Read Moroccan Standard Translation الْأَعْمَالْ 23 Bible Online

الْأَعْمَالْ 23 - Moroccan Standard Translation bible

الْأَعْمَالْ 23

¹الْفَصْلْ تْلَاتَة وْعْشْرِينْ وْشَافْ بُولُسْ مْزْيَانْ فْالْمَجْلِسْ وْݣَالْ: «آ الْخُوتْ، أَنَا عْشْتْ قُدَّامْ اللَّهْ بْضَمِيرْ نْقِي حْتَّى لْهَادْ النّْهَارْ».

²وْآمْرْ حَنَانْيَا اللِّي هُوَ رَئِيسْ رْجَالْ الدِّينْ، هَادُوكْ اللِّي وَاقْفِينْ مْعَاهْ بَاشْ يْضْرْبُو بُولُسْ عْلَى فُمُّه.

³وْهُوَ يْݣُولْ لِيهْ بُولُسْ: «غَيْضْرْبَكْ اللَّهْ آ هَادْ الْحِيطْ الْبْيَضْ! نْتَ ݣْلَسْتِي بَاشْ تْحَاكْمْنِي عْلَى حْسَابْ الشّْرَعْ، وْوَاخَّا هَكَّاكْ كَتْخَالْفْ الشّْرَعْ وْكَتْآمْرْهُمْ يْضْرْبُونِي؟»

⁴وْهُمَ يْݣُولُو اللِّي حَاضْرِينْ لْبُولُسْ: «وَاشْ كَتْسَبّْ رَئِيسْ رْجَالْ الدِّينْ دْيَالْ اللَّهْ!»

⁵وْرَدّْ عْلِيهُمْ بُولُسْ: «مَا كَنْتْشْ عَارْفْ آ الْخُوتْ بْلِّي هَادَا رَئِيسْ رْجَالْ الدِّينْ، حِيتْ كْتَابْ اللَّهْ كَيْݣُولْ: مَا تْݣُولْشْ كْلَامْ خَايْبْ عْلَى رَئِيسْ الشَّعْبْ دْيَالْكْ».

⁶وْمْلِّي عْرَفْ بُولُسْ بْلِّي شِي وْحْدِينْ مْنّْهُمْ مْنْ الصّْدُّوقِيِّينْ وْوْحْدِينْ خْرِينْ مْنْ الْفْرِّيسِيِّينْ، ݣَالْ بْصُوتْ عَالِي لْلنَّاسْ اللِّي فْالْمَجْلِسْ: «آ الْخُوتْ، أَنَا فْرِّيسِي وَلْدْ فْرِّيسِي. وْأَنَا دَابَا كَنْتّْحَاكْمْ حِيتْ عَنْدِي الرّْجَا بْلِّي الْمُوتَى غَادِي يْتّْبَعْتُو مْنْ الْمُوتْ».

⁷وْغِيرْ ݣَالْ هَادْ الْكْلَامْ، وْقَعْ الصّْدَاعْ بِينْ الْفْرِّيسِيِّينْ وْالصّْدُّوقِيِّينْ، وْتّْقَسْمُو النَّاسْ اللِّي فْالْمَجْلِسْ،

⁸حِيتْ الصّْدُّوقِيِّينْ مَا كَيْآمْنُوشْ بْلِّي الْمُوتَى غَادِي يْتّْبَعْتُو وْمَا كَيْآمْنُو لَا بْالْمَلَايْكَة وَلَا بْالرُّوحْ، وَلَكِنْ الْفْرِّيسِيِّينْ كَيْآمْنُو بْهَادْشِّي كُلُّه.

⁹وْتّْزَادْ الْغْوَاتْ، وْنَاضُو شِي عُلَمَا دْ الشّْرَعْ مْنْ الْفْرِّيسِيِّينْ وْبْدَاوْ كَيْعَارْضُو وْݣَالُو: «مَا لْقِينَا حْتَّى شِي دَنْبْ عْلَى هَادْ الرَّاجْلْ، يْمْكَنْ تّْكَلّْمْ مْعَاهْ شِي رُوحْ وْلَا شِي مَلَاكْ!»

¹⁰وْمْلِّي كْتَرْ الصّْدَاعْ، وْلَّى قَايْدْ الْقُيَّادْ دْ الْعَسْكَرْ خَايْفْ لَيْتّْكَرْفْصُو عْلَى بُولُسْ، وْهُوَ يْآمْرْ الْعَسْكَرْ بَاشْ يْنَزْلُو لْعَنْدْ بُولُسْ وْيْجِيبُوهْ مْنْ وَسْطْهُمْ، وْيْدِّيوْهْ لْلْقَشْلَة.

