Read Moroccan Standard Translation الْأَعْمَالْ 13 Bible Online

الْأَعْمَالْ 13 - Moroccan Standard Translation bible

الْأَعْمَالْ 13

¹الْفَصْلْ تْلْطَاشْ وْكَانْ فْكْنِيسْةْ أَنْطَاكْيَة أَنْبِيَا وْمُعَلِّمِينْ هُمَ: بَرْنَابَا، وْسِمْعَانْ اللِّي مْكَنِّي الْكْحَلْ، وْلُوكِيُوسْ الْقَيْرَوَانِي، وْمَنَايِنْ اللِّي تْرَبَّى مْعَ الْحَاكْمْ هِيرُودُسْ، وْشَاوُلْ.

²وْمْلِّي كَانُو صَايْمِينْ وْكَيْعَبْدُو الرَّبّْ، ݣَالْ لِيهُمْ الرُّوحْ الْقُدُسْ: «عْزْلُو لِيَّ بَرْنَابَا وْشَاوُلْ لْلْخْدْمَة اللِّي خْتَارِيتْهُمْ لِيهَا».

³وْصَامُو وْصْلَّاوْ، وْحَطُّو يْدِّيهُمْ عْلَى بَرْنَابَا وْشَاوُلْ بَاشْ يْبَارْكُوهُمْ، وْمْنْ بَعْدْ خْلَّاوْهُمْ يْمْشِيوْ.

⁴وْصِيفْطْهُمْ الرُّوحْ الْقُدُسْ، وْمْشَاوْ لْسَالُوكِيَة وْمْنّْهَا سَافْرُو فْالْبْحَرْ لْقُبْرُصْ.

⁵وْمْلِّي وْصْلُو لْسَلَامِيسْ خَبّْرُو النَّاسْ بْكْلَامْ اللَّهْ فْدْيُورْ الصّْلَاة دْيَالْ لِيهُودْ، وْكَانْ مْعَاهُمْ يُوحَنَّا كَيْعَاوْنْهُمْ.

⁶وْدَازُو فْالْجَزِيرَة كُلّْهَا حْتَّى وْصْلُو لْبَافُوسْ، وْفِيهَا لْقَاوْ وَاحْدْ الرَّاجْلْ سْحَّارْ، وْهُوَ نْبِي كْدَّابْ يْهُودِي سْمِيتُه بَارْيَشُوعْ،

⁷اللِّي كَانْ مْعَ الْحَاكْمْ سَرْجِيُوسْ بُولُسْ. وْكَانْ هَادْ الْحَاكْمْ رَاجْلْ دْكِي، وْهُوَ يْعَيّْطْ عْلَى بَرْنَابَا وْشَاوُلْ حِيتْ بْغَا يْسْمَعْ كْلَامْ اللَّهْ.

⁸وَلَكِنْ السّْحَّارْ عَلِيمْ، وْهَادِي مْعْنِيّْةْ سْمِيتُه، وْقَفْ ضْدّْهُمْ كَيْقَلّْبْ بَاشْ يْبَعّْدْ الْحَاكْمْ مْنْ الْإِيمَانْ.

⁹وَلَكِنْ شَاوُلْ، اللِّي سْمِيتُه عَاوْتَانِي بُولُسْ، تْعَمّْرْ مْنْ الرُّوحْ الْقُدُسْ وْحَقَّقْ فْالسّْحَارْ مْزْيَانْ

¹⁰وْݣَالْ لِيهْ: «آ هَادْ الرَّاجْلْ اللِّي عَامْرْ بْالْغْشّْ وْالْخْدِيعَة، آ وَلْدْ إِبْلِيسْ، آ عَدُوّْ الْخِيرْ! وَاشْ مَا غَتْسَالِيشْ مْنْ تْعْوَاجْ طْرْقَانْ الرَّبّْ الْمْقَادَّة؟

¹¹هَا هِيَ يْدّْ الرَّبّْ كَتْنْزَلْ عْلِيكْ، وْغَتْوَلِّي عْمَى مَا كَتْشُوفْشْ ضَوّْ الشّْمْسْ حْتَّى لْشِي وَقْتْ». وْفْدِيكْ السَّاعَة غْطَّاتْ جْلَالَة كَحْلَا عِينِيهْ. وْبْدَا كَيْضُورْ فْمُوضْعُه وْكَيْقَلّْبْ شْكُونْ اللِّي يْشْدُّه مْنْ يْدُّه.

¹²وْمْلِّي شَافْ الْحَاكْمْ أَشْنُو جْرَا، آمْنْ حِيتْ تّْعَجّْبْ مْنْ التَّعْلِيمْ دْيَالْ الرَّبّْ.

