Read Moroccan Standard Translation الْأَعْمَالْ 15 Bible Online

الْأَعْمَالْ 15 - Moroccan Standard Translation bible

الْأَعْمَالْ 15

¹الْفَصْلْ خْمْسْطَاشْ وْجَاوْ شِي وْحْدِينْ مْنْ بْلَادْ الْيَهُودِيَّة، وْبْدَاوْ كَيْعَلّْمُو الْخُوتْ الْمُومْنِينْ وْݣَالُو لِيهُمْ: «مَا يْمْكَنْشْ لِيكُمْ تْنْجَاوْ إِلَا مَا تْخَتّْنْتُوشْ كِمَا كَيْݣُولْ الشّْرَعْ دْيَالْ مُوسَى».

²وْمْلِّي طْرَاتْ مُنَاقَشَة قْوِيَّة بِينْهُمْ وْبِينْ بُولُسْ وْبَرْنَابَا، تَّافْقُو بَاشْ يْسَافْرْ بُولُسْ وْبَرْنَابَا وْشِي وْحْدِينْ خْرِينْ مْنّْهُمْ لْأُورْشَلِيمْ، بَاشْ يْتّْشَاوْرُو فْهَادْ الْقَضِيَّة مْعَ الرُّسُلْ وْالشّْيُوخْ.

³وْمْنْ بَعْدْمَا صِيفْطَاتْهُمْ الْكْنِيسَة، دَازُو مْنْ فِينِيقِيَة وْالسَّامِرَة، وْخَبّْرُو بْالتّْفْصِيلْ بْلِّي حْتَّى النَّاسْ اللِّي مَاشِي يْهُودْ آمْنُو بْالْمَسِيحْ. وْهَادْ الْخْبَارْ دَارْتْ فَرْحَة كْبِيرَة بِينْ الْخُوتْ كُلّْهُمْ.

⁴وْمْلِّي وْصْلُو لْأُورْشَلِيمْ، رَحّْبُو بِيهُمْ الْمُومْنِينْ دْ الْكْنِيسَة وْالرُّسُلْ وْالشّْيُوخْ، وْهُمَ يْخَبّْرُوهُمْ بْكُلّْ مَا دَارْ اللَّهْ مْعَاهُمْ.

⁵وَلَكِنْ شِي نَاسْ اللِّي كَانُو مْنْ جْمَاعْةْ الْفْرِّيسِيِّينْ وْآمْنُو، نَاضُو وْݣَالُو: «وَاجْبْ عْلَى الْمُومْنِينْ اللِّي مَاشِي يْهُودْ يْتّْخَتّْنُو وْيْدِيرُو بْشْرَعْ مُوسَى».

⁶وْهُمَ يْتّْجَمْعُو الرُّسُلْ وْالشّْيُوخْ بَاشْ يْشُوفُو فْهَادْ الْقَضِيَّة.

⁷وْمْنْ بَعْدْ مُنَاقَشَة طْوِيلَة، نَاضْ بُطْرُسْ وْݣَالْ لِيهُمْ: «آ الْخُوتْ، كَتْعَرْفُو بْلِّي اللَّهْ خْتَارْنِي مْنْ بِينَاتْكُمْ هَادِي مُدَّة طْوِيلَة، بَاشْ نْتّْكَلّْمْ مْعَ النَّاسْ اللِّي مَاشِي يْهُودْ عْلَى الْإِنْجِيلْ بَاشْ يْسَمْعُو وْيْآمْنُو.

⁸وْاللَّهْ اللِّي كَيْعْرَفْ أَشْنُو فْالْقْلُوبْ، رْضَى عْلِيهُمْ، وْعْطَاهُمْ الرُّوحْ الْقُدُسْ كِمَا عْطَاهْ لِينَا حْتَّى حْنَا،

⁹وْمَا فَرّْقْ بِينَّا وْبِينْهُمْ حْتَّى فْشِي حَاجَة. وْهُوَ اللِّي نْقَّى قْلُوبْهُمْ بْالْإِيمَانْ.

¹⁰وْدَابَا عْلَاشْ كَتْجَرّْبُو اللَّهْ، وْكَتْحَطُّو عْلَى التّْلَامْدْ تْقُلْ مَا قَدْرُو يْهَزُّوهْ لَا جْدُودْنَا وَلَا حْنَا؟

¹¹حْنَا كَنْآمْنُو بْلِّي بْالنِّعْمَة دْيَالْ رَبّْنَا يَسُوعْ كَنّْجَاوْ، كِمَا كَيْنْجَاوْ حْتَّى هُمَ».

