Read Moroccan Standard Translation الْأَعْمَالْ 20 Bible Online

الْأَعْمَالْ 20 - Moroccan Standard Translation bible

الْأَعْمَالْ 20

¹الْفَصْلْ عْشْرِينْ وْمْلِّي تّْهَدّْنَاتْ الْفُوضَى فْأَفَسُسْ، جْمَعْ بُولُسْ التّْلَامْدْ وْشَجّْعْهُمْ، وْمْنْ بَعْدْ تّْوَادْعْ مْعَاهُمْ وْسَافْرْ لْمَكِدُونِيَة.

²وْبْدَا كَيْتّْنَقّْلْ فْدُوكْ الجّْوَايْهْ كُلّْهُمْ، كَيْشَجّْعْ الْمُومْنِينْ بْكْلَامْ كْتِيرْ، حْتَّى وْصَلْ لْلْيُونَانْ.

³وْݣْلَسْ تْمَّ تْلْتْ شْهُورْ. وْمْلِّي بْدَا كَيْوَجّْدْ بَاشْ يْسَافْرْ فْالْبْحَرْ لْسُورِيَا، تَّافْقُو لِيهُودْ بَاشْ يْقْتْلُوهْ، وْبَانْ لِيهْ يْرْجَعْ عْلَى طْرِيقْ مَكِدُونِيَة.

⁴وْمْشَى مْعَاهْ سُوبَاتَرُسْ بْنْ بِرُّسْ مْنْ بِيرِيَّة، وْأَرِسْتَرْخُسْ وْسَكُونْدُسْ مْنْ تْسَالُونِيكِي، وْغَايُوسْ مْنْ دَرْبَة، وْتِيمُوتَاوُسْ، وْتِيخِيكُسْ وْتْرُوفِيمُسْ اللِّي بْجُوجْ مْنْ آسْيَا.

⁵وْسْبْقُونَا لْتَرْوَاسْ وْتّْسْنَّاوْنَا تْمَّ.

⁶أَمَّا حْنَا مْنْ بَعْدْ عِيدْ الْخُبْزْ الْفْطِيرْ سَافْرْنَا فْالْبْحَرْ مْنْ فِيلِبِّي، وْلْحَقْنَا عْلِيهُمْ مْنْ بَعْدْ خَمْسْ يَّامْ لْتَرْوَاسْ وْݣْلَسْنَا فِيهَا سْبَعْ يَّامْ.

⁷وْفْالنّْهَارْ اللّْوّْلْ دْ السِّيمَانَة، مْلِّي كْنَّا مْجْمُوعِينْ بَاشْ نْتّْشَارْكُو فْالْعْشَا دْيَالْ الرَّبّْ، بْدَا بُولُسْ اللِّي كَانْ بَاغِي يْسَافْرْ الْغَدّْ لِيهْ كَيْتّْكَلّْمْ مْعَ الْحَاضْرِينْ، وْطَوّْلْ فْالْكْلَامْ حْتَّى لْنَصّْ اللِّيلْ.

⁸وْكَانْ فْالْبِيتْ الْفُوقَانِي فِينْ تّْجْمَعْنَا، بْزَّافْ دْيَالْ الْقْنَادْلْ.

⁹وْكَانْ تْمَّ وَاحْدْ الشَّابْ سْمِيتُه أَفْتِيخُوسْ ݣَالْسْ حْدَا الشَّرْجَمْ، وْبْدَا كَيْدِّيهْ النّْعَاسْ. وْمْلِّي طَوّْلْ بُولُسْ فْكْلَامُه، غْلَبْ عْلَى الشَّابْ النّْعَاسْ وْطَاحْ مْنْ الطَّبْقَة التَّالْتَة لْلْتَحْتْ. وْهْزُّوهْ مْيّْتْ.

¹⁰وْنْزَلْ بُولُسْ وْتّْحْنَى عْلَى الشَّابْ وْخْدَاهْ بِينْ دْرَاعُه وْݣَالْ لِيهُمْ: «مَا تّْقَلّْقُوشْ، رَاهْ حَيّْ».

¹¹وْمْنْ بَعْدْ طْلَعْ بُولُسْ وْقَسّْمْ الْخُبْزْ وْكْلَا. وْتّْكَلّْمْ مْعَاهُمْ بْزَّافْ حْتَّى لْلْفْجَرْ وْمْنْ بَعْدْ مْشَى.

¹²وْدَّاوْ الشَّابْ حَيّْ لْدَارُه، وْتْشَجّْعُو بْزَّافْ.

