Read Moroccan Standard Translation الْأَعْمَالْ 19 Bible Online

الْأَعْمَالْ 19 - Moroccan Standard Translation bible

الْأَعْمَالْ 19

¹الْفَصْلْ تْسَعْطَاشْ وْمْلِّي كَانْ أَبُلُّوسْ فْكُورِنْتُوسْ، سَافْرْ بُولُسْ فْطْرِيقْ الْبْلْدَانْ اللِّي فْالشَّمَالْ حْتَّى وْصَلْ لْأَفَسُسْ. وْتْمَّ تّْلَاقَى شِي تْلَامْدْ،

²وْسْوّْلْهُمْ: «وَاشْ قْبَلْتُو الرُّوحْ الْقُدُسْ مْلِّي آمْنْتُو؟» وْهُمَ يْجَاوْبُوهْ: «لَّا، وْمَا سْمَعْنَاشْ حْتَّى وَاشْ كَايْنْ الرُّوحْ الْقُدُسْ!».

³وْݣَالْ لِيهُمْ: «إِينَ مَعْمُودِيَّة تْعَمّْدْتُو؟»، وْرَدُّو عْلِيهْ: «مَعْمُودِيَّةْ يُوحَنَّا».

⁴وْݣَالْ لِيهُمْ بُولُسْ: «يُوحَنَّا عَمّْدْ بْمَعْمُودِيَّةْ التُّوبَة، وْݣَالْ لْشَعْبْ إِسْرَائِيلْ بَاشْ يْآمْنُو بْهَادَاكْ اللِّي غَيْجِي مْنْ بَعْدُه، اللِّي هُوَ يَسُوعْ».

⁵وْمْلِّي سْمْعُو هَادْ الْكْلَامْ، تّْعَمّْدُو بْإِسْمْ الرَّبّْ يَسُوعْ.

⁶وْغِيرْ حَطّْ بُولُسْ يْدِّيهْ عْلِيهُمْ، نْزَلْ عْلِيهُمْ الرُّوحْ الْقُدُسْ، وْبْدَاوْ كَيْتّْكَلّْمُو بْلُغَاتْ وْكَيْتّْنَبّْأُو.

⁷وْكَانُو كُلّْهُمْ شِي طْنَاشْرْ رَاجْلْ تْقْرِيبًا.

⁸وْمْنْ بَعْدْ دْخَلْ بُولُسْ لْدَارْ الصّْلَاة، وْبْدَا كَيْتّْكَلّْمْ بْلَا مَا يْخَافْ عْلَى مَمْلَكَةْ اللَّهْ مُدَّةْ تْلْتْ شْهُورْ، وْكَيْتّْنَاقْشْ مْعَ اللِّي حَاضْرِينْ وْكَيْقْنَعْهُمْ.

⁹وَلَكِنْ مْلِّي شِي وْحْدِينْ عَانْدُو وْرْفْضُو، وْݣَالُو هَضْرَة خَايْبَة عْلَى طْرِيقْ الرَّبّْ قُدَّامْ النَّاسْ كُلّْهُمْ. خْلَّاهُمْ بُولُسْ وْمْشَى لْبْلَاصَة مْعْزُولَة هُوَ وْالتّْلَامْدْ وْبْدَا كَيْتّْنَاقْشْ مْعَاهُمْ كُلَّ نْهَارْ فْمَدْرَسَةْ وَاحْدْ الرَّاجْلْ سْمِيتُه تِيرَانُّسْ.

¹⁰وْدَامْ هَادْشِّي مُدَّةْ عَامَيْنْ، حْتَّى سْمْعُو ݣَاعْ النَّاسْ اللِّي فْآسْيَا، لِيهُودْ وْالْيُونَانِيِّينْ، عْلَى كْلَامْ الرَّبّْ.

