Read Moroccan Standard Translation يُوحَنَّا 8 Bible Online

يُوحَنَّا 8 - Moroccan Standard Translation bible

يُوحَنَّا 8

¹الْفَصْلْ التَّامْنْ وَلَكِنْ يَسُوعْ مْشَى لْجْبَلْ الزِّيتُونْ.

²وْالْغَدّْ لِيهْ فْالصّْبَاحْ بْكْرِي رْجَعْ لْبِيتْ اللَّهْ، وْجَاوْ لْعَنْدُه النَّاسْ كُلّْهُمْ وْݣْلَسْ كَيْعَلّْمْهُمْ.

³وْجَابُو لِيهْ الْعُلَمَا دْ الشّْرَعْ وْالْفْرِّيسِيِّينْ وَاحْدْ الْمْرَاة تّْقَبْطَاتْ وْهِيَ كَتْفْسَدْ، وْمْلِّي وَقّْفُوهَا قُدَّامْ الْحَاضْرِينْ،

⁴ݣَالُو لِيهْ: «آ الْمُعَلِّمْ، هَادْ الْمْرَاة رَاهَا تّْقَبْطَاتْ وْهِيَ كَتْفْسَدْ.

⁵وْمُوسَى وْصَّانَا فْالشّْرَعْ بَاشْ نْرَجْمُو بْحَالْ هَادِي، إِيوَا آشْ كَتْݣُولْ نْتَ؟».

⁶ݣَالُو هَادْ الْكْلَامْ بَاشْ يْحَصّْلُو يَسُوعْ وْيْلْقَاوْ عْلِيهْ شِي تُهْمَة. وَلَكِنْ هُوَ تّْحْنَى لْلْتَحْتْ وْبْدَا كَيْكْتَبْ فْالْأَرْضْ بْصَبْعُه.

⁷وْمْلِّي بْقَاوْ كَيْسْوّْلُوهْ، وْقَفْ وْݣَالْ لِيهُمْ: «اللِّي مَا دَارْ فِيكُمْ حْتَّى شِي دَنْبْ، يْشَيّْرْ عْلِيهَا بْحَجْرَة هُوَ اللّْوّْلْ».

⁸وْهُوَ يْتّْحْنَى تَانِي لْلْتَحْتْ وْبْدَا كَيْكْتَبْ فْالْأَرْضْ.

⁹وْمْلِّي سْمْعُو هَادْ الْكْلَامْ، خَرْجُو كُلّْهُمْ وَاحْدْ بْوَاحْدْ، وْالشّْيُوخْ هُمَ اللّْوّْلِينْ، وْبْقَى يَسُوعْ بُوحْدُه وْالْمْرَاة وَاقْفَة فْالْوَسْطْ.

¹⁰وْمْلِّي وْقَفْ يَسُوعْ، ݣَالْ لِيهَا: «آ الْمْرَاة، فِينْ هُمَ؟ وَاشْ حْتَّى وَاحْدْ مْنّْهُمْ مَا حْكَمْ عْلِيكْ؟».

¹¹وْهِيَ تْݣُولْ لِيهْ: «حْتَّى حَدّْ آ سِيدِي!». وْݣَالْ لِيهَا يَسُوعْ: «حْتَّى أَنَا مَا غَنْحْكَمْشْ عْلِيكْ! سِيرِي بْحَالْكْ، وْمْنْ دَابَا عَمّْرَكْ مَا تْعَاوْدِي تْدَنْبِي!».

¹²وْعَاوْدْ تّْكَلّْمْ مْعَاهُمْ يَسُوعْ وْݣَالْ: «أَنَا هُوَ النُّورْ دْيَالْ الدّْنْيَا. اللِّي تْبَعْنِي عَمّْرُه مَا غَيْمْشِي فْالضّْلَامْ، وَلَكِنْ غَادِي يْكُونْ عَنْدُه النُّورْ دْيَالْ الْحَيَاةْ».