¹³وْرْكَبْنَا فْالسّْفِينَة قْبَلْ مْنْ بُولُسْ بَاشْ نْمْشِيوْ لْأَسُّوسْ، نَاوْيِينْ نَاخْدُوهْ مْعَانَا مْنْ تْمَّ، حِيتْ هُوَ بْغَا يْمْشِي لِيهَا فْالْبْرّْ.

¹⁴وْمْلِّي لْحَقْ عْلِينَا لْأَسُّوسْ، رَكّْبْنَاهْ فْالسّْفِينَة وْمْشِينَا لْمِيتِيلِينِي.

¹⁵وْمْنْ تْمَّ سَافْرْنَا فْالْبْحَرْ وْوْصَلْنَا الْغَدّْ لِيهْ لْجِهْةْ خِيُوسْ. وْالْغَدْ لِيهْ دْزْنَا حْدَا سَامُوسْ، وْفْالنّْهَارْ اللِّي مْنْ بَعْدُه وْصَلْنَا لْمِيلِيتُسْ،

¹⁶حِيتْ بُولُسْ قَرّْرْ بَاشْ مَا يْدُوزْشْ عْلَى أَفَسُسْ فْالسّْفَرْ دْيَالُه بَاشْ مَا يْتّْعَطّْلْشْ فْبْلَادْ آسْيَا. عْلَاحْقَّاشْ كَانْ بَاغِي يْزْرَبْ بَاشْ يْوْصَلْ دْغْيَا لْأُورْشَلِيمْ إِلَا قْدَرْ فْيُومْ الْخَمْسِينْ.

¹⁷وْمْنْ مِيلِيتُسْ صِيفْطْ بُولُسْ لْشْيُوخْ كْنِيسْةْ أَفَسُسْ بَاشْ يْجِيوْ.

¹⁸وْمْلِّي جَاوْ لْعَنْدُه، ݣَالْ لِيهُمْ: «رَاكُمْ كَتْعَرْفُو كِيفَاشْ كْنْتْ مْعَاكُمْ هَادْ الْمُدَّة كُلّْهَا، مْنْ نْهَارْ حَطِّيتْ رْجْلِي فْبْلَادْ آسْيَا.

¹⁹وْكْنْتْ كَنْخْدَمْ الرَّبّْ وْأَنَا مْتْوَاضْعْ وْكَنْبْكِي بْدْمُوعْ كْتِيرَة، وْقَاسِيتْ الْمْحَايْنْ بْفْعَايْلْ لِيهُودْ.

²⁰وْمَا قَصّْرْتْ حْتَّى فْشِي حَاجَة اللِّي يْمْكَنْ لِيهَا تْنْفَعْكُمْ، وَلَكِنْ كْنْتْ كَنْبَيّْنْ لِيكُمْ وْكَنْعَلّْمْكُمْ قُدَّامْ النَّاسْ وْمْنْ دَارْ لْدَارْ.

²¹وْطْلَبْتْ مْنْ لِيهُودْ وْالْيُونَانِيِّينْ بَاشْ يْتُوبُو وْيْرْجْعُو لْلَّهْ وْيْآمْنُو بْرَبّْنَا يَسُوعْ.

²²وْأَنَا دَابَا غَادِي لْأُورْشَلِيمْ كِمَا آمْرْنِي الرُّوحْ الْقُدُسْ، وْمَا عَارْفْشْ أَشْنُو غَيْطْرَا لِيَّ تْمَّ.

²³وَاخَّا الرُّوحْ الْقُدُسْ كَانْ كَيْخَبّْرْنِي فْكُلّْ مْدِينَة بْلِّي الْحَبْسْ وْالْمْصَايْبْ كَيْتّْسْنَّاوْنِي.

²⁴وَلَكِنْ رَاهْ مَا كَنْدِيرْشْ حْسَابْ لْحْيَاتِي وْمَا عَنْدِي لِيهَا قِيمَة، مَا حَدّْنِي كَنْدِيرْ جْهْدِي بَاشْ نْكَمّْلْ خْدَمْتِي وْالْخْدْمَة اللِّي خْدِيتْهَا مْنْ الرَّبّْ يَسُوعْ بَاشْ نْخَبّْرْ النَّاسْ بْالْإِنْجِيلْ دْيَالْ نِعْمَةْ اللَّهْ.

