Read Moroccan Standard Translation الْأَعْمَالْ 14 Bible Online

الْأَعْمَالْ 14 - Moroccan Standard Translation bible

الْأَعْمَالْ 14

¹الْفَصْلْ رْبَعْطَاشْ وْدْخَلْ بُولُسْ وْبَرْنَابَا لْدَارْ الصّْلَاة دْيَالْ لِيهُودْ فْإِيقُونِيَة، وْتّْكَلّْمُو بْكْلَامْ خْلَّا بْزَّافْ دْ النَّاسْ مْنْ لِيهُودْ وْالْيُونَانِيِّينْ يْآمْنُو.

²وَلَكِنْ لِيهُودْ اللِّي مَاشِي مُومْنِينْ فَسّْدُو عْقُولْ النَّاسْ اللِّي مَاشِي يْهُودْ وْحَرّْشُوهُمْ عْلَى الْخُوتْ الْمُومْنِينْ.

³وَاخَّا هَكَّا بْقَى بُولُسْ وْبَرْنَابَا فْإِيقُونِيَة مُدَّة طْوِيلَة كَيْخَبّْرُو النَّاسْ عْلَى الرَّبّْ بْلَا مَا يْخَافُو، وْكَانْ كَيْشْهَدْ عْلَى كْلَامْ النِّعْمَة دْيَالُه، بْالْعَلَامَاتْ وْالْأُمُورْ الْعْجِيبَة اللِّي دَارْهَا عْلَى يْدِّيهُمْ.

⁴وْتّْقَسْمُو النَّاسْ دْيَالْ الْمْدِينَة، شِي وْحْدِينْ كَانُو مْعَ لِيهُودْ، وْوْحْدِينْ خْرِينْ مْعَ الرُّسُلْ.

⁵وْفْالْوَقْتْ اللِّي تَّافْقُو فِيهْ لِيهُودْ وْاللِّي مَاشِي يْهُودْ وْمْعَاهُمْ الرُّؤَسَا دْيَالْهُمْ بَاشْ يْهَجْمُو عْلِيهُمْ وْيْرَجْمُوهُمْ،

⁶عْرَفْ بُولُسْ وْبَرْنَابَا الْخُطَّة دْيَالْهُمْ، وْهُمَ يْهَرْبُو لْمْدُونْ لِسْتْرَة وْدَرْبَة وْلْلْمْدُونْ الْقْرِيبَة لِيهُمْ.

⁷وْتْمَّ بْدَاوْ كَيْخَبّْرُو النَّاسْ بْالْبْشَارَة.

⁸وْكَانْ فْلِسْتْرَة وَاحْدْ الرَّاجْلْ مْنْ نْهَارْ تّْزَادْ وْهُوَ زْحَّافْ، عَمّْرُه مَا تّْمْشَّى.

⁹وْكَانْ هَادْ الرَّاجْلْ ݣَالْسْ كَيْتّْصَنّْتْ لْبُولُسْ مْلِّي كَانْ كَيْتّْكَلّْمْ، وْشَافْ فِيهْ بُولُسْ مْزْيَانْ وْحَسّْ بْلِّي هَادْ الرَّاجْلْ عَنْدُه الْإِيمَانْ بَاشْ يْتّْشَافَى،

¹⁰وْهُوَ يْݣُولْ لِيهْ بْصُوتْ عَالِي: «نُوضْ وْقَفْ عْلَى رْجْلِيكْ!» وْنَاضْ وْقَفْ وْبْدَا كَيْمْشِي.

¹¹وْمْلِّي شَافُو الجّْمَاعَاتْ دْ النَّاسْ مَا دَارْ بُولُسْ، ݣَالُو بْلُغْتْهُمْ اللِّيقُونِيَّة: «الْإِلَاهَاتْ خْدَاوْ صُورْةْ الْبَشَرْ وْنْزْلُو لْعَنْدْنَا!».

¹²وْسْمَّاوْ بَرْنَابَا زَفْسْ، وْبُولُسْ هَرْمَسْ، حِيتْ هُوَ اللِّي كَانْ كَيْتّْكَلّْمْ بْزَّافْ.

¹³وْجَا رَاجْلْ الدِّينْ الْمْكَلّْفْ بْمَعْبَدْ الصَّنَمْ زَفْسْ اللِّي فْالدّْخْلَة دْيَالْ الْمْدِينَة، وْجَابْ التِّيرَانْ وْتِيجَانْ دْيَالْ الْوَرْدْ حْدَا الْبِيبَانْ، وْبْغَا يْقَدّْمْ الدّْبِيحَة مْعَ الجّْمَاعَاتْ دْيَالْ النَّاسْ.

