Read Moroccan Standard Translation يُوحَنَّا 4 Bible Online

يُوحَنَّا 4 - Moroccan Standard Translation bible

يُوحَنَّا 4

¹الْفَصْلْ الرَّابْعْ وْمْلِّي عْرَفْ الرَّبّْ يَسُوعْ بْلِّي الْفْرِّيسِيِّينْ سْمْعُو بْلِّي التّْلَامْدْ كَيْجِيوْ لْعَنْدُه وْكَيْعَمّْدْهُمْ كْتَرْ مْنْ يُوحَنَّا،

²وَاخَّا مَاشِي يَسُوعْ بْرَاسُه هُوَ اللِّي كَانْ كَيْعَمّْدْ وَلَكِنْ التّْلَامْدْ دْيَالُه،

³خْلَّا بْلَادْ الْيَهُودِيَّة وْرْجَعْ تَانِي لْلْجَلِيلْ.

⁴وْكَانْ خَاصُّه يْدُوزْ مْنْ السَّامِرَة.

⁵وْهُوَ يْوْصَلْ لْوَاحْدْ الْمْدِينَة فْالسَّامِرَة سْمِيتْهَا سُوخَارْ، قْرِيبَة لْلْفْدَّانْ اللِّي كَانْ عْطَاهْ يَعْقُوبْ لْوَلْدُه يُوسْفْ.

⁶وْكَانْ تْمَّ الْبِيرْ دْيَالْ يَعْقُوبْ. وْحِيتْ كَانْ يَسُوعْ عْيَّانْ بْالسّْفَرْ، ݣْلَسْ فْجَنْبْ الْبِيرْ، وْكَانْتْ السَّاعَة جْوَايْهْ الطّْنَاشْ.

⁷وْجَاتْ وَاحْدْ الْمْرَاة مْنْ السَّامِرَة بَاشْ تْسْݣِي الْمَا، وْݣَالْ لِيهَا يَسُوعْ: «عْطِينِي نْشْرَبْ».

⁸وْكَانُو تْلَامْدُه مْشَاوْ لْلْمْدِينَة بَاشْ يْشْرِيوْ الْمَاكْلَة.

⁹وْهِيَ تْݣُولْ لِيهْ الْمْرَاة السَّامِرِيَّة: «نْتَ يْهُودِي وْأَنَا سَامِرِيَّة، إِيوَا كِيفَاشْ كَتْطْلَبْ مْنِّي نْعْطِيكْ تْشْرَبْ؟». حِيتْ لِيهُودْ مَا كَيْتّْعَامْلُوشْ مْعَ السَّامِرِيِّينْ.

¹⁰وْجَاوْبْهَا يَسُوعْ وْݣَالْ لِيهَا: «كُونْ عْرَفْتِي آشْ كَيْعْطِي اللَّهْ، وْشْكُونْ هُوَ اللِّي كَيْݣُولْ لِيكْ عْطِينِي نْشْرَبْ، كُونْ رَاكِ نْتِ اللِّي طْلَبْتِي مْنُّه وْعْطَاكْ الْمَا دْيَالْ الْحَيَاةْ».

¹¹وْݣَالْتْ لِيهْ الْمْرَاة: «آ سِيدِي، نْتَ مَا عَنْدْكْ دْلُو، وْالْبِيرْ غَارْقْ، إِيوَا مْنِينْ جَاكْ الْمَا دْيَالْ الْحَيَاةْ؟

¹²وَاشْ نْتَ حْسَنْ مْنْ جْدّْنَا يَعْقُوبْ اللِّي عْطَانَا الْبِيرْ، وْهُوَ بْرَاسُه شْرَبْ مْنُّه وْشْرْبُو مْنُّه وْلَادُه وْالْبْهَايْمْ دْيَالُه؟».

¹³وْجَاوْبْهَا يَسُوعْ وْݣَالْ لِيهَا: «ݣَاعْ اللِّي كَيْشْرَبْ مْنْ هَادْ الْمَا، غَادِي يْعَاوْدْ يْعْطَشْ.

