Read Moroccan Standard Translation الْأَعْمَالْ 10 Bible Online

الْأَعْمَالْ 10 - Moroccan Standard Translation bible

الْأَعْمَالْ 10

¹الْفَصْلْ الْعَاشْرْ وْكَانْ كَيْسْكُنْ فْقَيْصَرِيَّة وَاحْدْ الرَّاجْلْ سْمِيتُه كُرْنِيلْيُوسْ، قَايْدْ دْ الْعَسْكَرْ مْنْ الْفَرْقَة اللِّي كَتّْسْمَّى الْإِيطَالِيَّة.

²وْكَانْ هَادْ الرَّاجْلْ مْتَّاقِي اللَّهْ وْكَيْخَافْ اللَّهْ هُوَ وْعَائِلْتُه كُلّْهَا، كَيْصَدّْقْ عْلَى النَّاسْ، وْكَيْصَلِّي لْلَّهْ فْكُلّْ وَقْتْ.

³وْفْجْوَايْهْ التّْلَاتَة دْ النّْهَارْ، شَافْ كُرْنِيلْيُوسْ فْوَاحْدْ الرُّؤْيَا مَلَاكْ مْنْ عَنْدْ اللَّهْ دَاخْلْ لْعَنْدُه وْكَيْݣُولْ لِيهْ: «آ كُرْنِيلْيُوسْ!».

⁴وْحَقَّقْ فْالْمَلَاكْ وْهُوَ خَايْفْ، وْرَدّْ عْلِيهْ: «شْنُو آ سِيدِي؟». وْݣَالْ لِيهْ الْمَلَاكْ: «اللَّهْ سْمَعْ لْصْلَاتْكْ وْشَافْ الْخِيرْ اللِّي كَتْدِيرْ، وْتّْفَكّْرَكْ.

⁵وْدَابَا، صِيفْطْ شِي رْجَالْ لْيَافَا بَاشْ تْجِيبْ سِمْعَانْ اللِّي مْكَنِّي بُطْرُسْ.

⁶رَاهْ ݣَالْسْ عَنْدْ وَاحْدْ الرَّاجْلْ دْبَّاغْ سْمِيتُه سِمْعَانْ، دَارُه عْلَى جَنْبْ الْبْحَرْ».

⁷وْغِيرْ مْشَى الْمَلَاكْ اللِّي تّْكَلّْمْ مْعَاهْ، وْهُوَ يْعَيّْطْ كُرْنِيلْيُوسْ عْلَى جُوجْ مْنْ الْخْدَّامَا دْيَالُه، وْوَاحْدْ مْنْ الْعَسْكَرْ مْتَّاقِي اللَّهْ مْنْ هَادُوكْ اللِّي كَيْكُونُو دِيمَا مْعَاهْ،

⁸وْعَاوْدْ لِيهُمْ كُلّْ مَا جْرَا، وْصِيفْطْهُمْ لْيَافَا.

⁹وْالْغَدّْ لِيهْ سَافْرُو. وْمْلِّي قَرّْبُو لْيَافَا، طْلَعْ بُطْرُسْ لْلسّْطَحْ جْوَايْهْ الطّْنَاشْ دْ النّْهَارْ بَاشْ يْصَلِّي،

¹⁰وْجَاعْ بْزَّافْ وْبْغَا يَاكُلْ. وْفْالْوَقْتْ اللِّي بْدَاوْ كَيْوَجّْدُو لِيهْ الْمَاكْلَة، جَاتُه الدُّوخَة وْطَاحْ،

¹¹وْهُوَ يْشُوفْ السّْمَا مْحْلُولَة، وْشِي حَاجَة نَازْلَة بْحَالْ شِي يْزَارْ كْبِيرْ مْعْقُودْ مْنْ طْرَافُه بْرَبْعَة، مْدَلِّي عْلَى الْأَرْضْ.

¹²وْفِيهْ ݣَاعْ نْوَاعْ الْبْهَايْمْ وْالْحَيَوَانَاتْ دْ الْأَرْضْ اللِّي كَتْزْحَفْ وْطْيُورْ السّْمَا.

¹³وْسْمَعْ صُوتْ كَيْݣُولْ لِيهْ: «آ بُطْرُسْ، نُوضْ دْبَحْ وْكُولْ».