²⁵وْدَابَا أَنَا عَارْفْ بْلِّي مَا غَادِيشْ تْشُوفُونِي مَرَّة خْرَى، نْتُمَ اللِّي ضْرْتْ بِينَاتْكُمْ كُلّْكُمْ كَنْخَبّْرْ بْمَمْلَكَةْ اللَّهْ.

²⁶عْلَى هَادْشِّي رَانِي كَنْشْهَدْ قُدَّامْكُمْ الْيُومْ بْلِّي رَانِي بَارِي مْنْ دْمّْكُمْ كُلّْكُمْ،

²⁷حِيتْ مَا خَلِّيتْ حْتَّى شِي حَاجَة مَا عَلّْمْتْهَاشْ لِيكُمْ مْنْ مُرَادْ اللَّهْ كُلُّه.

²⁸إِيوَا دَابَا رْدُّو الْبَالْ لْرَاسْكُمْ وْلْݣَاعْ النَّاسْ اللِّي دَارْكُمْ الرُّوحْ الْقُدُسْ مْسْؤُولِينْ عْلِيهُمْ، بَاشْ تْقَابْلُو كْنِيسْةْ اللَّهْ اللِّي شْرَاهَا بْالدّْمْ دْيَالُه.

²⁹وْأَنَا عَارْفْ بْلِّي شِي دْيَابْ كَيْخَطْفُو، غَادِي يْدَخْلُو وَسْطْكُمْ مْنْ بَعْدْمَا نْرْحَلْ وْمَا غَادِيشْ يْحَنُّو فْجْمَاعْةْ الْمُومْنِينْ.

³⁰وْمْنْ وَسْطْ مْنّْكُمْ نْتُمَ غَادِي يْنُوضُو شِي وْحْدِينْ وْيْنَطْقُو بْالْكْدُوبْ بَاشْ يْخَرّْجُو التّْلَامْدْ عْلَى الطّْرِيقْ وْيْجَرُّوهُمْ مُورَاهُمْ.

³¹عْلَى هَادْشِّي خَاصّْكُمْ تْكُونُو عْلَى بَالْ، وْنْتُمَ كَتّْفَكّْرُو بْلِّي تْلْتْ سْنِينْ هَادِي وْأَنَا كَنْوَصِّي كُلّْ وَاحْدْ مْنّْكُمْ لِيلْ وْنْهَارْ بْالدّْمُوعْ فْعِينِيَّ.

³²وْدَابَا آ خُوتِي غَادِي نْخَلِّيكُمْ فْيْدِّينْ اللَّهْ وْكْلَامْ النِّعْمَة دْيَالُه اللِّي قَادْرْ يْبْنِيكُمْ وْيْخَلِّيكُمْ تْوَرْتُو مْعَ ݣَاعْ النَّاسْ الْمْقَدّْسِينْ.

³³عَمّْرْنِي مَا طْمَعْتْ فْفْلُوسْ شِي وَاحْدْ وَلَا فْالدّْهَبْ دْيَالُه وَلَا فْحْوَايْجُه،

³⁴نْتُمَ كَتْعَرْفُو بْلِّي بْيْدِّيَّ هَادُو خْدَمْتْ بَاشْ نْصْرَفْ عْلَى رَاسِي وْعْلَى اللِّي مْعَايَ.

³⁵وْوْرِّيتْكُمْ فْكُلّْ حَاجَة كِيفَاشْ خَاصّْنَا نْخَدْمُو وْنْدِيرُو كُلّْ مَا فْجَهْدْنَا بَاشْ نْعَاوْنُو النَّاسْ الْفُقَرَا، وْنْتّْفَكّْرُو كْلَامْ الرَّبّْ يَسُوعْ مْلِّي ݣَالْ: الْوَاحْدْ كَيْتّْبَارْكْ إِلَا عْطَى كْتَرْ مْنْ إِلَا خْدَا».

³⁶وْمْلِّي كَمّْلْ بُولُسْ كْلَامُه، سْجَدْ مْعَاهُمْ كُلّْهُمْ وْصْلَّى.

³⁷وْبْكَاوْ كَامْلِينْ بْزَّافْ وْعَنّْقُو بُولُسْ وْبَاسُوهْ.

³⁸وْاللِّي حْزَّنْهُمْ بْزَّافْ هُوَ الْكْلَامْ اللِّي ݣَالْ لِيهُمْ: «مَا غَادِيشْ تْشُوفُونِي مَرَّة خْرَى». وْمْنْ بَعْدْ وَصّْلُوهْ لْلسّْفِينَة.