¹⁴وَلَكِنْ اللِّي غَيْشْرَبْ مْنْ الْمَا اللِّي غَنْعْطِيهْ لِيهْ أَنَا، رَاهْ عَمّْرُه مَا غَادِي يْعْطَشْ، وْالْمَا اللِّي غَنْعْطِيهْ لِيهْ غَادِي يْوَلِّي فِيهْ عِينْ كَتْفِيضْ بْالْمَا دْ الْحَيَاةْ الدَّايْمَة».

¹⁵وْݣَالْتْ لِيهْ الْمْرَاة: «آ سِيدِي، عْطِينِي هَادْ الْمَا بَاشْ مَا نْعَاوْدْشْ نْعْطَشْ وْلَا نْجِي لّْهْنَا بَاشْ نْسْݣِي!».

¹⁶وْݣَالْ لِيهَا يَسُوعْ: «سِيرِي وْعَيّْطِي عْلَى رَاجْلْكْ وْرْجْعِي لّْهْنَا».

¹⁷وْجَاوْبَاتْ الْمْرَاة وْݣَالْتْ لِيهْ: «مَا عَنْدِي رَاجْلْ». وْرَدّْ عْلِيهَا يَسُوعْ: «عَنْدْكْ الْحَقّْ مْلِّي ݣْلْتِي مَا عَنْدِي رَاجْلْ،

¹⁸عْلَاحْقَّاشْ كَانُو عَنْدْكْ خَمْسَة دْ الرّْجَالْ، وْالرَّاجْلْ اللِّي كَيْعِيشْ مْعَاكْ دَابَا مَاشِي رَاجْلْكْ، هَادْشِّي اللِّي ݣْلْتِي رَاهْ صْحِيحْ».

¹⁹وْهِيَ تْݣُولْ لِيهْ الْمْرَاة: «كَيْبَانْ لِيَّ آ سِيدِي بْلِّي نْتَ نْبِي!

²⁰جْدُودْنَا عْبْدُو اللَّهْ فْهَادْ الجّْبَلْ، وْنْتُمَ كَتْݣُولُو بْلِّي أُورْشَلِيمْ هِيَ الْمُوضْعْ اللِّي خَاصّْ يْتّْعْبَدْ فِيهْ اللَّهْ».

²¹وْݣَالْ لِيهَا يَسُوعْ: «تِيّْقِينِي آ الْمْرَاة، رَاهْ غَادِي يْجِي وَاحْدْ الْوَقْتْ اللِّي فِيهْ مَا غَادِيشْ تْعَبْدُو الْآبْ لَا فْهَادْ الجّْبَلْ وَلَا فْأُورْشَلِيمْ.

²²نْتُمَ كَتْعَبْدُو اللِّي مَا كَتْعَرْفُوهْشْ، أَمَّا حْنَا رَاهْ كَنْعَبْدُو اللِّي كَنْعَرْفُوهْ، حِيتْ النّْجَا غَيْجِي مْنْ لِيهُودْ.

²³وْغَيْجِي وَاحْدْ الْوَقْتْ، وْرَاهْ جَا دَابَا، فِينْ اللِّي كَيْعَبْدُو عْلَى حَقّْ غَيْعَبْدُو الْآبْ بْالرُّوحْ وْالْحَقّْ، عْلَاحْقَّاشْ الْآبْ كَيْقَلّْبْ عْلَى بْحَالْ هَادُو اللِّي كَيْعَبْدُوهْ.

²⁴اللَّهْ رُوحْ، وْاللِّي كَيْعَبْدُوهْ خَاصّْهُمْ يْعَبْدُوهْ بْالرُّوحْ وْالْحَقّْ».

²⁵وْݣَالْتْ لِيهْ الْمْرَاة: «أَنَا كَنْعْرَفْ بْلِّي الْمَسِيَّا -اللِّي هُوَ الْمَسِيحْ- غَادِي يْجِي. وْمْلِّي غَادِي يْجِي غَيْفَسّْرْ لِينَا كُلّْشِي».

²⁶وْݣَالْ لِيهَا يَسُوعْ: «رَاهْ هُوَ أَنَا اللِّي كَنْتّْكَلّْمْ مْعَاكْ».

²⁷وْدِيكْ السَّاعَة رْجْعُو تْلَامْدُه، وْتّْعَجّْبُو مْلِّي لْقَاوْهْ كَيْهْضَرْ مْعَ مْرَاة. وَلَكِنْ حْتَّى وَاحْدْ مَا سْوّْلُه: «أَشْنُو بْغِيتِي؟»، وْلَا «عْلَاشْ كَتْهْضَرْ مْعَاهَا؟».

