Read Moroccan Standard Translation الْأَعْمَالْ 18 Bible Online

الْأَعْمَالْ 18 - Moroccan Standard Translation bible

الْأَعْمَالْ 18

¹الْفَصْلْ تْمَنْطَاشْ وْمْنْ بَعْدْ هَادْشِّي، خْلَّا بُولُسْ أَتِينَا وْسَافْرْ لْكُورِنْتُوسْ.

²وْتّْلَاقَى مْعَ وَاحْدْ الرَّاجْلْ يْهُودِي أَصْلُه مْنْ الْبُنْطْ سْمِيتُه أَكِيلَا، عَادْ وْصَلْ بْشِي يَّامَاتْ قْلَالْ مْنْ إِيطَالِيَا هُوَ وْمْرَاتُه بِرِيسْكِلَّا، عْلَاحْقَّاشْ الْمَلِكْ كُلُودِيُوسْ آمْرْ لِيهُودْ كُلّْهُمْ بَاشْ يْخَرْجُو مْنْ رُومَا. وْمْشَى بُولُسْ لْعَنْدْهُمْ.

³وْحِيتْ كَانْتْ عَنْدُه نَفْسْ الْحَرْفَة دْيَالْهُمْ، اللِّي هِيَ الصَّنْعَة دْيَالْ الْݣْيَاطْنْ، ݣْلَسْ عَنْدْهُمْ وْكَانْ كَيْخْدَمْ مْعَاهُمْ.

⁴وْكَانْ كُلَّ سْبْتْ كَيْتّْنَاقْشْ مْعَ لِيهُودْ وْالْيُونَانِيِّينْ فْدَارْ الصّْلَاة وْكَيْحَاوْلْ يْقْنَعْهُمْ.

⁵وْمْلِّي وْصَلْ سِيلَا وْتِيمُوتَاوُسْ مْنْ مَكِدُونِيَة، وْلَّى هَمّْ بُولُسْ كُلُّه هُوَ يْخَبّْرْ النَّاسْ بْكْلَامْ اللَّهْ، وْيْشْهَدْ لْلِيهُودْ بْلِّي يَسُوعْ هُوَ الْمَسِيحْ.

⁶وَلَكِنْ كَانُو كَيْعَارْضُوهْ وْكَيْسَبُّوهْ. وْهُوَ يْسُوسْ حْوَايْجُه وْݣَالْ لِيهُمْ: «دَنْبْكُمْ عْلَى رَاسْكُمْ، أَنَا كَنْتْبَرَّا مْنّْكُمْ! مْنْ الْيُومْ غَنْمْشِي لْعَنْدْ الشّْعُوبْ اللِّي مَاشِي يْهُودْ».

⁷وْهُوَ يْمْشِي مْنْ تْمَّ لْوَاحْدْ الدَّارْ مْلَاصْقَة مْعَ دَارْ الصّْلَاة، كَيْسْكُنْ فِيهَا وَاحْدْ الرَّاجْلْ مَاشِي يْهُودِي كَيْعْبَدْ اللَّهْ سْمِيتُه تِيطُسْ يُوسْتُسْ.

⁸وْآمْنْ كِرِيسْبُسْ رَئِيسْ دَارْ الصّْلَاة بْالرَّبّْ، هُوَ وْمَّالِينْ دَارُه كُلّْهُمْ. وْبْزَّافْ دْ النَّاسْ مْنْ كُورِنْتُوسْ اللِّي سْمْعُو كْلَامْ بُولُسْ، آمْنُو وْتّْعَمّْدُو.

⁹وْفْوَاحْدْ اللِّيلَة ݣَالْ الرَّبّْ لْبُولُسْ فْرُؤْيَا: «مَا تْخَافْشْ! وَلَكِنْ غِيرْ تّْكَلّْمْ وْمَا تْسْكُتْشْ،

¹⁰حِيتْ رَانِي مْعَاكْ وْحْتَّى وَاحْدْ مَا غَيْقْدَرْ يْآدِيكْ، رَاهْ عَنْدِي شَعْبْ كْتِيرْ فْهَادْ الْمْدِينَة».

¹¹وْݣْلَسْ بُولُسْ تْمَّ عَامْ وْنَصّْ، كَيْعَلّْمْ النَّاسْ كْلَامْ اللَّهْ.

¹²وْمْلِّي كَانْ ݣَالْيُونْ الرُّومَانِي هُوَ الْحَاكْمْ عْلَى أَخَائِيَة، تَّافْقُو لِيهُودْ كُلّْهُمْ عْلَى بُولُسْ، وْشْدُّوهْ، وْدَّاوْهْ لْلْمَحْكَمَة.

¹³وْهُمَ يْݣُولُو: «رَاهْ هَادَا بْغَا يْرَدّْ النَّاسْ كَيْعَبْدُو اللَّهْ بْوَاحْدْ الشّْكَلْ كَيْضَادّْ الشّْرَعْ».

¹⁴وْمْلِّي بْغَا بُولُسْ يْهْضَرْ، ݣَالْ ݣَالْيُونْ لْلِيهُودْ: «آ لِيهُودْ، إِلَا كَانْتْ فْعْلَة قْبِيحَة وْلَا جَرِيمَة، رَاهْ مْنْ الْوَاجْبْ عْلِيَّ نْسْمَعْ لِيكُمْ.