¹¹وْكَانْ اللَّهْ كَيْدِيرْ عْلَى يْدِّينْ بُولُسْ مُعْجِزَاتْ عْجِيبَة،

¹²حْتَّى وْلَّاوْ النَّاسْ كَيْدِّيوْ شِي تُوبْ وْلَا زِيفْ مْسّْ الدَّاتْ دْيَالْ بُولُسْ، وْكَيْحَطُّوهْ عْلَى الْمَرْضَى دْيَالْهُمْ وْكَيْتّْشَافَاوْ مْنْ مَرْضْهُمْ، وْكَيْخَرْجُو مْنّْهُمْ الجّْنُونْ.

¹³وْحَاوْلُو شِي يْهُودْ، مْنْ هَادُوكْ اللِّي كَيْجُولُو فْالْمْدُونْ وْكَيْخَرّْجُو الجّْنُونْ بَاشْ يْسْتَغْلُّو إِسْمْ الرَّبّْ يَسُوعْ وْيْدِيرُو هَادْشِّي، وْكَانُو كَيْݣُولُو لْلْجّْنْ: «كَنْآمْرَكْ تْخْرُجْ بْإِسْمْ يَسُوعْ اللِّي كَيْخَبّْرْ بِيهْ بُولُسْ».

¹⁴وْكَانُو سْبْعَة مْنْ وْلَادْ وَاحْدْ رَئِيسْ رْجَالْ الدِّينْ يْهُودِي سْمِيتُه سَكَاوَا كَيْدِيرُو هَادْشِّي.

¹⁵وْرَدّْ عْلِيهُمْ الجّْنْ: «يَسُوعْ أَنَا كَنْعَرْفُه، وْبُولُسْ كَنْعْرَفْ شْكُونْ هُوَ. وَلَكِنْ شْكُونْ نْتُمَ؟».

¹⁶وْهُوَ يْهْجَمْ عْلِيهُمْ الرَّاجْلْ اللِّي فِيهْ الجّْنْ بْقُوَّة وْغْلَبْهُمْ، وْشَبّْعْهُمْ ضَرْبْ حْتَّى هَرْبُو مْنْ الدَّارْ عْرْيَانِينْ وْمْجْرُوحِينْ.

¹⁷وْسْمْعُو ݣَاعْ لِيهُودْ وْالْيُونَانِيِّينْ اللِّي سَاكْنِينْ فْأَفَسُسْ هَادْ الْخْبَارْ، وْخَافُو كُلّْهُمْ. وْكَانْ إِسْمْ الرَّبّْ يَسُوعْ كَيْتّْمَجّْدْ.

¹⁸وْبْزَّافْ مْنْ هَادُوكْ اللِّي آمْنُو جَاوْ كَيْعْتَرْفُو وْكَيْݣُولُو دَاكْشِّي اللِّي دَارُو.

¹⁹وْبْزَّافْ مْنْ هَادُوكْ اللِّي كَيْدِيرُو السِّحْرْ نَاضُو كَيْجَمْعُو الْكْتُبْ وْكَيْحَرْقُوهُمْ قُدَّامْ النَّاسْ كُلّْهُمْ. وْمْلِّي حْسْبُو تَمَنْ هَادْ الْكْتُبْ، لْقَاوْهْ خَمْسِينْ أَلْفْ قْطْعَة مْنْ الْفْضَّة.

²⁰وْهَكَّا كَانْ كْلَامْ الرَّبّْ كَيْزِيدْ يْتّْعْرَفْ وْكَيْتّْقُوَّى.

²¹وْمْنْ بَعْدْمَا طْرَاتْ هَادْ الْأُمُورْ، نْوَى بُولُسْ بَاشْ يْدُوزْ مْنْ مَكِدُونِيَة وْأَخَائِيَة، وْهُوَ فْطْرِيقُه لْأُورْشَلِيمْ. وْݣَالْ: «مْنْ بَعْدْمَا نْݣْلَسْ فْأُورْشَلِيمْ، خَاصّْنِي نْدُوزْ لْرُومَا حْتَّى هِيَ».

²²وْهُوَ يْصِيفْطْ لْمَكِدُونِيَة جُوجْ مْنْ هَادُوكْ اللِّي كَيْعَاوْنُوهْ، هُمَ تِيمُوتَاوُسْ وْأَرَسْطُسْ. وْبْقَى هُوَ مُدَّة خْرَى فْبْلَادْ آسْيَا.

