Read Moroccan Standard Translation يُوحَنَّا 5 Bible Online

يُوحَنَّا 5 - Moroccan Standard Translation bible

يُوحَنَّا 5

¹الْفَصْلْ الْخَامْسْ وْمْنْ بَعْدْ هَادْشِّي، فْالْوَقْتْ فَاشْ كَانْ وَاحْدْ الْعِيدْ دْيَالْ لِيهُودْ، طْلَعْ يَسُوعْ لْأُورْشَلِيمْ.

²وْكَانْ فْأُورْشَلِيمْ حْدَا بَابْ الْغْنَمْ، وَاحْدْ الشَّرِيجْ دْ الْمَا سْمِيتُه بْالْعِبْرِيَّة بَيْتْ حِسْدَا ضَايْرِينْ بِيهْ خَمْسَة دْ الْقَاعَاتْ.

³وْكَانُو نَاعْسِينْ فْهَادْ الْقَاعَاتْ بْزَّافْ دْ النَّاسْ مْرَاضْ، فِيهُمْ الْعَمْيِينْ وْالْعَرْجِينْ وْالزّْحَافَا، [كَيْتّْسْنَّاوْ الْمَا دْيَالْ الشَّرِيجْ يْتْحَرّْكْ،

⁴عْلَاحْقَّاشْ كَانْ وَاحْدْ الْمَلَاكْ كَيْنْزَلْ بَعْضْ الْمَرَّاتْ لْلشَّرِيجْ وْكَيْحَرّْكْ الْمَا، وْالْمْرِيضْ اللِّي نْزَلْ هُوَ اللّْوّْلْ مْنْ بَعْدْ التّْحْرَاكْ دْيَالْ الْمَا كَانْ كَيْتّْشَافَى كِيفْمَا كَانْ الْمَرْضْ اللِّي فِيهْ][١].

⁵وْكَانْ تْمَّ وَاحْدْ الرَّاجْلْ فِيهْ وَاحْدْ الْمَرْضْ مُدَّةْ تْمَنْيَة وْتْلَاتِينْ عَامْ.

⁶وْشَافُه يَسُوعْ مْتَكِّي، وْعْرَفْ بْلِّي رَاهْ هَادِي مُدَّة طْوِيلَة بَاشْ مْرِيضْ، وْهُوَ يْسْوّْلُه: «وَاشْ بْغِيتِي تْبْرَا؟»،

⁷وْجَاوْبُه الْمْرِيضْ: «مَا عَنْدِيشْ آ سِيدِي، شِي وَاحْدْ هْنَا اللِّي يْنَزّْلْنِي لْلشَّرِيجْ فْالْوَقْتْ فَاشْ كَيْتّْحَرّْكْ الْمَا، وْمْلِّي كَنْبْغِي نْدْخُلْ لِيهْ، كَيْنْزَلْ وَاحْدْ آخُرْ قْبَلْ مْنِّي».

⁸وْهُوَ يْݣُولْ لِيهْ يَسُوعْ: «نُوضْ هْزّْ فْرَاشْكْ وْسِيرْ».

⁹وْدِيكْ السَّاعَة تّْشَافَى الرَّاجْلْ، وْهْزّْ فْرَاشُه وْمْشَى. وْهَادْشِّي وْقَعْ نْهَارْ السّْبْتْ.

¹⁰وْݣَالُو لِيهُودْ لْهَادَاكْ اللِّي تّْشَافَى: «رَاهْ الْيُومْ السّْبْتْ! حْرَامْ تْهَزّْ فْرَاشْكْ».

¹¹وْرَدّْ عْلِيهُمْ وْݣَالْ: «هَادَاكْ اللِّي شْفَانِي هُوَ اللِّي ݣَالْ لِيَّ هْزّْ فْرَاشْكْ وْسِيرْ».

¹²وْسْوّْلُوهْ: «شْكُونْ هَادَا اللِّي ݣَالْ لِيكْ هْزّْ فْرَاشْكْ وْسِيرْ؟».

