Read Moroccan Standard Translation الْأَعْمَالْ 12 Bible Online

الْأَعْمَالْ 12 - Moroccan Standard Translation bible

الْأَعْمَالْ 12

¹الْفَصْلْ طْنَاشْ وْفْدِيكْ لِيَّامْ، شْدّْ الْمَلِكْ هِيرُودُسْ شِي مُومْنِينْ مْنْ الْكْنِيسَة بَاشْ يْعَدّْبْهُمْ.

²وْقْتَلْ يَعْقُوبْ خُو يُوحَنَّا بْالسِّيفْ.

³وْحِيتْ شَافْ هَادْشِّي كَيْفَرّْحْ لِيهُودْ، شْدّْ بُطْرُسْ حْتَّى هُوَ. وْطْرَاتْ هَادْ الْأُمُورْ فْيَّامَاتْ عِيدْ الْخُبْزْ الْفْطِيرْ.

⁴وْمْلِّي شْدُّه دَارُه فْالْحَبْسْ، وْدَارْ عْلِيهْ رْبْعَة دْ الْفَرْقَاتْ دْ الْعَسْكَرْ بَاشْ يْعَسُّو عْلِيهْ، كُلّْ فَرْقَة فِيهَا رْبْعَة دْ الْعْسَاكْرِيَّة. وْكَانْ نَاوِي يْحَاكْمُه قُدَّامْ الشَّعْبْ مْنْ بَعْدْ عِيدْ الْفِصْحْ.

⁵وْهَكَّا بْقَى بُطْرُسْ فْالْحَبْسْ. وَلَكِنْ الْكْنِيسَة كَانْتْ مْدَاوْمَة عْلَى الصّْلَاة لْلَّهْ مْنْ جِهْةْ بُطْرُسْ.

⁶وْفْاللِّيلَة اللِّي قْبَلْ النّْهَارْ اللِّي نْوَى فِيهْ هِيرُودُسْ يْحَاكْمْ بُطْرُسْ قُدَّامْ الشَّعْبْ، كَانْ بُطْرُسْ نَاعْسْ بِينْ جُوجْ عْسَاكْرِيَّة. وْكَانْ مْكَتّْفْ بْجُوجْ سْنَاسْلْ، وْفْالْبَابْ وَاقْفِينْ الْعْسَّاسَا اللِّي كَيْحْضِيوْ الْحَبْسْ.

⁷وْعْلَى غَفْلَة بَانْ مَلَاكْ مْنْ عَنْدْ الرَّبّْ، وْلْمَعْ ضَوّْ فْالْبِيتْ فِينْ كَانْ مْشْدُودْ. وْضْرَبْ الْمَلَاكْ بُطْرُسْ فْجَنْبُه، وْنَوّْضُه وْݣَالْ لِيهْ: «نُوضْ دْغْيَا!» وْطَاحُو السّْنَاسْلْ مْنْ يْدِّيهْ.

⁸وْݣَالْ لِيهْ الْمَلَاكْ: «سْدّْ حْزَامْكْ وْرْبَطْ سْيُورْ صْبَّاطْكْ». وْدَاكْشِّي نِيتْ اللِّي دَارْ بُطْرُسْ. وْعَاوْدْ ݣَالْ لِيهْ: «لْبَسْ السّْلْهَامْ دْيَالْكْ وْتْبَعْنِي».

⁹وْخْرَجْ بُطْرُسْ تَابْعْ الْمَلَاكْ، وْحْسَابْ لِيهْ هَادْشِّي اللِّي دَارْ الْمَلَاكْ غِيرْ رُؤْيَا، وْمَا عْرَفْشْ بْلِّي رَاهْ صْحِيحْ.

¹⁰وْدَازُو عْلَى الْفَرْقَة دْيَالْ الْعْسَّة اللّْوّْلَى وْالْفَرْقَة التَّانْيَة، وْوَصْلُو لْلْبَابْ دْ الْحْدِيدْ اللِّي كَيْدِّي لْلْمْدِينَة، وْهُوَ يْتّْحَلّْ لِيهُمْ بُوحْدُه وْخَرْجُو، وْغِيرْ قْطْعُو الزَّنْقَة، وْهُوَ يْتّْفَارْقْ الْمَلَاكْ مْعَ بُطْرُسْ.

¹¹وْفْدِيكْ السَّاعَة تّْوَݣّْضْ بُطْرُسْ وْݣَالْ: «دَابَا تْيِقّْنْتْ بْلِّي الرَّبّْ صِيفْطْ لِيَّ الْمَلَاكْ دْيَالُه، وْعْتَقْنِي مْنْ يْدِّينْ هِيرُودُسْ وْمْنْ كُلّْ مَا كَانْ الشَّعْبْ دْ لِيهُودْ بَاغِي يْدِيرْ».

¹²وْمْلِّي عْرَفْ هَادْشِّي، مْشَى لْدَارْ مَرْيَمْ أُمّْ يُوحَنَّا الْمْكَنِّي مَرْقُسْ. وْكَانُو بْزَّافْ دْ الْمُومْنِينْ مْجْمُوعِينْ تْمَّ كَيْصَلِّيوْ.