¹²وْسْكْتُو النَّاسْ كُلّْهُمْ، وْبْدَاوْ كَيْتّْصَنّْتُو لْبَرْنَابَا وْبُولُسْ وْهُمَ كَيْعَاوْدُو لِيهُمْ عْلَى ݣَاعْ الْعَلَامَاتْ وْالْأُمُورْ الْعْجِيبَة اللِّي دَارْ اللَّهْ عْلَى يْدِّيهُمْ فْوَسْطْ النَّاسْ اللِّي مَاشِي يْهُودْ.

¹³وْمْنْ بَعْدْمَا كَمّْلُو كْلَامْهُمْ ݣَالْ يَعْقُوبْ: «سْمْعُونِي آ الْخُوتْ:

¹⁴عَاوْدْ لِينَا سِمْعَانْ كِيفَاشْ مْنْ اللّْوّْلْ كَانْ اللَّهْ كَيْهَمُّه يَاخُدْ مْنْ الشّْعُوبْ اللِّي مَاشِي يْهُودْ شَعْبْ لِيهْ،

¹⁵وْهَادَا كَيْوَافْقْ بْزَّافْ كْلَامْ الْأَنْبِيَا فْكْتَابْ اللَّهْ اللِّي كَيْݣُولْ:

¹⁶غَادِي نْرْجَعْ مْنْ بَعْدْ هَادْشِّي، وْغَنْبْنِي تَانِي خِيمْةْ دَاوُدْ اللِّي رَايْبَة، وْغَنْبْنِي الرّْدَمْ دْيَالْهَا وْنْعَلِّيهْ.

¹⁷بَاشْ النَّاسْ اللِّي بْقَاوْ، وْݣَاعْ الشّْعُوبْ اللِّي مْآمْنِينْ بْالْإِسْمْ دْيَالِي يْقَلّْبُو عْلَى الرَّبّْ. هَادْشِّي اللِّي كَيْݣُولْ الرَّبّْ اللِّي خْلَّا هَادْ الْأُمُورْ

¹⁸مْعْرُوفَة مْنْ قْدِيمْ الزّْمَانْ.

¹⁹عْلَى هَادْشِّي كَنْشُوفْ بْلِّي مَا خَاصّْنَاشْ نْتَقّْلُو عْلَى النَّاسْ اللِّي مَاشِي يْهُودْ اللِّي كَيْرَجْعُو لْلَّهْ،

²⁰وَلَكِنْ خَاصّْنَا نْكَتْبُو لِيهُمْ بَاشْ مَا يْبْقَاوْشْ يَاكْلُو الدّْبِيحَة اللِّي كَتّْقَدّْمْ لْلْأَصْنَامْ، وْمَا يْفَسْدُوشْ وْمَا يَاكْلُوشْ الْحَيَوَانَاتْ الْمْخْنُوقَة وْاللِّي بْدَمّْهَا.

²¹حِيتْ الشّْرَعْ دْيَالْ مُوسَى عَنْدُه مْنْ قْدِيمْ الزّْمَانْ نَاسْ كَيْخَبّْرُو بِيهْ فْكُلّْ مْدِينَة، وْكَيْقْرَاوْهْ فْدْيُورْ الصّْلَاة كُلّْ سْبْتْ».

²²وْفْدَاكْ الْوَقْتْ تَّافْقُو الرُّسُلْ وْالشّْيُوخْ وْالْكْنِيسَة كُلّْهَا بَاشْ يْخْتَارُو مْنّْهُمْ جُوجْ رْجَالْ وْيْصِيفْطُوهُمْ لْأَنْطَاكْيَة مْعَ بُولُسْ وْبَرْنَابَا. وْهُمَ يْخْتَارُو يَهُودَا اللِّي كَيْسَمِّيوْهْ بَرْسَابَا، وْسِيلَا، وْكَانُو مْنْ الْمْسْؤُولِينْ الْكْبَارْ بِينْ الْخُوتْ،

²³وْصِيفْطُو مْعَاهُمْ هَادْ الرِّسَالَة اللِّي مْكْتُوبْ فِيهَا: «حْنَا خُوتْكُمْ الرُّسُلْ وْالشّْيُوخْ، كَنْسَلّْمُو عْلَى الْخُوتْ الْمُومْنِينْ اللِّي مَاشِي يْهُودْ اللِّي فْأَنْطَاكْيَة وْسُورِيَا وْكِيلِيكِيَّة.

²⁴رَاهْ سْمَعْنَا بْلِّي شِي نَاسْ مْشَاوْ مْنْ عَنْدْنَا بْلَا مَا نْصِيفْطُوهُمْ، وْشَوّْشُو عْلِيكُمْ وْدَخّْلُو لِيكُمْ الشّْكْ بْالْهَضْرَة دْيَالْهُمْ.

