Read Moroccan Standard Translation يُوحَنَّا 20 Bible Online

يُوحَنَّا 20 - Moroccan Standard Translation bible

يُوحَنَّا 20

¹الْفَصْلْ عْشْرِينْ وْنْهَارْ الْحَدّْ فْالصّْبَاحْ بْكْرِي، جَاتْ مَرْيَمْ الْمَجْدَلِيَّة لْلْقْبَرْ وْكَانْ بَاقِي الضّْلَامْ، وْهِيَ تْشُوفْ الْحَجْرَة مْحَيّْدَة مْنْ بَابْ الْقْبَرْ.

²وْمْشَاتْ كَتْجْرِي لْعَنْدْ سِمْعَانْ بُطْرُسْ وْالتّْلْمِيدْ لَاخُرْ اللِّي كَانْ كَيْبْغِيهْ يَسُوعْ، وْݣَالْتْ لِيهُمْ: «رَاهْ هْزُّو الدَّاتْ دْيَالْ الرَّبّْ يَسُوعْ مْنْ الْقْبَرْ وْمَا عْرَفْنَاشْ فِينْ دَارُوهَا!».

³وْهُوَ يْخْرَجْ بُطْرُسْ وْالتّْلْمِيدْ لَاخُرْ وْمْشَاوْ لْلْقْبَرْ،

⁴وْكَانُو بْجُوجْ كَيْجْرِيوْ، وَلَكِنْ التّْلْمِيدْ لَاخُرْ سْبَقْ بُطْرُسْ وْوْصَلْ هُوَ اللّْوّْلْ لْلْقْبَرْ.

⁵وْطْلّْ وْهُوَ يْبَانْ لِيهْ الْكْفَنْ مْحْطُوطْ فْالْأَرْضْ وَلَكِنْ مَا دْخَلْشْ.

⁶وْلْحَقْ عْلِيهْ سِمْعَانْ بُطْرُسْ وْدْخَلْ لْلْقْبَرْ وْشَافْ الْكْفَنْ مْحْطُوطْ فْالْأَرْضْ،

⁷وْالزِّيفْ اللِّي كَانْ عْلَى رَاسْ يَسُوعْ مَا كَانْشْ مْحْطُوطْ مْعَ الْكْفَنْ، وَلَكِنْ كَانْ مْجْمُوعْ فْبْلَاصَة خْرَى بُوحْدُه.

⁸وْدِيكْ السَّاعَة دْخَلْ حْتَّى التّْلْمِيدْ لَاخُرْ اللِّي وْصَلْ هُوَ اللّْوّْلْ لْلْقْبَرْ، وْشَافْ وْهُوَ يْآمْنْ.

⁹حِيتْ مَازَالْ مَا كَانُوشْ فَاهْمِينْ الْكْلَامْ اللِّي فْكْتَابْ اللَّهْ، اللِّي كَيْݣُولْ بْلِّي الْمَسِيحْ خَاصُّه يْتّْبْعَتْ مْنْ الْمُوتْ.

¹⁰وْرْجْعُو التّْلَامْدْ بْجُوجْ بْحَالْهُمْ.

¹¹وَلَكِنْ مَرْيَمْ الْمَجْدَلِيَّة، بْقَاتْ وَاقْفَة حْدَا الْقْبَرْ عْلَى بْرَّا كَتْبْكِي. وْمْلِّي كَانْتْ كَتْبْكِي، طْلَّاتْ عْلَى الْقْبَرْ،

¹²وْهِيَ تْشُوفْ جُوجْ دْ الْمَلَايْكَة لَابْسِينْ حْوَايْجْ بِيضِينْ ݣَالْسِينْ فِينْ كَانْتْ الدَّاتْ دْيَالْ يَسُوعْ مْحْطُوطَة، وَاحْدْ حْدَا الرَّاسْ وْلَاخُرْ حْدَا الرّْجْلِينْ.

¹³وْهُمَ يْݣُولُو لِيهَا: «آ الْمْرَاة، عْلَاشْ كَتْبْكِي؟»، وْݣَالْتْ لِيهُمْ: «رَاهْ دَّاوْ سِيدِي وْمَا عْرَفْتْشْ فِينْ دَارُوهْ!».

¹⁴وْمْلِّي ݣَالْتْ هَادْشِّي، تْلَفّْتَاتْ مُورَاهَا وْهِيَ تْشُوفْ يَسُوعْ وَاقْفْ، وْمَا عْرْفَاتْشْ بْلِّي هُوَ يَسُوعْ.

¹⁵وْسْوّْلْهَا: «آ الْمْرَاة، عْلَاشْ كَتْبْكِي؟ وْعْلَى مْنْ كَتْقَلّْبِي؟». وْحْسَابْ لِيهَا وَاشْ هُوَ الجّْنَايْنِي، وْهِيَ تْجَاوْبُه: «آ سِيدِي، إِلَا كْنْتِ نْتَ اللِّي هْزِّيتِيهْ، غِيرْ ݣُولْ لِيَّ فِينْ دْرْتِيهْ وْأَنَا غَنْدِّيهْ».

¹⁶وْݣَالْ لِيهَا يَسُوعْ: «آ مَرْيَمْ!». وْهِيَ تْلَفّْتْ وْݣَالْتْ لِيهْ بْالْعِبْرِيَّة: «رَبُّونِي!» -اللِّي كَتْعْنِي آ الْمُعَلِّمْ-.