¹⁴وَلَكِنْ بُطْرُسْ ݣَالْ: «لَّا آ رْبِّي! عْلَاحْقَّاشْ عَمّْرْنِي مَا كْلِيتْ شِي حَاجَة حْرَامْ وْلَا مْنْجُوسَة».

¹⁵وْعَاوْدْ ݣَالْ لِيهْ الصُّوتْ مَرَّة خْرَى: «اللِّي دَارُه اللَّهْ طَاهْرْ، مَا تْرَدُّوشْ نْتَ مْنْجُوسْ!».

¹⁶وْتّْعَاوْدْ هَادْ الْكْلَامْ تْلَاتَة دْ الْمَرَّاتْ، وْدِيكْ السَّاعَة تّْرَفْعَاتْ دِيكْ الْحَاجَة لْلسّْمَا.

¹⁷وْمْلِّي كَانْ بُطْرُسْ حَايْرْ كَيْسْوّْلْ رَاسُه عْلَى مْعْنِيّْةْ هَادْ الرُّؤْيَا اللِّي شَافْهَا، لْقَاوْ الرّْجَالْ اللِّي صِيفْطْهُمْ كُرْنِيلْيُوسْ دَارْ سِمْعَانْ، وْوْقْفُو حْدَا الْبَابْ

¹⁸وْعَيْطُو كَيْسْوّْلُو: «وَاشْ سِمْعَانْ الْمْكَنِّي بُطْرُسْ ݣَالْسْ عَنْدْكُمْ هْنَا؟».

¹⁹وْمْلِّي كَانْ بُطْرُسْ بَاقِي كَيْفَكّْرْ أَشْنُو كَتْعْنِي هَادْ الرُّؤْيَا، ݣَالْ لِيهْ رُوحْ اللَّهْ: «فْالْبَابْ تْلَاتَة دْ الرّْجَالْ كَيْقَلّْبُو عْلِيكْ،

²⁰نُوضْ وْنْزَلْ لْعَنْدْهُمْ وْسِيرْ مْعَاهُمْ بْلَا مَا تْشَكّْ فْوَالُو، عْلَاحْقَّاشْ أَنَا اللِّي صِيفْطْتْهُمْ لِيكْ».

²¹وْهُوَ يْنْزَلْ بُطْرُسْ لْعَنْدْ الرّْجَالْ اللِّي صِيفْطْهُمْ لِيهْ كُرْنِيلْيُوسْ، وْݣَالْ لِيهُمْ: «أَنَا هُوَ اللِّي كَتْقَلّْبُو عْلِيهْ، أَشْنُو هُوَ السَّبَبْ عْلَاشْ جِيتُو؟».

²²وْجَاوْبُوهْ: «صِيفْطْنَا لْعَنْدْكْ الْقَايْدْ دْ الْعَسْكَرْ كُرْنِيلْيُوسْ، وْهُوَ رَاجْلْ صَالْحْ كَيْخَافْ اللَّهْ، السُّمْعَة دْيَالُه مْزْيَانَة بِينْ ݣَاعْ الشَّعْبْ دْ لِيهُودْ، رَاهْ تّْكَلّْمْ مْعَاهْ مَلَاكْ مْقَدّْسْ مْنْ عَنْدْ اللَّهْ بَاشْ يْعْرَضْ عْلِيكْ لْدَارُه وْيْسْمَعْ مْنّْكْ الْكْلَامْ اللِّي عَنْدْكْ».

²³وْهُوَ يْدَخّْلْهُمْ بُطْرُسْ لْعَنْدُه وْضَايْفْهُمْ. وْالْغَدّْ لِيهْ، مْشَى مْعَاهُمْ. وْكَانُو مْعَاهْ شِي خُوتْ مْنْ يَافَا،

²⁴وْفْالنّْهَارْ التَّانِي وْصْلُو لْقَيْصَرِيَّة. وْكَانْ كُرْنِيلْيُوسْ كَيْتّْسْنَّاهُمْ مْعَ النَّاسْ اللِّي عَارْضْ عْلِيهُمْ مْنْ عَائِلْتُه وْصْحَابُه اللِّي قْرَابْ لِيهْ.

