Read Moroccan Standard Translation يُوحَنَّا 9 Bible Online

يُوحَنَّا 9 - Moroccan Standard Translation bible

يُوحَنَّا 9

¹الْفَصْلْ التَّاسْعْ وْمْلِّي كَانْ يَسُوعْ غَادِي، شَافْ وَاحْدْ الرَّاجْلْ، مْلِّي تّْوْلَدْ وْهُوَ عْمَى.

²وْسْوّْلُوهْ التّْلَامْدْ دْيَاوْلُه وْݣَالُو لِيهْ: «آ سِيدِي، شْكُونْ اللِّي دْنَبْ، وَاشْ هَادْ الرَّاجْلْ وْلَا وَالِدِيهْ حْتَّى تّْزَادْ عْمَى؟».

³وْجَاوْبْهُمْ يَسُوعْ: «رَاهْ مَا دْنَبْ لَا هُوَ وَلَا وَالِدِيهْ، وَلَكِنْ وْقَعْ لِيهْ دَاكْشِّي غِيرْ بَاشْ تْبَانْ أَعْمَالْ اللَّهْ فِيهْ.

⁴رَاهْ خَاصّْنَا نْدِيرُو الْأَعْمَالْ دْيَالْ هَادَاكْ اللِّي صِيفْطْنِي مَا حَدّْ بَاقِي النّْهَارْ، مْلِّي غَيْجِي اللِّيلْ حْتَّى حَدّْ مَا غَيْقْدَرْ يْخْدَمْ.

⁵مَا حَدّْنِي فْالدّْنْيَا، أَنَا هُوَ نُورْ الدّْنْيَا».

⁶وْمْنْ بَعْدْمَا ݣَالْ يَسُوعْ هَادْ الْكْلَامْ، دْفَلْ فْالتّْرَابْ، وْصَايْبْ مْنْ الدّْفَالْ شْوِيَّة دْ الْغِيسْ وْحَطُّه عْلَى عِينِينْ الرَّاجْلْ.

⁷وْݣَالْ لِيهْ: «سِيرْ غْسَلْ فْضَايْةْ سِلْوَامْ» -وْالْمَعْنَى دْيَالْ سِلْوَامْ هُوَ الْمْرْسُولْ-. وْمْشَى وْغْسَلْ، وْرْجَعْ وْهُوَ كَيْشُوفْ.

⁸وْالجِّيرَانْ وْالنَّاسْ اللِّي كَانُو كَيْشُوفُوهْ مْنْ قْبَلْ كَيْسْعَى، بْدَاوْ كَيْسْوّْلُو رَاسْهُمْ وْكَيْݣُولُو: «وَاشْ هَادْ الرَّاجْلْ مَاشِي هُوَ اللِّي كَانْ كَيْݣْلَسْ وْكَيْسْعَى؟».

⁹وْݣَالُو شِي وْحْدِينْ: «رَاهْ هُوَ هَادَا!»، وْوْحْدِينْ خْرِينْ ݣَالُو: «لَّا، رَاهْ غِيرْ كَيْشْبَهْ لِيهْ!». وَلَكِنْ هُوَ ݣَالْ: «رَاهْ أَنَا هُوَ!».

¹⁰وْهُمَ يْسْوّْلُوهْ: «كِيفَاشْ تّْحَلُّو لِيكْ عِينِيكْ؟».

¹¹وْجَاوْبْهُمْ: «وَاحْدْ الرَّاجْلْ سْمِيّْتُه يَسُوعْ صَايْبْ شْوِيَّة دْيَالْ الْغِيسْ وْدَارُه عْلَى عِينِيَّ وْݣَالْ لِيَّ: سِيرْ لْضَايْةْ سِلْوَامْ وْغْسَلْ. وْأَنَا نْمْشِي وْغْسَلْتْ وْوْلِّيتْ كَنْشُوفْ».

¹²وْسْوّْلُوهْ: «وْفِينْ هُوَ هَادْ الرَّاجْلْ؟». ݣَالْ لِيهُمْ: «مَا عْرَفْتْشْ!».

¹³وْدَّاوْ الرَّاجْلْ اللِّي كَانْ عْمَى عَنْدْ الْفْرِّيسِيِّينْ،

¹⁴وْكَانْ دَاكْ النّْهَارْ نْهَارْ السّْبْتْ فَاشْ صَايْبْ يَسُوعْ الْغِيسْ وْحَلّْ عِينِينْ الْعْمَى.