¹³وْمْنْ بَعْدْ سَافْرْ بُولُسْ فْالْبْحَرْ هُوَ وْصْحَابُه مْنْ بَافُوسْ لْبَرْجَة فْبْلَادْ بَمْفِيلِيَّة. وَلَكِنْ يُوحَنَّا تّْفَارْقْ مْعَاهُمْ وْرْجَعْ لْأُورْشَلِيمْ.

¹⁴وْمْشَا بُولُسْ وْبَرْنَابَا مْنْ بَرْجَة لْأَنْطَاكْيَة فْبِيسِيدِيَّة. وْدَخْلُو لْدَارْ الصّْلَاة نْهَارْ السّْبْتْ وْݣْلْسُو تْمَّ.

¹⁵وْمْنْ بَعْدْ الْقْرَايَة فْشْرَعْ مُوسَى وْكْتُبْ الْأَنْبِيَا، صِيفْطُو لِيهُمْ الرُّؤَسَا دْيَالْ دَارْ الصّْلَاة وْݣَالُو لِيهُمْ: «آ الْخُوتْ، إِلَا كَانْ عَنْدْكُمْ مَا تْݣُولُو لْلشَّعْبْ مْنْ كْلَامْ اللَّهْ بَاشْ تْشَجّْعُوهُمْ، تّْكَلّْمُو».

¹⁶وْهُوَ يْوْقَفْ بُولُسْ وْشَيّْرْ بْيْدُّه وْݣَالْ: «آ وْلَادْ إِسْرَائِيلْ وْاللِّي مْتَّاقْيِينْ اللَّهْ، تْصَنّْتُو لِيَّ:

¹⁷إِلَاهْ شَعْبْ إِسْرَائِيلْ، خْتَارْ جْدُودْنَا وْرْفَعْ مْنْ مْقَامْ الشَّعْبْ فْالْغُرْبَة دْيَالُه فْبْلَادْ مِصْرْ، وْبْالْقُوَّة دْيَالُه الْكْبِيرَة خَرّْجْهُمْ مْنّْهَا،

¹⁸وْرْبْعِينْ عَامْ وْهُوَ صَابْرْ مْعَاهُمْ فْالصَّحْرَا.

¹⁹وْهْلَكْ سْبْعَة دْيَالْ الشّْعُوبْ فْبْلَادْ كَنْعَانْ وْعْطَى بْلَادْهُمْ وَرْتْ،

²⁰وْمْنْ بَعْدْ هَادْشِّي بْرْبَعْمِيَة وْخَمْسِينْ عَامْ تْقْرِيبًا. عْطَى اللَّهْ لْلشَّعْبْ دْيَالُه قُضَاةْ، حْتَّى لْلْوَقْتْ فَاشْ جَا النّْبِي صَمُوئِيلْ.

²¹وْهُمَ يْطْلْبُو مْنْ اللَّهْ مَلِكْ، وْعْطَاهُمْ شَاوُلْ بْنْ قَيْسْ مْنْ قْبِيلْةْ بْنْيَامِينْ، لْمُدَّةْ رْبْعِينْ عَامْ.

²²وْمْنْ بَعْدْ حَيّْدُه اللَّهْ وْدَارْ دَاوُدْ مَلِكْ عْلِيهُمْ، وْݣَالْ اللَّهْ عْلِيهْ: رَانِي لْقِيتْ دَاوُدْ وَلْدْ يَسَّى رَاجْلْ كَيْرْتَاحْ لِيهْ قَلْبِي، وْغَادِي يْدِيرْ مُرَادِي كُلُّه.

²³مْنْ تْرِّيكْةْ دَاوُدْ عْطَى اللَّهْ لْشَعْبْ إِسْرَائِيلْ مُنَجِّي هُوَ يَسُوعْ عْلَى حْسَابْ الْوَعْدْ دْيَالُه.

²⁴وْقْبَلْ مَا يْجِي يَسُوعْ، خَبّْرْ يُوحَنَّا شَعْبْ إِسْرَائِيلْ كُلُّه بْمَعْمُودِيَّةْ التُّوبَة.

²⁵وْمْلِّي قَرّْبْ يُوحَنَّا يْكَمّْلْ الْخْدْمَة دْيَالُه ݣَالْ: وَاشْ كَتْضَنُّو بْلِّي أَنَا هُوَ الْمَسِيحْ؟ لَّا! أَنَا مَاشِي هُوَ، وَلَكِنْ غَيْجِي مْنْ بَعْدْ مْنِّي، وْأَنَا مَا نْسْتَاهْلْشْ نْحَلّْ سْيُورْ صْبَّاطُه.

