Read Moroccan Standard Translation الْأَعْمَالْ 11 Bible Online

الْأَعْمَالْ 11 - Moroccan Standard Translation bible

الْأَعْمَالْ 11

¹الْفَصْلْ حْضَاشْ وْسْمْعُو الرُّسُلْ وْالْخُوتْ الْمُومْنِينْ فْبْلَادْ الْيَهُودِيَّة، بْلِّي حْتَّى النَّاسْ اللِّي مَاشِي يْهُودْ قْبْلُو كْلَامْ اللَّهْ.

²وْمْلِّي رْجَعْ بُطْرُسْ لْأُورْشَلِيمْ، خَاصْمُو عْلِيهْ الْمُومْنِينْ اللِّي مْنْ أَصْلْ يْهُودِي،

³وْݣَالُو لِيهْ: «رَاكْ دْخَلْتِي لْعَنْدْ نَاسْ مَاشِي يْهُودْ، وْكْلِيتِي مْعَاهُمْ!»

⁴وْبْدَا بُطْرُسْ كَيْعَاوْدْ لِيهُمْ عْلَى كُلّْ مَا جْرَا كْلْمَة بْكْلْمَة، وْݣَالْ:

⁵«كْنْتْ كَنْصَلِّي فْمْدِينْةْ يَافَا، وْجَاتْنِي الدُّوخَة وْغَبْتْ، وْشْفْتْ فْرُؤْيَا شِي حَاجَة نَازْلَة بْحَالْ شِي يْزَارْ كْبِيرْ مْعْقُودْ مْنْ طْرَافُه بْرَبْعَة وْنَازْلْ مْنْ السّْمَا حْتَّى وْصَلْ حْدَايَ.

⁶وْمْلِّي حَقَّقْتْ فِيهْ مْزْيَانْ، بَانْ لِيَّ فِيهْ بْهَايْمْ الْأَرْضْ وْالْوْحُوشْ وْالْحَيَوَانَاتْ اللِّي كَتْزْحَفْ وْطْيُورْ السّْمَا.

⁷وْسْمَعْتْ وَاحْدْ الصُّوتْ كَيْݣُولْ: آ بُطْرُسْ، نُوضْ دْبَحْ وْكُولْ!.

⁸وَلَكِنْ أَنَا ݣْلْتْ: لَّا، آ رْبِّي! عَمّْرْ شِي حَاجَة حْرَامْ وْلَا مْنْجُوسَة مَا دْخْلَاتْ لْفُمِّي مْنْ قْبَلْ!.

⁹وْهُوَ يْجَاوْبْنِي الصُّوتْ مْنْ السّْمَا مَرَّة خْرَى: اللِّي دَارُه اللَّهْ طَاهْرْ، مَا تْرَدُّوشْ نْتَ مْنْجُوسْ.

¹⁰وْتّْعَاوْدْ هَادْ الْكْلَامْ تْلَاتَة دْ الْمَرَّاتْ، وْمْنْ بَعْدْ تّْرْفَعْ لِيزَارْ وْݣَاعْ دَاكْشِّي اللِّي فِيهْ لْلسّْمَا.

¹¹وْدِيكْ السَّاعَة، وْقْفُو تْلَاتَة دْ الرّْجَالْ حْدَا بَابْ الدَّارْ اللِّي كْنْتْ فِيهَا، صِيفْطْهُمْ لِيَّ اللَّهْ مْنْ قَيْصَرِيَّة.

¹²وْݣَالْ لِيَّ رُوحْ اللَّهْ بَاشْ نْمْشِي مْعَاهُمْ بْلَا مَا نْشْكّْ فْحْتَّى حَاجَة. وْمْشَاوْ مْعَايَ هَادْ الْخُوتْ بْسْتَّة. وْمْلِّي دْخَلْنَا لْدَارْ هَادْ الرَّاجْلْ،

¹³عَاوْدْ لِينَا كِيفَاشْ شَافْ الْمَلَاكْ وَاقْفْ فْدَارُه وْكَيْݣُولْ لِيهْ: صِيفْطْ شِي وَاحْدْ لْيَافَا بَاشْ يْجِيبْ سِمْعَانْ اللِّي مْكَنِّي بُطْرُسْ،

¹⁴وْهُوَ غَادِي يْكَلّْمَكْ بْكْلَامْ بِيهْ غَتْنْجَا نْتَ وْعَائِلْتْكْ كُلّْهَا.

¹⁵وْمْلِّي بْدِيتْ كَنْتّْكَلّْمْ، نْزَلْ عْلِيهُمْ الرُّوحْ الْقُدُسْ كِمَا نْزَلْ عْلِينَا حْتَّى حْنَا فْالْمَرَّة اللّْوّْلَى.

¹⁶وْأَنَا نْتّْفَكّْرْ الْكْلَامْ اللِّي ݣَالْ لِينَا الرَّبّْ يَسُوعْ: يُوحَنَّا عَمّْدْ بْالْمَا، أَمَّا نْتُمَ رَاكُمْ غَادِي تْتْعَمّْدُو بْالرُّوحْ الْقُدُسْ.