¹³وْهُوَ يْدَقّْ فْبَابْ الدّْخْلَة دْيَالْ الدَّارْ، وْمْشَاتْ وَاحْدْ الْخْدَّامَة سْمِيتْهَا رَوْدَا بَاشْ تْشُوفْ شْكُونْ.

¹⁴وْمْلِّي عَرْفَاتْ الصُّوتْ دْيَالْ بُطْرُسْ، رْجْعَاتْ بْالزّْرْبَة بْلَا مَا تْحَلّْ الْبَابْ مْنْ كْتْرَةْ الْفَرْحَة، وْدْخْلَاتْ وْݣَالْتْ لِيهُمْ بْلِّي بُطْرُسْ وَاقْفْ حْدَا الْبَابْ.

¹⁵وْهُمَ يْݣُولُو لِيهَا: «رَاكِ غِيرْ كَتّْخَيّْلِي؟». وَلَكِنْ هِيَ بْقَاتْ شَادَّة فْكْلَامْهَا. وْݣَالُو لِيهَا: «هَادَاكْ رَاهْ الْمَلَاكْ دْيَالُه».

¹⁶وَلَكِنْ بُطْرُسْ بْقَى كَيْدَقّْ فْالْبَابْ. وْمْلِّي حْلُّو لِيهْ وْشَافُوهْ، تّْعَجّْبُو.

¹⁷وْشَيّْرْ لِيهُمْ بْيْدُّه بَاشْ يْسَكْتُو. وْعَاوْدْ لِيهُمْ كِيفَاشْ خَرّْجُه الرَّبّْ مْنْ الْحَبْسْ. وْزَادْ ݣَالْ لِيهُمْ: «خَبّْرُو يَعْقُوبْ وْالْخُوتْ الْمُومْنِينْ بْهَادْشِّي اللِّي طْرَا». وْمْنْ بَعْدْ خْرَجْ مْنْ تْمَّ وْمْشَى لْبْلَاصَة خْرَى.

¹⁸وْمْلِّي طْلَعْ الصّْبَاحْ خَافُو الْعْسَّاسَا دْيَالْ الْحَبْسْ وْحَارُو آشْ يْدِيرُو. وْبْدَاوْ كَيْݣُولُو لْبَعْضِيَّاتْهُمْ: «شْنُو جْرَا لْبُطْرُسْ؟».

¹⁹وْمْلِّي بْغَاهْ هِيرُودُسْ وْمَا لْقَاهْشْ، سْوّْلْ الْعْسَّاسَا وْحْكَمْ عْلِيهُمْ بْالْمُوتْ. وْمْنْ بَعْدْ هَادْشِّي، مْشَى هِيرُودُسْ مْنْ بْلَادْ الْيَهُودِيَّة لْقَيْصَرِيَّة وْبْقَى تْمَّ.

²⁰وْكَانْ هِيرُودُسْ سَاخْطْ عْلَى النَّاسْ دْيَالْ صُورْ وْدْيَالْ صَيْدَا. وْتَّافْقُو بِينَاتْهُمْ وْمْشَاوْ شِي وْحْدِينْ مْنّْهُمْ لْعَنْدُه، وْطْلْبُو مْنْ بَلَاسْتُسْ الْمْسْؤُولْ عْلَى بِيتْ النّْعَاسْ دْ الْمَلِكْ، بَاشْ يْتّْصَالْحُو مْعَ الْمَلِكْ، عْلَاحْقَّاشْ بْلَادْهُمْ كَتَاخُدْ الْمُونَة دْيَالْهَا مْنْ مَمْلَكَةْ هِيرُودُسْ.

²¹وْفْالنّْهَارْ اللِّي غَيْسْتَقْبَلْهُمْ فِيهْ هِيرُودُسْ لْبَسْ اللّْبْسَة الْمَلَكِيَّة، وْݣْلَسْ عْلَى الْكُرْسِي دْ الْحُكْمْ كَيْخْطُبْ عْلِيهُمْ.

²²وْبْدَاتْ الجّْمَاعَة دْ النَّاسْ كَتْݣُولْ بْصُوتْ عَالِي: «هَادَا صُوتْ دْيَالْ إِلَاهْ مَاشِي دْيَالْ بَشَرْ!».

²³وْفْدِيكْ السَّاعَة ضْرَبْ مَلَاكْ مْنْ عَنْدْ الرَّبّْ هِيرُودُسْ عْلَاحْقَّاشْ مَا عْطَاشْ الْعَزّْ لْلَّهْ. وْبْدَا الدُّودْ كَيَاكُلْ فِيهْ وْمَاتْ.

²⁴وْكَانْ كْلَامْ اللَّهْ كَيْزِيدْ يْدِيعْ وْيْتّْعْرَفْ.

²⁵وْبَعْدْمَا كَمّْلْ بَرْنَابَا وْشَاوُلْ خْدَمْتْهُمْ، رْجْعُو مْنْ أُورْشَلِيمْ، وْمْعَاهُمْ يُوحَنَّا الْمْكَنِّي مَرْقُسْ.