¹⁴وْمْلِّي سْمْعُو الرُّسُلْ بُولُسْ وْبَرْنَابَا هَادْ الْخْبَارْ، قَطّْعُو حْوَايْجْهُمْ وْخَرْجُو بْالزّْرْبَة لْعَنْدْ الجّْمَاعَة دْ النَّاسْ كَيْغَوّْتُو

¹⁵وْكَيْݣُولُو: «آ هَادْ النَّاسْ، عْلَاشْ كَتْدِيرُو هَادْشِّي؟ رَاهْ حْتَّى حْنَا بَشَرْ وْكَنْحَسُّو بْحَالْكُمْ، كَنْخَبّْرُوكُمْ بْالْبْشَارَة بَاشْ تْخَلِّيوْ هَادْ الْأُمُورْ الْبَاطْلَة وْتْرْجْعُو لْلَّهْ الْحَيّْ، اللِّي خْلَقْ السّْمَا وْالْأَرْضْ وْالْبْحَرْ وْكُلّْ حَاجَة فِيهُمْ.

¹⁶وْهُوَ اللِّي خْلَّا ݣَاعْ الشّْعُوبْ فْقْدِيمْ الزّْمَانْ يْمْشِيوْ فْطْرِيقْهُمْ،

¹⁷وْوَاخَّا هَكَّاكْ كَانْ كَيْشْهَدْ لْرَاسُه عْلَى الْخِيرْ اللِّي كَيْدِيرْ: كَيْنَزّْلْ لِيكُمْ الشّْتَا مْنْ السّْمَا، وْكَيْعْطِيكُمْ الصَّابَا فْوَقْتْهَا، وْكَيْرْزَقْكُمْ بْالْمَاكْلَة، وْكَيْعَمّْرْ قْلُوبْكُمْ بْالْفَرْحَة».

¹⁸وْغِيرْ بَزّْزْ بَاشْ قَدْرُو الرُّسُلْ بْجُوجْ بْهَادْ الْكْلَامْ يْحَبْسُو النَّاسْ بَاشْ مَا يْقَدّْمُوشْ لِيهُمْ الدّْبِيحَة.

¹⁹وْمْنْ بَعْدْ جَاوْ شِي يْهُودْ مْنْ أَنْطَاكْيَة وْإِيقُونِيَة، وْقْنْعُو الجّْمَاعَاتْ دْ النَّاسْ بْكْلَامْهُمْ، وْهُمَ يْرَجْمُو بُولُسْ وْجَرُّوهْ لْبَرَّا دْ الْمْدِينَة وْهُمَ كَيْضَنُّو بْلِّي مَاتْ.

²⁰وْمْلِّي تّْجَمْعُو عْلِيهْ التّْلَامْدْ، نَاضْ وْرْجَعْ لْلْمْدِينَة. وْالْغَدّْ لِيهْ خْرَجْ مْعَ بَرْنَابَا لْدَرْبَة.

²¹وْخَبّْرْ بُولُسْ وْبَرْنَابَا النَّاسْ فْدَرْبَة بْالْبْشَارَة وْعَلّْمُو بْزَّافْ مْنّْهُمْ. وْمْنْ بَعْدْ رْجْعُو لْلِسْتْرَة، وْمْنّْهَا لْإِيقُونِيَة وْأَنْطَاكْيَة،

²²كَيْعَاوْنُو التّْلَامْدْ وْكَيْشَجّْعُوهُمْ بَاشْ يْبْقَاوْ تَابْتِينْ فْالْإِيمَانْ دْيَالْهُمْ، وْكَيْݣُولُو: «خَاصّْنَا نْدُوزُو فْبْزَّافْ دْيَالْ الْمْحَايْنْ بَاشْ نْدَخْلُو لْمَمْلَكَةْ اللَّهْ».

²³وْمْلِّي بُولُسْ وْبَرْنَابَا خْتَارُو لْلتّْلَامْدْ شْيُوخْ فْكُلّْ كْنِيسَة، صْلَّاوْ وْصَامُو مْعَاهُمْ وْخْلَّاوْهُمْ فْيْدِّينْ الرَّبّْ اللِّي آمْنُو بِيهْ.

²⁴وْمْلِّي دَازُو الرُّسُلْ بْجُوجْ مْنْ بْلَادْ بِيسِيدِيَّة، وْصْلُو لْبْلَادْ بَمْفِيلِيَّة.

²⁵وْخَبّْرُو النَّاسْ بْكْلَامْ اللَّهْ فْبَرْجَة، وْمْنْ بَعْدْ نْزْلُو لْأَتَّالْيَة.

²⁶وْمْنْ تْمَّ سَافْرُو فْالْبْحَرْ رَاجْعِينْ لْأَنْطَاكْيَة، اللِّي مْنّْهَا وَدّْعُوهُمْ الْخُوتْ فْأَمَانْ اللَّهْ لْلْخْدْمَة اللِّي كَمّْلُوهَا.

²⁷وْمْلِّي وْصْلُو لِيهَا جْمْعُو الْمُومْنِينْ دْيَالْ الْكْنِيسَة، وْخَبّْرُوهُمْ بْكُلّْ مَا دَارْ اللَّهْ مْعَاهُمْ، وْكِيفَاشْ فْتَحْ اللَّهْ بَابْ الْإِيمَانْ لْلنَّاسْ اللِّي مَاشِي يْهُودْ.

²⁸وْݣْلْسُو تْمَّ مُدَّة طْوِيلَة مْعَ التّْلَامْدْ.