²⁵وْتَّافْقْنَا كُلّْنَا بَاشْ نْخْتَارُو شِي مُومْنِينْ وْنْصِيفْطُوهُمْ لِيكُمْ مْعَ خُوتْنَا الْعْزَازْ بَرْنَابَا وْبُولُسْ،

²⁶اللِّي عْطَاوْ حْيَاتْهُمْ لْإِسْمْ رَبّْنَا يَسُوعْ الْمَسِيحْ.

²⁷وْهَكَّا صِيفْطْنَا يَهُودَا وْسِيلَا بَاشْ يْݣُولُو لِيكُمْ بْفُمّْهُمْ هَادْ الْكْلَامْ اللِّي كْتَبْنَاهْ لِيكُمْ.

²⁸حِيتْ بَانْ لْلرُّوحْ الْقُدُسْ وْلِينَا، بْلِّي مَا خَاصّْنَا نْكَلّْفُوكُمْ غِيرْ بْالْحْوَايْجْ اللِّي وَلَابْدّْ مْنّْهُمْ:

²⁹خَاصّْكُمْ تْبَعّْدُو مْنْ الدّْبَايْحْ اللِّي كَتّْدْبَحْ لْلْأَصْنَامْ، وْمَا تَاكْلُوشْ الدّْمْ وْالدّْبِيحَة الْمْخْنُوقَة، وْمَا تْفَسْدُوشْ. وْرَاهْ غَادِي تْدِيرُو الْخِيرْ فْرَاسْكُمْ إِلَا بَعّْدْتُو مْنْ هَادْشِّي. سْلَامْ اللَّهْ مْعَاكُمْ».

³⁰وْهُمَ يْمْشِيوْ وْسَافْرُو لْأَنْطَاكْيَة، وْجْمْعُو الْمُومْنِينْ وْعْطَاوْهُمْ الرِّسَالَة.

³¹وْمْلِّي قْرَاوْهَا فْرْحُو بْكْلَامْ التَّشْجِيعْ اللِّي مْكْتُوبْ فِيهَا.

³²وْحِيتْ يَهُودَا وْسِيلَا كَانُو أَنْبِيَا، ݣَالُو بْزَّافْ دْيَالْ الْكْلَامْ شَجّْعُو بِيهْ الْخُوتْ وْعَاوْنُوهُمْ بِيهْ.

³³وْمْنْ بَعْدْمَا دَوّْزُو وَاحْدْ الْمُدَّة فْأَنْطَاكْيَة، صِيفْطُوهُمْ الْخُوتْ بْالْهْنَا، بَاشْ يْرْجْعُو لْلْخُوتْ اللِّي صِيفْطُوهُمْ. [

³⁴وَلَكِنْ سِيلَا قَرّْرْ بَاشْ يْبْقَى تْمَّ.][٢]

³⁵وْݣْلَسْ بُولُسْ وْبَرْنَابَا فْأَنْطَاكْيَة، كَيْعَلّْمُو وْكَيْخَبّْرُو بْالْإِنْجِيلْ وْبْكْلَامْ الرَّبّْ، وْبْزَّافْ دْيَالْ الْمُومْنِينْ خْرِينْ كَيْعَاوْنُوهُمْ.

³⁶وْمْنْ بَعْدْ شِي يَّامَاتْ، ݣَالْ بُولُسْ لْبَرْنَابَا: «يَالَّاهْ نْرْجْعُو بَاشْ نْزُورُو الْخُوتْ فْكُلّْ مْدِينَة خَبّْرْنَا فِيهَا بْكْلَامْ الرَّبّْ، وْنْعَرْفُو حْوَالْهُمْ».

³⁷وْبْغَا بَرْنَابَا يْدِّي مْعَاهُمْ حْتَّى يُوحَنَّا اللِّي كَيْسَمِّيوْهْ مَرْقُسْ،

³⁸وَلَكِنْ بُولُسْ مَا بْغَاهْشْ يْمْشِي مْعَاهُمْ، حِيتْ سْمَحْ فِيهُمْ فْبَمْفِيلِيَّة وْمَا عَاوْنْهُمْشْ فْالْخْدْمَة.

³⁹وْطْرَاتْ بِينَاتْهُمْ خْصُومَة كْبِيرَة حْتَّى تّْفَارْقُو عْلَى بْعْضِيَّاتْهُمْ. وْدَّا بَرْنَابَا مَرْقُسْ وْسَافْرُو فْالْبْحَرْ لْقُبْرُصْ.

⁴⁰وَلَكِنْ بُولُسْ خْتَارْ سِيلَا وْخْرَجْ مْنْ أَنْطَاكْيَة، وْخْلَّاوْهُمْ الْخُوتْ فْأَمَانْ اللَّهْ.

⁴¹وْهُوَ يْدُوزْ مْنْ سُورِيَا وْكِيلِيكِيَّة كَيْشَجّْعْ الْكْنَايْسْ.