Read Moroccan Standard Translation يُوحَنَّا 6 Bible Online

يُوحَنَّا 6 - Moroccan Standard Translation bible

يُوحَنَّا 6

¹الْفَصْلْ السَّادْسْ وْمْنْ بَعْدْ هَادْشِّي، قْطَعْ يَسُوعْ لْلجِّهَة لْخْرَى دْيَالْ بْحَرْ الْجَلِيلْ اللِّي هُوَ بْحَرْ طَبَرِيَّة،

²وْتْبْعَاتُه جْمَاعَة كْبِيرَة دْ النَّاسْ، عْلَاحْقَّاشْ شَافُو الْعَلَامَاتْ اللِّي دَارْ مْعَ النَّاسْ اللِّي مْرَاضْ.

³وْطْلَعْ يَسُوعْ لْوَاحْدْ الجّْبَلْ وْݣْلَسْ تْمَّ مْعَ تْلَامْدُه.

⁴وْكَانْ عِيدْ الْفِصْحْ قَرّْبْ، اللِّي هُوَ الْعِيدْ دْيَالْ لِيهُودْ.

⁵وْهْزّْ يَسُوعْ عِينِيهْ وْشَافْ بْلِّي جْمَاعَة كْبِيرَة دْ النَّاسْ كَانُو جَايِّينْ لْعَنْدُه، وْهُوَ يْݣُولْ لْفِيلُبُّسْ: «مْنِينْ نْقَدْرُو نْشْرِيوْ الْخُبْزْ بَاشْ يَاكْلُو هَادْ النَّاسْ؟».

⁶ݣَالْ يَسُوعْ هَادْ الْكْلَامْ لْفِيلُبُّسْ بَاشْ يْجَرّْبُه، حِيتْ يَسُوعْ كَانْ عَارْفْ آشْ بْغَا يْدِيرْ.

⁷وْرَدّْ عْلِيهْ فِيلُبُّسْ: «رَاهْ مَا تْقَدّْهُمْشْ حْتَّى مْيَتَايْنْ دِينَارْ بَاشْ يَاخُدْ كُلّْ وَاحْدْ مْنّْهُمْ شِي حَاجَة قْلِيلَة».

⁸وْهُوَ يْݣُولْ لِيهْ وَاحْدْ مْنْ تْلَامْدُه، اللِّي هُوَ أَنْدْرَاوُسْ خُو سِمْعَانْ بُطْرُسْ:

⁹«رَاهْ كَايْنْ هْنَا وَاحْدْ الْوَلْدْ عَنْدُه خَمْسَة دْ الْخُبْزَاتْ دْ الشّْعِيرْ وْجُوجْ حُوتَاتْ، وَلَكِنْ كِيفَاشْ يْقْدَرْ يْقَدّْ هَادْشِّي لْهَادْ النَّاسْ كُلّْهُمْ؟».

¹⁰وْݣَالْ يَسُوعْ: «ݣُولُو لْلنَّاسْ يْݣَلْسُو». وْكَانْ هَادَاكْ الْمُوضْعْ فِيهْ بْزَّافْ دْ الرّْبِيعْ، وْهُمَ يْݣَلْسُو. وْكَانُو شِي خَمْسَالَافْ رَاجْلْ تْقْرِيبًا.

¹¹وْخْدَا يَسُوعْ الْخُبْزَاتْ وْشْكَرْ اللَّهْ، وْفَرّْقْ عْلَى النَّاسْ اللِّي ݣَالْسِينْ. وْدَارْ نَفْسْ الشِّي لْلْحُوتَاتْ، وْعْطَاهُمْ عْلَى قْدّْ دَاكْشِّي اللِّي بْغَاوْ.

¹²وْمْلِّي شْبْعُو، ݣَالْ لْلتّْلَامْدْ: «جْمْعُو دَاكْشِّي اللِّي شَاطْ مْنْ الطّْرُوفَ دْ الْخُبْزْ، بَاشْ حْتَّى حَاجَة مَا تْضِيعْ».

¹³وْجَمْعُوهُمْ وْعَمّْرُو طْنَاشْرْ ݣُفَّة بْالطّْرُوفَ دْ الْخَمْسَة دْ الْخُبْزَاتْ دْيَالْ الشّْعِيرْ اللِّي شَاطُو عْلَى النَّاسْ اللِّي كْلَاوْ.

¹⁴وْمْلِّي شَافُو النَّاسْ الْعَلَامَة اللِّي دَارْهَا يَسُوعْ ݣَالُو: «فْالْحَقِيقَة، هَادَا هُوَ النّْبِي اللِّي كَانْ خَاصُّه يْجِي لْلدّْنْيَا!».

