Read Moroccan Standard Translation الْأَعْمَالْ 21 Bible Online

الْأَعْمَالْ 21 - Moroccan Standard Translation bible

الْأَعْمَالْ 21

¹الْفَصْلْ وَاحْدْ وْعْشْرِينْ وْمْنْ بَعْدْمَا تّْفَارْقْنَا مْعَاهُمْ، سَافْرْنَا نِيشَانْ فْالْبْحَرْ لْكُوسْ، وْالْغَدّْ لِيهْ وْصَلْنَا لْرُودُسْ، وْمْنْ تْمَّ لْبَاتْرَا.

²وْلْقِينَا وَاحْدْ السّْفِينَة غَادْيَة لْفِينِيقِيَة، وْرْكَبْنَا فِيهَا وْمْشِينَا.

³وْمْلِّي بَانْتْ لِينَا قُبْرُصْ خَلِّينَاهَا عْلَى لِيسْرْ دْيَالْنَا، وْمْشِينَا فْطْرِيقْ سُورِيَا. وْوْصَلْنَا لْلْمَرْسَى دْ صُورْ حِيتْ فِيهَا كَانْتْ السّْفِينَة غَتْخْوِي السّْلْعَة دْيَالْهَا.

⁴وْلْقِينَا التّْلَامْدْ تْمَّ، وْݣْلَسْنَا عَنْدْهُمْ سْبَعْ يَّامْ. وْكَانُو كَيْوَصِّيوْ بُولُسْ بَاشْ مَا يْطْلَعْشْ لْأُورْشَلِيمْ، كِمَا ݣَالْ لِيهُمْ رُوحْ اللَّهْ.

⁵وَلَكِنْ مْلِّي كْمْلَاتْ السِّيمَانَة، خْرَجْنَا بَاشْ نْكَمّْلُو السّْفَرْ دْيَالْنَا. وْمْشَاوْ مْعَانَا الْمُومْنِينْ كُلّْهُمْ بْعْيَالَاتْهُمْ وْوْلَادْهُمْ بْرَّا دْ الْمْدِينَة بَاشْ يْتّْوَادْعُو مْعَانَا. وْرْكَعْنَا عْلَى رْكَابِينَا فْجَنْبْ الْبْحَرْ وْصَلِّينَا.

⁶وْمْلِّي تّْوَادْعْنَا مْعَ بْعْضِيَّاتْنَا وْرْكَبْنَا فْالسّْفِينَة، رْجْعُو هُمَ لْدْيُورْهُمْ.

⁷وْكَمّْلْنَا السّْفَرْ دْيَالْنَا فْالْبْحَرْ مْنْ صُورْ لْبُتُولِمَايِسْ، وْسَلّْمْنَا عْلَى الْخُوتْ تْمَّ وْݣْلَسْنَا عَنْدْهُمْ نْهَارْ وَاحْدْ.

⁸وْالْغَدّْ لِيهْ خْرَجْنَا، وْوْصَلْنَا لْقَيْصَرِيَّة وْدْخَلْنَا لْدَارْ فِيلُبُّسْ الْمُبَشِّرْ بْالْإِنْجِيلْ، وْهُوَ وَاحْدْ مْنْ السّْبْعَة اللِّي خْتَارْتْهُمْ كْنِيسْةْ أُورْشَلِيمْ بَاشْ يْخَدْمُو الْمُومْنِينْ، وْݣْلَسْنَا عَنْدُه.

⁹وْكَانْ عَنْدُه رْبْعَة دْ الْبْنَاتْ عَزْبَاتْ كَيْتّْنَبّْأُو.

¹⁰وْفْالْوَقْتْ اللِّي ݣْلَسْنَا عَنْدُه يَّامَاتْ كْتَارْ، وْصَلْ مْنْ بْلَادْ الْيَهُودِيَّة نْبِي سْمِيتُه أَݣَابُوسْ.

