Read Moroccan Standard Translation الْأَعْمَالْ 16 Bible Online

الْأَعْمَالْ 16 - Moroccan Standard Translation bible

الْأَعْمَالْ 16

¹الْفَصْلْ سْطَّاشْ وْوْصَلْ بُولُسْ لْدَرْبَة وْمْنْ بَعْدْ دَازْ لْلِسْتْرَة، وْكَانْ فِيهَا وَاحْدْ التّْلْمِيدْ سْمِيتُه تِيمُوتَاوُسْ، وَلْدْ وَاحْدْ الْمْرَاة يْهُودِيَّة وْلَّاتْ مُومْنَة، وْبَّاهْ يُونَانِي.

²وْكَانُو الْخُوتْ كَيْشَهْدُو لْهَادْ الْوَلْدْ بْالْخِيرْ فْلِسْتْرَة وْإِيقُونِيَة.

³وْبْغَا بُولُسْ يْدِّيهْ مْعَاهْ فْالسّْفَرْ دْيَالُه، وْهُوَ يْخَتّْنُه بْسْبَابْ لِيهُودْ اللِّي فْدِيكْ الْبْلَادْ، حِيتْ كُلّْهُمْ كَانُو كَيْعَرْفُو بْلِّي بَّاهْ يُونَانِي.

⁴وْمْلِّي كَانُو كَيْسَافْرُو مْنْ مْدِينَة لْمْدِينَة، بْدَاوْ كَيْبَلّْغُو الْمُومْنِينْ بْالْوْصِيَّاتْ اللِّي خَرْجُو بِيهَا الرُّسُلْ وْالشّْيُوخْ فْأُورْشَلِيمْ، وْكَيْوَصِّيوْهُمْ يْدِيرُو بِيهَا.

⁵وْكَانُو الْكْنَايْسْ كَيْكَبْرُو فْالْإِيمَانْ، وْكَيْتّْزَادُو فِيهُمْ الْمُومْنِينْ كُلَّ نْهَارْ.

⁶وْدَازْ بُولُسْ وْسِيلَا وْتِيمُوتَاوُسْ مْنْ فِرِيجِيَّة وْغَلَاطِيَّة، حِيتْ الرُّوحْ الْقُدُسْ مَا خْلَّاهُمْشْ يْخَبّْرُو بْكْلَامْ اللَّهْ فْآسْيَا.

⁷وْمْلِّي قَرّْبُو مْنْ مِيسِيَّا، حَاوْلُو يْدَخْلُو لْبِتِينِيَّة، وَلَكِنْ رُوحْ يَسُوعْ مَا خْلَّاهُمْشْ.

⁸وْهُمَ يْدُوزُو عْلَى مِيسِيَّا وْنْزْلُو لْتَرْوَاسْ.

⁹وْفْاللِّيلْ شَافْ بُولُسْ وَاحْدْ الرُّؤْيَا، وْبَانْ لِيهْ رَاجْلْ مْنْ بْلَادْ مَكِدُونِيَة وَاقْفْ كَيْطْلْبُه وْكَيْݣُولْ لِيهْ: «أَجِي لْعَنْدْنَا لْمَكِدُونِيَة وْعَاوْنَّا!».

¹⁰وْمْلِّي شَافْ بُولُسْ هَادْ الرُّؤْيَا، بْغِينَا دِيكْ السَّاعَة نْسَافْرُو لْمَكِدُونِيَة، مْتْيِقّْنِينْ بْلِّي اللَّهْ عَيّْطْ لِينَا بَاشْ نْخَبّْرُوهُمْ بْالْبْشَارَة.

¹¹وْسَافْرْنَا فْالْبْحَرْ مْنْ تَرْوَاسْ لْسَامُوتْرَاكِي، وْالْغَدّْ لِيهْ دْزْنَا لْنِيَابُولِيسْ،

¹²وْمْنّْهَا دْزْنَا لْفِيلِبِّي، اللِّي هِيَ الْعَاصِمَة دْيَالْ بْلَادْ مَكِدُونِيَة وْاللِّي مْسْتَعْمْرِينْهَا الرُّومَانْ. وْݣْلَسْنَا فْهَادْ الْمْدِينَة شِي يَّامَاتْ.

¹³وْنْهَارْ السّْبْتْ خْرَجْنَا مْنْ الْمْدِينَة لْجَنْبْ الْوَادْ، وْفْبَالْنَا بْلِّي غَنْلْقَاوْ شِي بْلَاصَة دْيَالْ الصّْلَاة. وْݣْلَسْنَا كَنْتّْكَلّْمُو مْعَ الْعْيَالَاتْ اللِّي كَانُو مْجْمُوعِينْ.