²⁸وْخْلَّاتْ الْمْرَاة الْݣْلَّة دْيَالْهَا وْمْشَاتْ لْلْمْدِينَة، وْݣَالْتْ لْلنَّاسْ:

²⁹«أَجِيوْ تْشُوفُو وَاحْدْ الرَّاجْلْ ݣَالْ لِيَّ ݣَاعْ دَاكْشِّي اللِّي دْرْتْ. وَاشْ يْمْكَنْ يْكُونْ هَادَا هُوَ الْمَسِيحْ؟».

³⁰وْخَرْجُو النَّاسْ مْنْ الْمْدِينَة وْجَاوْ لْعَنْدْ يَسُوعْ.

³¹وْفْنَفْسْ الْوَقْتْ، كَانُو التّْلَامْدْ كَيْطْلْبُو يَسُوعْ وْكَيْݣُولُو لِيهْ: «آ الْمُعَلِّمْ، كُولْ!».

³²وَلَكِنْ هُوَ رَدّْ عْلِيهُمْ: «عَنْدِي مَاكْلَة كَنَاكُلْهَا مَا كَتْعَرْفُوهَاشْ نْتُمَ».

³³وْبْدَاوْ التّْلَامْدْ كَيْݣُولُو لْبَعْضِيَّاتْهُمْ: «وَاشْ جَابْ لِيهْ شِي وَاحْدْ مَا يَاكُلْ؟».

³⁴وْݣَالْ لِيهُمْ يَسُوعْ: «مَاكْلْتِي هِيَ نْدِيرْ مُرَادْ هَادَاكْ اللِّي صِيفْطْنِي، وْنْكَمّْلْ الْخْدْمَة دْيَالْتُه.

³⁵يَاكْ كَتْݣُولُو: مْنْ دَابَا رْبَعْ شْهُورْ غَيْجِي الْحْصَادْ! إِيوَا رَانِي نْݣُولْ لِيكُمْ: هْزُّو عِينِيكُمْ وْشُوفُو الزّْرَعْ فْالْفْدَادْنْ كِيفْ وْلَّى طَايْبْ وْمُوجُودْ لْلْحْصَادْ.

³⁶وْالْحْصَّادْ كَيَاخُدْ الْأُجْرَة وْكَيْجْمَعْ الْغْلَّة لْلْحَيَاةْ الدَّايْمَة، بَاشْ يْفْرَحْ هَادَاكْ اللِّي كَيْزْرَعْ وْهَادَاكْ اللِّي كَيْحْصَدْ.

³⁷وْمَا كْدَبْشْ هَادَاكْ اللِّي ݣَالْ: وَاحْدْ كَيْزْرَعْ وْلَاخُرْ كَيْحْصَدْ.

³⁸رَانِي صِيفْطْتْكُمْ بَاشْ تْحَصْدُو دَاكْشِّي اللِّي مَا ضْرَبْتُوشْ عْلِيهْ تَمَارَة، نَاسْ خْرِينْ ضْرْبُو تَمَارَة وْنْتُمَ كَتْجْنِيوْ الْغْلَّة دْ تَمَارَة دْيَالْهُمْ».

³⁹وْآمْنُو بْيَسُوعْ فْدِيكْ الْمْدِينَة بْزَّافْ دْيَالْ السَّامِرِيِّينْ بْسْبَابْ كْلَامْ الْمْرَاة اللِّي كَانْتْ كَتْشْهَدْ وْكَتْݣُولْ: «ݣَالْ لِيَّ ݣَاعْ دَاكْشِّي اللِّي دْرْتْ».

⁴⁰وْمْلِّي جَاوْ لْعَنْدُه السَّامِرِيِّينْ، طْلْبُو مْنُّه بَاشْ يْبْقَى مْعَاهُمْ، وْبْقَى تْمَّ يُومَيْنْ.

⁴¹وْزَادُو آمْنُو بِيهْ بْزَّافْ دْ النَّاسْ بْسْبَابْ كْلَامُه.