¹⁷إِيوَا، إِلَا كَانْ اللَّهْ نْعَمْ عْلَى هَادْ النَّاسْ كِمَا نْعَمْ عْلِينَا حْتَّى حْنَا مْلِّي آمْنَّا بْالرَّبّْ يَسُوعْ الْمَسِيحْ، آشْ نْكُونْ أَنَا حْتَّى نْعْصَى أَمْرْ اللَّهْ؟».

¹⁸وْمْلِّي سْمْعُو الْحَاضْرِينْ هَادْ الْكْلَامْ، تْهَدّْنُو وْعْطَاوْ الْعَزّْ لْلَّهْ وْݣَالُو: «حْتَّى النَّاسْ اللِّي مَاشِي يْهُودْ نْعَمْ عْلِيهُمْ اللَّهْ مْنْ عَنْدُه بْالتُّوبَة اللِّي كَتْدِّي لْلْحَيَاةْ!».

¹⁹أَمَّا هَادُوكْ اللِّي تّْشَتّْتُو بْسْبَابْ الْخُوفْ وْالْعْدَابْ اللِّي طْرَا لِيهُمْ مْنْ بَعْدْمَا تّْقْتَلْ اسْتِفَانُوسْ، مْشَاوْ لْبْلَادْ فِينِيقِيَة وْقُبْرُصْ وْأَنْطَاكْيَة، وْمَا كَانُوشْ كَيْخَبّْرُو شِي وَاحْدْ مْنْ غِيرْ لِيهُودْ بْالْبْشَارَة.

²⁰وَلَكِنْ شِي وْحْدِينْ مْنّْهُمْ، مْنْ قُبْرُصْ وْمْدِينْةْ الْقَيْرَوَانْ، مْلِّي جَاوْ لْأَنْطَاكْيَة بْدَاوْ كَيْخَبّْرُو حْتَّى الْيُونَانِيِّينْ، وْكَلّْمُوهُمْ عْلَى الْبْشَارَة دْيَالْ الرَّبّْ يَسُوعْ.

²¹وْكَانْ الرَّبّْ كَيْعَاوْنْهُمْ، وْآمْنُو نَاسْ كْتَارْ وْرْجْعُو لْطْرِيقْ الرَّبّْ.

²²وْمْلِّي وْصْلَاتْ هَادْ الْخْبَارْ لْكْنِيسْةْ أُورْشَلِيمْ، صِيفْطُو بَرْنَابَا لْأَنْطَاكْيَة.

²³وْفْالْوَقْتْ فَاشْ جَا وْشَافْ نِعْمَةْ اللَّهْ، فْرَحْ بْزَّافْ وْشَجّْعْهُمْ كُلّْهُمْ بَاشْ يْبْقَاوْ تَابْتِينْ فْالْإِيمَانْ دْيَالْهُمْ بْالرَّبّْ بْقَلْبْ صَافِي.

²⁴عْلَاحْقَّاشْ بَرْنَابَا كَانْ رَاجْلْ مْزْيَانْ، وْمْعَمّْرْ بْالرُّوحْ الْقُدُسْ وْبْالْإِيمَانْ. وْآمْنَاتْ بْالرَّبّْ جْمَاعَة كْبِيرَة دْ النَّاسْ.

²⁵وْمْنْ بَعْدْ، مْشَى بَرْنَابَا لْطَرْسُوسْ بَاشْ يْقَلّْبْ عْلَى شَاوُلْ،

²⁶وْمْلِّي لْقَاهْ جَابُه مْعَاهْ لْأَنْطَاكْيَة. وْبْقَاوْ فِيهَا عَامْ كَامْلْ وْهُمَ كَيْتّْجَمْعُو مْعَ الْخُوتْ فْالْكْنِيسَة، وْكَيْعَلّْمُو بْزَّافْ دْ النَّاسْ. وْفْأَنْطَاكْيَة تّْسْمَّاوْ التّْلَامْدْ أَوَّلْ مَرَّة بْالْمَسِيحِيِّينْ.

²⁷وْفْدِيكْ لِيَّامْ، جَاوْ شِي أَنْبِيَا مْنْ أُورْشَلِيمْ لْأَنْطَاكْيَة.

²⁸وْنَاضْ وَاحْدْ مْنّْهُمْ، سْمِيتُه أَݣَابُوسْ، وْتّْنَبّْأْ بْالْوَحْيْ مْنْ رُوحْ اللَّهْ، وْݣَالْ بْلِّي جُوعْ صْعِيبْ غَادِي يْكُونْ فْالدّْنْيَا كُلّْهَا. وْهُوَ الجُّوعْ اللِّي كَانْ طْرَا فْيَّامَاتْ الْحَاكْمْ كُلُودِيُوسْ.

²⁹وْتَّافْقُو التّْلَامْدْ، كُلّْ وَاحْدْ وْعْلَاشْ قْدَرْ، بَاشْ يْعَاوْنُو الْخُوتْ اللِّي سَاكْنِينْ فْبْلَادْ الْيَهُودِيَّة.

³⁰وْدَاكْشِّي اللِّي دَارُو، وْالْمُعَاوَنَة اللِّي جْمْعُوهَا صِيفْطُوهَا مْعَ بَرْنَابَا وْشَاوُلْ لْشْيُوخْ الْكْنِيسَة.