¹¹وْفْاللِّيلَة التَّانْيَة، وْقَفْ الرَّبّْ عْلَى بُولُسْ وْݣَالْ لِيهْ: «تْشَجّْعْ! كِمَا شْهَدْتِي لِيَّ فْأُورْشَلِيمْ، هَكَّا خَاصّْكْ تْشْهَدْ لِيَّ حْتَّى فْرُومَا».

¹²وْمْلِّي طْلَعْ الصّْبَاحْ تَّافْقُو شِي وْحْدِينْ مْنْ لِيهُودْ، وْحَلْفُو بْلِّي مَا غَيَاكْلُو وْلَا يْشَرْبُو حْتَّى يْقْتْلُو بُولُسْ.

¹³وْكَانُو هَادُوكْ اللِّي تَّافْقُو عْلِيهْ كْتَرْ مْنْ رْبْعِينْ وَاحْدْ.

¹⁴وْجَاوْ لْعَنْدْ الرُّؤَسَا دْ رْجَالْ الدِّينْ وْالشّْيُوخْ وْݣَالُو لِيهُمْ: «حْلَفْنَا مَا نْدُوقُو النّْعْمَة حْتَّى نْقْتْلُو بُولُسْ.

¹⁵وْدَابَا خَاصّْكُمْ نْتُمَ وْاللِّي مْسْؤُولِينْ عْلَى الْمَجْلِسْ تْطْلْبُو مْنْ قَايْدْ الْقُيَّادْ دْ الْعَسْكَرْ بَاشْ يْصِيفْطْ لِيكُمْ بُولُسْ، بْحَالْ إِلَا بْغِيتُو تْشُوفُو مْزْيَانْ فْالْقَضِيَّة دْيَالُه. وْحْنَا غَادِي نْكُونُو مُوجُودِينْ بَاشْ نْقْتْلُوهْ قْبَلْ مَا يْوْصَلْ».

¹⁶وْسْمَعْ وَلْدْ خْتْ بُولُسْ بْهَادْ الْحِيلَة، وْهُوَ يْمْشِي لْلْقَشْلَة وْدْخَلْ لْعَنْدْ بُولُسْ وْخَبّْرُه بْالْكْلَامْ اللِّي سْمَعْ.

¹⁷وْعَيّْطْ بُولُسْ عْلَى وَاحْدْ مْنْ الْقُيَّادْ دْ الْعَسْكَرْ وْݣَالْ لِيهْ: «دِّي هَادْ الشَّابْ لْعَنْدْ قَايْدْ الْقُيَّادْ دْ الْعَسْكَرْ حِيتْ عَنْدُه مَا يْݣُولْ لِيهْ».

¹⁸وْدَّاهْ الْقَايْدْ دْ الْعَسْكَرْ لْعَنْدْ قَايْدْ الْقُيَّادْ دْ الْعَسْكَرْ وْݣَالْ لِيهْ: «عَيّْطْ عْلِيَّ الْمْسْجُونْ بُولُسْ وْطْلَبْ مْنِّي بَاشْ نْجِيبْ هَادْ الشَّابْ لْعَنْدْكْ، حِيتْ عَنْدُه مَا يْݣُولْ لِيكْ»،

¹⁹وْهُوَ يْشْدُّه قَايْدْ الْقُيَّادْ دْ الْعَسْكَرْ مْنْ يْدُّه، وْبْقَى غِيرْ هُوَ وْيَّاهْ وْسْوّْلُه: «شْنُو بْغِيتِي تْݣُولْ لِيَّ؟»

²⁰وْرَدّْ عْلِيهْ: «رَاهْ تَّافْقُو لِيهُودْ بَاشْ يْدِيرُو السّْبَّة وْيْطْلْبُو مْنّْكْ تْخَرّْجْ لِيهُمْ بُولُسْ غْدَّا، وْتْجِيبُه لْلْمَجْلِسْ بْحَالْ إِلَا غَيْعَاوْدُو يْشُوفُو فْالْقَضِيَّة دْيَالُه.

²¹مَا خَاصّْكْشْ تِّيّْقْهُمْ، حِيتْ كْتَرْ مْنْ رْبْعِينْ رَاجْلْ مْنّْهُمْ مْخَبّْيِينْ كَيْتّْسْنَّاوْهْ، وْحَلْفُو مَا يَاكْلُو وَلَا يْشَرْبُو حْتَّى يْقْتْلُوهْ. وْرَاهُمْ دَابَا مُوجُودِينْ، وْكَيْتّْسْنَّاوْكْ تْوَافْقْ عْلَى كْلَامْهُمْ».