¹⁷وْݣَالْ لِيهَا يَسُوعْ: «مَا تْمْسِّينِيشْ، حِيتْ بَاقِي مَا طْلَعْتْ لْعَنْدْ الْآبْ، وَلَكِنْ سِيرِي لْعَنْدْ خُوتِي وْݣُولِي لِيهُمْ: رَانِي غَادِي نْطْلَعْ لْعَنْدْ بَّا وْبَّاكُمْ، وْإِلَاهِي وْإِلَاهْكُمْ».

¹⁸وْرْجْعَاتْ مَرْيَمْ الْمَجْدَلِيَّة وْخَبّْرَاتْ التّْلَامْدْ وْݣَالْتْ لِيهُمْ: «رَانِي شْفْتْ الرَّبّْ»، وْعَاوْدَاتْ لِيهُمْ دَاكْشِّي اللِّي ݣَالْ لِيهَا يَسُوعْ.

¹⁹وْفْالْعْشِيَّة دْيَالْ نْهَارْ الْحَدّْ، اللِّي هُوَ النّْهَارْ اللّْوّْلْ فْالسِّيمَانَة، كَانُو التّْلَامْدْ مْجْمُوعِينْ فْوَاحْدْ الْبْلَاصَة وْسَادِّينْ الْبِيبَانْ، عْلَاحْقَّاشْ كَانُو خَايْفِينْ مْنْ لِيهُودْ. وْهُوَ يْجِي يَسُوعْ وْوْقَفْ وَسْطْهُمْ وْݣَالْ: «السّْلَامْ عْلِيكُمْ!».

²⁰وْمْلِّي ݣَالْ لِيهُمْ هَادْشِّي وْرَّاهُمْ يْدِّيهْ وْجَنْبُه، وْفْرْحُو التّْلَامْدْ مْلِّي شَافُو الرَّبّْ.

²¹وْهُوَ يْݣُولْ لِيهُمْ يَسُوعْ عَاوْتَانِي: «السّْلَامْ عْلِيكُمْ! كِمَا صِيفْطْنِي الْآبْ غَادِي نْصِيفْطْكُمْ حْتَّى أَنَا».

²²وْمْلِّي ݣَالْ هَادْشِّي، نْفَخْ فِيهُمْ وْݣَالْ لِيهُمْ: «قْبْلُو الرُّوحْ الْقُدُسْ،

²³اللِّي غْفَرْتُو لِيهْ دْنُوبُه غَتّْغْفَرْ لِيهْ، وْاللِّي مَا غْفَرْتُوشْ لِيهْ دْنُوبُه مَا غَتّْغْفَرْشْ لِيهْ».

²⁴وَلَكِنْ تُومَا، وَاحْدْ مْنْ التّْلَامْدْ الطّْنَاشْ، اللِّي كَيْسَمِّيوْهْ التّْوِيمِي، مَا كَانْشْ مْعَاهُمْ مْلِّي جَا يَسُوعْ.

²⁵وْهُمَ يْݣُولُو لِيهْ التّْلَامْدْ لْخْرِينْ: «رَاهْ شْفْنَا الرَّبّْ!». وْجَاوْبْهُمْ: «إِلَا مَا شْفْتْشْ فْيْدِّيهْ الْأَتَرْ دْيَالْ الْمْسَامْرْ، وْحَطِّيتْ صْبْعِي فْالْأَتَرْ، وْحَطِّيتْ يْدِّي فْجَنْبُه، رَاهْ مَا غَنْآمْنْشْ».

²⁶وْمْنْ بَعْدْ تْمَنْ يَّامْ، كَانُو تْلَامْدْ يَسُوعْ مْجْمُوعِينْ مَرَّة خْرَى وْمْعَاهُمْ تُومَا، وْكَانُو الْبِيبَانْ مْسْدُودِينْ. وْهُوَ يْجِي يَسُوعْ وْوْقَفْ فْالْوَسْطْ، وْݣَالْ لِيهُمْ: «السّْلَامْ عْلِيكُمْ!».

²⁷وْمْنْ بَعْدْ ݣَالْ لْتُومَا: «أَرَا صْبْعْكْ لّْهْنَا وْشُوفْ يْدِّيَّ، وْأَرَا يْدّْكْ حَطّْهَا عْلَى جَنْبِي، وْمَا تْشَكّْشْ وَلَكِنْ كُونْ مُومْنْ».

²⁸وْجَاوْبُه تُومَا وْݣَالْ لِيهْ: «رْبِّي وْإِلَاهِي!».

²⁹وْهُوَ يْݣُولْ لِيهْ يَسُوعْ: «عْلَاحْقَّاشْ شْفْتِينِي آمْنْتِي، وَلَكِنْ سْعْدَاتْ هَادُوكْ اللِّي آمْنُو بْلَا مَا يْشُوفُو».

³⁰وْدَارْ يَسُوعْ بْزَّافْ دْيَالْ الْعَلَامَاتْ خْرِينْ قُدَّامْ تْلَامْدُه مَا تّْكَتْبُوشْ فْهَادْ الْكْتَابْ.

³¹أَمَّا هَادْ الْكْلَامْ رَاهْ تّْكْتَبْ بَاشْ تْآمْنُو بْلِّي يَسُوعْ هُوَ الْمَسِيحْ وَلْدْ اللَّهْ، وْبَاشْ إِلَا آمْنْتُو تْكُونْ عَنْدْكُمْ حَيَاةْ فْالْإِسْمْ دْيَالُه.