¹¹وْجَا لْعَنْدْنَا وْخْدَا الْحْزَامْ دْيَالْ بُولُسْ وْكَتّْفْ رَاسُه مْنْ رْجْلِيهْ وْيْدِّيهْ وْݣَالْ: «كَيْݣُولْ الرُّوحْ الْقُدُسْ: مُولْ هَادْ الْحْزَامْ غَادِي يْكَتّْفُوهْ لِيهُودْ بْحَالْ هَكَّا فْأُورْشَلِيمْ، وْغَيْسَلّْمُوهْ لْلْيْدِّينْ دْيَالْ النَّاسْ اللِّي مَاشِي يْهُودْ».

¹²وْمْلِّي سْمَعْنَا هَادْ الْكْلَامْ، بْدِينَا حْنَا وْالنَّاسْ اللِّي مْنْ تْمَّ، كَنْرَغْبُو بُولُسْ بَاشْ مَا يْطْلَعْشْ لْأُورْشَلِيمْ.

¹³وْهُوَ يْݣُولْ لِينَا: «مَالْكُمْ كَتْقَطّْعُو قَلْبِي بْالْبْكَا دْيَالْكُمْ؟ أَنَا رَاهْ مُوجُودْ مَاشِي غِيرْ نْتْكَتّْفْ فْأُورْشَلِيمْ، وَلَكِنْ نْمُوتْ فِيهَا عْلَى وْدّْ الرَّبّْ يَسُوعْ».

¹⁴وْمْلِّي مَا قْدَرْنَاشْ نْقَنْعُوهْ، سْكَتْنَا وْݣْلْنَا: «اللِّي بْغَاهَا الرَّبّْ هِيَ اللِّي تْكُونْ».

¹⁵وْمْنْ بَعْدْ شِي يَّامَاتْ وَجّْدْنَا رَاسْنَا لْلسّْفَرْ وْطْلَعْنَا لْأُورْشَلِيمْ،

¹⁶وْمْشَاوْ مْعَانَا شِي تْلَامْدْ مْنْ قَيْصَرِيَّة، وْدَّاوْنَا لْدَارْ مَنَاسُونْ اللِّي مْنْ قُبْرُصْ وْهُوَ تْلْمِيدْ قْدِيمْ، بَاشْ نْݣَلْسُو عَنْدُه.

¹⁷وْمْلِّي وْصَلْنَا لْأُورْشَلِيمْ سْتَقْبْلُونَا الْخُوتْ وْرَحّْبُو بِينَا.

¹⁸وْالْغَدّْ لِيهْ، مْشَا مْعَانَا بُولُسْ عَنْدْ يَعْقُوبْ، وْجَاوْ شْيُوخْ الْكْنِيسَة كُلّْهُمْ حْتَّى هُمَ.

¹⁹وْسَلّْمْ عْلِيهُمْ بُولُسْ وْحْكَى لِيهُمْ بْالتَّدْقِيقْ ݣَاعْ دَاكْشِّي اللِّي دَارْ اللَّهْ عْلَى يْدِّيهْ وَسْطْ الشّْعُوبْ اللِّي مَاشِي يْهُودْ.

²⁰وْمْلِّي سْمْعُو لْكْلَامُه عْطَاوْ الْعَزّْ لْلَّهْ وْݣَالُو لِيهْ: «هَا نْتَ كَتْشُوفْ آ خُونَا كِيفَاشْ الْأُلُوفْ دْيَالْ لِيهُودْ آمْنُو، وْكُلّْهُمْ كَيْغِيرُو عْلَى الشّْرَعْ.

²¹وْرَاهْ سْمْعُو عْلِيكْ بْلِّي كَتْعَلّْمْ لِيهُودْ اللِّي سَاكْنِينْ وَسْطْ الشّْعُوبْ لْخْرِينْ بَاشْ مَا يْبْقَاوْشْ تَابْعِينْ لْشْرَعْ مُوسَى، وْكَتْوَصِّيهُمْ بَاشْ مَا يْخَتّْنُوشْ وْلَادْهُمْ وْمَا يْتْبْعُوشْ الْعَادَاتْ دْيَالْنَا.

²²وْدَابَا أَشْنُو الْمَعْمُولْ؟ حِيتْ بْلَا شْكّْ غَادِي يْسَمْعُو بْالْمْجِي دْيَالْكْ.