¹³وَلَكِنْ الرَّاجْلْ اللِّي تّْشَافَى مَا كَانْشْ عَارْفْ شْكُونْ هُوَ، حِيتْ يَسُوعْ بَعّْدْ عْلَى الْمُوضْعْ اللِّي كَانْتْ فِيهْ الجّْمَاعَة دْ النَّاسْ.

¹⁴وْمْنْ بَعْدْ هَادْشِّي لْقَاهْ يَسُوعْ فْبِيتْ اللَّهْ وْݣَالْ لِيهْ: «هَا نْتَ دَابَا تّْشَافِيتِي، إِيوَا مَا تْبْقَاشْ تْدِيرْ الدّْنُوبْ، بَاشْ مَا تْطْرَا لِيكْ حْتَّى حَاجَة كْفَسْ مْنْ دَاكْشِّي اللِّي كَانْ فِيكْ».

¹⁵وْمْنْ بَعْدْ مْشَى الرَّاجْلْ وْخَبّْرْ لِيهُودْ بْلِّي يَسُوعْ هُوَ اللِّي شْفَاهْ.

¹⁶وْعْلَى هَادْشِّي كَانُو لِيهُودْ كَيْقَلّْبُو كِيفَاشْ يْقْتْلُو يَسُوعْ، حِيتْ كَانْ كَيْدِيرْ هَادْشِّي نْهَارْ السّْبْتْ.

¹⁷وْرَدّْ عْلِيهُمْ يَسُوعْ وْݣَالْ: «بَّا كَيْخْدَمْ حْتَّى لْدَابَا، وْحْتَّى أَنَا كَنْخْدَمْ».

¹⁸وْبْسْبَابْ هَادْشِّي بْدَاوْ لِيهُودْ كَيْقَلّْبُو كْتَرْ كِيفَاشْ يْقْتْلُوهْ، مَاشِي غِيرْ حِيتْ مَا دَارْشْ بْالْقَانُونْ دْيَالْ السّْبْتْ، وَلَكِنْ حِيتْ ݣَالْ بْلِّي اللَّهْ بَّاهْ، وْهَكَّا حْسَبْ رَاسُه بْحَالْ اللَّهْ.

¹⁹وْجَاوْبْ يَسُوعْ لِيهُودْ وْݣَالْ لِيهُمْ: «نْݣُولْ لِيكُمْ الْحَقّْ: مَا يْقْدَرْشْ الْوَلْدْ يْدِيرْ شِي حَاجَة مْنْ رَاسُه، وَلَكِنْ مَا كَيْدِيرْ غِيرْ الْحْوَايْجْ اللِّي كَيْشُوفْ الْآبْ كَيْدِيرْهُمْ. عْلَاحْقَّاشْ كُلّْ حَاجَة كَيْدِيرْهَا الْآبْ، كَيْدِيرْهَا وَلْدُه حْتَّى هُوَ.

²⁰حِيتْ الْآبْ كَيْبْغِي وَلْدُه وْكَيْوَرِّيهْ كُلّْ مَا كَيْدِيرْ، وْغَيْوَرِّيهْ خْدْمَة كْبَرْ مْنْ هَادِي، وْهَكَّا غَادِي تّْعَجّْبُو.

²¹كِمَا الْآبْ كَيْبْعَتْ الْمُوتَى وْكَيْحْيِيهُمْ، هَكَّا الْوَلْدْ حْتَّى هُوَ كَيْحْيِي اللِّي بْغَا.

²²الْآبْ رَاهْ مَا كَيْحْكَمْ حْتَّى عْلَى شِي وَاحْدْ، وَلَكِنْ عْطَى الْحْكَامْ كُلُّه لْلْوَلْدْ.