¹⁵أَمَّا يَسُوعْ، مْلِّي عْرَفْ بْلِّي بْغَاوْ يْخَطْفُوهْ بَاشْ يْرَدُّوهْ مَلِكْ، طْلَعْ مَرَّة خْرَى لْلجّْبَلْ بُوحْدُه.

¹⁶وْمْلِّي جَاتْ الْعْشِيَّة، نْزْلُو التّْلَامْدْ لْلْبْحَرْ.

¹⁷وْرْكْبُو فْالْفْلُوكَة بَاشْ يْقَطْعُو الْبْحَرْ لْكَفْرْنَاحُومْ. وَلَكِنْ طَاحْ الضّْلَامْ وْكَانْ يَسُوعْ بَاقِي مَا جَاشْ عَنْدْهُمْ.

¹⁸وْهَاجْ الْبْحَرْ بْسْبَابْ وَاحْدْ الرِّيحْ قْوِيَّة بْزَّافْ.

¹⁹وْمْلِّي قَدّْفُو التّْلَامْدْ وَاحْدْ الْخَمْسَة وْلَا سْتَّة دْيَالْ الْكِيلُومِتْرَاتْ، شَافُو يَسُوعْ غَادِي فُوقْ الْمَا كَيْقَرّْبْ لْلْفْلُوكَة، وْهُمَ يْخَافُو.

²⁰وْݣَالْ لِيهُمْ يَسُوعْ: «رَاهْ أَنَا هُوَ، مَا تْخَافُوشْ!».

²¹وْمَا جَاوْ فِينْ يْݣُولُو لِيهْ يْطْلَعْ لْعَنْدْهُمْ لْلْفْلُوكَة، حْتَّى وْصْلَاتْ الْفْلُوكَة لْلْمُوضْعْ اللِّي كَانُو غَادْيِينْ لِيهْ.

²²وْالْغَدّْ لِيهْ، شَافْتْ الجّْمَاعَة دْ النَّاسْ اللِّي بْقَاوْ وَاقْفِينْ فْالجِّهَة لْخْرَى دْيَالْ الْبْحَرْ بْلِّي كَانْتْ تْمَّ غِيرْ فْلُوكَة وَحْدَة، هِيَ الْفْلُوكَة اللِّي رْكْبُو فِيهَا تْلَامْدْ يَسُوعْ، وْبْلِّي يَسُوعْ مَا رْكَبْشْ مْعَاهُمْ فْالْفْلُوكَة، وَلَكِنْ مْشَاوْ فِيهَا غِيرْ التّْلَامْدْ بُوحْدْهُمْ.

²³وْجَاوْ شِي فْلَايْكْ مْنْ طَبَرِيَّة، لْوَاحْدْ الْمُوضْعْ قْرِيبْ مْنْ الْبْلَاصَة اللِّي كْلَاوْ فِيهَا النَّاسْ الْمَاكْلَة مْنْ بَعْدْمَا الرَّبّْ يَسُوعْ شْكَرْ عْلِيهَا.

²⁴وْمْلِّي شَافْتْ الجّْمَاعَة بْلِّي مَا كَانْ تْمَّ لَا يَسُوعْ وَلَا تْلَامْدُه، رْكْبُو فْدُوكْ الْفْلَايْكْ وْجَاوْ لْكَفْرْنَاحُومْ كَيْقَلّْبُو عْلَى يَسُوعْ.

²⁵وْمْلِّي لْقَاوْهْ فْالجِّهَة لْخْرَى دْيَالْ الْبْحَرْ، ݣَالُو لِيهْ: «آ الْمُعَلِّمْ، إِيمْتَى وْصَلْتِي لّْهْنَا؟».

²⁶وْهُوَ يْجَاوْبْهُمْ يَسُوعْ وْݣَالْ: «نْݣُولْ لِيكُمْ الْحَقّْ: رَاكُمْ كَتْقَلّْبُو عْلِيَّ مَاشِي حِيتْ شْفْتُو الْعَلَامَاتْ وَلَكِنْ حِيتْ كْلِيتُو الْخُبْزْ وْشْبَعْتُو.

²⁷مَا تْجْرِّيوْشْ وْرَا الْمَاكْلَة اللِّي مَا دَايْمَاشْ، وَلَكِنْ جْرِّيوْ وْرَا الْمَاكْلَة اللِّي غَتْبْقَى لْلْحَيَاةْ الدَّايْمَة، وْهِيَ الْمَاكْلَة اللِّي غَيْعْطِيهَا لِيكُمْ وَلْدْ الْإِنْسَانْ، حِيتْ اللَّهْ الْآبْ هُوَ اللِّي رْشْمُه».

