Read Moroccan Standard Translation يُوحَنَّا 3 Bible Online

يُوحَنَّا 3 - Moroccan Standard Translation bible

يُوحَنَّا 3

¹الْفَصْلْ التَّالْتْ كَانْ وَاحْدْ الرَّاجْلْ مْنْ الْفْرِّيسِيِّينْ مْنْ كْبَارْ لِيهُودْ سْمِيتُه نِيقُودِيمُوسْ.

²جَا لْعَنْدْ يَسُوعْ فْاللِّيلْ وْݣَالْ لِيهْ: «آ الْمُعَلِّمْ، حْنَا كَنْعَرْفُو بْلِّي نْتَ مُعَلِّمْ جِيتِي مْنْ عَنْدْ اللَّهْ، عْلَاحْقَّاشْ حْتَّى وَاحْدْ مَا يْقْدَرْ يْدِيرْ هَادْ الْعَلَامَاتْ اللِّي كَتْدِيرْ إِلَا مَا كَانْشْ اللَّهْ مْعَاهْ».

³وْجَاوْبُه يَسُوعْ وْݣَالْ لِيهْ: «نْݣُولْ لِيكْ الْحَقّْ: رَاهْ اللِّي مَا تّْوْلَدْشْ مْنْ جْدِيدْ، مَا يْقْدَرْشْ يْشُوفْ مَمْلَكَةْ اللَّهْ».

⁴وْسْوّْلْ نِيقُودِيمُوسْ يَسُوعْ: «كِيفَاشْ يْقْدَرْ بْنَادْمْ يْتّْوْلَدْ وْهُوَ كْبِيرْ فْالْعْمَرْ؟ وَاشْ يْقْدَرْ يْرْجَعْ لْكَرْشْ مُّه مَرَّة خْرَى وْيْعَاوْدْ يْتّْوْلَدْ؟».

⁵وْجَاوْبُه يَسُوعْ: «نْݣُولْ لِيكْ الْحَقّْ: اللِّي مَا تّْوْلَدْشْ مْنْ الْمَا وْالرُّوحْ، مَا يْقْدَرْشْ يْدْخَلْ لْمَمْلَكَةْ اللَّهْ.

⁶رَاهْ اللِّي تّْوْلَدْ مْنْ الدَّاتْ هُوَ دَاتْ، وْاللِّي تّْوْلَدْ مْنْ الرُّوحْ هُوَ رُوحْ.

⁷مَا تّْعَجّْبْشْ إِلَا كْنْتْ ݣْلْتْ لِيكْ بْلِّي خَاصّْكُمْ تّْوَلْدُو مْنْ جْدِيدْ.

⁸الرِّيحْ كَتْسُوطْ فِينْ مَا بْغَاتْ، وْكَتْسْمَعْ الصُّوتْ دْيَالْهَا وَلَكِنْ مَا كَتْعْرَفْشْ لَا مْنِينْ كَتْجِي وْلَا فِينْ كَتْمْشِي: هَكَّا كُلّْ وَاحْدْ تّْوْلَدْ مْنْ الرُّوحْ».

⁹وْعَاوْدْ سْوّْلُه نِيقُودِيمُوسْ: «كِيفَاشْ يْمْكَنْ يْوْقَعْ هَادْشِّي؟».

¹⁰وْجَاوْبْ يَسُوعْ وْݣَالْ لِيهْ: «نْتَ مُعَلِّمْ فْإِسْرَائِيلْ وْمَا عْرَفْتِيشْ هَادْشِّي؟

¹¹نْݣُولْ لِيكْ الْحَقّْ: رَاهْ حْنَا كَنْتّْكَلّْمُو بْدَاكْشِّي اللِّي كَنْعَرْفُو، وْكَنْشَهْدُو بْدَاكْشِّي اللِّي شْفْنَا، وَلَكِنْ مَا كَتْقَبْلُوشْ الشّْهَادَة دْيَالْنَا.