²³وْخَاصّْكْ تْدِيرْ هَادْشِّي اللِّي غَادِي نْݣُولُو لِيكْ: كَايْنِينْ رْبْعَة دْ الرّْجَالْ كَانُو مْوَاعْدِينْ اللَّهْ بْشِي حَاجَة.

²⁴دِّيهُمْ، وْتّْنْقَّى مْعَاهُمْ وْخَلّْصْ عْلِيهُمْ بَاشْ يْحَسّْنُو شْعَرْهُمْ، وْهَكَّا غَادِي يْعْرَفْ كُلّْ وَاحْدْ بْلِّي دَاكْشِّي اللِّي سْمَعْ عْلِيكْ مَاشِي صْحِيحْ، وْبْلِّي حْتَّى نْتَ كَتْدِيرْ بْالشّْرَعْ دْيَالْ مُوسَى.

²⁵أَمَّا النَّاسْ اللِّي مَاشِي يْهُودْ وْآمْنُو، رَاهْ حْنَا كْتَبْنَا لِيهُمْ أَشْنُو قَرّْرْنَا، بَاشْ مَا يْبْقَاوْشْ يَاكْلُو الدّْبَايْحْ اللِّي كَتّْدْبَحْ لْلْأَصْنَامْ، وْمَا يَاكْلُوشْ الدّْمْ وْالجِّيفَة، وْمَا يْزْنِيوْشْ».

²⁶وْالْغَدّْ لِيهْ، دَّا بُولُسْ مْعَاهْ الرّْجَالْ بْرَبْعَة، وْتّْنْقَّى مْعَاهُمْ وْدْخَلْ لْبِيتْ اللَّهْ بَاشْ يْقَيّْدْ النّْهَارْ اللِّي غَادِي تْكْمَلْ فِيهْ لِيَّامْ اللِّي فْرَضْهَا الشّْرَعْ بَاشْ يْوَلِّيوْ نْقِيِّينْ، وْالْوَقْتْ اللِّي غَادِي تّْعْطَى فِيهْ الدّْبِيحَة عْلَى كُلّْ وَاحْدْ مْنّْهُمْ.

²⁷وْمْلِّي قَرّْبَاتْ تْسَالِي سْبَعْ يَّامْ، شَافُو شِي يْهُودْ مْنْ بْلَادْ آسْيَا بُولُسْ فْبِيتْ اللَّهْ. وْهُمَ يْحَرّْشُو عْلِيهْ الجّْمَاعَة دْ النَّاسْ كُلّْهَا، وْشْدُّوهْ،

²⁸وْبْدَاوْ كَيْݣُولُو بْالْغْوَاتْ: «آ وْلَادْ إِسْرَائِيلْ، عَاوْنُونَا! رَاهْ هَادَا هُوَ الرَّاجْلْ اللِّي كَيْعَلّْمْ النَّاسْ كُلّْهُمْ فْكُلّْ بْلَاصَة تَعْلِيمْ ضْدّْ الشَّعْبْ وْضْدّْ الشّْرَعْ وْضْدّْ هَادْ الْمُوضْعْ. وْكْتَرْ مْنْ هَادْشِّي، دَخّْلْ حْتَّى الْيُونَانِيِّينْ لْبِيتْ اللَّهْ، وْنَجّْسْ هَادْ الْمُوضْعْ الْمْقَدّْسْ».

²⁹ݣَالُو هَادْ الْكْلَامْ حِيتْ شَافُو تْرُوفِيمُسْ اللِّي مْنْ أَفَسُسْ مْعَ بُولُسْ فْالْمْدِينَة، وْسْحَابْ لِيهُمْ بْلِّي بُولُسْ دَخّْلُه لْبِيتْ اللَّهْ!

³⁰وْهِيَ تْنُوضْ الْفُوضَى فْالْمْدِينَة كُلّْهَا، وْتّْجَمْعُو النَّاسْ عْلَى بُولُسْ، وْشْدُّوهْ وْجَرُّوهْ مْخَرّْجِينُه مْنْ بِيتْ اللَّهْ، وْدِيكْ السَّاعَة سْدُّو الْبِيبَانْ.