²⁵وْغِيرْ دْخَلْ بُطْرُسْ لْلدَّارْ، رَحّْبْ بِيهْ كُرْنِيلْيُوسْ وْطَاحْ لْلْأَرْضْ عَنْدْ رْجْلِيهْ وْسْجَدْ لِيهْ.

²⁶وَلَكِنْ بُطْرُسْ وَقّْفُه وْݣَالْ لِيهْ: «نُوضْ، رَاهْ حْتَّى أَنَا غِيرْ إِنْسَانْ بْحَالْكْ!»،

²⁷وْمْنْ بَعْدْ دْخَلْ بُطْرُسْ وْهُوَ كَيْتّْكَلّْمْ مْعَ كُرْنِيلْيُوسْ، وْلْقَا بْزَّافْ دْ النَّاسْ مْجْمُوعِينْ،

²⁸وْݣَالْ لِيهُمْ: «كَتْعَرْفُو بْلِّي لِيهُودِي مْحَرّْمْ عْلِيهْ يْعَاشْرْ اللِّي مَاشِي يْهُودِي، وْلَا يْجِي لْعَنْدُه لْدَارُه. وَلَكِنْ اللَّهْ وْرَّانِي بْلِّي مَا خَاصّْنِي نْحَرّْمْ الْعْشْرَة دْيَالْ حْتَّى شِي وَاحْدْ وْلَا نْعْتَبْرُه مْنْجُوسْ.

²⁹عْلَى هَادْشِّي، مْلِّي عَيّْطْتُو عْلِيَّ جِيتْ بْلَا مَا نْݣُولْ لَّا. وْدَابَا بْغِيتْ نْعْرَفْ عْلَاشْ عَيّْطْتُو عْلِيَّ؟»

³⁰وْݣَالْ كُرْنِيلْيُوسْ: «مُدَّةْ رْبَعْ يَّامْ هَادِي مْعَ التّْلَاتَة دْ الْعْشِيَّة كْنْتْ كَنْصَلِّي فْدَارِي، وْعْلَى غَفْلَة وْقَفْ وَاحْدْ الرَّاجْلْ قُدَّامِي بْلْبَاسْ كَيْلْمَعْ

³¹وْهُوَ يْݣُولْ لِيَّ: آ كُرْنِيلْيُوسْ، اللَّهْ سْمَعْ لْصْلَاتْكْ وْتّْفَكّْرْ الْخِيرْ اللِّي كَتْدِيرْ مْعَ النَّاسْ،

³²صِيفْطْ شِي وَاحْدْ لْيَافَا، وْعَيّْطْ عْلَى سِمْعَانْ اللِّي مْكَنِّي بُطْرُسْ، رَاهْ ݣَالْسْ فْدَارْ سِمْعَانْ الدّْبَّاغْ عْلَى جَنْبْ الْبْحَرْ، وْمْلِّي غَيْجِي غَيْتّْكَلّْمْ مْعَاكْ.

³³وْدْغْيَا صِيفْطْتْ لِيكْ، وْنْتَ دْرْتِي مْزِيَّة مْلِّي جِيتِي. وْدَابَا هَا حْنَا كُلّْنَا حَاضْرِينْ قُدَّامْ اللَّهْ بَاشْ نْسَمْعُو ݣَاعْ دَاكْشِّي اللِّي آمْرَكْ بِيهْ الرَّبّْ».

³⁴وْبْدَا بُطْرُسْ كْلَامُه وْݣَالْ: «فْالْحَقِيقَة، أَنَا عَادْ فْهَمْتْ بْلِّي اللَّهْ مَا كَيْدِيرْشْ الْوْجْهِيَّاتْ،

³⁵وْبْلِّي كُلّْ وَاحْدْ تَّاقَى اللَّهْ مْنْ أَيّْ شَعْبْ كَانْ، وْدَارْ الْخِيرْ، رَاهْ مْقْبُولْ عَنْدْ اللَّهْ.

³⁶وْاللَّهْ صِيفْطْ كْلَامُه لْشَعْبْ إِسْرَائِيلْ، بَاشْ يْخَبّْرْهُمْ بْالْهْنَا بْيَسُوعْ الْمَسِيحْ اللِّي هُوَ رَبّْ لْلنَّاسْ كُلّْهُمْ.