²⁸وْسْوّْلُوهْ: «أَشْنُو خَاصّْنَا نْدِيرُو بَاشْ نْدِيرُو الْخْدْمَة دْيَالْ اللَّهْ؟».

²⁹وْجَاوْبْهُمْ يَسُوعْ وْݣَالْ لِيهُمْ: «الْخْدْمَة اللِّي بْغَاكُمْ اللَّهْ تْدِيرُوهَا هِيَ تْآمْنُو بْهَادَاكْ اللِّي صِيفْطُه».

³⁰وْݣَالُو لِيهْ: «آشْ مْنْ عَلَامَة تْقْدَرْ تْدِيرْ بَاشْ نْشُوفُوهَا وْنْآمْنُو بِيكْ؟ آشْ غَتْدِيرْ؟

³¹جْدُودْنَا كْلَاوْ الْمَنّْ فْالصَّحْرَا. كِمَا مْكْتُوبْ فْكْتَابْ اللَّهْ: عْطَاهُمْ خُبْزْ مْنْ السّْمَا بَاشْ يَاكْلُو».

³²وْرَدّْ عْلِيهُمْ يَسُوعْ: «رَانِي نْݣُولْ لِيكُمْ الْحَقّْ: مَاشِي مُوسَى اللِّي عْطَاكُمْ الْخُبْزْ مْنْ السّْمَا، وَلَكِنْ بَّا هُوَ اللِّي كَيْعْطِيكُمْ الْخُبْزْ الْحْقِيقِي مْنْ السّْمَا.

³³عْلَاحْقَّاشْ خُبْزْ اللَّهْ هُوَ اللِّي نَازْلْ مْنْ السّْمَا، وْهُوَ اللِّي كَيْعْطِي الْحَيَاةْ لْلدّْنْيَا».

³⁴وْهُمَ يْݣُولُو لِيهْ: «عْطِينَا آ سِيدِي هَادْ الْخُبْزْ فْكُلّْ وَقْتْ».

³⁵وْݣَالْ لِيهُمْ يَسُوعْ: «أَنَا هُوَ خُبْزْ الْحَيَاةْ، اللِّي كَيْجِي لْعَنْدِي عَمّْرُه مَا غَيْجُوعْ، وْاللِّي كَيْآمْنْ بِيَّ عَمّْرُه مَا غَيْعْطَشْ.

³⁶وَلَكِنْ كْنْتْ ݣْلْتْ لِيكُمْ: رَاكُمْ شْفْتُونِي وْمَا كَتْآمْنُوشْ.

³⁷كُلّْ وَاحْدْ عْطَاهْ لِيَّ الْآبْ، غَيْجِي لْعَنْدِي. وْاللِّي غَيْجِي لْعَنْدِي عَمّْرْنِي مَا غَنْرْمِيهْ عْلَى بْرَّا.

³⁸حِيتْ أَنَا نْزَلْتْ مْنْ السّْمَا مَاشِي بَاشْ نْدِيرْ مُرَادِي، وَلَكِنْ بَاشْ نْدِيرْ مُرَادْ هَادَاكْ اللِّي صِيفْطْنِي.

³⁹وْمُرَادْ هَادَاكْ اللِّي صِيفْطْنِي هُوَ مَا نْضَيّْعْ حْتَّى شِي وَاحْدْ مْنْ هَادُوكْ اللِّي عْطَانِي، وَلَكِنْ فْيُومْ الْحِسَابْ غَنْبْعَتْهُمْ كُلّْهُمْ مْنْ الْمُوتْ.

⁴⁰حِيتْ هَادَا هُوَ مُرَادْ بَّا: تْكُونْ الْحَيَاةْ الدَّايْمَة لْكُلّْ وَاحْدْ كَيْشُوفْ الْوَلْدْ وْكَيْآمْنْ بِيهْ. وْفْيُومْ الْحِسَابْ، أَنَا غَنْبَعْتُه مْنْ الْمُوتْ».

⁴¹وْبْدَاوْ لِيهُودْ كَيْݣَمْݣْمُو عْلَى يَسُوعْ حِيتْ ݣَالْ: «أَنَا هُوَ الْخُبْزْ اللِّي نْزَلْ مْنْ السّْمَا».

