التَّانِي وْفْالنّْهَارْ التَّالْتْ، كَانْ وَاحْدْ الْعَرْسْ فْقَانَا اللِّي فْالْجَلِيلْ، وْكَانْتْ أُمّْ يَسُوعْ تْمَّ.

²وْكَانْ يَسُوعْ وْتْلَامْدُه حْتَّى هُمَ مْعْرُوضِينْ لْلْعَرْسْ.

³وْمْلِّي تّْسَالَا الْخْمَرْ لْمَّالِينْ الْعَرْسْ، ݣَالْتْ لِيهْ مُّه: «رَاهْ تّْسَالَا لِيهُمْ الْخْمَرْ!».

⁴وْهُوَ يْݣُولْ لِيهَا يَسُوعْ: «آشْ بِينِي وْبِينْكْ آ هَادْ الْمْرَاة؟ رَاهْ سَاعْتِي مَازَالْ مَا جَاتْ».

⁵وْݣَالْتْ مُّه لْلْخْدَّامَا: «اللِّي ݣَالْ لِيكُمْ عْلِيهْ، دِيرُوهْ!».

⁶وْكَانُو تْمَّ سْتَّة دْيَالْ الْخْوَابِي مْصَايْبِينْ مْنْ الْحْجَرْ، كَيْسْتَعْمْلُوهُمْ لِيهُودْ بَاشْ يْتّْنْقَّاوْ، وْكَانْتْ كُلّْ خَابْيَة كَتْهَزّْ تْقْرِيبًا مَا بِينْ تْمَانِينْ حْتَّى لْمْيَة وْعْشْرِينْ يْتْرُو.

⁷وْݣَالْ لِيهُمْ يَسُوعْ: «عَمّْرُو الْخْوَابِي بْالْمَا!»، وْهُمَ يْعَمّْرُوهُمْ حْتَّى لْلْفُمّْ.

⁸وْمْنْ بَعْدْ ݣَالْ لِيهُمْ: «دَابَا، خْوِيوْ وْعْطِيوْ لْلِّي مْكَلّْفْ بْالْعَرْسْ». وْعْطَاوْهْ.

⁹وْمْلِّي دَاقْ الْمَا اللِّي وْلَّى خْمَرْ، مَا عْرَفْشْ مْنِينْ جَا هَادْ الْخْمَرْ، وَلَكِنْ الْخْدَّامَا اللِّي فَرّْقُو مْنُّه كَانُو عَارْفِينْ. وْعَيّْطْ اللِّي مْكَلّْفْ بْالْعَرْسْ عْلَى الْعْرِيسْ،

¹⁰وْݣَالْ لِيهْ: «ݣَاعْ النَّاسْ كَيْعْطِيوْ الْخْمَرْ الْمْخَيّْرْ فْاللّْوّْلْ، وْمْلِّي كَيْسَكْرُو الضّْيَافْ كَيْعْطِيوْهُمْ الْخْمَرْ الرّْخِيصْ، أَمَّا نْتَ رَاكْ خَلِّيتِي الْخْمَرْ الْمْزْيَانْ حْتَّى لْدَابَا!».

¹¹هَادِي هِيَ الْعَلَامَة اللّْوّْلَى اللِّي دَارْهَا يَسُوعْ فْقَانَا اللِّي فْالْجَلِيلْ، وْبَيّْنْ الْعَزّْ دْيَالُه وْآمْنُو بِيهْ تْلَامْدُه.

¹²وْمْنْ بَعْدْ هَادْشِّي نْزَلْ لْكَفْرْنَاحُومْ، هُوَ وْمُّه وْخُوتُه وْتْلَامْدُه، وْبْقَاوْ تْمَّ شِي يَّامَاتْ قْلَالْ.

¹³وْكَانْ عِيدْ الْفِصْحْ دْيَالْ لِيهُودْ قْرِيبْ، وْطْلَعْ يَسُوعْ لْأُورْشَلِيمْ.

¹⁴وْلْقَا فْبِيتْ اللَّهْ الْبْيَّاعَا دْ الْبْݣَرْ وْالْغْنَمْ وْالْحْمَامْ، وْاللِّي كَيْصَرّْفُو الْفْلُوسْ ݣَالْسِينْ.

¹⁵وْهُوَ يْصَايْبْ مْصْوِيطَة مْنْ الْحْبَالْ وْجْرَّى عْلِيهُمْ كُلّْهُمْ مْنْ بِيتْ اللَّهْ مْعَ الْغْنَمْ وْالْبْݣَرْ دْيَالْهُمْ، وْشَتّْتْ الدّْرَاهْمْ دْيَالْ اللِّي كَيْصَرّْفُو الْفْلُوسْ وْقْلَبْ طْبَالِيهُمْ.

¹⁶وْݣَالْ لْلْبِيَّاعَا دْ الْحْمَامْ: «خَرّْجُو هَادْشِّي مْنْ هْنَا، مَا تْرَدُّوشْ دَارْ بَّا دَارْ لْلْبِيعْ وْالشّْرَا!».

¹⁷وْتّْفَكّْرُو تْلَامْدُه بْلِّي مْكْتُوبْ فْكْتَابْ اللَّهْ: «الْغِيرَة عْلَى دَارْكْ غَادِي تَاكْلْنِي».

¹⁸وْسْوّْلُوهْ لِيهُودْ: «آشْ مْنْ عَلَامَة غَتْدِيرْ بَاشْ تْوَرِّينَا بْلِّي عَنْدْكْ الْحَقّْ تْدِيرْ هَادْشِّي؟».

¹⁹وْجَاوْبْهُمْ يَسُوعْ وْݣَالْ: «رَيّْبُو هَادْ بِيتْ اللَّهْ، وْفْتْلْتْ يَّامْ أَنَا غَنْبْنِيهْ».

²⁰وْهُمَ يْݣُولُو لِيهْ لِيهُودْ: «هَادْ بِيتْ اللَّهْ تّْبْنَى فْسْتَّة وْرْبْعِينْ عَامْ، وْنْتَ فْتْلْتْ يَّامْ غَتْعَاوْدْ تْبْنِيهْ؟».

²¹وَلَكِنْ يَسُوعْ كَانْ كَيْقْصَدْ بْلِّي بِيتْ اللَّهْ هُوَ الدَّاتْ دْيَالُه.

²²وْمْلِّي تّْبْعَتْ مْنْ الْمُوتْ، تّْفَكّْرُو تْلَامْدُه بْلِّي ݣَالْ هَادْشِّي، وْآمْنُو بْكْتَابْ اللَّهْ وْالْكْلَامْ اللِّي ݣَالُه يَسُوعْ.

²³وْمْلِّي كَانْ يَسُوعْ فْأُورْشَلِيمْ فْعِيدْ الْفِصْحْ، آمْنُو بْزَّافْ دْ النَّاسْ بْالْإِسْمْ دْيَالُه حِيتْ شَافُو الْعَلَامَاتْ اللِّي دَارْ.

²⁴وَلَكِنْ يَسُوعْ مَا كَانْشْ كَيْتِيقْ فِيهُمْ، عْلَاحْقَّاشْ كَانْ كَيْعْرَفْ النَّاسْ كُلّْهُمْ.

²⁵وْمَا كَانْشْ مْحْتَاجْ لْشِي وَاحْدْ يْشْهَدْ لِيهْ عْلَى بْنَادْمْ، حِيتْ كَانْ كَيْعْرَفْ أَشْنُو كَايْنْ فْقَلْبْ بْنَادْمْ.