¹³وْهُمَ يْݣُولُو لِيهْ الْفْرِّيسِيِّينْ: «نْتَ دَابَا كَتْشْهَدْ لْرَاسْكْ، وْالشّْهَادَة دْيَالْكْ مَاشِي صْحِيحَة».

¹⁴وْجَاوْبْهُمْ يَسُوعْ وْݣَالْ لِيهُمْ: «وَاخَّا كَنْشْهَدْ لْرَاسِي، رَاهْ شْهَادْتِي صْحِيحَة، عْلَاحْقَّاشْ أَنَا كَنْعْرَفْ مْنِينْ جِيتْ وْفِينْ غَادِي. وَلَكِنْ نْتُمَ مَا كَتْعَرْفُو لَا مْنِينْ جِيتْ وْلَا فِينْ غَادِي.

¹⁵نْتُمَ كَتْحَكْمُو كِمَا كَيْحْكَمْ بْنَادْمْ، وَلَكِنْ أَنَا مَا كَنْحْكَمْ عْلَى حَدّْ.

¹⁶وْإِلَا كْنْتْ كَنْحْكَمْ، رَاهْ حْكَامِي حَقّْ، حِيتْ أَنَا مَاشِي بُوحْدِي، وَلَكِنْ مْعَايَ الْآبْ اللِّي صِيفْطْنِي.

¹⁷وْمْكْتُوبْ فْالشّْرَعْ دْيَالْكُمْ بْلِّي الشّْهَادَة دْيَالْ جُوجْ دْ النَّاسْ صْحِيحَة.

¹⁸أَنَا كَنْشْهَدْ لْرَاسِي وْكَيْشْهَدْ لِيَّ الْآبْ اللِّي صِيفْطْنِي».

¹⁹وْهُمَ يْسْوّْلُوهْ: «فِينْ هُوَ بَّاكْ؟». وْجَاوْبْهُمْ يَسُوعْ: «مَا كَتْعَرْفُونِي لَا أَنَا وَلَا بَّا. وْكُونْ عْرَفْتُونِي، كُونْ عْرَفْتُو بَّا حْتَّى هُوَ».

²⁰هَادْ الْكْلَامْ ݣَالُه يَسُوعْ مْلِّي كَانْ حْدَا الصّْنْدُوقْ اللِّي كَيْحَطُّو فِيهْ التَّقْدِمَاتْ وْهُوَ كَيْعَلّْمْ فْبِيتْ اللَّهْ. وْمَا قْبْطُه حْتَّى حَدّْ عْلَاحْقَّاشْ سَاعْتُه كَانْتْ مَازَالْ مَا جَاتْ.

²¹وْزَادْ ݣَالْ لِيهُمْ يَسُوعْ: «هَانِي غَنْمْشِي فْحَالِي وْغَتْقَلّْبُو عْلِيَّ، وَلَكِنْ غَتْمُوتُو وْنْتُمَ فْدْنُوبْكُمْ. وْمَا تْقَدْرُوشْ تْمْشِيوْ فِينْ أَنَا غَنْمْشِي».

²²وْݣَالُو لِيهُودْ: «يَاكْمَا بْغَا يْقْتَلْ رَاسُه وْدَاكْشِّي عْلَاشْ كَيْݣُولْ: مَا تْقَدْرُوشْ تْمْشِيوْ فِينْ أَنَا غَنْمْشِي».

²³وْݣَالْ لِيهُمْ يَسُوعْ: «نْتُمَ مْنْ لْتَحْتْ، وَلَكِنْ أَنَا مْنْ لْفُوقْ. نْتُمَ مْنْ هَادْ الدّْنْيَا، وَلَكِنْ أَنَا مَاشِي مْنّْهَا.

²⁴عْلَى دَاكْشِّي ݣْلْتْ لِيكُمْ: غَادِي تْمُوتُو فْدْنُوبْكُمْ، حِيتْ إِلَا مَا آمْنْتُوشْ بْلِّي أَنَا هُوَ، غَادِي تْمُوتُو فْدْنُوبْكُمْ».