¹²إِلَا كْنْتْ تّْكَلّْمْتْ لِيكُمْ عْلَى الْأُمُورْ دْيَالْ الْأَرْضْ وْمَا آمْنْتُوشْ، كِيفَاشْ غَتْآمْنُو إِلَا تّْكَلّْمْتْ لِيكُمْ عْلَى الْأُمُورْ دْيَالْ السّْمَا؟

¹³رَاهْ عَمّْرْ شِي حَدّْ مَا طْلَعْ لْلسّْمَا غِيرْ هَادَاكْ اللِّي نْزَلْ مْنّْهَا اللِّي هُوَ وَلْدْ الْإِنْسَانْ.

¹⁴وْكِمَا رْفَعْ مُوسَى اللّْفْعَى فْالصَّحْرَا، هَكَّا خَاصّْ وَلْدْ الْإِنْسَانْ يْتّْرْفَعْ،

¹⁵بَاشْ كُلّْ مْنْ كَيْآمْنْ بِيهْ تْكُونْ عَنْدُه الْحَيَاةْ الدَّايْمَة.

¹⁶حِيتْ هَكَّا بْغَا اللَّهْ نَاسْ الدّْنْيَا حْتَّى وْهَبْ وَلْدُه الْوْحِيدْ، بَاشْ مَا يْتّْهْلَكْشْ كُلّْ مْنْ كَيْآمْنْ بِيهْ وَلَكِنْ تْكُونْ عَنْدُه الْحَيَاةْ الدَّايْمَة.

¹⁷حِيتْ اللَّهْ مَا صِيفْطْشْ وَلْدُه لْلدّْنْيَا بَاشْ يْحْكَمْ عْلَى نَاسْهَا، وَلَكِنْ بَاشْ يْنْجَاوْ بِيهْ.

¹⁸اللِّي كَيْآمْنْ بْوَلْدْ اللَّهْ مَا كَيْتّْحْكَمْشْ عْلِيهْ، وْاللِّي مَا كَيْآمْنْشْ رَاهْ تّْحْكَمْ عْلِيهْ حِيتْ مَا آمْنْشْ بْإِسْمْ وَلْدْ اللَّهْ الْوْحِيدْ.

¹⁹وْهَادَا هُوَ الْحُكْمْ: النُّورْ جَا لْلدّْنْيَا، وَلَكِنْ النَّاسْ بْغَاوْ الضّْلَامْ كْتَرْ مْنْ النُّورْ، حِيتْ فْعَايْلْهُمْ مَا مْزْيَانَاشْ.

²⁰حِيتْ ݣَاعْ اللِّي كَيْدِيرْ الشَّرّْ، كَيْكْرَهْ النُّورْ، وْمَا كَيْجِيشْ لْلنُّورْ بَاشْ مَا يْتّْفْضْحُوشْ فْعَايْلُه.

²¹وَلَكِنْ اللِّي كَيْمْشِي فْطْرِيقْ الْحَقّْ كَيْجِي لْلنُّورْ، بَاشْ يْبَانْ بْلِّي بْأَعْمَالُه كَيْطِيعْ اللَّهْ».

²²وْمْنْ بَعْدْ هَادْشِّي، جَا يَسُوعْ وْتْلَامْدُه لْبْلَادْ الْيَهُودِيَّة، وْبْقَى مْعَاهُمْ تْمَّ شِي يَّامَاتْ، وْكَانْ كَيْعَمّْدْ.

²³وْكَانْ يُوحَنَّا حْتَّى هُوَ كَيْعَمّْدْ النَّاسْ فْعِينْ نُونْ حْدَا مْدِينْةْ سَالِيمْ، عْلَاحْقَّاشْ كَانْ تْمَّ بْزَّافْ دْ الْمَا وْالنَّاسْ كَانُو كَيْجِيوْ وْكَيْتّْعَمّْدُو.

²⁴حِيتْ يُوحَنَّا كَانْ مَازَالْ مَا تّْشَدّْشْ فْالْحَبْسْ.