⁴²وْݣَالُو بِينَاتْهُمْ: «وَاشْ مَاشِي هَادَا هُوَ يَسُوعْ وَلْدْ يُوسْفْ اللِّي كَنْعَرْفُو بَّاهْ وْمُّه؟ إِيوَا كِيفَاشْ كَيْݣُولْ دَابَا بْلِّي هُوَ نْزَلْ مْنْ السّْمَا؟».

⁴³وْرَدّْ عْلِيهُمْ يَسُوعْ وْݣَالْ: «بْلَا مَا تْݣَمْݣْمُو بِينَاتْكُمْ.

⁴⁴رَاهْ حْتَّى وَاحْدْ مَا يْقْدَرْ يْجِي لْعَنْدِي مْنْ غِيرْ إِلَا جَابُه لْعَنْدِي الْآبْ اللِّي صِيفْطْنِي، وْأَنَا غَنْبَعْتُه مْنْ الْمُوتْ فْيُومْ الْحِسَابْ.

⁴⁵حِيتْ مْكْتُوبْ فْكْتُبْ الْأَنْبِيَا: النَّاسْ كُلّْهُمْ غَادِي يْتّْعَلّْمُو مْنْ اللَّهْ. وْݣَاعْ اللِّي كَيْتّْصَنّْتْ لْلْآبْ وْكَيْتّْعَلّْمْ مْنُّه كَيْجِي لْعَنْدِي.

⁴⁶وْأَنَا مَا كَنْعْنِيشْ بْلِّي شِي وَاحْدْ شَافْ الْآبْ، عْلَاحْقَّاشْ غِيرْ هَادَاكْ اللِّي مْنْ اللَّهْ هُوَ بُوحْدُه اللِّي شَافْ الْآبْ.

⁴⁷وْنْݣُولْ لِيكُمْ الْحَقّْ: رَاهْ ݣَاعْ اللِّي كَيْآمْنْ بِيَّ، عَنْدُه الْحَيَاةْ الدَّايْمَة.

⁴⁸أَنَا هُوَ خُبْزْ الْحَيَاةْ.

⁴⁹وَاخَّا جْدُودْكُمْ كْلَاوْ الْمَنّْ فْالصَّحْرَا رَاهُمْ مَاتُو،

⁵⁰وَلَكِنْ هَادَا هُوَ الْخُبْزْ اللِّي نَازْلْ مْنْ السّْمَا بَاشْ اللِّي كْلَا مْنُّه مَا يْمُوتْشْ.

⁵¹أَنَا هُوَ الْخُبْزْ الْحَيّْ اللِّي نْزَلْ مْنْ السّْمَا. إِلَا كْلَا شِي وَاحْدْ مْنْ هَادْ الْخُبْزْ غَيْحْيَا عْلَى الدّْوَامْ. وْالْخُبْزْ اللِّي غَنْعْطِي أَنَا، هُوَ دَاتِي اللِّي غَنْعْطِيهَا بَاشْ يْحْيَاوْ نَاسْ الدّْنْيَا».

⁵²وْبْدَاوْ لِيهُودْ كَيْتّْنَاقْشُو مْعَ بْعْضِيَّاتْهُمْ وْهُمَ مْقَلّْقِينْ وْكَيْݣُولُو: «كِيفَاشْ يْقْدَرْ هَادْ الرَّاجْلْ يْعْطِينَا دَاتُه نَاكْلُوهَا؟».

⁵³وْݣَالْ لِيهُمْ يَسُوعْ: «رَانِي نْݣُولْ لِيكُمْ الْحَقّْ: إِلَا مَا كْلِيتُوشْ دَاتْ وَلْدْ الْإِنْسَانْ وْشْرَبْتُو دْمُّه، مَا غَادِيشْ تْكُونْ فِيكُمْ الْحَيَاةْ.

⁵⁴اللِّي كْلَا مْنْ دَاتِي وْشْرَبْ مْنْ دْمِّي، رَاهْ عَنْدُه الْحَيَاةْ الدَّايْمَة، وْأَنَا غَنْبَعْتُه مْنْ الْمُوتْ فْيُومْ الْحِسَابْ.

⁵⁵عْلَاحْقَّاشْ دَاتِي هِيَ الْمَاكْلَة الْحْقِيقِيَّة، وْدْمِّي هُوَ الْمْشْرُوبْ الْحْقِيقِي.

⁵⁶اللِّي كْلَا مْنْ دَاتِي وْشْرَبْ مْنْ دْمِّي، كَيْتْبَتْ فِيَّ، وْأَنَا كَنْتْبَتْ فِيهْ.

⁵⁷كِمَا أَنَا حَيّْ بْالْآبْ الْحَيّْ اللِّي صِيفْطْنِي، رَاهْ بْحَالْ هَكَّا اللِّي غَيَاكُلْنِي غَيْحْيَا بِيَّ.