²⁵وْهُمَ يْسْوّْلُوهْ: «شْكُونْ نْتَ؟». وْرَدّْ عْلِيهُمْ يَسُوعْ وْݣَالْ: «رَانِي خَبّْرْتْكُمْ مْنْ اللّْوّْلْ.

²⁶عَنْدِي بْزَّافْ دْ الْأُمُورْ نْݣُولْهَا وْنْحْكَمْ بِيهَا عْلِيكُمْ. وَلَكِنْ هَادَاكْ اللِّي صِيفْطْنِي رَاهْ صَادْقْ، وْاللِّي سْمَعْتْ مْنُّه كَنْݣُولُه فْهَادْ الدّْنْيَا».

²⁷وَلَكِنْ مَا فَهْمُوشْ بْلِّي يَسُوعْ كَيْتّْكَلّْمْ لِيهُمْ عْلَى الْآبْ،

²⁸وْݣَالْ لِيهُمْ يَسُوعْ: «مْلِّي تْعَلّْقُو وَلْدْ الْإِنْسَانْ عْلَى الصّْلِيبْ غَادِي تْعَرْفُو دِيكْ السَّاعَة بْلِّي أَنَا هُوَ، وْبْلِّي مَا كَنْدِيرْشْ شِي حَاجَة مْنْ رَاسِي، وْمَا كَنْݣُولْ غِيرْ اللِّي عَلّْمْنِي الْآبْ.

²⁹وْهَادَاكْ اللِّي صِيفْطْنِي هُوَ مْعَايَ وْمَا خْلَّانِيشْ بُوحْدِي، حِيتْ دِيمَا كَنْدِيرْ دَاكْشِّي اللِّي كَيْفَرّْحُه».

³⁰وْمْلِّي كَانْ يَسُوعْ كَيْݣُولْ هَادْ الْكْلَامْ، آمْنُو بِيهْ بْزَّافْ دْ النَّاسْ.

³¹وْݣَالْ يَسُوعْ لْلِيهُودْ اللِّي آمْنُو بِيهْ: «إِلَا بْقِيتُو تَابْتِينْ فْكْلَامِي، غَتْوَلِّيوْ تْلَامْدِي بْالصَّحْ:

³²هَكَّا غَتْعَرْفُو الْحَقّْ، وْالْحَقّْ هُوَ اللِّي غَيْحَرّْرْكُمْ».

³³وْجَاوْبُوهْ: «رَاهْ حْنَا وْلَادْ إِبْرَاهِيمْ، عَمّْرْنَا مَا كْنَّا عْبِيدْ لْحَدّْ! إِيوَا كِيفَاشْ كَتْݣُولْ لِينَا نْتَ: غَتّْحَرّْرُو؟».

³⁴وْجَاوْبْهُمْ يَسُوعْ وْݣَالْ: «نْݣُولْ لِيكُمْ الْحَقّْ: رَاهْ اللِّي دَارْ الدَّنْبْ كَيْكُونْ عَبْدْ لْلدَّنْبْ،

³⁵وْالْعَبْدْ مَا كَيْسْكُنْشْ فْدَارْ سِيدُه عْلَى الدّْوَامْ وَلَكِنْ الْوَلْدْ هُوَ اللِّي كَيْسْكُنْ فِيهَا دِيمَا.

³⁶وْإِلَا حَرّْرْكُمْ الْوَلْدْ، غَادِي تّْحَرّْرُو بْالصَّحْ.

³⁷أَنَا كَنْعْرَفْ بْلِّي نْتُمَ وْلَادْ إِبْرَاهِيمْ، وَلَكِنْ كَتْقَلّْبُو بَاشْ تْقْتْلُونِي حِيتْ كْلَامِي مَا كَيْدْخَلْشْ لْقْلُوبْكُمْ.