²⁵وْوْقَعْ وَاحْدْ النِّقَاشْ بِينْ تْلَامْدْ يُوحَنَّا وْوَاحْدْ لِيهُودِي عْلَى كِيفَاشْ كَيْكُونْ التَّطْهِيرْ.

²⁶وْهُمَ يْجِيوْ لْعَنْدْ يُوحَنَّا وْݣَالُو لِيهْ: «آ الْمُعَلِّمْ، هَادَاكْ اللِّي كَانْ مْعَاكْ فْالجِّهَة لْخْرَى دْيَالْ وَادْ الْأُرْدُنْ، اللِّي شْهَدْتِي لِيهْ، هَا هُوَ كَيْعَمّْدْ، وْݣَاعْ النَّاسْ كَيْجِيوْ لْعَنْدُه».

²⁷وْجَاوْبْهُمْ يُوحَنَّا وْݣَالْ: «مَا يْقْدَرْشْ بْنَادْمْ يَاخُدْ شِي حَاجَة مْنْ غِيرْ إِلَا عْطَاهَا لِيهْ اللَّهْ.

²⁸نْتُمَ بْرَاسْكُمْ كَتْشَهْدُو بْلِّي ݣْلْتْ أَنَا مَاشِي هُوَ الْمَسِيحْ، وَلَكِنْ اللَّهْ صِيفْطْنِي قْبَلْ مْنُّه بَاشْ نْوَجّْدْ لِيهْ الطّْرِيقْ.

²⁹اللِّي عَنْدُه الْعْرُوسَة، رَاهْ هُوَ الْعْرِيسْ. وَلَكِنْ صَاحْبْ الْعْرِيسْ اللِّي وَاقْفْ وْكَيْسْمَعْ لِيهْ، كَيْفْرَحْ بْزَّافْ مْلِّي كَيْسْمَعْ صُوتْ الْعْرِيسْ. وْهَكَّا حْتَّى أَنَا الْفَرْحَة دْيَالِي كْمْلَاتْ.

³⁰لَابْدّْ يْزِيدْ هُوَ، وْأَنَا نّْقَصْ.

³¹هَادَاكْ اللِّي جَايْ مْنْ الْفُوقْ هُوَ فُوقْ كُلّْشِي، وْهَادَاكْ اللِّي مْنْ الْأَرْضْ هُوَ مْنْ سُكَّانْ الْأَرْضْ وْبْكْلَامْ سُكَّانْهَا كَيْتّْكَلّْمْ. وْهَادَاكْ اللِّي جَايْ مْنْ السّْمَا هُوَ فُوقْ كُلّْشِي،

³²وْكَيْشْهَدْ بْدَاكْشِّي اللِّي شَافْ وْسْمَعْ، وَلَكِنْ حْتَّى حَدّْ مَا كَيْقْبَلْ الشّْهَادَة دْيَالُه.

³³وْاللِّي قْبَلْ الشّْهَادَة دْيَالُه، كَيْشْهَدْ بْلِّي اللَّهْ صَادْقْ.

³⁴حِيتْ اللِّي صِيفْطُه اللَّهْ كَيْتّْكَلّْمْ بْكْلَامْ اللَّهْ، عْلَاحْقَّاشْ اللَّهْ كَيْعْطِي الرُّوحْ دْيَالُه بْلَا قْيَاسْ.

³⁵رَاهْ الْآبْ كَيْبْغِي وَلْدُه، وْدَارْ كُلّْشِي فْيْدُّه.

³⁶اللِّي كَيْآمْنْ بْوَلْدُه عَنْدُه الْحَيَاةْ الدَّايْمَة، وْاللِّي مَا كَيْطِيعْشْ وَلْدُه، مَا غَادِيشْ يْشُوفْ الْحَيَاةْ وَلَكِنْ غَادِي يْبْقَى عْلِيهْ غَضَبْ اللَّهْ».