²²وْصِيفْطْ قَايْدْ الْقُيَّادْ دْ الْعَسْكَرْ الْوَلْدْ وْوْصَّاهْ وْݣَالْ لِيهْ: «مَا تْݣُولْ لْحْتَّى وَاحْدْ بْلِّي خَبّْرْتِينِي بْهَادْ الْكْلَامْ».

²³وْمْنْ بَعْدْ عَيّْطْ قَايْدْ الْقُيَّادْ دْ الْعَسْكَرْ عْلَى جُوجْ دْ الْقُيَّادْ دْ الْعَسْكَرْ، وْآمْرْهُمْ وْݣَالْ: «وَجّْدُو مْيَتَايْنْ عَسْكْرِي، وْسْبْعِينْ دْ الْخْيَّالَة وْمْيَتَايْنْ وَاحْدْ مْسَلّْحْ بْالْحَرْبَة، بَاشْ يْمْشِيوْ لْقَيْصَرِيَّة مْعَ التّْسْعُودْ دْ اللِّيلْ.

²⁴وْوَجّْدُو لْبُولُسْ الْخِيلْ بَاشْ يْوَصّْلُوهْ سَالْمْ لْعَنْدْ الْحَاكْمْ فِيلِكْسْ».

²⁵وْكْتَبْ قَايْدْ الْقُيَّادْ دْ الْعَسْكَرْ لْلْحَاكْمْ رِسَالَة كَيْݣُولْ لِيهْ فِيهَا:

²⁶«مْنْ كُلُودِيُوسْ لِيسِيَاسْ، لْسَعَادَةْ الْحَاكْمْ فِيلِكْسْ، تَحِيَّة وْسْلَامْ لِيكْ:

²⁷هَادْ الرَّاجْلْ شْدُّوهْ لِيهُودْ وْكَانُو غَادْيِينْ يْقْتْلُوهْ. وْمْلِّي عْرَفْتْ بْلِّي هُوَ رُومَانِي، صِيفْطْتْ دْغْيَا الْعَسْكَرْ دْيَالِي وْعْتَقْتُه.

²⁸وْحِيتْ بْغِيتْ نْعْرَفْ بَاشْ كَيْتَّهْمُوهْ، دِّيتُه لْلْمَجْلِسْ دْيَالْهُمْ،

²⁹وْبَانْ لِيَّ بْلِّي كَيْتَّهْمُوهْ بْشِي حَاجَة كَتْمَسّْ الشّْرَعْ دْيَالْهُمْ، وَلَكِنْ مَا لْقِيتْ عْلِيهْ حْتَّى شِي حَاجَة اللِّي كَيْسْتَاهْلْ عْلِيهَا الْمُوتْ وْلَا الْحَبْسْ.

³⁰وْمْنْ بَعْدْ سْمَعْتْ بْلِّي شِي يْهُودْ تَّافْقُو بَاشْ يْدِيرُو شِي حَاجَة ضْدُّه، وْدِيكْ السَّاعَة صِيفْطْتُه لِيكْ، وْݣْلْتْ لْهَادُوكْ اللِّي مْخَاصْمِينْ مْعَاهْ بَاشْ يْرَفْعُو الدَّعْوَة دْيَالْهُمْ لْعَنْدْكْ».

³¹وْدَارُو الْعْسَاكْرِيَّة دَاكْشِّي اللِّي آمْرْهُمْ بِيهْ قَايْدْ الْقُيَّادْ دْ الْعَسْكَرْ، وْفْدِيكْ اللِّيلَة دَّاوْ بُولُسْ لْمْدِينْةْ أَنْتِيبَاتْرِيسْ.

³²وْالْغَدّْ لِيهْ رْجْعُو الْعْسَاكْرِيَّة لْلْقَشْلَة وْخْلَّاوْ الْخْيَّالَة يْكَمّْلُو السّْفَرْ دْيَالْهُمْ مْعَاهْ.

³³وْمْلِّي وْصْلُو الْخْيَّالَة لْقَيْصَرِيَّة، عْطَاوْ الرِّسَالَة لْلْحَاكْمْ وْدَخّْلُو لِيهْ بُولُسْ حْتَّى هُوَ.

³⁴وْقْرَاهَا الْحَاكْمْ وْسْوّْلْ بُولُسْ عْلَى الْبْلَادْ اللِّي تّْزَادْ فِيهَا، وْمْلِّي عْرَفْ بْلِّي هُوَ مْنْ كِيلِيكِيَّة،

³⁵ݣَالْ لِيهْ: «غَادِي نْسْمَعْ لْكْلَامْكْ مْلِّي يْوَصْلُو هَادُوكْ اللِّي مْتَّهْمِينْكْ». وْآمْرْ الْعَسْكَرْ دْيَالُه بَاشْ يْعَسُّو عْلَى بُولُسْ فْقْصَرْ هِيرُودُسْ.