⁴²وْݣَالُو لْلْمْرَاة: «رَاهْ حْنَا مَاشِي غِيرْ بْسْبَابْ كْلَامْكْ كَنْآمْنُو، وَلَكِنْ كَنْآمْنُو حِيتْ حْنَا نِيتْ سْمَعْنَاهْ وْعْرَفْنَا بْلِّي بْالصَّحْ هَادَا هُوَ الْمُنَجِّي دْيَالْ نَاسْ الدّْنْيَا».

⁴³وْمْنْ بَعْدْمَا دَازْتْ يُومَيْنْ، خْرَجْ يَسُوعْ مْنْ تْمَّ وْرْجَعْ لْلْجَلِيلْ.

⁴⁴حِيتْ يَسُوعْ بْرَاسُه شْهَدْ بْلِّي مَا كَايْنْشْ شِي نْبِي كَيْتّْحْتَرْمْ فْبْلَادُه.

⁴⁵وْمْلِّي وْصَلْ لْلْجَلِيلْ، رَحّْبُو بِيهْ الْجَلِيلِيِّينْ عْلَاحْقَّاشْ مْشَاوْ لْأُورْشَلِيمْ فْيَّامَاتْ عِيدْ الْفِصْحْ، وْشَافُو ݣَاعْ دَاكْشِّي اللِّي دَارْ يَسُوعْ تْمَّ فْيَّامَاتْ الْعِيدْ.

⁴⁶وْمْنْ بَعْدْ، رْجَعْ يَسُوعْ لْقَانَا اللِّي فْالْجَلِيلْ، فِينْ رَدّْ الْمَا خْمَرْ. وْكَانْ فْكَفْرْنَاحُومْ وَاحْدْ الْخْدَّامْ دْيَالْ الْمَلِكْ وَلْدُه مْرِيضْ.

⁴⁷وْمْلِّي سْمَعْ هَادْ الرَّاجْلْ بْلِّي يَسُوعْ جَا مْنْ بْلَادْ الْيَهُودِيَّة لْلْجَلِيلْ، مْشَى لْعَنْدُه وْطَلْبُه يْمْشِي مْعَاهْ بَاشْ يْشَافِي لِيهْ وَلْدُه اللِّي كَانْ قْرِيبْ يْمُوتْ.

⁴⁸وْݣَالْ لِيهْ يَسُوعْ: «مَا كَتْآمْنُو غِيرْ إِلَا شْفْتُو الْعَلَامَاتْ وْالْعْجَايْبْ».

⁴⁹وْݣَالْ لِيهْ الْخْدَّامْ دْيَالْ الْمَلِكْ: «آ سِيدِي، أَجِي مْعَايَ قْبَلْ مَا يْمُوتْ وْلْدِي».

⁵⁰وْرَدّْ عْلِيهْ يَسُوعْ وْݣَالْ: «سِيرْ، رَاهْ وَلْدْكْ حَيّْ!». وْآمْنْ الرَّاجْلْ بْالْكْلَامْ اللِّي ݣَالْ لِيهْ يَسُوعْ، وْمْشَى.

⁵¹وْمْلِّي كَانْ الرَّاجْلْ غَادِي فْطْرِيقُه لْلدَّارْ، تّْلْقَّاوْ لِيهْ الْعْبِيدْ دْيَالُه وْݣَالُو لِيهْ بْلِّي وَلْدُه حَيّْ.

⁵²وْهُوَ يْسْوّْلْهُمْ فَاشْ مْنْ وَقْتْ بْرَا وَلْدُه. وْجَاوْبُوهْ: «الْبَارْحْ مْعَ الْوَحْدَة دْيَالْ النّْهَارْ تّْحَيّْدَاتْ مْنُّه السّْخَانَة».

⁵³وْعْرَفْ الْبُو بْلِّي هَادِيكْ هِيَ السَّاعَة اللِّي ݣَالْ لِيهْ فِيهَا يَسُوعْ: «رَاهْ وَلْدْكْ حَيّْ». وْآمْنْ هُوَ وْعَائِلْتُه كُلّْهَا.

⁵⁴وْكَانْتْ هَادِي هِيَ الْعَلَامَة التَّانْيَة اللِّي دَارْهَا يَسُوعْ مْلِّي رْجَعْ مْنْ بْلَادْ الْيَهُودِيَّة لْلْجَلِيلْ.