¹⁵وْسْوّْلُوهْ الْفْرِّيسِيِّينْ حْتَّى هُمَ كِيفَاشْ وْلَّى كَيْشُوفْ، وْݣَالْ لِيهُمْ: «حَطّْ شْوِيَّة دْيَالْ الْغِيسْ عْلَى عِينِيَّ وْغْسَلْتْ، وْوْلِّيتْ كَنْشُوفْ».

¹⁶وْݣَالُو شِي وْحْدِينْ مْنْ الْفْرِّيسِيِّينْ: «مَا يْمْكَنْشْ يْكُونْ هَادْ الرَّاجْلْ مْنْ اللَّهْ، عْلَاحْقَّاشْ مَا كَيْدِيرْشْ بْالْوْصِيَّة دْيَالْ نْهَارْ السّْبْتْ». وْݣَالُو وْحْدِينْ خْرِينْ: «كِيفَاشْ يْقْدَرْ وَاحْدْ مُدْنِبْ يْدِيرْ بْحَالْ هَادْ الْعَلَامَاتْ؟». وْكَانُو مَا مْتَّافْقِينْشْ فْهْضَرْتْهُمْ.

¹⁷وْعَاوْدُو سْوّْلُو الرَّاجْلْ اللِّي كَانْ عْمَى: «وْنْتَ آشْ كَتْݣُولْ عْلِيهْ حِيتْ حَلّْ لِيكْ عِينِيكْ؟»، وْهُوَ يْجَاوْبْهُمْ: «رَاهْ هُوَ نْبِي!».

¹⁸وْمَا تَاقُوشْ لِيهُودْ بْلِّي هُوَ كَانْ عْمَى وْوْلَّى كَيْشُوفْ حْتَّى عَيْطُو عْلَى وَالِدِيهْ،

¹⁹وْسْوّْلُوهُمْ وْݣَالُو: «وَاشْ هَادَا وَلْدْكُمْ اللِّي كَتْݣُولُو تّْوْلَدْ عْمَى؟ إِيوَا كِيفَاشْ كَيْشُوفْ دَابَا؟».

²⁰وْجَاوْبُوهُمْ وَالِدِيهْ: «حْنَا كَنْعَرْفُو بْلِّي هَادَا وَلْدْنَا وْبْلِّي تّْوْلَدْ عْمَى.

²¹وَلَكِنْ مَا كَنْعَرْفُوشْ كِيفَاشْ وْلَّى كَيْشُوفْ دَابَا، وْمَا كَنْعَرْفُوشْ شْكُونْ اللِّي حَلّْ لِيهْ عِينِيهْ. رَاهْ هُوَ كْبِيرْ فْالْعْمَرْ، سْوّْلُوهْ وْرَاهْ هُوَ يْجَاوْبْكُمْ عْلَى رَاسُه».

²²ݣَالُو وَالِدِينْ الرَّاجْلْ هَادْ الْكْلَامْ، عْلَاحْقَّاشْ كَانُو خَايْفِينْ مْنْ لِيهُودْ. حِيتْ لِيهُودْ كَانُو تَّافْقُو بِينَاتْهُمْ مْنْ قْبَلْ بَاشْ اللِّي عْتَرْفْ بْالْمَسِيحْ، يْجْرِّيوْ عْلِيهْ مْنْ دَارْ الصّْلَاة.

²³دَاكْشِّي عْلَاشْ ݣَالُو وَالِدِيهْ: «رَاهْ هُوَ كْبِيرْ فْالْعْمَرْ، سْوّْلُوهْ!».

²⁴وْعَيْطُو مَرَّة خْرَى عْلَى الرَّاجْلْ اللِّي كَانْ عْمَى وْݣَالُو لِيهْ: «عْطِي الْعَزّْ لْلَّهْ، حْنَا رَاهْ كَنْعَرْفُو بْلِّي هَادْ الرَّاجْلْ مُدْنِبْ».

²⁵وْجَاوْبْهُمْ: «وَاشْ هَادَاكْ الرَّاجْلْ مُدْنِبْ؟ مَا كَنْعْرَفْشْ! حَاجَة وَحْدَة اللِّي كَنْعْرَفْ: كْنْتْ عْمَى، وْدَابَا وْلِّيتْ كَنْشُوفْ!».

²⁶وْهُمَ يْݣُولُو لِيهْ تَانِي: «أَشْنُو دَارْ لِيكْ؟ كِيفَاشْ حَلّْ لِيكْ عِينِيكْ؟».