²⁶آ الْخُوتْ، آ وْلَادْ إِبْرَاهِيمْ، وْهَادُوكْ اللِّي مْتَّاقْيِينْ اللَّهْ فْوَسْطْ مْنّْكُمْ، رَاهْ لِينَا صِيفْطْ اللَّهْ الْكْلْمَة دْيَالْ هَادْ النّْجَا.

²⁷حِيتْ لَا سُكَّانْ أُورْشَلِيمْ وَلَا الرُّؤَسَا دْيَالْهُمْ كَانُو كَيْعَرْفُو الْمَسِيحْ، وَلَا فَهْمُو كْلَامْ الْأَنْبِيَا اللِّي كَيْتّْقْرَا كُلّْ سْبْتْ، وْحْكْمُو عْلِيهْ بْالْمُوتْ، وْهَكَّا كَمّْلُو دَاكْشِّي اللِّي ݣَالُوهْ الْأَنْبِيَا.

²⁸وْوَاخَّا مَا لْقَاوْ عْلِيهْ حْتَّى شِي تُهْمَة يْسْتَاهْلْ عْلِيهَا الْمُوتْ، طْلْبُو مْنْ بِيلَاطُسْ بَاشْ يْقْتْلُه.

²⁹وْهَكَّا، مْلِّي كَمّْلُو كُلّْ مَا كْتْبُوهْ الْأَنْبِيَا عْلِيهْ، نْزّْلُوهْ مْنْ الصّْلِيبْ وْدْفْنُوهْ فْوَاحْدْ الْقْبَرْ.

³⁰وَلَكِنْ اللَّهْ بَعْتُه مْنْ الْمُوتْ،

³¹وْبَانْ يَّامَاتْ كْتَارْ لْهَادُوكْ اللِّي مْشَاوْ مْعَاهْ مْنْ الْجَلِيلْ لْأُورْشَلِيمْ. وْهُمَ دَابَا شْهُودْ لِيهْ وَسْطْ الشَّعْبْ.

³²وْهَا حْنَا كَنْخَبّْرُوكُمْ بْلِّي الْوَعْدْ اللِّي عْطَاهْ اللَّهْ لْجْدُودْنَا،

³³حَقّْقُه لِينَا الْيُومْ حْنَا وْلَادْهُمْ، مْلِّي بْعَتْ يَسُوعْ مْنْ الْمُوتْ، كِمَا مْكْتُوبْ فْالْمَزْمُورْ التَّانِي: نْتَ وْلْدِي وْأَنَا الْيُومْ وْلِّيتْ بَّاكْ.

³⁴رَاهْ اللَّهْ بَعْتُه مْنْ الْمُوتْ وْمَا خْلَّاشْ دَاتُه تْتْعَفّْنْ، وْرَاهْ مْكْتُوبْ فْكْتَابْ اللَّهْ: غَادِي نْعْطِيكُمْ الْبَرَكَاتْ الْمْقَدّْسَة وْالصّْحِيحَة دْيَالْ دَاوُدْ.

³⁵وْعْلَى هَادْشِّي ݣَالْ دَاوُدْ فْمَزْمُورْ آخُرْ: مَا غَادِيشْ تْخَلِّي الْقُدُّوسْ دْيَالْكْ يْتّْعَفّْنْ.

³⁶حِيتْ دَاوُدْ مْنْ بَعْدْمَا دَارْ مُرَادْ اللَّهْ فْالْجِيلْ دْيَالُه، مَاتْ وْتّْدْفَنْ مْعَ جْدُودُه وْتّْعَفّْنْ فْالْقْبَرْ.

³⁷أَمَّا اللِّي بَعْتُه اللَّهْ مْنْ الْمُوتْ رَاهْ ݣَاعْ مَا تّْعَفّْنْ.

³⁸وْخَاصّْكُمْ تْعَرْفُو آ الْخُوتْ، رَاهْ حْنَا كَنْخَبّْرُوكُمْ بْلِّي بْيَسُوعْ كَتْكُونْ مَغْفِرَةْ الدّْنُوبْ، وْهَادْ الصّْلَاحْ اللِّي مَا قْدَرْتُوشْ تْلْقَاوْهْ بْشْرَعْ مُوسَى،

³⁹لْقِيتُوهْ بْيَسُوعْ اللِّي بِيهْ كُلّْ وَاحْدْ كَيْوَلِّي بَارِي مْلِّي كَيْآمْنْ.