²³وْفْهَادْ الْوَقْتْ، طْرَاتْ فُوضَى كْبِيرَة فْأَفَسُسْ بْسْبَابْ طْرِيقْ الرَّبّْ،

²⁴حِيتْ وَاحْدْ الدّْهَايْبِي سْمِيتُه دِيمِتْرِيُوسْ كَانْ كَيْصْنَعْ مْنْ الْفْضَّة شْكِيْلَاتْ لْمَعَابِدْ الْإِلَاهَة أَرْطَامِيسْ، وْكَانُو الْحْرَايْفِيَّة كَيْرَبْحُو بْزَّافْ دْ الْفْلُوسْ مْنْ دَاكْشِّي.

²⁵وْهُوَ يْجْمَعْ الْحْرَايْفِيَّة وْحْتَّى الصّْنَايْعِيَّة لْخْرِينْ وْݣَالْ لِيهُمْ: «كَتْعَرْفُو آ الْخُوتْ بْلِّي عِيشْتْنَا الْمْزْيَانَة هِيَ مْنْ هَادْ الصَّنْعَة.

²⁶وْنْتُمَ شْفْتُو وْسْمَعْتُو كِيفَاشْ هَادْ بُولُسْ غَرّْ نَاسْ كْتَارْ بْالْكْلَامْ دْيَالُه، مَاشِي غِيرْ فْأَفَسُسْ وَلَكِنْ فْكُلّْ بْلَاصَة فْآسْيَا تْقْرِيبًا، وْكَيْݣُولْ بْلِّي هَادْشِّي اللِّي كَيْصَنْعُوهْ النَّاسْ مَاشِي إِلَاهَاتْ.

²⁷وْهَادَا رَاهْ مَاشِي خَطَرْ غِيرْ عْلَى الصَّنْعَة دْيَالْنَا اللِّي مَا غَيْبْقَى يْدِّيهَا فِيهَا حَدّْ، وَلَكِنْ رَاهْ حْتَّى مَعْبَدْ الْإِلَاهَة أَرْطَامِيسْ الْكْبِيرَة مَا غَتْبْقَاشْ عَنْدُه الْهِيبَة دْيَالُه، وْالْإِلَاهَة بْرَاسْهَا مَا غَتْبْقَاشْ عَنْدْهَا الْقِيمَة الْكْبِيرَة دْيَالْهَا، وْهِيَ اللِّي كَيْعَبْدُوهَا ݣَاعْ النَّاسْ دْ آسْيَا وْالدّْنْيَا كُلّْهَا!».

²⁸وْمْلِّي سْمْعُو الْحَاضْرِينْ هَادْ الْكْلَامْ، غَضْبُو بْزَّافْ وْبْدَاوْ كَيْغَوّْتُو وْكَيْݣُولُو: «الْعَظَمَة لْأَرْطَامِيسْ إِلَاهَةْ أَفَسُسْ!».

²⁹وْدَاعْتْ الْفُوضَى فْالْمْدِينَة كُلّْهَا. وْهْجْمُو النَّاسْ فْخَطْرَة وَحْدَة عْلَى غَايُوسْ وْأَرِسْتَرْخُسْ اللِّي مْنْ بْلَادْ مَكِدُونِيَة وْاللِّي جَاوْ مْعَ بُولُسْ فْالسّْفَرْ دْيَالُه، وْجَرُّوهُمْ لْلسَّاحَة دْيَالْ الْمْدِينَة.

³⁰وْبْغَا بُولُسْ بَاشْ يْمْشِي عَنْدْ النَّاسْ وْيْتّْكَلّْمْ مْعَاهُمْ، وَلَكِنْ التّْلَامْدْ مَا خْلَّاوْهْشْ.

³¹وْشِي صْحَابُه مْنْ النَّاسْ الْكْبَارْ فْآسْيَا صِيفْطُو لِيهْ، وْطْلْبُو مْنُّه بَاشْ مَا يْبَانْشْ فْالسَّاحَة دْ الْمْدِينَة.

³²وْدِيكْ السَّاعَة تْخَلّْطَاتْ الْأُمُورْ عْلَى ݣَاعْ النَّاسْ اللِّي تّْجَمْعُو، شِي وْحْدِينْ مْنّْهُمْ كَانُو كَيْݣُولُو هَضْرَة، وْلْخْرِينْ كَيْݣُولُو هَضْرَة خْرَى، وْبْزَّافْ مْنّْهُمْ مَا عَرْفُوشْ عْلَاشْ تّْجَمْعُو.

³³وْزْيّْدُو لِيهُودْ وَاحْدْ مْنْ بِينَاتْهُمْ لْلْقُدَّامْ سْمِيتُه إِسْكَنْدَرْ بَاشْ يْدَافْعْ عْلَى غَايُوسْ وْأَرِسْتَرْخُسْ وْشَيّْرْ بْيْدُّه حِيتْ بْغَا يْفَسّْرْ لْلنَّاسْ.

³⁴وَلَكِنْ غِيرْ عَرْفُوهْ النَّاسْ يْهُودِي، بْدَاوْ كَيْغَوّْتُو بْصُوتْ وَاحْدْ شِي سَاعْتَيْنْ تْقْرِيبًا، وْكَيْݣُولُو: «الْعَظَمَة لْأَرْطَامِيسْ إِلَاهَةْ أَفَسُسْ!».

³⁵وْفْاللّْخْرْ، هَدّْنْ الْكَاتِبْ دْيَالْ حَاكْمْ الْمْدِينَة الجّْمَاعَة دْ النَّاسْ وْݣَالْ: «آ سُكَّانْ أَفَسُسْ! شْكُونْ يْقْدَرْ يْنْكَرْ بْلِّي النَّاسْ دْيَالْ أَفَسُسْ هُمَ اللِّي كَيْحْضِيوْ الْمَعْبَدْ دْيَالْ الْإِلَاهَة أَرْطَامِيسْ، وْهُمَ اللِّي كَيْحْضِيوْ الصَّنَمْ دْيَالْهَا اللِّي هْبَطْ مْنْ السّْمَا.

³⁶هَادْ الْأُمُورْ كُلّْهَا مْعْرُوفَة، وْدَابَا خَاصّْكُمْ تْتْهَدّْنُو وْمَا تْدِيرُوشْ شِي حَاجَة بْلَا عْقَلْ.

³⁷جْبْتُو هَادْ جُوجْ رْجَالْ، وْرَاهْ حْتَّى وَاحْدْ مْنّْهُمْ مَا تْعْدَّى عْلَى الْإِلَاهَة دْيَالْنَا وَلَا ݣَالْ عْلِيهَا كْلَامْ الْكُفْرْ.

³⁸وْإِلَا دِيمِتْرِيُوسْ وْالصّْنَايْعِيَّة اللِّي مْعَاهْ بْغَاوْ يْدْعِيوْ شِي حَدّْ، رَاهْ كَايْنْ الْقَاضِي وْالْحُكَّامْ، يْمْشِيوْ يْدْعِيوْهُمْ عَنْدْهُمْ.

³⁹وَلَكِنْ إِلَا كَانْتْ عَنْدْكُمْ شِي قَضِيَّة خْرَى، خَاصّْ الْحُكْمْ فِيهَا يْكُونْ فْالْمَحْكَمَة وْبْالْقَانُونْ،

⁴⁰بَاشْ مَا يْݣُولُوشْ عْلِينَا بْلِّي كَنْدِيرُو الْفُوضَى فْهَادْشِّي اللِّي طْرَا الْيُومْ. وْمَا عَنْدْنَا حْتَّى شِي سْبَّة بَاشْ نْتّْجَمْعُو هَكَّا».

⁴¹وْمْنْ بَعْدْمَا ݣَالْ هَادْ الْكْلَامْ، صِيفْطْ النَّاسْ اللِّي تّْجَمْعُو بْحَالْهُمْ.