Read Moroccan Standard Translation الْأَعْمَالْ 22 Bible Online

الْأَعْمَالْ 22 - Moroccan Standard Translation bible

الْأَعْمَالْ 22

¹الْفَصْلْ تْنِينْ وْعْشْرِينْ «آ خُوتِي وْسْيَادِي، سْمْعُو دَابَا بَاشْ غَنْدَافْعْ عْلَى رَاسِي».

²وْمْلِّي سْمْعُوهْ كَيْهْضَرْ مْعَاهُمْ بْاللُّغَة الْعِبْرِيَّة زَادُو تْهَدّْنُو، وْهُوَ يْݣُولْ:

³«أَنَا يْهُودِي تّْوْلَدْتْ فْطَرْسُوسْ مْنْ بْلَادْ كِيلِيكِيَّة، وَلَكِنْ كْبَرْتْ هْنَا فْهَادْ الْمْدِينَة، وْعْلَى يْدّْ الْأُسْتَادْ غَمَالَائِيلْ تْعَلّْمْتْ مْزْيَانْ شْرَعْ جْدُودْنَا، وْكَانْتْ عَنْدِي الْغِيرَة عْلَى اللَّهْ بْحَالْ كُلّْ وَاحْدْ مْنّْكُمْ الْيُومْ.

⁴وْتّْعَدِّيتْ حْتَّى لْلْمُوتْ عْلَى كُلّْ وَاحْدْ تَابْعْ طْرِيقْ يَسُوعْ، وْهَكَّا شْدِّيتْ الرّْجَالْ وْالْعْيَالَاتْ وْدَخّْلْتْهُمْ لْلْحَبْسْ.

⁵وْكَيْشْهَدْ لِيَّ بْهَادْشِّي رَئِيسْ رْجَالْ الدِّينْ وْشْيُوخْ الشَّعْبْ كُلّْهُمْ، اللِّي مْنّْهُمْ خْدِيتْ رَسَائِلْ دِّيتْهُمْ لْخُوتْنَا لِيهُودْ فْدِمَشْقْ، وْمْشِيتْ بَاشْ نْشَدّْ هَادُوكْ اللِّي تْمَّ وْنْجِيبْهُمْ لْأُورْشَلِيمْ بَاشْ يْتّْعَاقْبُو.

⁶وْمْلِّي كْنْتْ غَادِي فْالطّْرِيقْ وْقَرّْبْتْ لْدِمَشْقْ، لْمَعْ عْلَى غَفْلَة مْعَ جْوَايْهْ الضّْهُرْ ضَوّْ قْوِي مْنْ السّْمَا ضَايْرْ بِيَّ،

⁷وْأَنَا نْطِيحْ لْلْأَرْضْ، وْسْمَعْتْ صُوتْ كَيْݣُولْ لِيَّ: شَاوُلْ، شَاوُلْ، عْلَاشْ كَتّْعَدَّى عْلِيَّ؟.

⁸وْجَاوْبْتُه: شْكُونْ نْتَ آ سِيدِي؟. وْهُوَ يْݣُولْ لِيَّ: أَنَا يَسُوعْ النَّاصِرِي اللِّي نْتَ كَتّْعَدَّى عْلِيهْ.

⁹وْكَانُو الرّْجَالْ اللِّي مْعَايَ كَيْشُوفُو الضُّو، وَلَيْنِّي مَا كَيْسَمْعُوشْ الصُّوتْ اللِّي كَيْتّْكَلّْمْ مْعَايَ.

¹⁰وْݣْلْتْ لِيهْ: أَشْنُو خَاصّْنِي نْدِيرْ آ سِيدِي؟ وْجَاوْبْنِي الرَّبّْ: نُوضْ وْدْخُلْ لْدِمَشْقْ، وْتْمَّ غَادِي يْتّْݣَالْ لِيكْ دَاكْشِّي اللِّي خَاصّْكْ تْدِيرْ.