²⁷وْرَدّْ عْلِيهُمْ: «رَانِي ݣْلْتْ لِيكُمْ وْمَا سْمَعْتُونِيشْ! عْلَاشْ بْغِيتُو تْسَمْعُو الْهَضْرَة مَرَّة خْرَى؟ يَاكْمَا بْغِيتُو حْتَّى نْتُمَ تْوَلِّيوْ تْلَامْدُه؟».

²⁸وْهُمَ يْسَبُّوهْ وْݣَالُو: «نْتَ هُوَ التّْلْمِيدْ دْيَالُه، أَمَّا حْنَا رَاهْ تْلَامْدْ مُوسَى.

²⁹وْكَنْعَرْفُو بْلِّي مُوسَى تّْكَلّْمْ مْعَاهْ اللَّهْ، وَلَكِنْ هَادْ الرَّاجْلْ مَا كَنْعَرْفُوشْ مْنِينْ هُوَ!».

³⁰وْجَاوْبْ الرَّاجْلْ وْݣَالْ لِيهُمْ: «إِيوَا رَاهْ الْعْجَبْ هَادَا! مَا كَتْعَرْفُوشْ مْنِينْ هُوَ وَاخَّا حَلّْ لِيَّ عِينِيَّ!

³¹حْنَا كَنْعَرْفُو بْلِّي اللَّهْ مَا كَيْسْمَعْشْ لْلْمُدْنِبِينْ، وَلَكِنْ كَيْسْمَعْ لْلِّي كَيْتَّاقِيهْ وْكَيْدِيرْ مُرَادُه.

³²وْمْنْ قْدِيمْ الزّْمَانْ عَمّْرْنَا مَا سْمَعْنَا بْلِّي شِي وَاحْدْ حَلّْ عِينِينْ شِي وَاحْدْ تّْوْلَدْ عْمَى.

³³كُونْ مَا كَانْشْ هَادْ الرَّاجْلْ مْنْ اللَّهْ، كُونْ مَا قْدَرْ يْدِيرْ وَالُو».

³⁴وْجَاوْبُوهْ وْݣَالُو: «نْتَ كُلّْكْ تّْوْلَدْتِي فْالدّْنُوبْ، وْكَتْعَلّْمْنَا!». وْهُمَ يْجْرِّيوْ عْلِيهْ.

³⁵وْسْمَعْ يَسُوعْ بْلِّي الْفْرِّيسِيِّينْ جْرَّاوْ عْلَى الرَّاجْلْ الْعْمَى، وْمْلِّي لْقَاهْ يَسُوعْ ݣَالْ لِيهْ: «وَاشْ كَتْآمْنْ بْوَلْدْ الْإِنْسَانْ؟».

³⁶وْجَاوْبْ دَاكْ الرَّاجْلْ وْݣَالْ: «شْكُونْ هُوَ آ سِيدِي بَاشْ نْآمْنْ بِيهْ؟».

³⁷وْݣَالْ لِيهْ يَسُوعْ: «اللِّي شْفْتِيهْ! وْاللِّي كَيْتّْكَلّْمْ مْعَاكْ دَابَا، رَاهْ هُوَ هَادَاكْ!».

³⁸وْهُوَ يْݣُولْ الرَّاجْلْ: «كَنْآمْنْ آ سِيدِي!». وْسْجَدْ لِيهْ.

³⁹وْݣَالْ يَسُوعْ: «جِيتْ لْلنَّاسْ دْيَالْ هَادْ الدّْنْيَا بَاشْ نْبَيّْنْ دْنُوبْهُمْ: بَاشْ الْعَمْيِينْ يْوَلِّيوْ كَيْشُوفُو، وْاللِّي كَيْشُوفُو يْوَلِّيوْ عَمْيِينْ».

⁴⁰وْسْمْعُو شِي وْحْدِينْ مْنْ الْفْرِّيسِيِّينْ اللِّي كَانُو مْعَاهْ تْمَّ هَادْ الْكْلَامْ وْݣَالُو لِيهْ: «يَاكْمَا حْتَّى حْنَا عَمْيِينْ؟».

⁴¹وْݣَالْ لِيهُمْ يَسُوعْ: «كُونْ كْنْتُو عَمْيِينْ كُونْ ݣَاعْ مَا كَانُو فِيكُمْ الدّْنُوبْ، وَلَكِنْ نْتُمَ دَابَا كَتْݣُولُو بْلِّي كَتْشُوفُو، دَاكْشِّي عْلَاشْ دْنُوبْكُمْ بَاقْيِينْ فِيكُمْ».