³⁸أَنَا كَنْتّْكَلّْمْ عْلَى دَاكْشِّي اللِّي شْفْتْ عَنْدْ بَّا، وْنْتُمَ كَتْدِيرُو بْدَاكْشِّي اللِّي سْمَعْتُو مْنْ بَّاكُمْ».

³⁹وْرَدُّو عْلِيهْ وْݣَالُو: «بَّانَا هُوَ إِبْرَاهِيمْ». وْݣَالْ لِيهُمْ يَسُوعْ: «كُونْ كْنْتُو وْلَادْ إِبْرَاهِيمْ، كُونْ رَاكُمْ كَتْدِيرُو بْالْأُمُورْ اللِّي دَارْهَا إِبْرَاهِيمْ.

⁴⁰وَلَكِنْ دَابَا نْتُمَ كَتْقَلّْبُو بَاشْ تْقْتْلُونِي، وَاخَّا أَنَا ݣْلْتْ لِيكُمْ الْحَقّْ اللِّي سْمَعْتُه مْنْ اللَّهْ، وْرَاهْ إِبْرَاهِيمْ مَا دَارْشْ هَادْشِّي.

⁴¹نْتُمَ كَتْدِيرُو بْأَعْمَالْ بَّاكُمْ». وْهُمَ يْݣُولُو لِيهْ: «حْنَا مَاشِي وْلَادْ الْفْسَادْ، عَنْدْنَا بَّانَا وَاحْدْ هُوَ اللَّهْ!».

⁴²وْݣَالْ لِيهُمْ يَسُوعْ: «كُونْ كَانْ اللَّهْ هُوَ بَّاكُمْ غَادِي تْبْغِيوْنِي، حِيتْ أَنَا مْنْ عَنْدْ اللَّهْ خْرَجْتْ وْجِيتْ، وْالْمْجِي دْيَالِي مَا كَانْشْ مْنْ رَاسِي وَلَكِنْ هُوَ اللِّي صِيفْطْنِي.

⁴³عْلَاشْ مَا كَتْفَهْمُوشْ هْضَرْتِي؟ عْلَاحْقَّاشْ مَا كَتْقَدْرُوشْ تْسَمْعُو كْلَامِي.

⁴⁴نْتُمَ رَاكُمْ وْلَادْ بَّاكُمْ إِبْلِيسْ، وْكَتْبْغِيوْ تْدِيرُو دَاكْشِّي اللِّي كَيْبْغِي بَّاكُمْ. هَادَاكْ رَاهْ كَانْ قْتَّالْ مْنْ اللّْوّْلْ، وْعَمّْرُه مَا تْبَتْ فْالْحَقّْ، حِيتْ مَا فِيهْشْ الْحَقّْ، وْمْلِّي كَيْكْدَبْ، رَاهْ مَا كَيْتّْكَلّْمْ غِيرْ بْلِّي فْقَلْبُه، حِيتْ هُوَ كْدَّابْ وْبَّاتْ الْكْدُوبْ.

⁴⁵أَمَّا أَنَا حِيتْ كَنْݣُولْ الْحَقّْ، مَا كَتِّيقُوشْ بِيَّ.

⁴⁶شْكُونْ فِيكُمْ اللِّي يْقْدَرْ يْتْبَتْ عْلِيَّ شِي دَنْبْ؟ وْإِلَا كْنْتْ كَنْݣُولْ الْحَقّْ، عْلَاشْ مَا كَتِّيقُوشْ بِيَّ؟

⁴⁷اللِّي مْنْ اللَّهْ رَاهْ كَيْسْمَعْ لْكْلَامْ اللَّهْ، أَمَّا نْتُمَ مَا كَتْسَمْعُوشْ لْكْلَامْ اللَّهْ، عْلَاحْقَّاشْ رَاكُمْ مَاشِي مْنْ اللَّهْ».