⁵⁸هَادَا هُوَ الْخُبْزْ اللِّي نْزَلْ مْنْ السّْمَا، مَاشِي بْحَالْ هَادَاكْ اللِّي كْلَاوْهْ جْدُودْكُمْ وْمَاتُو. وْاللِّي كَيَاكُلْ مْنْ هَادْ الْخُبْزْ، غَيْحْيَا عْلَى الدّْوَامْ».

⁵⁹ݣَالْ يَسُوعْ هَادْ الْكْلَامْ فْدَارْ الصّْلَاة وْهُوَ كَيْعَلّْمْ فْكَفْرْنَاحُومْ.

⁶⁰وْݣَالُو بْزَّافْ دْيَالْ التّْلَامْدْ مْلِّي سْمْعُو كْلَامُه: «هَادْ الْكْلَامْ صْعِيبْ، شْكُونْ يْقْدَرْ يْسَمْعُه؟».

⁶¹وْعْرَفْ يَسُوعْ مْعَ رَاسُه بْلِّي تْلَامْدُه كَانُو كَيْݣَمْݣْمُو عْلَى هَادْشِّي، وْهُوَ يْݣُولْ لِيهُمْ: «وَاشْ هَادْشِّي كَيْزَعْزَعْ إِيمَانْكُمْ؟

⁶²إِيوَا آشْ غَيْطْرَا إِلَا شْفْتُو وَلْدْ الْإِنْسَانْ طَالْعْ فِينْ كَانْ فْاللّْوّْلْ؟

⁶³الرُّوحْ رَاهْ هُوَ اللِّي كَيْحْيِي، أَمَّا الدَّاتْ دْيَالْ بْنَادْمْ رَاهْ مَا فِيهَا حْتَّى نْفَعْ، وْالْكْلَامْ اللِّي تّْكَلّْمْتْ مْعَاكُمْ بِيهْ هُوَ رُوحْ وْحَيَاةْ.

⁶⁴وَلَكِنْ رَاهْ فِيكُمْ شِي نَاسْ اللِّي مَا كَيْآمْنُوشْ». حِيتْ يَسُوعْ كَانْ عَارْفْ مْنْ اللّْوّْلْ شْكُونْ هُمَ اللِّي مَا كَيْآمْنُوشْ وْشْكُونْ هُوَ اللِّي غَادِي يْخُونُه.

⁶⁵وْزَادْ يَسُوعْ ݣَالْ: «دَاكْشِّي عْلَاشْ ݣْلْتْ لِيكُمْ بْلِّي حْتَّى وَاحْدْ مَا يْقْدَرْ يْجِي لْعَنْدِي إِلَا مَا تّْعْطَاهْشْ هَادْشِّي مْنْ الْآبْ».

⁶⁶وْمْنْ دَاكْ الْوَقْتْ، سْمْحُو فِيهْ بْزَّافْ دْ التّْلَامْدْ دْيَالُه وْمَا بْقَاوْشْ كَيْمْشِيوْ مْعَاهْ.

⁶⁷وْݣَالْ يَسُوعْ لْلتّْلَامْدْ الطّْنَاشْ: «وَاشْ حْتَّى نْتُمَ بْغِيتُو تْمْشِيوْ؟»،

⁶⁸وْهُوَ يْجَاوْبُه سِمْعَانْ بُطْرُسْ: «آ سِيدِي، عَنْدْ مْنْ غَنْمْشِيوْ وْنْتَ عَنْدْكْ الْكْلَامْ اللِّي كَيْعْطِي الْحَيَاةْ الدَّايْمَة؟

⁶⁹وْحْنَا آمْنَّا وْعْرَفْنَا بْلِّي نْتَ هُوَ الْمْقَدّْسْ اللِّي جَا مْنْ عَنْدْ اللَّهْ».

⁷⁰وْجَاوْبْهُمْ يَسُوعْ: «وَاشْ مَاشِي أَنَا اللِّي خْتَارْتْكُمْ بْطْنَاشْ؟ وَلَكِنْ وَاخَّا دَاكْشِّي رَاهْ وَاحْدْ مْنّْكُمْ شِيطَانْ!».

⁷¹ݣَالْ هَادْشِّي عْلَى يَهُودَا وَلْدْ سِمْعَانْ الْإِسْخَرْيُوطِي، حِيتْ كَانْ هُوَ اللِّي غَيْخُونْ يَسُوعْ وَاخَّا كَانْ وَاحْدْ مْنْ التّْلَامْدْ الطّْنَاشْ.