³⁷رَاكُمْ عْرَفْتُو أَشْنُو طْرَا فْبْلَادْ الْيَهُودِيَّة كُلّْهَا، وْكُلّْشِي بْدَا فْالْجَلِيلْ مْنْ بَعْدْ الْمَعْمُودِيَّة اللِّي بَرّْحْ بِيهَا يُوحَنَّا الْمَعْمَدَانْ،

³⁸وْكَتْعَرْفُو كِيفَاشْ يَسُوعْ اللِّي مْنْ النَّاصِرَة، خْتَارُه اللَّهْ بْالرُّوحْ الْقُدُسْ وْالْقُوَّة، وْجَالْ فْكُلّْ مُوضْعْ كَيْدِيرْ الْخِيرْ وْكَيْشَافِي كُلّْ وَاحْدْ تْسَلّْطْ عْلِيهْ إِبْلِيسْ، عْلَاحْقَّاشْ اللَّهْ كَانْ مْعَاهْ.

³⁹وْحْنَا كَنْشَهْدُو عْلَى ݣَاعْ الْخِيرْ اللِّي دَارْ فْبْلَادْ الْيَهُودِيَّة وْفْأُورْشَلِيمْ. وْرَاهْ هُوَ اللِّي قْتْلُوهْ مْعَلّْقِينُه عْلَى خَشْبَة.

⁴⁰وَلَكِنْ اللَّهْ بَعْتُه مْنْ الْمُوتْ فْالْيُومْ التَّالْتْ، وْخْلَّاهْ يْبَانْ،

⁴¹مَاشِي لْلشَّعْبْ كُلُّه، وَلَكِنْ غِيرْ لْلشّْهُودْ اللِّي خْتَارْهُمْ اللَّهْ مْنْ قْبَلْ، وْاللِّي هُمَ حْنَا، اللِّي كْلِينَا وْشْرَبْنَا مْعَاهْ مْنْ بَعْدْمَا تّْبْعَتْ مْنْ الْمُوتْ.

⁴²وْمْنْ بَعْدْ وْصَّانَا بَاشْ نْخَبّْرُو النَّاسْ بْالْبْشَارَة، وْنْشَهْدُو بْلِّي اللَّهْ عْطَاهْ بَاشْ يْحْكَمْ عْلَى النَّاسْ الْحَيِّينْ وْالْمْيّْتِينْ.

⁴³وْلِيهْ كَيْشْهْدُو ݣَاعْ الْأَنْبِيَا بْلِّي كُلّْ وَاحْدْ كَيْآمْنْ بِيهْ غَتّْغْفَرْ لِيهْ الدّْنُوبْ بْالْإِسْمْ دْيَالُه».

⁴⁴وْمْلِّي كَانْ بُطْرُسْ كَيْݣُولْ هَادْ الْكْلَامْ، نْزَلْ الرُّوحْ الْقُدُسْ عْلَى ݣَاعْ النَّاسْ اللِّي كَانُو كَيْسَمْعُو لْكْلَامُه.

⁴⁵وْتّْعَجّْبُو ݣَاعْ الْمُومْنِينْ لِيهُودْ اللِّي جَاوْ مْعَ بُطْرُسْ، مْلِّي شَافُو بْلِّي اللَّهْ فَاضْ بْالنِّعْمَة دْيَالْ الرُّوحْ الْقُدُسْ حْتَّى عْلَى اللِّي مَاشِي يْهُودْ،

⁴⁶حِيتْ سْمْعُوهُمْ كَيْتّْكَلّْمُو بْلُغَاتْ، وْكَيْسَبّْحُو اللَّهْ. وْهُوَ يْݣُولْ بُطْرُسْ:

⁴⁷«وَاشْ يْقْدَرْ شِي وَاحْدْ يْمْنَعْ الْمَا بَاشْ مَا يْتْعَمّْدُوشْ هَادْ النَّاسْ اللِّي نْزَلْ عْلِيهُمْ الرُّوحْ الْقُدُسْ بْحَالْنَا حْنَا؟».

⁴⁸وْآمْرْهُمْ بُطْرُسْ بَاشْ يْتْعَمّْدُو بْإِسْمْ يَسُوعْ الْمَسِيحْ. وْمْنْ بَعْدْ طْلَبْ مْنُّه كُرْنِيلْيُوسْ وْعَائِلْتُه بَاشْ يْݣْلَسْ مْعَاهُمْ شِي يَّامَاتْ.