⁴⁸وْݣَالُو لِيهْ لِيهُودْ: «وَاشْ كْلَامْنَا مَاشِي صْحِيحْ مْلِّي ݣْلْنَا بْلِّي نْتَ سَامِرِي وْفِيكْ جْنّْ؟».

⁴⁹وْجَاوْبْهُمْ يَسُوعْ وْݣَالْ: «أَنَا مَا فِيَّ حْتَّى شِي جْنّْ، وَلَكِنْ كَنْعْطِي الْعَزّْ لْبَّا، وْنْتُمَ كَتْحْتَقْرُونِي.

⁵⁰أَنَا مَا كَنْطْلَبْشْ الْعَزّْ لْرَاسِي، وَلَكِنْ كَايْنْ اللِّي يْطْلْبُه لِيَّ وْهُوَ اللِّي كَيْحْكَمْ.

⁵¹نْݣُولْ لِيكُمْ الْحَقّْ: اللِّي كَيْدِيرْ بْكْلَامِي عَمّْرُه مَا غَيْشُوفْ الْمُوتْ».

⁵²وْݣَالُو لِيهْ لِيهُودْ: «دَابَا تْأَكّْدْنَا بْلِّي فِيكْ شِي جْنّْ. حِيتْ مَاتْ إِبْرَاهِيمْ وْمَاتُو الْأَنْبِيَا، وْنْتَ كَتْݣُولْ: اللِّي كَيْدِيرْ بْكْلَامْكْ عَمّْرُه مَا غَيْدُوقْ الْمُوتْ.

⁵³وَاشْ نْتَ حْسَنْ مْنْ بَّانَا إِبْرَاهِيمْ اللِّي مَاتْ؟ رَاهْ الْأَنْبِيَا بْرَاسْهُمْ مَاتُو، إِيوَا شْكُونْ كَتْحْسَبْ رَاسْكْ؟».

⁵⁴وْرَدّْ عْلِيهُمْ يَسُوعْ وْݣَالْ: «إِلَا كْنْتْ كَنْعْطِي الْعَزّْ لْرَاسِي، رَاهْ الْعَزّْ دْيَالِي مَا عَنْدُه قِيمَة. وَلَكِنْ بَّا هُوَ اللِّي كَيْعْطِينِي الْعَزّْ وْهُوَ اللِّي كَتْݣُولُو عْلِيهْ إِلَاهْنَا،

⁵⁵وْنْتُمَ مَا كَتْعَرْفُوهْشْ، أَمَّا أَنَا كَنْعَرْفُه. حْتَّى إِلَا ݣْلْتْ مَا كَنْعَرْفُوشْ، رَاهْ غَادِي نْكُونْ كْدَّابْ بْحَالْكُمْ، وَلَكِنْ أَنَا كَنْعَرْفُه وْكَنْدِيرْ بْكْلَامُه.

⁵⁶بَّاكُمْ إِبْرَاهِيمْ بْالْفَرْحَة كَانْ كَيْتّْمَنَّى يْشُوفْ نْهَارْ الْمْجِي دْيَالِي، وْشَافُه وْكَانْ فْرْحَانْ».

⁵⁷وْݣَالُو لِيهْ لِيهُودْ: «مَا عَنْدْكْ حْتَّى خَمْسِينْ عَامْ فْالْعْمَرْ، وْشْفْتِي إِبْرَاهِيمْ؟».

⁵⁸وْجَاوْبْهُمْ يَسُوعْ وْݣَالْ: «نْݣُولْ لِيكُمْ الْحَقّْ: رَاهْ قْبَلْ مَا يْكُونْ إِبْرَاهِيمْ، أَنَا كْنْتْ».

⁵⁹وْهُمَ يْهَزُّو الْحْجَرْ بَاشْ يْرَجْمُوهْ، وَلَكِنْ يَسُوعْ تّْخْبَّى وْخْرَجْ مْنْ بِيتْ اللَّهْ.