Read Moroccan Standard Translation الْأَعْمَالْ 17 Bible Online

الْأَعْمَالْ 17 - Moroccan Standard Translation bible

الْأَعْمَالْ 17

¹الْفَصْلْ سْبَعْطَاشْ وْدَازْ بُولُسْ وْسِيلَا عْلَى أَمْفِيبُولِيسْ وْأَبُولُونِيَّة حْتَّى وْصْلُو لْتْسَالُونِيكِي، وْكَانْتْ فِيهَا دَارْ الصّْلَاة دْيَالْ لِيهُودْ.

²وْدْخَلْ بُولُسْ لْدَارْ الصّْلَاة كِيفْ عَادْتُه، وْبْدَا كَيْتّْنَاقْشْ مْعَ لِيهُودْ مْنْ كْتَابْ اللَّهْ مُدَّةْ تْلَاتَة دْ السّْبُوتَ،

³كَيْشْرَحْ وْكَيْبَيّْنْ لِيهُمْ كِيفَاشْ كَانْ خَاصّْ الْمَسِيحْ يْتّْعَدّْبْ وْيْتّْبْعَتْ مْنْ الْمُوتْ، وْݣَالْ لِيهُمْ: «هَادَا هُوَ الْمَسِيحْ يَسُوعْ اللِّي كَنْخَبّْرْكُمْ عْلِيهْ».

⁴وْقْتَنْعُو شِي وْحْدِينْ مْنّْهُمْ وْوْلَّاوْ مْعَ بُولُسْ وْسِيلَا، وْمْعَاهُمْ بْزَّافْ دْيَالْ الْيُونَانِيِّينْ اللِّي كَيْعَبْدُو اللَّهْ، وْعْيَالَاتْ كْتَارْ شَانْهُمْ كْبِيرْ.

⁵وَلَكِنْ لِيهُودْ لْخْرِينْ حْسْدُوهُمْ، وْجْمْعُو مْنْ النَّاسْ دْ السُّوقْ شِي وْحْدِينْ خَايْبِينْ حَرّْشُو النَّاسْ وْدَارُو الْفُوضَى فْالْمْدِينَة، وْمْنْ بَعْدْ هْجْمُو عْلَى دَارْ يَاسُونْ كَيْقَلّْبُو عْلَى بُولُسْ وْسِيلَا بَاشْ يْخَرّْجُوهُمْ قُدَّامْ النَّاسْ.

⁶وْمْلِّي مَا لْقَاوْهُمْشْ، دَّاوْ يَاسُونْ وْشِي خُوتْ مُومْنِينْ لْلْحُكَّامْ دْ الْمْدِينَة، وْهُمَ كَيْغَوّْتُو وْكَيْݣُولُو: «رَاهْ هَادُوكْ اللِّي دَارُو الْفُوضَى فْكُلّْ بْلَاصَة جَاوْ دَابَا لّْهْنَا،

⁷وْكَانْ يَاسُونْ مْضَايْفْهُمْ عَنْدُه. وْرَاهْ هَادُو كُلّْهُمْ كَيْعْصَاوْ حْكَامْ قَيْصَرْ، وْكَيْݣُولُو بْلِّي كَايْنْ شِي مَلِكْ آخُرْ سْمِيتُه يَسُوعْ!».

⁸وْمْلِّي سْمْعُو النَّاسْ وْالْحُكَّامْ هَادْ الْكْلَامْ تْقَلّْقُو بْزَّافْ.

⁹وْخْدَاوْ الْحُكَّامْ ضَمَانَة دْ الْفْلُوسْ مْنْ عَنْدْ يَاسُونْ وْالْمُومْنِينْ لْخْرِينْ، وْهُمَ يْطَلْقُوهُمْ.

¹⁰وْغِيرْ جَا اللِّيلْ، صِيفْطُو الْخُوتْ الْمُومْنِينْ بُولُسْ وْسِيلَا لْبِيرِيَّة، وْمْلِّي وْصْلُو لِيهَا دَخْلُو لْدَارْ الصّْلَاة دْيَالْ لِيهُودْ.

¹¹وَلَكِنْ هَادُوكْ كَانُو مْتْسَامْحِينْ بْزَّافْ كْتَرْ مْنْ اللِّي فْتْسَالُونِيكِي، وْقْبْلُو كْلَامْ اللَّهْ بْفَرْحَة كْبِيرَة، وْبْدَاوْ كُلَّ نْهَارْ كَيْقْرَاوْ وْكَيْقَلّْبُو فْكْتَابْ اللَّهْ وَاشْ هَادْ الْأُمُورْ صْحِيحَة.