³¹وْمْلِّي كَانُو بَاغْيِينْ يْقْتْلُوهْ، سْمَعْ قَايْدْ الْقُيَّادْ دْيَالْ الْفَرْقَة دْ الْعَسْكَرْ الرُّومَانِيَّة بْلِّي أُورْشَلِيمْ كُلّْهَا فِيهَا الْفُوضَى،

³²وْدْغْيَا خْدَا الْعَسْكَرْ وْالْقُيَّادْ دْ الْعَسْكَرْ مْعَاهْ، وْجْرَى جِيهْةْ النَّاسْ، وْغِيرْ شَافُو قَايْدْ الْقُيَّادْ وْالْعَسْكَرْ، حَبْسُو وْمَا بْقَاوْشْ كَيْضْرْبُو بُولُسْ.

³³وْدِيكْ السَّاعَة قَرّْبْ مْنُّه قَايْدْ الْقُيَّادْ وْشْدُّه، وْآمْرْ الْعَسْكَرْ بَاشْ يْكَتّْفُوهْ بْجُوجْ سْنَاسْلْ. وْمْنْ بَعْدْ سْوّْلْ عْلِيهْ بَاشْ يْعْرَفْ شْكُونْ هُوَ وْأَشْنُو دَارْ.

³⁴وْكَانُو شِي وْحْدِينْ مْنْ الجّْمَاعَة دْ النَّاسْ كَيْغَوْتُو وْكَيْݣُولُو شِي حَاجَة، وْوْحْدِينْ خْرِينْ كَيْغَوْتُو وْكَيْݣُولُو حَاجَة خْرَى. وْمْلِّي صْعَابْ عْلِيهْ يْعْرَفْ الْحَقِيقَة وَسْطْ هَادْ الْفُوضَى، آمْرْ الْعَسْكَرْ دْيَالُه بَاشْ يْدِّيوْ بُولُسْ لْلْقَشْلَة.

³⁵وْمْلِّي وْصْلُو بِيهْ لْلدّْرُوجْ، هْزُّوهْ الْعَسْكَرْ عْلَاحْقَّاشْ خَافُو مْنْ الجّْمَاعَة دْ النَّاسْ لَيْتّْكَرْفْصُو عْلِيهْ.

³⁶حِيتْ كَانُو تَابْعِينُه وْكَيْغَوّْتُو: «قْتْلُوهْ!».

³⁷وْمْلِّي كَانُو غَادْيِينْ يْدَخّْلُو بُولُسْ لْلْقَشْلَة، ݣَالْ بُولُسْ لْقَايْدْ الْقُيَّادْ دْ الْعَسْكَرْ: «وَاشْ تْسْمَحْ لِيَّ نْݣُولْ لِيكْ شِي حَاجَة؟». وْرَدّْ عْلِيهْ قَايْدْ الْقُيَّادْ دْ الْعَسْكَرْ: «كَتْعْرَفْ الْيُونَانِيَّة؟

³⁸وَاشْ مَاشِي نْتَ هُوَ دَاكْ الْمِصْرِي اللِّي دَارْ الْفُوضَى هَادِي شِي يَّامَاتْ، وْخَرّْجْ رَبْعَالَافْ قْتَّالْ لْلصَّحْرَا؟».

³⁹وْهُوَ يْجَاوْبُه بُولُسْ: «أَنَا يْهُودِي، وْمُوَاطِنْ مْنْ طَرْسُوسْ، وْهِيَ مْدِينَة مْعْرُوفَة فْبْلَادْ كِيلِيكِيَّة. وْدَابَا كَنْطْلَبْ مْنّْكْ بَاشْ تْسْمَحْ لِيَّ نْهْضَرْ مْعَ هَادْ النَّاسْ».

⁴⁰وْسْمَحْ لِيهْ قَايْدْ الْقُيَّادْ دْ الْعَسْكَرْ بَاشْ يْتّْكَلّْمْ، وْوْقَفْ بُولُسْ فْالدّْرُوجْ وْهْزّْ يْدُّه لْلنَّاسْ بَاشْ يْسَكْتُو. وْمْلِّي سْكْتُو كُلّْهُمْ، تّْكَلّْمْ مْعَاهُمْ بُولُسْ بْاللُّغَة الْعِبْرِيَّة وْݣَالْ: