Read Moroccan Standard Translation الْأَعْمَالْ 2 Bible Online

الْأَعْمَالْ 2 - Moroccan Standard Translation bible

الْأَعْمَالْ 2

¹الْفَصْلْ التَّانِي وْمْلِّي وْصَلْ يُومْ الْخَمْسِينْ، كَانُو الْمُومْنِينْ كُلّْهُمْ مْجْمُوعِينْ فْبْلَاصَة وَحْدَة،

²وْعْلَى غَفْلَة تّْسْمَعْ صُوتْ مْنْ السّْمَا بْحَالْ شِي رِيحْ قْوِيَّة، وْعَمّْرْ الدَّارْ فِينْ كَانُو ݣَالْسِينْ كُلّْهَا.

³وْبَانُو لِيهُمْ أَلْسِنَة مْفَرّْقِينْ بْحَالْ إِلَا مْنْ الْعَافْيَة وْتّْحَطّْ عْلَى كُلّْ وَاحْدْ مْنّْهُمْ لْسَانْ.

⁴وْتّْعَمّْرُو كُلّْهُمْ بْالرُّوحْ الْقُدُسْ، وْبْدَاوْ كَيْتّْكَلّْمُو بْلُغَاتْ خْرِينْ، كِمَا عْطَاهُمْ الرُّوحْ يْتّْكَلّْمُو.

⁵وْكَانُو شِي يْهُودْ مْتَّاقْيِينْ اللَّهْ مْنْ ݣَاعْ الشّْعُوبْ دْيَالْ الدّْنْيَا سَاكْنِينْ فْأُورْشَلِيمْ.

⁶وْمْلِّي وْقَعْ هَادْ الصُّوتْ، تّْجَمْعُو نَاسْ مْنّْهُمْ وْهُمَ حَايْرِينْ، عْلَاحْقَّاشْ كُلّْ وَاحْدْ مْنّْهُمْ كَانْ كَيْسْمَعْ الْمُومْنِينْ كَيْتّْكَلّْمُو بْلُغْتُه.

⁷وْدَهْشُو وْتّْعَجّْبُو وْݣَالُو: «وَاشْ مَاشِي ݣَاعْ هَادُو اللِّي كَيْتّْكَلّْمُو مْنْ الْجَلِيلْ؟

⁸إِيوَا كِيفَاشْ كَيْسْمَعْهُمْ كُلّْ وَاحْدْ مْنَّا بْلُغْةْ بْلَادُه اللِّي تّْوْلَدْ فِيهَا؟

⁹رَاهْ فِينَا اللِّي مْنْ بْلَادْ فَرْتِيَّة وْمَادِي وْعِيلَامْ، وْاللِّي كَيْسَكْنُو فْبْلَادْ مَا بِينْ النَّهْرَيْنْ وْفْالْيَهُودِيَّة وْكَبَّدُوكِيَّة وْبُنْتُسْ وْآسْيَا،

¹⁰وْفِرِيجِيَّة وْبَمْفِيلِيَّة وْمِصْرْ، وْجِهْةْ لِيبِيَا اللِّي قْرِيبَة مْنْ الْقَيْرَوَانْ، وْالرُّومَانِيِّينْ اللِّي كَيْزُورُو الْمْدِينَة،

¹¹لِيهُودْ وْالْبْرَّانِيِّينْ اللِّي وْلَّاوْ يْهُودْ، الْكِرِيتِيِّينْ وْالْعْرَبْ، وْوَاخَّا هَكَّاكْ كَنْسَمْعُوهُمْ كَيْتّْكَلّْمُو بْاللُّغَاتْ دْيَالْنَا عْلَى الْأُمُورْ الْعْجِيبَة دْيَالْ اللَّهْ!».

¹²وْتّْعَجّْبُو كُلّْهُمْ وْحَارُو، وْسْوّْلُو بْعْضِيَّاتْهُمْ: «أَشْنُو كَيْعْنِي هَادْشِّي؟».

¹³وَلَكِنْ وْحْدِينْ خْرِينْ كَانُو كَيْضَحْكُو وْكَيْݣُولُو: «رَاهُمْ شَرْبُو الْخْمَرْ بْزَّافْ!».

¹⁴وْوْقَفْ بُطْرُسْ مْعَ التّْلَامْدْ الْحْضَاشْ، وْتّْكَلّْمْ بْصُوتْ عَالِي وْݣَالْ لْلنَّاسْ: «آ الرّْجَالْ اللِّي يْهُودْ، وْنْتُمَ اللِّي سَاكْنِينْ فْأُورْشَلِيمْ كُلّْكُمْ، سْمْعُو لْكْلَامِي بَاشْ هَادْشِّي يْكُونْ مْعْرُوفْ عَنْدْكُمْ،

¹⁵هَادْ النَّاسْ مَاشِي سْكْرَانِينْ كِمَا كَتْضَنُّو نْتُمَ، حِيتْ هَادِي يَالَّاهْ التّْسْعُودْ دْيَالْ الصّْبَاحْ.

¹⁶وَلَكِنْ هَادْشِّي اللِّي ݣَالُه النّْبِي يُوئِيلْ:

¹⁷كَيْݣُولْ اللَّهْ: فْلِيَّامْ اللّْخْرَة غَنْفِيضْ بْرُوحِي عْلَى النَّاسْ كُلّْهُمْ، وْغَيْتّْنَبّْأُو وْلَادْكُمْ وْبْنَاتْكُمْ وْغَيْشُوفُو الشُّبَّانْ دْيَالْكُمْ رُؤْيَاتْ، وْغَيْحَلْمُو الْكْبَارْ مْنّْكُمْ فْالْعْمَرْ حْلْمَاتْ.

¹⁸وْغَنْفِيضْ بْرُوحِي فْدِيكْ لِيَّامْ عْلَى الْعْبِيدْ دْيَالِي رْجَالْ وْنْسَا، وْغَادِي يْتّْنَبّْأُو.

¹⁹وْغَنْدِيرْ أُمُورْ عْجِيبَة فْالسّْمَا مْنْ الْفُوقْ وْعَلَامَاتْ عْلَى الْأَرْضْ مْنْ لْتَحْتْ: دْمّْ وْعَافْيَة وْدْخَّانْ دَايْرْ بْحَالْ السّْحَابَة،

²⁰وْالشّْمْسْ غَتْوَلِّي ضْلَامْ، وْالْقَمَرْ غَيْوَلِّي حْمَرْ بْحَالْ الدّْمْ، قْبَلْ مَا يْجِي الْيُومْ الْعْظِيمْ الْمْشْهُورْ دْيَالْ الرَّبّْ.

²¹وْغَيْكُونْ بْاللِّي كُلّْ وَاحْدْ كَيْطْلَبْ إِسْمْ الرَّبّْ، غَيْنْجَا.

²²آ الرّْجَالْ الْإِسْرَائِيلِيِّينْ، سْمْعُو هَادْ الْكْلَامْ: رَاهْ بَانْ لِيكُمْ بْالْبُرْهَانْ بْلِّي يَسُوعْ النَّاصِرِي هُوَ مْنْ عَنْدْ اللَّهْ، بْالْمُعْجِزَاتْ وْالْأُمُورْ الْعْجِيبَة وْالْعَلَامَاتْ اللِّي دَارْهَا اللَّهْ عْلَى يْدِّيهْ وَسْطْكُمْ، كِيفْ كَتْعَرْفُو حْتَّى نْتُمَ.

²³وْهُوَ اللِّي سَلّْمُوهْ لِيكُمْ كِمَا هِيَ خُطَّةْ اللَّهْ اللِّي مْوَجّْدْهَا وْالْعِلْمْ دْيَالُه اللِّي سْبَقْ، وْبْيْدِّينْ الْمُدْنِبِينْ صْلَبْتُوهْ وْقْتَلْتُوهْ.