¹²وْآمْنُو بْزَّافْ مْنّْهُمْ وْمْنْ الْعْيَالَاتْ الْيُونَانِيَّاتْ اللِّي لَبَاسْ عْلِيهُمْ، وْبْزَّافْ دْ الرّْجَالْ.

¹³وَلَكِنْ مْلِّي عَرْفُو لِيهُودْ اللِّي فْتْسَالُونِيكِي بْلِّي بُولُسْ كَيْخَبّْرْ بْكْلَامْ اللَّهْ فْبِيرِيَّة حْتَّى هِيَ، جَاوْ وْبْدَاوْ كَيْحَرّْشُو الجّْمَاعَاتْ دْ النَّاسْ بَاشْ يْدِيرُو الْفُوضَى حْتَّى تْمَّ.

¹⁴وْفْدِيكْ السَّاعَة، صِيفْطُو الْخُوتْ بُولُسْ بَاشْ يْسَافْرْ فْالْبْحَرْ، وْبْقَى سِيلَا وْتِيمُوتَاوُسْ تْمَّ.

¹⁵وْهَادُوكْ اللِّي مْشَاوْ مْعَ بُولُسْ وَصّْلُوهْ لْأَتِينَا. وْمْلِّي كَانُو رَاجْعِينْ، وْصَّاهُمْ يْݣُولُو لْسِيلَا وْتِيمُوتَاوُسْ بَاشْ يْوَصْلُو عْلِيهْ دْغْيَا.

¹⁶وْمْلِّي كَانْ بُولُسْ فْأَتِينَا كَيْتّْسَنَّى سِيلَا وْتِيمُوتَاوُسْ، تْقَلّْقْ بْزَّافْ حِيتْ شَافْ الْمْدِينَة عَامْرَة بْالْأَصْنَامْ.

¹⁷وْبْدَا كَيْتّْنَاقْشْ مْعَ لِيهُودْ وْمْعَ اللِّي كَيْعَبْدُو اللَّهْ فْدَارْ الصّْلَاة، وْمْعَ النَّاسْ اللِّي كَيْتّْلَاقَى بِيهُمْ كُلَّ نْهَارْ فْالسُّوقْ.

¹⁸وْكَانُو شِي وْحْدِينْ مْنْ الْفَلَاسِفَة الْأَبِيقُورِيِّينْ وْالرِّوَاقِيِّينْ كَيْتّْنَاقْشُو مْعَاهْ، وْشِي وْحْدِينْ مْنّْهُمْ ݣَالُو: «آشْ بْغَا يْݣُولْ هَادَا اللِّي فِيهْ غِيرْ كْتْرَةْ الْهَضْرَة؟». وْوْحْدِينْ خْرِينْ ݣَالُو: «رَاهْ كَيْتّْكَلّْمْ عْلَى إِلَاهَاتْ غْرِيبَة». حِيتْ بُولُسْ كَانْ كَيْخَبّْرْ بْيَسُوعْ وْبْالْبَعْتْ مْنْ الْمُوتْ.

¹⁹وْشْدُّوهْ وْدَّاوْهْ لْلْأَرْيُوبَاݣُوسْ وْݣَالُو لِيهْ: «وَاشْ يْمْكَنْ لِينَا نْعَرْفُو هَادْ التَّعْلِيمْ الجّْدِيدْ اللِّي كَتّْكَلّْمْ بِيهْ.

²⁰حِيتْ هَادْشِّي اللِّي كَنْسَمْعُوهْ مْنّْكْ غْرِيبْ عْلِينَا، وْحْنَا بْغِينَا نْعَرْفُو أَشْنُو كَيْعْنِي».

²¹وْكَانُو ݣَاعْ النَّاسْ دْيَالْ أَتِينَا وْالنَّاسْ الْبْرَّانِيِّينْ اللِّي كَيْزُورُو الْمْدِينَة، كَيْدَوّْزُو وَقْتْهُمْ فْوَالُو، إِمَّا كَيْتّْكَلّْمُو وْلَا كَيْسَمْعُو شِي حَاجَة جْدِيدَة.

²²وْوْقَفْ بُولُسْ فْوَسْطْ الْأَرْيُوبَاݣُوسْ وْݣَالْ: «آ سُكَّانْ أَتِينَا! كَنْشُوفْ بْلِّي رَاكُمْ مْتْدَيّْنِينْ بْزَّافْ فْكُلّْ حَاجَة.