²³بَاشْ النَّاسْ يْعْطِيوْ الْعَزّْ لْلْوَلْدْ، كِمَا كَيْعْطِيوْ الْعَزّْ لْلْآبْ. وْاللِّي مَا كَيْعْطِيشْ الْعَزّْ لْلْوَلْدْ، رَاهْ مَا كَيْعْطِيشْ الْعَزّْ لْلْآبْ اللِّي صِيفْطُه.

²⁴وْنْݣُولْ لِيكُمْ الْحَقّْ: اللِّي كَيْسْمَعْ كْلَامِي وْكَيْآمْنْ بْهَادَاكْ اللِّي صِيفْطْنِي، رَاهْ عَنْدُه الْحَيَاةْ الدَّايْمَة وْمَا غَادِيشْ يْتّْحْكَمْ عْلِيهْ فْيُومْ الدِّينْ، وْغَادِي يْكُونْ دَازْ مْنْ الْمُوتْ لْلْحَيَاةْ.

²⁵وْنْݣُولْ لِيكُمْ الْحَقّْ: غَادِي تْجِي وَاحْدْ السَّاعَة، وْرَاهَا جَاتْ دَابَا، فَاشْ غَادِي يْسَمْعُو الْمُوتَى صُوتْ وَلْدْ اللَّهْ، وْݣَاعْ اللِّي غَيْسَمْعُوهْ غَيْحْيَاوْ.

²⁶وْكِمَا مْنْ الْآبْ كَتْجِي الْحَيَاةْ، رَاهْ عْطَى لْلْوَلْدْ حْتَّى هُوَ الْقُدْرَة بَاشْ تْجِي مْنُّه الْحَيَاةْ،

²⁷وْعْطَاهْ حْتَّى السُّلْطَة بَاشْ يْحْكَمْ عْلَاحْقَّاشْ هُوَ وَلْدْ الْإِنْسَانْ.

²⁸مَا تّْعَجّْبُوشْ مْنْ هَادْشِّي! رَاهْ غَيْجِي وَاحْدْ الْوَقْتْ اللِّي فِيهْ ݣَاعْ الْمُوتَى اللِّي فْالْقْبُورْ غَيْسَمْعُو الصُّوتْ دْيَالُه،

²⁹وْغَيْخَرْجُو مْنْ الْقْبُورْ. هَادُوكْ اللِّي دَارُو الْحَسَنَاتْ غَيْتّْبَعْتُو لْلْحَيَاةْ، وْهَادُوكْ اللِّي دَارُو السَّيِّئَاتْ غَيْتّْبَعْتُو بَاشْ يْتّْحَاكْمُو.

³⁰أَنَا مَا نْقْدَرْشْ نْدِيرْ شِي حَاجَة مْنْ رَاسِي، وَلَكِنْ كَنْحْكَمْ بْدَاكْشِّي اللِّي سْمَعْتْ وْبْالْحَقّْ كَنْحْكَمْ. عْلَاحْقَّاشْ مَا كَنْقَلّْبْشْ بَاشْ نْدِيرْ الْمُرَادْ دْيَالِي، وَلَكِنْ بَاشْ نْدِيرْ مُرَادْ هَادَاكْ اللِّي صِيفْطْنِي».

³¹«كُونْ كْنْتْ كَنْشْهَدْ لْرَاسِي، كُونْ رَاهْ شْهَادْتِي مَا صْحِيحَاشْ.

³²وَلَكِنْ كَايْنْ وَاحْدْ آخُرْ كَيْشْهَدْ لِيَّ، وْأَنَا كَنْعْرَفْ بْلِّي شْهَادْتُه صْحِيحَة.

³³رَاكُمْ صِيفْطْتُو الْمْرْسُولِينْ دْيَالْكُمْ لْيُوحَنَّا، وْشْهَدْ لِيَّ بْالْحَقّْ.

³⁴وْمَاشِي عْلَى الشّْهَادَة دْيَالْ شِي بْنَادْمْ كَنْعَوّْلْ، وَلَكِنْ كَنْݣُولْ هَادْ الْكْلَامْ بَاشْ نْتُمَ تْنْجَاوْ.