¹⁴وْكَانْتْ بِينَاتْهُمْ وَاحْدْ الْمْرَاة كَتْسْمَعْ لِينَا سْمِيتْهَا لِيدْيَا مْنْ تِيَاتِيرَا، كَتْبِيعْ التُّوبْ الْمْدَادِي وْكَتْعْبَدْ اللَّهْ. وْفْتَحْ الرَّبّْ قَلْبْهَا بَاشْ تْرَدّْ الْبَالْ لْلْكْلَامْ اللِّي كَيْݣُولُه بُولُسْ.

¹⁵وْمْلِّي تّْعَمّْدَاتْ هِيَ وْعَائِلْتْهَا، رْغْبَاتْنَا وْݣَالْتْ لِينَا: «إِلَا كْنْتُو كَتْحْسْبُونِي مُومْنَة بْالرَّبّْ، أَجِيوْ لْدَارِي وْݣْلْسُو عَنْدِي». وْبَزّْزَاتْ عْلِينَا بَاشْ نْقَبْلُو.

¹⁶وْوَاحْدْ الْمَرَّة مْلِّي كْنَّا غَادْيِينْ لْمُوضْعْ الصّْلَاة، تّْلَاقَاتْنَا وَاحْدْ الْخْدَّامَة وْهِيَ شْوَّافَة، وْكَانْتْ كَتْجِيبْ بْزَّافْ دْ الْفْلُوسْ لْسْيَادْهَا مْنْ هَادْ الْخْدْمَة.

¹⁷وْتْبْعَاتْ بُولُسْ وْحْنَا مْعَاهْ، وْهِيَ كَتْݣُولْ بْالْغْوَاتْ: «رَاهْ هَادْ الرّْجَالْ عْبِيدْ دْيَالْ اللَّهْ الْعَالِي، كَيْخَبّْرُوكُمْ بْطْرِيقْ النّْجَا!».

¹⁸وْبْقَاتْ يَّامَاتْ كْتَارْ وْهِيَ كَتْدِيرْ هَادْشِّي حْتَّى تْقَلّْقْ بُولُسْ بْزَّافْ، وْضَارْ لْجِهْتْهَا وْݣَالْ لْلْجّْنْ اللِّي سَاكْنْ فِيهَا: «كَنْآمْرَكْ بْإِسْمْ يَسُوعْ الْمَسِيحْ بَاشْ تْخْرُجْ مْنّْهَا». وْهُوَ يْخْرَجْ دِيكْ السَّاعَة.

¹⁹وْمْلِّي شَافُو سْيَادْهَا بْلِّي مَا بْقَى عَنْدْهُمْ رْجَا فْالرّْبَحْ، شْدُّو بُولُسْ وْسِيلَا وْجَرُّوهُمْ لْلسُّوقْ لْعَنْدْ صْحَابْ السُّلْطَة،

²⁰وْمْلِّي جَابُوهُمْ لْعَنْدْ الْقُيَّادْ ݣَالُو لِيهُمْ: «هَادْ الجُّوجْ دْ الرّْجَالْ كَيْدِيرُو الْفُوضَى فْمْدِينْتْنَا، وْرَاهُمَ يْهُودْ،

²¹وْكَيْخَبّْرُو بْعَادَاتْ مَا خَاصّْنَاشْ نْقَبْلُوهَا وْلَا نْدِيرُو بِيهَا حِيتْ حْنَا رُومَانِيِّينْ».

²²وْنَاضْتْ الجّْمَاعَة دْ النَّاسْ ضْدّْهُمْ، وْشَرّْݣُو الْقُيَّادْ لْبُولُسْ وْسِيلَا حْوَايْجْهُمْ وْآمْرُو بَاشْ يْضْرْبُوهُمْ بْالْعْصِي.

²³وْمْلِّي ضْرْبُوهُمْ بْزَّافْ لَاحُوهُمْ فْالْحَبْسْ، وْوْصَّاوْ الْعْسَّاسْ دْ الْحَبْسْ بَاشْ يْعَسّْ عْلِيهُمْ مْزْيَانْ.

²⁴وْمْلِّي سْمَعْ الْعْسَّاسْ دْ الْحَبْسْ هَادْ الْوْصِيَّة، رْمَاهُمْ فْقَاعْ الْحَبْسْ، وْدَارْ لِيهُمْ رْجْلِيهُمْ فْالْقَرْطَة دْيَالْ الْخْشَبْ.

²⁵وْفْنَصّْ اللِّيلْ كَانْ بُولُسْ وْسِيلَا كَيْصَلِّيوْ وْكَيْسَبّْحُو اللَّهْ، وْالْمْحَابْسِيَة كَيْتّْصَنّْتُو لِيهُمْ،

²⁶وْعْلَى بَغْتَة طْرَا زْلْزَالْ قْوِي حْتَّى تّْهَزُّو السِّيسَانْ دْ الْحَبْسْ، وْتّْحَلُّو الْبِيبَانْ كُلّْهُمْ، وْتّْفَكُّو السّْنَاسْلْ دْيَالْ الْمْحَابْسِيَّة كُلّْهُمْ.

²⁷وْمْلِّي فَاقْ الْعْسَّاسْ دْ الْحَبْسْ مْنْ النّْعَاسْ، وْشَافْ بِيبَانْ الْحَبْسْ مْحْلُولِينْ، ضْنّْ بْلِّي الْمْحَابْسِيَّة هَرْبُو. وْهُوَ يْخَرّْجْ سِيفُه بَاشْ يْقْتَلْ رَاسُه،

²⁸وَلَكِنْ بُولُسْ عَيّْطْ عْلِيهْ بْصُوتْ عَالِي وْݣَالْ لِيهْ: «عَنْدَاكْ تْآدِي رَاسْكْ، رَاهْ حْنَا كُلّْنَا هْنَا!».

²⁹وْجَابْ الْعْسَّاسْ الضُّو وْدْخَلْ بْالزّْرْبَة لْلْحَبْسْ وْطَاحْ قُدَّامْ رْجْلِينْ بُولُسْ وْسِيلَا وْهُوَ كَيْتّْرَعّْدْ.

³⁰وْمْنْ بَعْدْ خَرّْجْهُمْ مْنْ الْحَبْسْ وْݣَالْ: «آ سْيَادِي، شْنُو خَاصّْنِي نْدِيرْ بَاشْ نّْجَا؟».

³¹وْهُمَ يْجَاوْبُوهْ: «آمْنْ بْالرَّبّْ يَسُوعْ وْغَتْنْجَا نْتَ وْمَّالِينْ دَارْكْ».

³²وْخَبّْرُوهْ بْكْلَامْ الرَّبّْ هُوَ وْمَّالِينْ دَارُه كُلّْهُمْ.

³³وْدَّاهُمْ فْدِيكْ السَّاعَة فْاللِّيلْ وْغْسَلْ الجّْرْحْ دْيَالْهُمْ، وْتّْعَمّْدْ هُوَ وْمَّالِينْ دَارُه كُلّْهُمْ.

³⁴وْمْنْ بَعْدْ، عْرَضْ عْلِيهُمْ لْدَارُه وْعْطَاهُمْ يَاكْلُو. وْفْرَحْ هُوَ وْمَّالِينْ دَارُه كُلّْهُمْ حِيتْ آمْنُو بْاللَّهْ.

³⁵وْمْلِّي طْلَعْ الصّْبَاحْ، صِيفْطُو الْقُيَّادْ الْمْسْؤُولِينْ دْ الْأَمْنْ بَاشْ يْݣُولُو لْلْعْسَّاسْ دْ الْحَبْسْ: «طْلَقْ هَادُوكْ الرّْجَالْ بْجُوجْ!».

³⁶وْوَصّْلْ الْعْسَّاسْ دْ الْحَبْسْ هَادْ الْكْلَامْ لْبُولُسْ، وْݣَالْ لِيهْ: «الْقُيَّادْ آمْرُو بَاشْ نْطَلْقُوكُمْ، وْدَابَا خَرْجُو وْسِيرُو عْلَى سْلَامْتْكُمْ!».

³⁷وَلَكِنْ بُولُسْ ݣَالْ لْلْمْسْؤُولِينْ دْ الْأَمْنْ: «ضْرْبُونَا عَايْنْ بَايْنْ بْلَا مَا يْحَاكْمُونَا، وَاخَّا حْنَا رُومَانِيِّينْ، وْلَاحُونَا فْالْحَبْسْ. وْدَابَا، بْغَاوْ يْخَرّْجُونَا فْالسِّرْ؟ رَاهْ حْنَا مَا خَارْجِينْشْ مْنْ هْنَا حْتَّى يْجِيوْ الْحُكَّامْ بْرَاسْهُمْ يْخَرّْجُونَا!».

³⁸وْوَصّْلُو الْمْسْؤُولِينْ دْ الْأَمْنْ هَادْ الْكْلَامْ لْلْقُيَّادْ، وْمْلِّي سْمْعُو بْلِّي بُولُسْ وْسِيلَا مُوَاطِنِينْ رُومَانِيِّينْ خَافُو.

³⁹وْهُمَ يْجِيوْ لْعَنْدْهُمْ كَيْطْلْبُو السّْمَاحَة، وْطَلْقُوهُمْ وْطْلْبُو مْنّْهُمْ بَاشْ يْخَرْجُو مْنْ الْمْدِينَة.

⁴⁰وْمْلِّي خْرَجْ بُولُسْ وْسِيلَا مْنْ الْحَبْسْ، مْشَاوْ لْعَنْدْ لِيدْيَا، وْشَافُو الْخُوتْ تْمَّ وْشَجّْعُوهُمْ وْمْشَاوْ بْحَالْهُمْ.