¹¹وْعْلَاحْقَّاشْ مَا بْقِيتْشْ كَنْشُوفْ بْسْبَابْ دَاكْ الضُّو الْقْوِي، شْدُّونِي مْنْ يْدِّي هَادُوكْ اللِّي كَانُو مْعَايَ، وْوَصْلُونِي لْدِمَشْقْ.

¹²وْكَانْ تْمَّ وَاحْدْ الرَّاجْلْ مْتَّاقِي اللَّهْ وْكَيْطِيعْ شْرَعْ مُوسَى سْمِيتُه حَنَانْيَا، السُّمْعَة دْيَالُه مْزْيَانَة بِينْ ݣَاعْ لِيهُودْ اللِّي سَاكْنِينْ فْدِمَشْقْ.

¹³وْهُوَ يْجِي لْعَنْدِي وْوْقَفْ وْݣَالْ: آ خُويَا شَاوُلْ، شُوفْ! وْفْدِيكْ السَّاعَة وْلِّيتْ كَنْشُوفْ، وْشْفْتْ فِيهْ.

¹⁴وْهُوَ يْݣُولْ لِيَّ: إِلَاهْ جْدُودْنَا خْتَارْكْ بَاشْ تْعْرَفْ الْمُرَادْ دْيَالُه، وْتْشُوفْ الصَّالِحْ، وْتْسَمْعُهْ كَيْكَلّْمْكْ بْفُمُّه.

¹⁵عْلَاحْقَّاشْ غَادِي تْوَلِّي كَتْشْهَدْ بِيهْ لْلنَّاسْ كُلّْهُمْ عْلَى كُلّْ مَا شْفْتِي وْسْمَعْتِي.

¹⁶وْدَابَا آشْ كَتّْسَنَّى؟ نُوضْ تْعَمّْدْ، وْتّْنْقَّى مْنْ دْنُوبْكْ، وْنْتَ كَتْعَيّْطْ بْالْإِسْمْ دْيَالُه.

¹⁷وْمْنْ بَعْدْمَا رْجَعْتْ لْأُورْشَلِيمْ وْكْنْتْ كَنْصَلِّي فْبِيتْ اللَّهْ شْفْتْ رُؤْيَا،

¹⁸شْفْتْ الرَّبّْ كَيْݣُولْ لِيَّ: سَرْبِي! خْرُجْ مْنْ أُورْشَلِيمْ بْالزّْرْبَة، حِيتْ مَا غَيْقْبْلُوشْ الشّْهَادَة دْيَالْكْ لِيَّ.

¹⁹وْأَنَا نْݣُولْ: آ رْبِّي، رَاهُمْ كَيْعَرْفُو مْزْيَانْ بْلِّي كْنْتْ كَنْدْخُلْ لْدْيُورْ الصّْلَاة بَاشْ نْشَدّْ فْالْحَبْسْ هَادُوكْ اللِّي كَيْآمْنُو بِيكْ وْنْضْرَبْهُمْ،

²⁰وْمْلِّي تّْقْتَلْ اسْتِفَانُوسْ الشَّهِيدْ دْيَالْكْ كْنْتْ حَاضْرْ تْمَّ، وْأَنَا رَاضِي عْلَى دَاكْشِّي وْحَاضِي الْحْوَايْجْ دْيَالْ هَادُوكْ اللِّي قْتْلُوهْ.

²¹وْهُوَ يْݣُولْ لِيَّ الرَّبّْ: سِيرْ، عْلَاحْقَّاشْ غَادِي نْصِيفْطْكْ لْبْلَاصَة بْعِيدَة، لْلشّْعُوبْ اللِّي مَاشِي يْهُودْ».

²²وْكَانُو النَّاسْ كَيْتّْصَنّْتُو لْبُولُسْ حْتَّى ݣَالْ هَادْ الْكْلَامْ، وْمْنْ بَعْدْ بْدَاوْ كَيْغَوّْتُو وْكَيْݣُولُو: «حَيّْدُو هَادْ الرَّاجْلْ مْنْ عْلَى وْجَهْ الْأَرْضْ حِيتْ ݣَاعْ مَا يْسْتَاهْلْ يْعِيشْ!».