¹⁵وَلَكِنْ إِلَا كَانْتْ الْقَضِيَّة غِيرْ مُنَاقَشَة فْالسّْمْيَاتْ وْالْكْلَامْ وْالشّْرَعْ دْيَالْكُمْ، هَادْشِّي رَاهْ كَيْخَصّْكُمْ نْتُمَ، وْمَا بْغِيتْشْ نْكُونْ قَاضِي فْهَادْ الْأُمُورْ».

¹⁶وْهُوَ يْجَرِّي عْلِيهُمْ مْنْ الْمَحْكَمَة.

¹⁷وْشْدُّو كُلّْهُمْ سُوسْتَانِيسْ رَئِيسْ دَارْ الصّْلَاة وْضْرْبُوهْ قُدَّامْ الْمَحْكَمَة، وَلَكِنْ ݣَالْيُونْ مَا كَانْ عَنْدُه سُوقْ فْدَاكْشِّي.

¹⁸وْݣْلَسْ بُولُسْ يَّامَاتْ كْتَارْ فْكُورِنْتُوسْ، وْمْنْ بَعْدْ، تّْوَادْعْ مْعَ الْخُوتْ وْسَافْرْ فْالْبْحَرْ لْسُورِيَا، وْكَانْتْ مْعَاهْ بِرِيسْكِلَّا وْرَاجْلْهَا أَكِيلَا، وْحَسّْنْ رَاسُه فْكَنْخَرِيَا حِيتْ كَانْ مْعَاهْدْ اللَّهْ.

¹⁹وْمْلِّي وْصْلُو لْأَفَسُسْ، تّْفَارْقْ بُولُسْ مْعَ بِرِيسْكِلَّا وْأَكِيلَا وْدْخَلْ لْدَارْ الصّْلَاة وْبْدَا كَيْتّْنَاقْشْ مْعَ لِيهُودْ.

²⁰وْطْلْبُو مْنُّه بَاشْ يْزِيدْ يْبْقَى مْعَاهُمْ، وْمَا قْبَلْشْ.

²¹وَلَكِنْ مْلِّي كَانْ كَيْتّْوَادْعْ مْعَاهُمْ، ݣَالْ لِيهُمْ: «رَانِي غَنْرْجَعْ عَنْدْكُمْ إِلَا بْغَا اللَّهْ». وْسَافْرْ فْالْبْحَرْ مْنْ أَفَسُسْ،

²²وْوْصَلْ لْقَيْصَرِيَّة، وْمْنّْهَا طْلَعْ لْأُورْشَلِيمْ وْسَلّْمْ عْلَى الْمُومْنِينْ فْالْكْنِيسَة، وْمْنْ تْمَّ نْزَلْ لْأَنْطَاكْيَة.

²³وْمْنْ بَعْدْمَا دَوّْزْ فِيهَا شِي يَّامَاتْ، سَافْرْ وْدَازْ مْنْ بْلَادْ غَلَاطِيَّة وْفِرِيجِيَّة كَيْشَجّْعْ التّْلَامْدْ كُلّْهُمْ.

²⁴وْجَا لْأَفَسُسْ وَاحْدْ الرَّاجْلْ يْهُودِي سْمِيتُه أَبُلُّوسْ مْنْ الْإِسْكَنْدَرِيَّة، كَيْعْرَفْ يْتّْكَلّْمْ وْمْتْمَكّْنْ مْنْ كْتَابْ اللَّهْ مْزْيَانْ.

²⁵تْعَلّْمْ طْرِيقْ الرَّبّْ، وْتْشَجّْعْ فْالرُّوحْ، وْبْدَا كَيْتّْكَلّْمْ وْكَيْعَلّْمْ تَعْلِيمْ صْحِيحْ فْكُلّْ حَاجَة عْلَى يَسُوعْ. وَلَكِنْ كَانْ كَيْعْرَفْ غِيرْ مَعْمُودِيَّةْ يُوحَنَّا بُوحْدْهَا.

²⁶وْبْدَا كَيْتّْكَلّْمْ بْلَا مَا يْخَافْ فْدَارْ الصّْلَاة. وْمْلِّي سْمْعَاتُه بِرِيسْكِلَّا وْرَاجْلْهَا أَكِيلَا، عَرْضُو عْلِيهْ لْدَارْهُمْ وْزَادُو فَسّْرُو لِيهْ طْرِيقْ اللَّهْ مْزْيَانْ.

²⁷وْبْغَا أَبُلُّوسْ بَاشْ يْسَافْرْ لْأَخَائِيَة، وْشَجّْعُوهْ الْخُوتْ وْكْتْبُو لْلتّْلَامْدْ اللِّي تْمَّ بَاشْ يْرَحّْبُو بِيهْ. وْمْلِّي وْصَلْ، كَانْ عْوِينْ كْبِيرْ لْهَادُوكْ اللِّي آمْنُو بْفْضَلْ نِعْمَةْ اللَّهْ.

²⁸حِيتْ كَانْ بْقُوَّةْ الْحُجَّة دْيَالُه كَيْسَكّْتْ لِيهُودْ قُدَّامْ النَّاسْ، وْكَيْبَيّْنْ لِيهُمْ مْنْ كْتَابْ اللَّهْ بْلِّي يَسُوعْ هُوَ الْمَسِيحْ.