³⁵كَانْ يُوحَنَّا قْنْدِيلْ شَاعْلْ مْضَوِّي، وْنْتُمَ قْبَلْتُو تْفَرْحُو بْالنُّورْ دْيَالُه غِيرْ وَقْتْ قْلِيلْ.

³⁶وَلَكِنْ عَنْدِي شْهَادَة كْبَرْ مْنْ الشّْهَادَة دْيَالْ يُوحَنَّا: حِيتْ الْخْدْمَة اللِّي عْطَاهَا لِيَّ الْآبْ وْخَاصّْنِي نْكَمّْلْهَا، هِيَ بْرَاسْهَا كَتْشْهَدْ بْلِّي الْآبْ صِيفْطْنِي.

³⁷وْالْآبْ اللِّي صِيفْطْنِي هُوَ بْرَاسُه كَيْشْهَدْ لِيَّ. وْنْتُمَ عَمّْرْكُمْ مَا سْمَعْتُو صُوتُه وْلَا شْفْتُو وْجْهُه،

³⁸وْكْلَامُه مَا تَابْتْشْ فِيكُمْ، عْلَاحْقَّاشْ مَا كَتْآمْنُوشْ بْهَادَاكْ اللِّي صِيفْطُه.

³⁹نْتُمَ كَتْقَلّْبُو مْزْيَانْ كْتُبْ اللَّهْ، عْلَاحْقَّاشْ كَتْضَنُّو بْلِّي عَنْدْكُمْ فِيهُمْ الْحَيَاةْ الدَّايْمَة. وْرَاهْ هَادْ الْكْتُبْ هُمَ اللِّي كَيْشَهْدُو لِيَّ.

⁴⁰وْوَاخَّا دَاكْشِّي، مَا بْغِيتُوشْ تْجِيوْ لْعَنْدِي بَاشْ تْكُونْ عَنْدْكُمْ الْحَيَاةْ الدَّايْمَة.

⁴¹رَانِي مَا كَنْتّْسْنَّاشْ الْعَزّْ مْنْ النَّاسْ.

⁴²وَلَكِنْ كَنْعْرَفْكُمْ وْكَنْعْرَفْ بْلِّي مَا فِيكُمْشْ مْحَبَّةْ اللَّهْ.

⁴³أَنَا جِيتْ بْإِسْمْ بَّا، وْنْتُمَ مَا رَحّْبْتُوشْ بِيَّ. وْإِلَا جَا شِي وَاحْدْ آخُرْ غِيرْ مْنْ رَاسُه، هَادَاكْ غَتْرَحّْبُو بِيهْ!

⁴⁴كِيفَاشْ تْقَدْرُو تْآمْنُو وْنْتُمَ كَتّْسْنَّاوْ الْعَزّْ مْنْ بْعْضِيَّاتْكُمْ، وْالْعَزّْ اللِّي مَا كَيْعْطِيهْ غِيرْ اللَّهْ بُوحْدُه مَا كَتْقَلّْبُوشْ عْلِيهْ؟

⁴⁵مَا تْضْنُّوشْ بْلِّي أَنَا غَادِي نْشْكِي بِيكُمْ لْلْآبْ، رَاهْ اللِّي غَادِي يْشْكِي بِيكُمْ هُوَ مُوسَى اللِّي دَايْرِينْ فِيهْ رْجَاكُمْ.

⁴⁶عْلَاحْقَّاشْ كُونْ كْنْتُو كَتِّيقُو بْمُوسَى، كُونْ تْقْتُو بِيَّ، حِيتْ هُوَ كْتَبْ عْلِيَّ.

⁴⁷وْإِلَا كْنْتُو مَا كَتِّيْقُوشْ الْكْتُبْ دْيَالْ مُوسَى، كِيفَاشْ غَادِي تِّيّْقُو كْلَامِي؟».