⁴⁰رْدُّو بَالْكُمْ بَاشْ مَا يْطْرَاشْ لِيكُمْ كِيفْ ݣَالُو الْأَنْبِيَا:

⁴¹شُوفُو آ اللِّي كَتْضْحْكُو! تّْعَجّْبُو وْمُوتُو! عْلَاحْقَّاشْ غَادِي نْدِيرْ فْيَّامْكُمْ شِي حَاجَة عَمّْرْكُمْ مَا غَادِي تِّيْقُوهَا وَاخَّا يْخَبّْرُوكُمْ بِيهَا».

⁴²وْمْلِّي كَانْ بُولُسْ وْبَرْنَابَا خَارْجِينْ مْنْ دَارْ الصّْلَاة، طْلْبُو مْنّْهُمْ النَّاسْ بَاشْ يْرْجْعُو السّْبْتْ الجَّايْ وْيْزِيدُو يْكَلّْمُوهُمْ مَرَّة خْرَى عْلَى هَادْشِّي اللِّي سْمْعُوهْ.

⁴³وْمْنْ بَعْدْمَا كْمَلْ الْإِجْتِمَاعْ، تْبْعُوهُمْ بْزَّافْ دْ النَّاسْ مْنْ لِيهُودْ وْمْنْ غِيرْ لِيهُودْ اللِّي كَيْعَبْدُو اللَّهْ، وْكَلّْمْهُمْ بُولُسْ وْبَرْنَابَا وْقْنْعُوهُمْ بَاشْ يْبْقَاوْ تَابْتِينْ فْنِعْمَةْ اللَّهْ.

⁴⁴وْفْنْهَارْ السّْبْتْ لَاخُرْ، تّْجَمْعُو سُكَّانْ الْمْدِينَة كُلّْهُمْ تْقْرِيبًا بَاشْ يْسَمْعُو كْلَامْ الرَّبّْ.

⁴⁵وْمْلِّي شَافُو لِيهُودْ الجّْمَاعَاتْ الْكْبِيرَة دْ النَّاسْ، عَمْرَاتْ قْلُوبْهُمْ بْالْغِيرَة وْبْدَاوْ كَيْعَارْضُو كْلَامْ بُولُسْ وْكَيْسَبُّوهْ.

⁴⁶وْبْلَا خُوفْ ݣَالْ لِيهُمْ بُولُسْ وْبَرْنَابَا: «كَانْ خَاصّْنَا نْخَبّْرُوكُمْ نْتُمَ فْاللّْوّْلْ بْكْلَامْ اللَّهْ، وَلَكِنْ مَا قْبَلْتُوهْشْ، وْحْكَمْتُو عْلَى رَاسْكُمْ بْلِّي مَا كَتْسْتَاهْلُوشْ الْحَيَاةْ الدَّايْمَة. وْعْلَى هَادْشِّي غَادِي نْتّْكَلّْمُو مْعَ النَّاسْ اللِّي مَاشِي يْهُودْ.

⁴⁷حِيتْ هَكَّا وْصَّانَا الرَّبّْ: دْرْتْكْ بَاشْ تْكُونْ نُورْ لْلشّْعُوبْ، وْتْكُونْ نْجَا لْلنَّاسْ دْيَالْ الدّْنْيَا كُلّْهَا».

⁴⁸وْمْلِّي سْمْعُو النَّاسْ اللِّي مَاشِي يْهُودْ هَادْشِّي، فْرْحُو وْعْطَاوْ الْعَزّْ لْكْلَامْ الرَّبّْ. وْآمْنْ كُلّْ مْنْ خْتَارُه اللَّهْ لْلْحَيَاةْ الدَّايْمَة.

⁴⁹وْدَاعْ كْلَامْ الرَّبّْ فْدِيكْ الْبْلَادْ كُلّْهَا.

⁵⁰وَلَكِنْ لِيهُودْ حَرّْشُو الْعْيَالَاتْ اللِّي لَبَاسْ عْلِيهُمْ وْاللِّي مْتَّاقْيِينْ اللَّهْ، وْالْمْسْؤُولِينْ دْيَالْ الْمْدِينَة، وْبْقَاوْ كَيْتّْعَدَّاوْ عْلَى بُولُسْ وْبَرْنَابَا حْتَّى جْرَاوْ عْلِيهُمْ مْنْ بْلَادْهُمْ.

⁵¹وْهُوَ يْسُوسْ بُولُسْ وْبَرْنَابَا الْغَبْرَة اللِّي فْرْجْلِيهُمْ وْمْشَاوْ لْمْدِينْةْ إِيقُونِيَة.

⁵²وْكَانُو التّْلَامْدْ مْعَمّْرِينْ بْالْفَرْحَة وْالرُّوحْ الْقُدُسْ.