²³وْبْدَاوْ كَيْغَوّْتُو، وْكَيْشَيّْرُو بْحْوَايْجْهُمْ، وْكَيْرْمِيوْ التّْرَابْ لْلسّْمَا.

²⁴وْآمْرْ قَايْدْ الْقُيَّادْ دْ الْعَسْكَرْ الرّْجَالْ دْيَالُه بَاشْ يْدَخّْلُو بُولُسْ لْلْقَشْلَة وْيْضْرْبُوهْ حْتَّى يْݣَرّْ بَاشْ يْعْرَفْ السَّبَبْ اللِّي خْلَّاهُمْ دَايْرِينْ عْلِيهْ هَادْ الصّْدَاعْ كُلُّه.

²⁵وْمْلِّي جْبّْدُوهْ بَاشْ يْضْرْبُوهْ، ݣَالْ بُولُسْ لْلْقَايْدْ دْ الْعَسْكَرْ اللِّي وَاقْفْ فْجَنْبُه: «وَاشْ عَنْدْكُمْ الْحَقّْ تْضَرْبُو مُوَاطِنْ رُومَانِي بْلَا مَا تْحَاكْمُوهْ؟»

²⁶وْمْلِّي سْمَعْ الْقَايْدْ دْ الْعَسْكَرْ هَادْ الْكْلَامْ، مْشَى كَيْجْرِّي لْعَنْدْ قَايْدْ الْقُيَّادْ دْ الْعَسْكَرْ وْݣَالْ لِيهْ: «أَشْنُو كْنْتِ غَتْدِيرْ؟ هَادْ الرَّاجْلْ رَاهْ رُومَانِي!»

²⁷وْجَا قَايْدْ الْقُيَّادْ دْ الْعَسْكَرْ لْعَنْدْ بُولُسْ وْݣَالْ لِيهْ: «ݣُولْ لِيَّ: وَاشْ نْتَ رُومَانِي؟» وْهُوَ يْجَاوْبُه: «إِيِّهْ».

²⁸وْݣَالْ لِيهْ قَايْدْ الْقُيَّادْ دْ الْعَسْكَرْ: «أَنَا دْفَعْتْ بْزَّافْ دْ الْفْلُوسْ بَاشْ نَاخُدْ الْجِنْسِيَّة الرُّومَانِيَّة». وْهُوَ يْرَدّْ عْلِيهْ بُولُسْ: «أَمَّا أَنَا رَانِي تّْوْلَدْتْ بِيهَا».

²⁹وْدِيكْ السَّاعَة بَعّْدُو عْلِيهْ هَادُوكْ اللِّي كَانُو غَيْحَقّْقُو مْعَاهْ. وْحْتَّى قَايْدْ الْقُيَّادْ دْ الْعَسْكَرْ خَافْ مْلِّي عَرْفُه رُومَانِي حِيتْ كَتّْفُه بْالسّْنَاسْلْ.

³⁰وْالْغَدّْ لِيهْ بْغَا قَايْدْ الْقُيَّادْ دْ الْعَسْكَرْ يْعْرَفْ الْحَقِيقَة، وْيْعْرَفْ بَاشْ كَيْتَّهْمُو لِيهُودْ بُولُسْ. وْحَلّْ لِيهْ السّْنَاسْلْ، وْآمْرْ الرُّؤَسَا دْ رْجَالْ الدِّينْ وْݣَاعْ الْمْسْؤُولِينْ فْالْمَجْلِسْ دْيَالْ لِيهُودْ بَاشْ يْتّْجَمْعُو، وْمْنْ بَعْدْ نَزّْلْ بُولُسْ وْوَقّْفُه قُدَّامْهُمْ.