²⁴وَلَكِنْ اللَّهْ فَكُّه مْنْ قْيُودْ الْمُوتْ وْبَعْتُه حَيّْ، حِيتْ مَا كَانْشْ يْمْكَنْ لْلْمُوتْ تْبْقَى حَابْسَاهْ،

²⁵حِيتْ دَاوُدْ ݣَالْ عْلِيهْ: كْنْتْ كَنْشُوفْ الرَّبّْ قُدَّامِي دِيمَا، عْلَاحْقَّاشْ هُوَ عْلَى لِيمْنْ دْيَالِي بَاشْ مَا نْتّْزَعْزَعْشْ،

²⁶عْلَى دَاكْشِّي فْرَحْ قَلْبِي وْسَبّْحْ لْسَانِي، وْحْتَّى دَاتِي غَادِي تْمُوتْ وْعَنْدْهَا الرّْجَا،

²⁷عْلَاحْقَّاشْ مَا غَادِيشْ تْخَلِّينِي فْالْهَاوِيَة وْمَا غَادِيشْ تْخَلِّي الْقُدُّوسْ دْيَالْكْ يْتّْعَفّْنْ فْالْقْبَرْ.

²⁸هْدِيتِينِي لْطْرِيقْ الْحَيَاةْ، وْغَتْعَمّْرْنِي بْالْفَرْحَة مْلِّي نْشُوفْ وْجْهَكْ.

²⁹آ الْخُوتْ، سْمْحُو لِيَّ نْݣُولْ لِيكُمْ بْكُلّْ صَرَاحَة: رَاهْ جْدّْنَا دَاوُدْ مَاتْ وْتّْدْفَنْ، وْالْقْبَرْ دْيَالُه مَازَالْ عَنْدْنَا حْتَّى لْهَادْ النّْهَارْ.

³⁰وْحِيتْ كَانْ نْبِي، وْعَارْفْ بْلِّي اللَّهْ وَاعْدُه بْالْحَقّْ بْلِّي مْنْ التّْرِّيكَة دْيَالُه غَيْصِيفْطْ الْمَسِيحْ بَاشْ يْݣَلّْسُه عْلَى الْعَرْشْ دْيَالُه.

³¹تّْنَبّْأْ وْتّْكَلّْمْ عْلَى الْبَعْتْ دْيَالْ الْمَسِيحْ وْبْلِّي نْفْسُه مَا غَتْبْقَاشْ فْالْهَاوِيَة وْالدَّاتْ دْيَالُه مَا غَتّْعَفّْنْشْ.

³²يَسُوعْ هَادَا بَعْتُه اللَّهْ مْنْ الْمُوتْ، وْحْنَا كُلّْنَا شَاهْدِينْ عْلَى هَادْشِّي.

³³وْمْلِّي تّْرْفَعْ لْلسّْمَا عْلَى لِيمْنْ دْيَالْ اللَّهْ، وْخْدَا مْنْ عَنْدْ الْآبْ الرُّوحْ الْقُدُسْ اللِّي وْعَدْنَا بِيهْ، نَزّْلُه عْلِينَا كِيفْمَا كَتْشُوفُوهْ وْكَتْسَمْعُوهْ دَابَا.

³⁴حِيتْ دَاوُدْ مَا طْلَعْشْ لْلسَّمَاوَاتْ، وَلَكِنْ بْنَفْسُه كَيْݣُولْ: ݣَالْ الرَّبّْ لْرَبِّي: ݣْلَسْ عْلَى لِيمْنْ دْيَالِي

³⁵حْتَّى نْدِيرْ عْدْيَانْكْ تَحْتْ رْجْلِيكْ.

³⁶إِيوَا خَاصّْ ݣَاعْ شَعْبْ إِسْرَائِيلْ يْعَرْفُو وْيْتّْيِقّْنُو بْلِّي اللَّهْ دَارْ يَسُوعْ هَادَا اللِّي نْتُمَ صْلَبْتُوهْ، رَبّْ وْمَسِيحْ».

³⁷وْمْلِّي سْمْعُو النَّاسْ هَادْ الْكْلَامْ، تْنَادْمْ مْعَاهُمْ الْحَالْ، وْݣَالُو لْبُطْرُسْ وْلْلرُّسُلْ لْخْرِينْ: «آشْ خَاصّْنَا نْدِيرُو آ الْخُوتْ؟»

³⁸وْهُوَ يْݣُولْ لِيهُمْ بُطْرُسْ: «تُوبُو، وْخَاصّْ كُلّْ وَاحْدْ مْنّْكُمْ يْتّْعَمّْدْ بْإِسْمْ يَسُوعْ الْمَسِيحْ بَاشْ تّْغْفَرْ لِيكُمْ دْنُوبْكُمْ، وْغَادِي يْنْعَمْ عْلِيكُمْ اللَّهْ بْالرُّوحْ الْقُدُسْ،

³⁹حِيتْ هُوَ وَاعْدْكُمْ بِيهْ وْوَاعْدْ وْلَادْكُمْ وْݣَاعْ النَّاسْ اللِّي بْعَادْ، كُلّْ وَاحْدْ غَيْعَيّْطْ عْلِيهْ الرَّبّْ إِلَاهْنَا لْعَنْدُه».

⁴⁰وْكَانْ بُطْرُسْ كَيْخَبّْرْهُمْ وْكَيْشَجّْعْهُمْ بْكْلَامْ آخُرْ كْتِيرْ وْكَيْݣُولْ لِيهُمْ: «نْجِّيوْ رَاسْكُمْ مْنْ هَادْ الْجِيلْ الْفَاسْدْ!»

⁴¹وْاللِّي قْبْلُو كْلَامُه بْالْفَرْحَة تّْعَمّْدُو، وْتّْزَادُو عْلَى الجّْمَاعَة دْ الْمُومْنِينْ فْدَاكْ النّْهَارْ شِي تْلْتَالَافْ وَاحْدْ.

⁴²وْكَانُو كَيْدَاوْمُو عْلَى التَّعْلِيمْ دْيَالْ الرُّسُلْ، وْعْلَى الشّْرْكَة مْعَ بْعْضِيَّاتْهُمْ، وْالْعْشَا دْيَالْ الرَّبّْ، وْالصّْلَاة.

⁴³وْوْلَّاوْ ݣَاعْ النَّاسْ خَايْفِينْ، وْكَانُو بْزَّافْ دْ الْعْجَايْبْ وْالْعَلَامَاتْ كَيْتّْدَارُو عْلَى يْدِّينْ الرُّسُلْ.

⁴⁴وْݣَاعْ هَادُوكْ اللِّي آمْنُو كَانُو مْتَّاحْدِينْ وْكَانْ كُلّْشِي مْشْرُوكْ بِينَاتْهُمْ،

⁴⁵وْكَانُو كَيْبِيعُو الْأَمْلَاكْ دْيَالْهُمْ وْݣَاعْ دَاكْشِّي اللِّي عَنْدْهُمْ، وْكَيْقَسْمُو تَمَنُه بِينَاتْهُمْ عْلَى حْسَابْ مَا كَيْحْتَاجْ كُلّْ وَاحْدْ.

⁴⁶وْكُلَّ نْهَارْ كَانُو كَيْتّْجَمْعُو فْبِيتْ اللَّهْ مْتَّاحْدِينْ، وْكَيْشَرْكُو الطّْعَامْ بِينَاتْهُمْ فْدْيُورْهُمْ، وْكَيَاكْلُو وْهُمَ فْرْحَانِينْ وْمْتْوَاضْعِينْ،

⁴⁷وْكَيْسَبّْحُو اللَّهْ، وْكَانُو مْقْبُولِينْ عَنْدْ النَّاسْ كُلّْهُمْ. وْكَانْ الرَّبّْ كُلَّ نْهَارْ كَيْزِيدْ النَّاسْ اللِّي نْجَّاهُمْ لْجْمَاعْةْ الْمُومْنِينْ.