²³حِيتْ وْأَنَا كَنْتّْسَارَا فْمْدِينْتْكُمْ وْكَنْشُوفْ الْحْوَايْجْ اللِّي كَتْعَبْدُوهَا، لْقِيتْ وَاحْدْ الْمَدْبَحْ مْكْتُوبْ عْلِيهْ: لْوَاحْدْ الْإِلَاهْ مَا مْعْرُوفْشْ. إِيوَا هَادَا اللِّي كَتْعَبْدُوهْ وْمَا كَتْعَرْفُوهْشْ، هُوَ اللِّي كَنْخَبّْرْكُمْ عْلِيهْ.

²⁴هُوَ اللَّهْ اللِّي خْلَقْ الدّْنْيَا وْكُلّْ مَا فِيهَا، هُوَ رَبّْ السّْمَا وْالْأَرْضْ، مَا كَيْسْكُنْشْ فْمَعَابِدْ بْنَاوْهَا النَّاسْ،

²⁵وْمَا كَيْخَدْمُوشْ عْلِيهْ النَّاسْ بْحَالْ إِلَا مْحْتَاجْ لْشِي حَاجَة، عْلَاحْقَّاشْ هُوَ اللِّي كَيْعْطِي لْلنَّاسْ كُلّْهُمْ الْحَيَاةْ وْالنَّفْسْ وْكُلّْ حَاجَة.

²⁶وْخْلَقْ مْنْ إِنْسَانْ وَاحْدْ ݣَاعْ الشّْعُوبْ، وْسَكّْنْهُمْ عْلَى وْجَهْ الْأَرْضْ كُلّْهَا، وْمْنْ قْبَلْ قَسّْمْ لِيهُمْ الْوَقْتْ وْالْحُدُودْ فِينْ يْعِيشُو،

²⁷لَعَلَّ وَعَسَى يْقَلّْبُو عْلَى اللَّهْ وْيْلْقَاوْهْ، حِيتْ رَاهْ هُوَ قْرِيبْ مْنْ كُلّْ وَاحْدْ فِينَا.

²⁸حِيتْ بِيهْ كَنْحْيَاوْ وْكَنْتْحَرّْكُو وْكَايْنِينْ. كِمَا ݣَالُو شِي وْحْدِينْ مْنْ الشُّعَرَا دْيَالْكُمْ: رَاهْ حْتَّى حْنَا تْرِّيكْتُه.

²⁹وْحِيتْ حْنَا تْرِّيكْةْ اللَّهْ، مَا خَاصّْنَاشْ نْفَكّْرُو بْلِّي اللَّهْ بْحَالْ الصَّنَمْ مْنْ الدّْهَبْ وْلَا مْنْ الْفْضَّة وْلَا مْنْ الْحْجَرْ الْمَنْقُوشْ، كَيْصَنْعُه بْنَادْمْ بْالْفَنّْ وْالْفِكْرْ دْيَالُه.

³⁰وَاخَّا اللَّهْ مَا عَاقْبْشْ النَّاسْ فْالزّْمَانْ اللِّي مَا كَانُوشْ كَيْعَرْفُوهْ فِيهْ، رَاهْ دَابَا كَيْآمْرْ النَّاسْ كُلّْهُمْ فْكُلّْ بْلَاصَة بَاشْ يْتُوبُو.

³¹عْلَاحْقَّاشْ دَارْ وَاحْدْ النّْهَارْ اللِّي فِيهْ غَيْحْكَمْ عْلَى النَّاسْ دْيَالْ الدّْنْيَا بْالْعَدْلْ، عْلَى يْدّْ الرَّاجْلْ اللِّي خْتَارُه لْهَادْشِّي، وْبَيّْنْ بْالْحُجَّة لْلنَّاسْ كُلّْهُمْ بْلِّي خْتَارُه مْلِّي بَعْتُه مْنْ الْمُوتْ!».

³²وْمْلِّي سْمْعُو عْلَى الْبَعْتْ دْيَالْ الْمُوتَى، ضَحْكُو عْلِيهْ شِي وْحْدِينْ، وْوْحْدِينْ خْرِينْ ݣَالُو لِيهْ: «بْغِينَا نْسَمْعُو كْلَامْكْ فْهَادْشِّي مَرَّة خْرَى».

³³وْهَكَّا خْرَجْ بُولُسْ مْنْ وَسْطْهُمْ.

³⁴وَلَكِنْ شِي وْحْدِينْ مْنّْهُمْ وْلَّاوْ مْعَاهْ وْآمْنُو، مْنّْهُمْ دِيُونِيسْيُوسْ وْهُوَ وَاحْدْ مْنْ الْمْسْؤُولِينْ فْالْأَرْيُوبَاݣُوسْ، وْوَاحْدْ الْمْرَاة سْمِيتْهَا دَامَرِسْ وْوْحْدِينْ خْرِينْ مْعَاهُمْ.